جدول تنظيف يومي اسبوعي شهري

بسم الله الرحمن الرحيم
السلام عليكم ورحمة الله وبركاته
كيف حالكم يالغاليات ....
وفيت بوعدي لكم وكاني نزلت الجدول الخاص بالتنظيف والترتيب والنظام .....
بدايتا احب اني افيد بعض الربات
اني اقول لكم ان جدول التنظيف الي نظامه
كل يوم تمسكين غرفه وتنظفيها فاشله فاشله فاشله
والسبب معروف انك تمسكين غرفه وحده وتحطين حيلك فيها
وباقي البيت دمار شامل
الصحيان بدري مهم جدا
ما تصحين من وقت ما في فايده بيضيع اليوم وانتي ليلحين بالمطبخ ما خلصتي
شي ولا بعد مقصره بواجباتك مع عيالك وزوجك
الي عندها عيال صغار وتسهر معاهم ان كان تحت سن السنه
فصعب انك تنظمين نومهم فأنصحك تنظمين وقت التنظيف وتخلصين امورك
بالليل وانتي سهرانه مع طفلك او طفلتك
الي عندها عيال فوق السنه لا تقولين ما ينام الليل
لا والله القصور منك وسامحيني على صراحتي
انا عيالي وهم ثمان شهور ما شاء الله ينامون الساعه 7 ونص
ويقعدون معاي الساعه 5 الفجر
والى الحين هذا نظامهم
لما الام تنسدح وتغير عادتها بالنوم
الطفل ما عنده شغل الا يلحق امه ويلتصق فيها
اصبري وبتشوفين ان راحو بسابع نومه كل شي يبي له صبر
صحيهم من الصباح واشغليهم طول اليوم والليل بتشوفينهم من الساعه
سبع خلاص ما فيهم انهم يقعدون اكثر
وزوجك له حق ان يلاقيك بالليل جاهزه له
بدون عيالك كل شي المفروض تعطينه حقه
خواتي ابتدأ معكم بالفتره الصباحيه ....
اصحى من النوم الساعه 5 الفجر اصلي واصحي عيالي يصلون بعد ..
بعدها عيالي يتوجهون لغرفهم يبدلون ثيابهم
وانا اتوكل على الله ثم ادخل المطبخ
احضر لهم الفطور وايضا اجهز لهم السندويشات للمدرسه
خواتي بالنسبه للفطور كيف اجهزه
انا عندي علب بلاستيكيه الي بالغطا يعني
عندي جبن بعلبه
وعندي زيتون ايضا بعلبه
افتحهم واخليهم على الطاوله وبعد ما يخلصون اغطيه وارجعه للثلاجه
وكل ما يخلص اغسل العلب واعيد تعبئته مره ثانيه
وايضا اقدم المربي
وأغلي بيض مفيوح من الليل واخليه بالثلاجه
وممكن تاكلونه لمدة يومين ما يخترب اهم شي انكم ما تقشرونه
يعني اغليه واحتفظي فيه جاهز بسله خاصه بالثلاجه
ولا تنسون السندويشات وخلاص هذا الفطور جاهز كل يوم الصباح
احيانا اسوي لهم شاي بالحليب
واحيانا عصير برتقال طازج او معلب
احب اني انوه لبعض ربات البيوت
خواتي عند اختيار العصاير لأطفالكم او لكم
دائما اختارو العلب الي مكتوب عليها عصير او نكتار
ولا تختاري العلب الي مكتوب عليه مشروب لأنه يحتفظ فقط بالنكهه ومواد حافظه
يعني ما راح ينفع عيالكم بشئ
بالنسبه للسندويشات الي احضرها للمدرسه
أقلي لهم بالليل جيكن نكت او سجق او اسوي بيض مقلي جاهز او همبرجر واحطه بعلبه بلاستيكيه
والصباح اسخنه بالميكوريف وبعدين احطه بالسندويش واحطه بالمكينه علشان يصير مثل الكفتيريا
وبس هذا هو الفطور الصباحي
ولا انسى اني اطلع دجاج او لحم او أي شي عندي موجود بجدول الأكل علشان يذوب الثلج ويكون جاهز
لما ابي اطبخ
بعدها نتوجه للمدرسه ..
