دنيتي وهي دنيتي مني اكتفت

الجزء الثاني
ودخل فهد وهو شايل الشنطه وجود معاه
وحمد كان يقرا الجريده واول ما رفع راسه طاحت عينه على الشنطه اللي مع اخوه
فهد : السلام عليكم
حمد ورافع حواجبه : شعندك جاي
فهد : رد السلام طيب
حمد وبدا صوته يعلا : انا سألتك سؤال واحد بس شعندك جاي
فهد : يعني ما يحق لي ازور اخوي
حمد عصب : فهد اهرج شعندك جاي و جايب جود بعد وليش هالشنطه
فهد : يا اخوي استهدي بالله وانا بقولك الموضوع على طول و بدون مقدمات جود مو مرتاحه مع خالد ولا هو مرتاح معها و.........جود اطلقت من خالد
حمد والشر باين من عيونه : نعم جود اطلقت من خالد ومن دون ما اعرف جود تكلمي هالكلام صدق والا لا ليش مالك ابو ترجعين له والا خلاص تبريتي مني صدق اني ما ربيتك
جود من الخوف ما قدرت تتكلم بس هزت راسها
فهد وهو يحاول يهدي اخوه : يا اخي اللي صار صار وكل هذا مكتوب والزواج قسمه ونصيب وجود مو اول ولا اخر وحده تطلقت يا خوي خذ الموضوع بهدوء زين ان البنت الحين تطلقت قبل ما يجيها منه عيال يتشتتون بين امهم وابوهم
حمد : خالد رجال سنع اكيد انك مقصره اعرفك كنت رافضه من البدايه انك تتزوجينه صدق يا حسافة تربيتي فيك ويا فشيلتي عند شركاي اذا عرفو بطلاقك من خالد انت عارفه بطلاقك هذا خربتي علي امور كثيره بشغلي
فهد : استهدي بالله يا اخوي
حمد :انت مالك دخل لو فيك خير ما طعتها انها تتطلق من زوجها وانت يا جود مو رحت لعمك خلاص مثل ما خليتيه يطلقك خليه يلقالك مكان تعيشين فيه بيتي يتعذرك انا ما زوجتك عشان ترجعين لي مطلقه والحين انسي ان لك ابو اسمه حمد فاهمه وخلي عمك ينفعك
جود من الصدمه كانت ساكته مو قادره تتكلم بحرف واحد تمنت انها تموت ولا تصير بموقف مثل هذا وصارت الدنيا حولها كلها ظلام
فهد حس بقهر : عمها اللي طلقها بياخذها معاه لان حرام رجال مثلك يصير عنده بنت مثل جود والله حرام يالله جود بتجين معي
وطلع فهد وهو مقهور من اخوه وهالقساوه اللي ما تفارقه
وجود قبل ما تطلع كانت رجلينها مو قادره تشيلها التفتت ل ابوها وقالت بصووت راح من كثر الصياح والهم
جود : يبه سامحني
وطلعت ورى عمها اللي كان مضايق من اخوه بدال ما يهدي البنت ويضمها لصدره ويعوضها عن الايام اللي قاستها مع خالد يزيد عليها بكلام مثل السم
وفي السياره كان فهد يحاول يخلي جود تتكلم بس حرف واحد ما نطقت كرهت حياتها تمنت المووت مليوون مره
ومسك فهد جواله ودق على زوجته ام علي وعلى طوول ردت
فهد : الو السلام عليكم
ام علي بخوف حسته من صوت ابو علي : وعليكم السلام ابو علي صوتك ابد مو عاجبني
فهد : مو مهم الحين جهزي الغرفه اللي جنب غرفة علي ترى جود معاي
ام علي بحزن واسى على حال جود : ان شاء الله طيب كيف نفسيتها
فهد : الله العالم تبغين شي
ام علي : لا بحفظ الله مع السلامه
><><
**ساره { ام علي تصير خالة جود انسانه طيبه لأبعد الحدود وما تشيل بقلبها على احد و مرره تعطف على جود لأنها ما كانت تشوفها الا بين فتره وفتره لأن ابو جود كان مقاطع اخوانه ورافض ان جود تروح لهم }
><><
