توني نزلت الصينيه من الفرن وهي حاره تعالو شوفوها

مرحبا بنات
اليوم جاي على بالي أسوي سينابون لعيالي يموتون فيها وأول مانزلته من الفرن قلت لازم اصوره لكم شوفو كيف صورته وهو في الصينيه
وهنا لما قطعته وسامحونا على الحوسه لأن عيالي الله يحفظهم قاعدين على راسي مستنيين السينابون
هاه أيش رايكم ؟؟؟؟
والله يابنات انه لذيذ وهش من بره وطري من جوه
كل من ذاقه على طول يسأل مين اللي سوواه ؟ وربي كثير عجبهم وأخذو طريقته مني وشكروني
جربوه تراه يواجه وبقوه يكفي أن مقاديره مظبوطه 100% واحلى شي فيه أنه لو تركتيه 3 ساعات بدون حتى ماتغطيه ماينشف أبد ويبقى طري
الطريقه :
مقادير العجينه : (العجينه الذهبيه للأخت شذى في منتدى ثاني الله يوفقها يارب )
كوبين ونصف دقيق أبيض كويتي
م ك خميره فوريه
م ك بيكنج بودر
3 م ك سكر
ربع الكوب زيت
نصف كوب لبن المراعي
علبة زبادي
وبس (ماتحتاج مويه أبدا )
اعجني المقادير السابقه زين (ويفضل بالعجانه الكهربائيه ) لين تصير معك عجينه لينه
غطيها بكيس نصف ساعه أو لين تنتفخ العجينه
وخذي العجينه كلها وافرديها كلها (مو مره تخلينها خفيفه خليها متينه شوي) وبعدين أدهنيها بزبده سايحه
بعدين رشي عليها السكر البودره ثم القرفه المطحونه ثم الكاكاو البودره (نسكويك اللي علبته صفرا لازم)
ولفي العجينه مثل السويسرول وقطعيها وحطيها بصينيه مدهونه بشوي زيت ودخليها الفرن تاخذ لها ربع ساعه على نار هاديه بعدين حمريها من فوق شوي بس وطلعيها على طول وحطي عليها الصوص
مقادير الصوص :
اربع حبات جبن كيري مع حليب نستله في الخلاط
+
هيرشي شوكولاته السايل
صبي الصوص الابيض على السينابون وفوقه على طول اعصري شوكولاته هيرشي
واخيرا
مكسرات عين الجمل مجروشه
وسلامتكمأخواتي ترى نفس موضوعي مكتوب في منتدى ثاني لاتستغربون انا اللي نزلته لعيونكم