بعد ما اوديهم المدرسه اتلاقى مع جارتي بالممشى عند البحر
ونمشي لمدة ساعه كامله ههه ليلحين عندنا امل ان ننحف
بس في تطور الحمدلله
على الساعه 8 اكون موجوده بالبيت اخذ شور والبس واتعطر واصحي
ابو الشباب يتوجه للعمل بعد ما يجهز روحه ويفطر وبهذا الوقت ما اشغل
روحي بشي الا فيه يعني اسولف معه حتى لو كان مشغول ويلبس ...
وأودعه وأوصله الى الباب ...
وبهذا الوقت تكون الساعه 45: 8
اخذ ربع ساعه اسوي لي كوفي واجلس على النت وادخل المنتدى واشوف المواضيع
او ارد على مواضيعي ..
بعدها أخذ سلتي ( سلة التنظيفات )
أبتدي التنظيف
أحب اني اذكر
أن انا بيتي طابقين فأبتدي أول شي بالطابق الأول الأرضي
بما ان الوحده ما تعرف متى راح يجيها ناس او زياره
وانا ما شاء الله جاراتي عادي يدرعمون علي بأي وقت ههه وانا بعد اسوي
لهم هالشي
فأبتدي التنظيف بالقاعه
أول شي أنظف التحف والمكتبه والطاولات بالريشه
وان كان يحتاج لتلميع فألمعه بالملمع
وان كان عندي المرايا فيها اثار المعها بلمع الزجاج
وما انسى المدخل ايضا امرر الريشه على كل مكان
وبكذا انتهيت من الغبار
ملاحظه مع تكرار هالعمليه بشكل يومي ما راح يتراكم عليك
الغبار على قطع الأثاث او التحف
بالنسبه للقاعه ما عندي فيها أي مكان للتخزين
والسبب ان كل شخص فينا اغراضه موجوده بغرفته
وعيالي ممنوع عليهم جلب اللعب او الاغراض الي تخص المدرسه
لأي مكان بالبيت الا غرفهم
فالقاعه كلها كنب وطاولات وابجورات وتحف وتلفزيون وبس
عموما حبيت اني اقول لكم اني ما اكنس البيت الا لما اخلص من كل الغرف
ثانيا ...
بعدها ادخل غرفة الطعام انظف والمع الطاوله وارتب الكراسي
وامرر ريشتي على كل التحف الي موجوده فيه
واطلع من الغرفه ..
ثالثا ....
عندي مجلس الرجال ما انظفه لأنه مسكر للضيوف
عندي مجلس النساء الخاص للمناسبات الي تصير فيها جمعه وايضا مسكر
( بما ان المجالس للزيارات الخاصه والعزومات فراح يكون اكيد عندي خبر بالموعد المحدد
للزياره فقبل الموعد بيوم ازيل الشراشف من على الكنب الموجود بالمجالس والمع الأثاث والطاولات
وبما ان الباب كان مسكر بالغرفه ومحد يستعمله فكل شي نظيف مجرد لمسات بسيطه وكل شي
يلمع وما انسى اني ابخر المجالس وارش عطر المفارش على الستائر )
اما اذا وحده وله ثنتين زاروني استقبلهم بالقاعه
يعني على حسب الميانه الي بيني وبينهم
المطبخ راح اخليه الى ما اخلص كل البيت
المخزن عرفتين مداخلين ببعض وهذا بالملحق عرفة كانت للخادمه سابقا
وغرفه للمخزن فيها كل شي على رفوف زي السوبرماركتات بصراحه
قبل كان عندي رفوف عاديه ودواليب قديمه من المفروشات الي كانو عندي قبل ما اغير البيت
واغير الاثاث
ولكن بعد فتره حبيت اني ازبط المكان علشان يسهل علي التخزين
فرحت للمحلات الي تزود بالرفوف الخاصه للسوبرماركتات
والي عندها مخزن وحابه تزبطه ممكن اعطيها العنوان الي تعاملت معه
اما بنات السعوديه فعندهم ايكيا عندهم رفوف شكلها حلو وجذاب
للتخزين وعلب انواع واحجام واشكال عديده تصلح ليلي تسكن بشقه
التخزين يا بنات هو سر الترتيب بكل بيت
ان عرفتي كل تخزنين بشكل مرتب وحلو
راح تلاقين دائما بيتك مرتب ويفتح النفس ومو مكركب
الاستغناء عن الاشياء الي ما تبينها بين فتره والثانيه افضل
من تجميعها من غير فائده ...