ووصلو البيت واستقبلت ام علي جود اللي من شافتها رمت نفسها عليها وقعدت تصيح
ام علي وهي ضامه جود لصدرها : خلاص حبيبتي انسي اللي صار
جود و هي تصيح: خالتي ابوي ما يبغاني ابوي يكرهني يا خالتي يا ليتني مت وريحته ياليت يا خالتي
ام علي تحاول تهدي جود : تعالي الحين توضي وصلي لك ركعتين وارتاحي شوي بالغرفه حتى يجهز الغدا وتذكري ان الله يحب الصابرين خلك صابره ومحتسبه هاللي يجيك على رب العالمين
وراحت جود لغرفتها اللي دلتها عليها ام علي ودخلتها وتوضت وصلت وحست انها غسلت حزنها بوضؤها وصلاتها وقعدت تقرا قران لين جاها عمها ولما خلصت قعدت على السرير تفكر ( الحمد لله ان ربي سخر لي عمي الله يسامحك يا بوي على اللي سويته فيني بس كيف بقدر اعيش معهم احس اني بثقل عليهم ام بس عمي فهد طيب وحتى خالتي بس اخاف يجي اليوم اللي يملون من وجودي عندهم اه يا رب ......) وقطع عمها ابو علي عليها تفكيرها
فهد بطريقه مرحه : وشلون الحلوه الحين اللي تتغلى علينا ولا تنزل من نفسها
جود بابتسامه وناظرته بحزن : حمد الله عمي انا اسف
فهد : جود يا بنتي مو قلنا انسي اللي صار خلاص حطيها في بالك هذا ماضي
جود وتحاول انها ما تثقل على عمها : عمي اوعدك اني احاول انسى
وطلعت جود مع عمها وهم ينزلون بالدرج الوااسع الفخم
فهد : والله وحلمي تحقق وصار لي بنت من يوم وليله بنت مثل القمر يوم 14 فديتها
جود ضحكت على كلام عمها : ههه بنتك جت وعمرها 18 وش ذا البنت جايه عكس النااس
فهد : عشان الكل يعرف ان بنت فهد غير سبشل عن النااس
وسمعت ام علي كلامهم ولما صلو طاولة الاكل
قالت ام علي وهي مبتسمه : اصلا جود بنتي والا نسيت انا مرضعتها مع عمر الله يرحمه
فهد : طبعا ما نسيت وهذا شي ينسي الله يهديك
ام علي بحنان : صدق يا جود والله انك بنتي واكثر والله يعلم اللي بقلبي
جود بامتنان : وانت يا خالتي الله يعلم شكثر افرح لما كنت تزوروني بين فتره و فتره
فهد : شوفي وش حلوك وانت تتكلمين بدون حزن خلك كول على طول
ام علي : حشى عليك يا ابو علي وش هالكلام اللي يسمعك يقول ابو عشرين سنه
ابو علي: اعترفي اعترفي انك تغارين من رووحي الشبابيه وان انت تفكييرك رجعي ههه
جود وتضحك على كلام عمها : ههه لولا الله ثم انت يا عمي ما ادري وشلون هالنار اللي بصدري بتطفى
ام علي ودمعتها على خدها : قولو امين الله يلم شملنا ويرجع علي بالسلامه
جود مستغربه : امين بس هو وينه
فهد : يدرس بكندا طب وخلاص هذا اخر كورس ويرجع لنا جراح ويرفع راسنا بين الناس الله يوفقه
و بدت ام علي تصيح من يجي طاري علي لازم دموعها تنزل
فهد : خلاص يا ام علي بيرجع انشالله
جود : خالتي لا تصيحين بيرجع وبتفرحين فيه
ام علي بقهر من ولدها : الله يصلحه رافض يعلمني متى بيرجع حرق قلبي يا جود
جود : هو خلص الكورس حقه
فهد : ايه من اسبوعين تقريبا والى الحين ما جاء الله يهديه
جود تحاول تبرر ل علي: يمكن يبي يودع معارفه اللي هناك
ام علي : يبي يموتني ذا الولد ناقصة عمر يقولي يبغى يسويها مفااجئه الله يهديه
جود : الله يطول بعمرك
......
