جربوا عجينتي لكل شيء يا بنات الكل سأل عن طريقتها

جربوا عجينتي لكل شيء يا بنات ( الكل سأل عن طريقتها )السلام عليكم ورحمة الله وبركاته :
اسمعوا يا بنات انا راح اكتب طريقتي في العجينة , ومافي احد زارني واكلها عندي إلا وسألني كيف تعملي معجناتك
شوفوا حكايتي انا ماكنت اعرف اسوي معجنات بالمرة , ونادرا ما كانت تضبط معاي عجينة , وكنت اقول انا ما لي خُلق في المعجنات ابدا ومستحيل اعرف اتعامل مع العجينة ,
وما احب الشي اللي يا خذ وقت وما كنت اتوقع اني راح اكون متميزة فيها
المهم شوفوا عجينتي اللي تعلمنها من واحدة زميلتي
نص كاسة زيت
كاسة ونص ماء دافي
2 ملعقة اكل خميرة
1 ملعقة اكل ممسوحة بكينج بودر ( اختياري )
فنجان سكر
3 ملاعق أو 4 ملاعق حليب بودرة
نص ملعقة صغيرة ملح او حسب الرغبة
دقيق حسب العجن ( لايقل عن 4 كاسات فأكثر )
الطريقة
توضع المقادير السابقة ما عدا الدقيق في وعاء وتخلط جيدا بملعقة أو مضرب البيض
ثم يوضع الدقيق بالتدريج حتى تصلين الى عجينة متماسكة وطرية نوعا ما
هذا بالنسب لعجينة الخلية
بالنسة لعجينة الأقماع والكرواسان والفطاير الملفوفة على شكل اسطواني ثم تقطع تكون العجينة قوية وتترك حتى تختمر ليش ؟؟!
لأن العجاين اللي اتكلمت عنها تحتاج فرد ولما تكون الجينة قوية وتختمر تلين شوي بس عشان ما تلصق في طاولة الفرد
وبعدين قطعيها بالطريق اللي تحبيها
وانا اسوي كل المعجنات بعجينة واحدة بس بعضها ارخّي العجينة وبعضها اقويها على حسب الطلب, وممكن تزودي شوي حليب ناشف في عجينة الخلية لو حبيتي
وعلى فكرة بعدين تدهني الوجه بحليب شاهي وتحطي شوي سمسم او حبة البركة
وممكن تدهني الوجه بالبيض وكمان الميزة اللي في البيض انه يعطي لمعة حلوة للمعجنات
وبعد ما تخبزيها من تحت تحمري من فوق .
يا بنات جربوها وما راح تندموا
انا كنت اول استصعب المعجنات , وما اتصور اني ممكن اعمل الجينة من غير ما اكيّل , بس اتضح لي انه ما في اسهل منها ,
وممكن تسوي نصف المقدار وتقيسي بالكاسة الصغيرة نفس المقادير , وباقي المقادير اقسميها بالنص.
انا ما امدح عجينتي , بس صار زوجي يطلب مني معجنات يوميا وهو رايح الشغل , واحيانا يجي يطلب طريقة العجينة الفلانية من طقطق لسلام عليكم, يكون احد من اصحابه طالب الطريقة عشان يخلوا اهاليهم يسووا زيها .
وعندي لكم حشوات لذيذة للأقماع والفطاير بعدين رايحة اكتبها ان شاء الله .
ولو أي واحدة عندها استفسار انا حاضرة .