جسم اجمل لحياه احلى بأذن الله يومياتي بالصور

السلام عليكم
حيا الله كل من دخل وقرى يومياتي
في البدايه راح اسدح بطاقتي الشخصيه
الاسم : محاربة اليأس
العمر: 25
الحاله الاجتماعيه : متزوجه
طالبه انتساب تخصص تاريخ
اكبر وزن وصلت له بحياتي : 107
واجمل وزن وصلت له بحياتي وياليتني استمريت : 83
الوزن الحالي بالالكتروني 97 وبالميزان حق المستشفى 99
بعد هالمعلومات راح ابدا في موضوعي
حبيباتي .. انا من يوم يومي وانا دغبوجه خلفيتي معلقه بقفاي تقولون تكرونيه والسيقان الله المستعان تقولون سلك شاورما ومع ذلك ابشركم تزوجت خ <<<< امه داعيه عليه
وحملت وكنت طايره من فرحتي ولكن قدره الله اراد اني ماكمل حملي فسقطت حملي الاول
طبعا حلمي زي كل بنت ان جسمي يكون رشيق والله العظيم يابنات في اليوم اموت بحسرتي اكثر من مره
رغم ان زوجي مايقول شي لانه خلقه يحب الجسم المليان بس حتى ولو اكيد في نفسه يتمناني رشييقه
اكثر شي يقهرني لانزلت السوق وشفت البنات انقهر لاني الاحظ زوجي يطالع فيهم احسه يقول ياربي وش بلاني بهالدينصور المعجعجه
سبحان الله البنت الرشيقه تكون صغيره ودلوعه والبنت المليانه تكون زي الحرمه الكبيره
اليوم صار لي موقف جدا اوجعني من زوجي دايم البس بناطيل بالبيت قطنيه <<< الثقه الزايده
الموهم اليوم وانا اتغدا معه قالي لعد اشوف عليك هالبنطلون قلت ليه قال البسي قميص مريح لك البنطلون يبي له نحافه
انا هنا غصت لي اللقمه بحلقي
والله يابنات ودي انحف ولكن ماهنا اراده رغم اني حقل تجارب ريجيم
ودي انحف قبل ماحمل مره ثانيه ابي اتدلع بجسمي والبس اللي ابي من غير قياس
ابي اكون اصغر اللي يشوفني يقول عمري 30
والله اني ارحم زوجي لاصرت جنبه احس كني امه وهو نحيف وطويل
جلست بيني وبين نفسي فقررت اني افتح لي موضوع خاص فيني وبيومياتي في التخفيف بدون مشاركه مع احد عشان لاتحطم من غياب غيري باليوميات واخبص ولا اخطم غيري بغيابي
والتخفيف راح يكبح شهيتي وامشي بالممشى يوميا ساعه
وبقدره الله ساتمم حلمي وراح اخلي لي اهداف كل هدف 6 كيلو
ومن بكره ان شاء الله راح انزل يومياتي بالصور اخر الليل كل يوم عشان اكون فاضيه من البيت وحوسته والمذاكره وطلبات زوجي
اتمنى منك ماتحرموني من تشجيعكم وكلماتكم اللي بجد احتاجها لرفع معنوياتي