وقت شرائك للأشياء الجديده سواء اثاث او أي شي ثاني من التحف او
الاشياء الي تاخذ حيز بالبيت فكري قبل الشراء وين راح تخلينه وتخصصين له
مكان يسهل استخدامه او و
متى انظف المخزن وارتبه
بصراحه تنظيف المخزن اسهل لما يكون بنهاية الشهر
لما يفضى من العلب والاشياء الغذائيه من الرفوف
ابتدي بالتنظيف على الرفوف واسفله وامسحه بالديتول
وارتب كل شي بمكانه علشان لما اشتري اغراض لبدايه الشهر
يكون المكان جاهز للتفريز ...
أما الحمامات كرمكم الله
عندي بالقاعه
1 بالملحق
1 بالمجلس الرجال
1 بمجلس النساء
حمامات المجالس انظفهم مره وحده بالاسبوع يكفي لأن استخدامهم
شبه معدوم وراح تعرفون كيف انظف الحمام بعدين بنفس الموضوع
اما حمامات القاعه والملحق فأرش يوميا وبقول لكم كيف انظفهم
اما الغسيل الكامل للحمام فيوم واحد يكفي بالاسبوع ...
وقت ما اخلص كل شي بالطابق الارضي
اشغل المكنسه واكنس كل مكان بشكل سريع
هذا بالنسبه للطابق الأرضي انتهيت منه
ترا الكلام كثير لكن التطبيق سهل وروتيني
واكثر الاماكن الي تكلمت عنها ما انظفها كل يوم مثل ما ذكرت فوق
يعني كل شي ما ياخذ مني ساعه وحده بس من وقتي
الطابق الثاني ........
غرفة نومي
ادخل الغرفه أول شي اسويه اني ارتب السرير
لأن اول ما ارتب السرير احس براحه نفسيه واقدر اني اكمل باقي
الترتيبات بالغرفه
عندي سلة التنظيف
اخذ كيس نظيف اغير سلة المهملات ( هذي السله خاصه ما نحط فيه الا الاوراق او الكلينكس او
العلب الفاضيه من الكريمات وما نحط فيها بقايا اكل او غيره من السوائل )
ممنوع الأكل بالغرف يا دوب ناخذ معنا مياه معدنيه للاستعمال الواحد فقط
احب اني اضيف شي ان بعض علب المياه المعدنيه تكون مستعمله الى النص فقط
فحرام اني اقطهم ايش اسوي فيهم ( استخدمه للكوايه ) لأن الكوايه لازم تحطين فيه
ماء حلو مو ماء العادي ....
المهم نرجع لتغير الكيس
اخذ الكيس المستعمل واحطه بسلة التنظيفات علشان لما انزل تحت
ما انساه اني اقطه بسلة المهملات الكبيره بالمطبخ
بعدها اخذ ريشتي وامررها على الأثاث سواء ميز التواليت وايضا
الديكور الي موجود فوق السرير وايضا الكوميدينو
وكل مكان
بالنسبه للميز التواليت انا مخليه عليه علبه شكلها حلو وماشي مع لون غرفتي
العلبه الي عندي من الخشب فاضيه لما زوجي يرجع من العمل يحط فيه
محفظته وقلمه وساعته ومفتاحه علشان يسهل عملية الترتيب وايضا
ما يزهقني وهو يدور على اغراضه ...
بالنسبه للدواليب الملابس ..
