خلاصة تجاربنا

السلام عليكم ورحمة الله
مرحبا لجميع الرشيقات طبعا ماشاء الله علينا كلنا آخذنا كورسات بالرجيم والبعض اخذ درجة الدكتوراه بهالقسم يعني اقصد اننا دائما بهالدوامه وعندنا خبره كافيه ونقدر نصير اخصائيات تغذيه
فموضوعي هو اشياء تعلمتها من تجاربي بالرجيم واشياء استفدت منها واشياء كنت غافله عنها وهي مهمه """
وانتم كذلك قولو اللي عندكم نفيد ونستفيد
بسم الله ابدا
1_كلمة رجيم ضروري نلغيها ونضع بدل منها كلمة تخفيف .
بالنسبه لي ياما جربت رجيمات وعذبت حالي ووصلت للمثالي لكن نفسيتي تعبت وجسمي رجع مثل ماكان ونفسيتي صارت مفتوحه للآخر عالأكل وصرت وكأني انتقم من نفسي .
2_ الرياضه اعتبريها شيء اساسي من جدولك لايمر يوم ماعملتي رياضه لو مشي نصف ساعه وان ماقدرتي لو تمارين الخصر والزنود يعني وش بيضرك اذا صفقتي 50 مره فوق وامام وخلف
المقصود الرياضه لو شيء بسيط باليوم
3_اي شيء كامل الدسم خليه قليل او منزوع والخبز كولي بر والزيت استخدمي زيت الزيتون
يعني غيري نظرتك للأكل بطريقه بسيطه
4_كنا نعتقد ان شرب ماء دافي على الريق ممتاز ويحرق ومدري ايش !!!!!
لكن سمعت الدكتور عبدالله المطوع اخصائي تغذيه يقول هذي اشاعه بالعكس الدافي يخلي المعده ترتخي اما البارد يخليها تنكمش
5_فترة التخفيف منتي مجبره على اكل معين المهم السعرات الحراريه خلال اليوم والليله تكون مناسبه مع جسمك
6_عادي روحي كوفيهات وروحي مطاعم بفترة التخفيف لكن اعرفي وش تطلبين مثل الكوفيهات انا اطلب بدون سكر
والمطاعم اطلبي سلطات واشياء مشويه مثلا سمك او دجاج وعصير ليمون بدون سكر وشوربات وسلطة فواكه وكذا يعني
اهم شيء لاتحرمين نفسك اعتبريه هذي الفتره اسلوب حياتك لاتعتبرينه مده معينه او فترة حرمان من المطاعم ومن الزيارات والإجتماعات ومن كل شيء فيه تغيير لجووك ان ماتعودتي الحين تراك بترجعين للطلعات واكل برا من كل قلبك وماتعرفين تختارين شو اللي يناسبك
7_حطي لك جدول فيه اهدافك يعني مثلا انا حاطه هدفي اني انزل كل شهر كيلوين والحمدلله تحقق اكثر لكن حلو اني اجي كل نهاية شهر واكتب صح بكل ثقه
وزياده على كذا اني حاطه هدفي النهائي اللي هو المثالي بشهر 5 الجاي ان شاء الله يعني يابنات هدو اللعب ترى الدنيا مارح تطير ومثل مابنينا هالشحوم بشهور ليش نطيرها بشهر او عشر ايام على قولة بعض البنات (رجيم ينزلك 10 كيلو ب10 ايام ) سلامات ؟
وعلى فكره ترى رجيم اتكنز مضر مضر للغايه وصاحب الرجيم مات بسبب سوء التغذيه والله من كلام عبدالله المطوع وشوفوه باليوتيوب
8_خليك راضيه عن نفسك تمام الرضا واعرفي انك ان مانزل وزنك هالإسبوع ينزل بالإسبوع اللي بعده وارضي عن جسمك وعن اي تغير يحصل فيه (نقصان طبعا )ههه
9_خلي هالمده تغيير لإسلوب حياتك كله سواء كلامك اخلاقك اناقتك اهتمامك بشعرك وبشرتك طوري ذاتك تغيري من الداخل والخارج ( انتقلي لحياه اخرى ) اجمل
0-لاتنسي الدعاء والإستغفار طول يومك ...
لكم مني كل الإحترام والتقدير.
انتظر تجاربكم ونصائحكم افكاركم ...... ويدي بيدينكم بنوصل مع بعض لأمنياتنا