تزاعلنا والسبة هالموضوع

السلام عليكم
بنات اني تزاعلت مع خطيبي لأنه قهرني وكل ما في الموضوع بدا بنقاش عابر
صراحة هو يعرفني إني ما أحب ينفتح هالموضوع لأنه بينرفزني
وهو موضوع الزواج من ثانية ( تعدد الزوجات ) ايش قال هذا شرع وحكم الله
ومو على كيفك انتي ولما أقول له طيب لازم يكون هناك سبب ما يصير منو الطريق
يروح الواحد يتزوج يعني مثلاً زوجته ما تجيب عيال أو يعني هي مو تمام ما يصير
من دون سبب يطقها بوحدة وخلاص وهو حضرته يقول انتي وش دراك ما فيه
سبب ،، يعني يمكن مثل واحد ما تكفيه وحدة !! واحد قصده شهواني يعني<<
عاد اني شوي شوي حسيته قاعد يقهرني وصرت أقول له واني معصبة ليش كلا
هالنظرة للمرأة وكأنها سلعة يعني المرى ما ياخذونها الا لهالشي
وبعدين تحولنا إلى إذا واحد ماتت زوجته طبعاً أني افهم واتفهم وما عندي اي اعتراض
بس بعد ما يصير الرجال يروح يتزوج وتوها مرته متوفية وما صار لها شي
وكلما قلت له على الأقل يصبر ووين الحياة اللي عاشتها وياه وجدي ولازم يحس
ويقدر مو بهالسهولة ينساها قام يسألني أسئلة استفزازية :
يعني انتي مو حزينة عشان النبي (ص) ؟
اقول له بلى
يقول ما تزوجتي ؟
وسألني كم المدة تبينه ينتظر ؟
عاد أني قلت له كلش كلش على الاقل 6 اشهر
الا يقول وهو يظل طول هالفترة بلا زواج ؟ وحاجاته ؟ واي احسن يرتكب حرام او يتزوج!!
عاد أني فقعت وقلت له يعني أني إذا مت بتروح تتزوج عليي سيدا وابتسم وقال هذا
مو موضوعنا
وما شفته الا اخذ روحه بيطلع من البيت بشكل يا زعم ودي وأني اكره عليي
لما نختلف في نقاش يتصكر بهالشكل يعني يا يكون حل وسط او على الاقل نغير الموضوع
ما احب آخر ما يروح عني نكون مختلفين حتى لو كان راي
عشان كذا ما خليته يطلع وطلبت منه يقعد معاي شوي على انه ما قعدت معاه زين
الا ما اشوفه الا يقول يبي يروح وبكرة دوام وانتي وش فيك يعني كل مرة اقعد مع اهلك
ما تحسبيها قعدة ولازم تقدرين وما ادري شنو واويلاه مو قصدي ترى !!
عاد اني عصبت وقلت له ما في طلعة كيفي وشوي ما ادري وش صار فيني وقعدت
اصييح بحرارة وقلت اخذ المفتاح وقوم اطلع هو متعود عليي اني اوصله للباب واودعه
كل مرة لانه
عاد هو ما قصر قعدت ويايي وحاول يهديني وحضني بس من دون ما يبرر ولا شي
يعني ما قال آسف ولا شرح الموضوع وكلما اصييح يقول ليي تكلمي زفيني لا تسكتين
اني ما قلت له وش يدور ببالي وخليته يطلع وقلت له اني ماني زعلانة عليه
بس والله كلامه حز فيني وكان خاطري إذا يزعلني يتكلم وهو أكثر شي كذا ما يتكلم
وينتظرني اني اللي دايما اتكلم
أني ادري انه يحبني واني هم بعد احبه بس أني كلش اختلف وياه في هالأشياء
أني تهمني المشاعر وأتعامل بعواطف وأكتب خواطر وهو بالعكس ساعات أشوفه واجد
رسمي
قولوا ليي شاسوي معاه
كلما ينفتح هالموضوع احسه ينرفزني وهذه اول مرة توصل إلى الصياح
لا تقولون مجرد موضوع ولا يهمك أني كلما قال ليي جدي أحس اني ما ليي قيمة
واتخيل اني بس اموت ما يصير شوي على موتي الا ويروح يتزوج