غرفتي فيها مدخل آخر نتوجه فيه الى الدواليب الخاصه بالملابس
بما معنى غرفه خاصه للملابس في بعضها بأبواب وبعضها رفوف بدون ابواب
وايضا دواليب خاصه للمفارش والاغطيه والشراشف
ودواليب خاصه للملابس الداخليه والشرابات
ولزوجي علاقات خاصه للسيور و الكربطات او التاي مثل ما يقولون البعض
وبما ان زوجي ما يلبس اثواب فقط بدلات رسميه للعمل
كل بدله معلقته فوق تحتها معلقه بنطلونه
اما القمصان معلقه لحالهم وانا كل ليله اجهز له بدله مع التاي ومع ما يناسبه من القمصان
واخذ الحذاء الي يناسب لونه مع البدله والمعها واجهزه للصباح ( احس اني اشتغل بالعسكريه )
خواتي انا زوجي يعمل من الصباح الى الظهر وبعد الظهر
له مكتبه الخاص فيه يفتحه العصر ..
وبما انه يتعب طول اليوم
ما احب اني اطلب منه مساعده
واحس ان الي قاعد يسويه يكفي وما ابي ازيد عليه
المهم نرجع لموضوع غرفتي بعد ما اخذ لفه سريعه على الدواليب وارتب
على السريع ادخل حمامي كرمكم الله الخاص بالغرفه ...
عندي بالحمام مفارش الي يجي طقم كل يومين اغيره
المهم عندي بخاخ الي تكلمت لكم عنه كيف تسونه
ارش على المغسله و والمرافق الخاصه
وادعك بالفرشاه الخاصه بشكل سريع وانتهي
ما اغسل الحمام بشكل يومي بس هذي الطريقه دائما حمامك نظيف ومرتب
وريحته منعشه ونفس الوقت البخاخ الي عندك يعقم كل شي
اما التنظيف الكامل للحمام فيكفي يوم واحد بالاسبوع
من الجدران الى الأرضيه وايضا كل الديكورات
كيف انظف الحمام
أشغل الماء الحار واسكر الباب
فيتكون البخار بكل الحمام
بعدها ادخل الحمام واسكر الماء
وارش البخاخ على كل جزء من الجدار وامسح بالفوطه
بهذي الطريقه يسهل عليك بتكون البخار بالحمام بأزالة الاوساخ المرئيه او الغير المرئيه
بما ان يوم الجمعه يوم مخصص للعائله نروح نتغدا عندهم
فما يكون عندي اعداد وجبه الغداء فأنتهز الفرصه لغسل الحمامات لجميع المنزل
الغرفه الثانيه غرفة عيالي
ارتب سرير كل واحد منهم
اشيل ثيابهم واحطه بسلة الغسيل
وهذي السله اشيلها معي من غرفتي الى غرفة عيالي
لأن بعدها اخذه معي الى الطابق الارضي لغرفة الغسيل
وبما ان ما في العاب مو موجود بمكانه لأن قبل ما ينامون
لازم يرتبون كل اغراضهم كل شي مكانه
كل واحد له ثلاث دروج خاصه فيهم
درج للاوراق ومذكراتهم الي يكتبونها لاني اهديتهم كل واحد دفتر مذكرات
واقلام خاصه للتلوين وايضا استيكرات خاصه لتزين الدفتر
واقراهم بين فتره والثانيه واكتشف الجديد عندهم سواء بالمدرسه او مع اصحابهم
طبعا هم يقفلون المذكره بالمفتاح ههه اكيد عرفتو النوعيه هذي من الدفاتر
وبما انهم يقفلونه بالمفتاح فلهم الحريه بكتابة كل ما يحبون يكتبونه بدون ما ينحرجون من شي
وانا عندي نسخه من هالمفتاح بدون علمهم ( آسفه ولكن للضروره أحكام )
ودرج خاص عندهم للعب الصغيره والكروت بعلبه خاصه لهم
ودرج فيه اقلام للمدارس وكل شي يخص المدرسه من كتب ودفاتر
اما الملابس ..........
فلهم ايضا غرفه خاصه بالملابس بنفس غرفتهم مثل طريقة غرفتي
وبما ان عندي ولد وبنت حبيت اني اخصص لكل واحد مكان لتبديل الملابس
وانتو عارفين ليه ...
بالنسبه لبنتي متعوده انها تاخذ ثيابها وتلبس ببيتها
بيتها من الخشب موجود بغرفتها
كنت اتمنى ان يكون عندي بيت من هالنوعيه لما كنت صغيره
وما تحقق حلمي وقلت لزوجي ان نفصل لها بيت من الخشب
يتكون من غرفه وحده وايضا فصلت لها كنب على قدها
وحطيت لها طاوله صغيره وايضا ابجوره وبصراحه تقدر تقعد هناك لساعات
تلعب وتتكلم مع روحها ههه
لا وازيدكم من الشعر بيت البيت له جرس والباب ينقفل من الداخل
فتاخذ حريتها ان تبدل ثيابها داخل بيتها
اما ولدي فدائما يبدل ثيابه بالحمام كرمكم الله ..
ما انسى اني اغير كيس سلة المهملات ..
وامرر ريشتي بكل مكان بالغرفه
وقبل ما اطلع من الغرفه اطلع لكل واحد لبس نظيف
واحطه على سريره علشان لما يرجعون من المدرسه يكون كل شي جاهز لهم
وما يحوسون لي الدواليب ما احب انهم يختارون لهم لبس
يكفي انهم يختارون ملابسهم وقت شراء الملابس الجديده
بالنسبه للملابس الجديده
انا احب اني اشتري كل 6 شهور لهم ملابس
يعني كل 6 شهور اشتري لهم بيجامات عدد 4 لكل واحد
وايضا عدد 4 ملابس طلعات لكل واحد
وعدد7 من الملابس الداخليه لكل واحد
اما المناسبات فهذا على حسب المناسبه اطلع اشتري بوقت المناسب للمناسبه
سواء اذا عيد او حفلة زواج او ....
وبالنسبه للأحذيه عندهم بالدواليب المفتوحه مجموعه من الاحذيه
اهم شي يكون عندهم اللون الاسود لأنه رسمي ويناسب كل شي
وباقي الاحذيه الرياضيه او النعل مجموعه منهم
واحذيه خاصه للمدارس
بالنسبه لعيالي اول ما يدخلون البيت يشيلون حذائهم ويودونه
غرفتهم ويخلونه مكانه
ما احب ان يكون عند المدخل أي حذاء الا نعال واحد فقط لكل واحد فينا
على رف مرتب
والصباح ايضا ياخذون الحذاء ويودونه معهم تحت ويحطونه عند المدخل
علشان يلبسونه للمدرسه او لطلعاتنا ...
واجهت البيت والمدخل لازم يكون دائما مرتبا وهذا يدل على نظامك وترتيبك
بعد ما اخلص كل شي ادخل حمامهم الخاص وارتب كل شي واسوي نفس العمليه
الي سويتها لحمام غرفتي
هذا بالنسبه لغرف النوم
الطابق الثاني ايضا عندي ثلاث غرف
وحده منهم غرفة نوم للضيوف خاص بأهلي اذا جو من السفر ويباتون عندي
فتكون مسكره وما احتاج انظفها الا وقت الزياره لأن ما نستعملها لأي غرض ثاني
الغرفه الثانيه صغيره نوعا ما مخصص لي ولزوجي وهي غرفة المساج
عملت الديكور وفرشتها بالاحمر ولسه نستعملها بالاسبوع مره وحده وقت اجازه الويك اند
وبعد ما ننتهي من الغرفه انظفها اليوم الثاني واقفلها وما احب عيالي يدخلونها
لان فيها اشياء مو المفروض الاطفال يشوفونها لأن بينهالون علي بأسئله انا مو قدها
فأقفلها واحتفظ بالمفتاح بعيد عنهم ..
الغرفه الثالثه ....
غرفة المكتبه
فيها مكتب زوجي
وباقي الغرفه كلها رفوف من يبدأ من فوق الى تحت مليانه كتب ومراجع
والكثير الكثير من الروايات الخاصه الي احب اني احتفظ فيها
وكل الاوراق الرسميه وغيرها من الفواتير و
هذي الغرفه ايضا انظفها يوميا
لان الكتب والمساحات كلها من الخشب والساج
فتلميعها بشكل يومي وتنظيفها ضروري ..
خلاص انتهيت من الطابق الثاني
اشغل المكنسه ونفس الطريقه اخلص بسرعه بسرعه
هذا بالنسبه للطابق الأعلى ..........
بعدها انزل بسلتي ( والله لو هالسله تتكلم كان قالت انا خلاص بهج من البيت )
الساعه الآن 10:30
شفتو كيف خلصت بساعه ونص طابقين ما شاء الله علي ههه
الي عندها شقه والله تقدر تضبط روحها بنص ساعه انا كنت ساكنه بشقه
لمدة سبع سنين التنظيف ما كان ياخذ مني وقت ولكن الترتيب والتخزين
بشقه صغيره هو الي يخلي الوحده تتعب بالترتيب والكركبه كل اشوي مع الاطفال
شي متعب ...
بصراحه ما ادخل المطبخ على طول بعد ما اخلص
ارجع للمنتدى مره ثانيه ههه
واقعد اشرب كوفي واشوف المواضيع
والود ودي ان الوقت يوقف ههه
الساعه 11 ادخل المطبخ
كل شي نظيف لكن سلتي تنتظرني هناك
اطلع الاكياس الي غيرتهم من الغرف واقطهم بالسله الكبيره ( الزباله كرمكم الله )
واخذ السله وخلاص اوديها مكانها
البس القفازات وابتدي اطبخ ووقت الطبخ اتفرج على التلفزيون
واضيع وقتي بمسح الطاولات واسوي السلطه
ارتب الاغراض بالدروج اعدل شكل الصحون والملاعق الي مطلعتهم من غسالة الصحون
وما احس اني قاعده اشتغل لان التلفزيون يسليني وقت الشغل بالمطبخ
وبما ان عيالي اجيبهم على الساعه 1:10 الظهر ففي وقت ان يجهز الاكل على راحته
ان كان اذن اروح اصلي
وارجع للمنتدى مره ثانيه ههه
ربع ساعه بس ههه
ارجع المطبخ واشوف الأكل ان كان خلاص جهز فخلاص اطفي عليه
اروح اخذ شور سريع بس للجسم
البس واجيب عيالي
كل واحد ياخذ شنطته وجزمته وانتو بكرامه وعلى غرفتهم
ينزلون واحط لهم الاكل على طاولة المطبخ أفضل علشان ما اقعد انظف غرفة الطعام مليون
مره باليوم ..
يخلصون الاكل وانا احط الصحون وكل شي بالغساله بس ما اشغلها بقول لكم ليش
لان غسالتي تاخذ كميه كبيره
فأستنى العشاء وقبل ما انام اليل اشغلها واليوم الثاني كل شي نظيف وجاهز
ووقت ما احضر للغداء لليوم الثاني نفس الوقت اطلع الصحون وارتبهم بالدواليب الخاصه فيهم
وبما ان عندي كميه كبيره من الصحون والملاعق فما راح يقصرني شي لما ابي اقدم لهم وجبه العشاء
( زوجي يحب يروح يشتري صحون وكاسات عن جد فيهم وراثه عائلته كلهم يحبون تجميع الصحون
ناس يجمعون طوابع وانا زوجي يشتري لي صحون وغيره من الاشياء الي تخص المطبخ )
المهم امسح طاولة الاكل الي بالمطبخ وامسح باقي الرخام على الدواليب والمغسله ارشها من البخاخ الي
سبق قلت لكم كيف اسويه وانظف بشكل سريع الفرن
على فكره تنظيفي للفرن القصدير او الالمنيو الي موجود على الفرن ما اغيره الا بالاسبوع مره وحده بس
وباقي الايام امسح على القصدير ببام مزيل الدهون العجيب وامسح بفوطه نظيفه وبهذا الشكل يكون عندي الفرن
نظيف كل يوم .....
خلصت من المطبخ اسوي لي شاي بالاعشاب للتنحيف ههه
عيالي مستانسين على التلفزيون
انا اروح اشوف اخبار المنتدى الين ما اخلص الشاي يعني شي عشر دقايق على السريع
طبعا الكمبيوتر شغال على التلفزيون من الصباح الين ما انام ههه
اروح اول شي امسك بنتي حبيبتي واخلي ولدي يتفرج على التلفزيون اودي بنتي فوق
بغرفتها واقعد ادرسها واخليها تحل كل واجباتها واقعد احظر لها الدروس الي ما عطوها لسه
علشان لما يعطونها الدرس يكون عندها فكره عن الموضوع
وخلاص اقعد معها الين ما تنتهي ....
أفراج
الحين دور الأخ الكبير ولدي البكر
اسوي معه نفس الطريقه الي سويتها مع بنتي
أفراج
طبعا بهذا الوقت يكونون خلاص ما صدقو يخلصون مني
يروحون يلونون بدفاتر التلوين او يتفرجون على التلفزيون
انا ادخل غرفتي أقرأ قرآن نص ساعه او اكثر اشوي ( على الأقل جزء كل يوم
علشان نهاية الشهر اكون خاتمه القرآن من كل شهر ) وبهذي الطريقه اختم القرأن 12 مره كل سنه
بعدها اطلع اروح المطبخ اخذ معي عصير وبسكوت او كيك
واطلع أي شي موجود على جدول العشا علشان يذوب الثلج
وانادي عيالي نروح نقعد برا بالحديقه هم ياكلون ويسولفون وانا اسقي الزرع
اخلص اقعد معهم اشوف وش يبون يسون
احيانا نقعد نلون واحيانا نقعد نلعب
اكثر شي نلعب لعبة الحيه الي معها النرد
بعدها اخلي كل واحد ياخذ شور كامل ونفس الوقت اطلع لكل واحد بيجاما نظيفه اخليه على السرير
وانا ابتدي اطبخ اخلص كل شي واطلع وما انسى موضوع الفطور لليوم الثاني للمدرسه اسويه
واحطه بالبوكس البلاستيك واسكر عليه عدل وادخله الثلاجه
اخذ شور سريع للجسم بس البس اتعطر مكياج لان بهذا الوقت احب اتمكيج اكثر من
الاوقات الثانيه لان لما اتمكيج العصر لازم اغسله للصلاة كل اشوي اما بالليل فعندي الوقت اطول
اتمكيج واقعد مع زوجي ..
اقعد بالقاعه اتفرج على التلفزيون
الين ما يجي زوجي من العمل
اقدم لهم العشا وانظف المكان والمطبخ مثل ما سويت وقت الغدا
اشغل غسالة الصحون
ما ادخل المطبخ خلاص الى يوم الثاني
عيالي الساعه 7:30 سواء مدارس او اجازه لازم ينامون
عودتهم على كذا من كان عمرهم سنه ماشين على هالطريقه
زوجي هالوقت زي الملهوف على التلفزيون وقلما يقعد على الكمبيوتر
انا بهذا الوقت اروح فوق أبدل ثيابي البس ثياب النوم بما ان عيالي نايمين
فأخذ راحتي بالبس الي ابيه ....
انزل اقعد معه نسولف و
ونفس الوقت اسوي شاي وقهوه ونقعد انتسامر الين الساعه عشر تقريبا
خلاص هذا وقت نومه ادخل معه الغرفه احيانا انا ما فيني نوم
فأنزل بعد ما اتأكد انه نام خلاص ..
اقعد اتفرج على التلفزيون او ادخل المنتدى ..
وبس اروح انام ....
حتى لو نمت متأخر ما احاول اني اغير بالجدول سهري ومتعتي بالتسليه سواء
بالمنتدى او بمتابعه البرامج ما اخليها تأثر على واجباتي اليوميه تجاه بيتي
احيانا اكون تعبانه من السهر واقوم انظف واقول لنفسي تستاهلين علشان ت