و مر اسبوعين على وجود جود عند عمها وبدت تتأقلم مع الوضع ونفسيتها بتحسن مستمر
على الساعه 2 في الليل جود مانامت توها مخلصه مرتبه غرفتها ( بروح المطبخ اشوف لي شي بعد هالتعب اه يا ظهري يعورني انزل اشرب لي نساكفيه عشان اروق )
وفي المطبخ كانت منسجمه وهي تسوي النسكافيه وسمعت صوت باب يتسكر
جود تكلم نفسها : من جاي هالوقت الله يستر
ومن الخوف ما قدرت تطلع من المطبخ
وبدا صوت الخطوات يقرب من المطبخ
جود : يا رب وش هالمصيبه وش اسوي
وفجأه دخل المطبخ ولا كان معها شي تتغطى فيه ولا هي عارفه كف تتصرف
..... كان يطالعها وعاقد حواجبه وهو متفاجئ بنت في بيتنا
جود بخوف : من انت
علي وهو مستغرب : انا اللي المفروض اسألك
جود وخانقتها العبره : بسرعة تكلم من انت
علي وحس انها بتصيح : اوكي اوكي لا تصيحين انا علي وانت ميين
جود قعدت على الارض : حسبي الله عليك خوفتني يا ربي
علي وللحين مو مستوعب الموضوع : سوري بس انت مين
جود ولما رد نفسها : انا جود
علي وتذكرها على طول: بنت عمي حمد واختي بنفس الوقت موو
جود وبدت تتكلم معاه بطريقه عفويه لأنها ارتاحت له كثيير : ايه صح بس انت من متى في الرياض
علي وبطريقته الطيبه : انا استغربت شفت لمبة المطبخ مفتوحه لان ابوي وامي مو راعين سهر وش تسوين هالحزه
جود : طيب اتركنا من هذا كله حمد الله على السلامه
وهو يقعد على الكرسي : الله يسلمك يازين الرياض واهلها
جود ضحكت على كلامه اللي طالع من قلب وعطته النسكافه اللي كانت مسويته لها
علي : مشكوره كأنك حاسه اني باخذه منك
جود : بالعافيه على قلبك علي حرام عليك
علي طارت عيونه : وش سويت
جود : ليش ما خبرت امك انك بتجي مسكيينه قلبها متقطع ودها تشووفك
علي : ابي اسويها سبرايز باليالله لقيت لي حجز خليها على ربك وعلى بال ما خلصت امووري هناك على طول جيت بس تعالي بسألك
جود : يالله اهم شي انك رجعت بالسلامه ..ووش كنت ناوي تسألني
علي : انت ليش عندنا في البيت انت متزوجه موو
جود بالم لما تذكرت موضوعها : تقدر تقول كنت لي اسبوعين منفصله عنه
علي حس بحزن على حال بنت عمه و كان يعرف عن وضع جود من كثر ما امه وابوه يتكلمون عنها بس هذا كان اول لقاء يجمعهم في بعض وبداية مشوار اخوي حميم بينهم
علي يحاول يرفع من معنويات جود : ولا يهمك يا الغاليه الدنيا ماشيه وانت الحين لازم تنسين كل شي وتبدين حياة جديده كلها تفاؤل وامل
جود وحست ان علي تعبان من السفر : علي شرايك تقوم ترتاح شكلك مره تعبان
علي وهو يتنهد :مره واصل حدي اجل انا برووح انام تصبحين على خير
جود وهي مبتسمه : وانت من اهله
ولما طلع من عندها و وصل الدرج نادته
جود : علي
علي التفت لها : سمي
جود : سم الله عدوك انتظر يمكن غرفتك يبغالها تمسيح خليني ارووح اشوف لك اياها
علي مبتسم : مو لازم ان شاء الله تكون الربع الخالي من الغبار والرمل بنام فيها واللي يصيير يصير
جود : ههه خلاص انت حر تلحف زين
وراح علي وترك جود في حالة ارتياح يمكن كانت شايله هم كيف بتتصرف وتتكلم مع علي بس اكتشفت انه غير عن الشخصيه اللي رسمتها في بالها عنه
><><
**علي { الولد الوحيد لفهد شاب حبوب وحنوون ومحترم مرره عمره 25 طويل وابيض شعره اسود وكانت ملامحه بصفه عامه جذابه وحلوه وكان عنده اخو اللي هو عمر وكان بعمر جود بس توفى وهو عمره سنتين وكان بار بأمه وابووه وكان يحب يمزح مع امه لأنه هو بطبعه مزووحي وعفوي }
><><
وفي الصباح كانت ام علي رايحه تقوم جود الا وتسمع صوت باب الحمام اللي في غرفة علي يتسكر وبسرعه فتحت الباب
ام علي مو مصدقه ان اللي قدامها علي وعلي من شاف امه راح النوم اللي كان يحس فيه ورااح على طوول ضم امه وحب راسها
عليوهو مبتسم : صبحك الله بالخير يا الغاليه
ام علي وهي تصيح من الفرحه : يا بعد الدنيا يا علي يا انا مشتاقتلك حيل ..وضمت علي مرره ثانيه وقعدت تصيح
علي ويحاول يخلي امه تضحك : يمه اللي يشوفك يقول راجع من حرب ترى راس مالي راجع من الدراسه وحمد لله ربي وفقني كله من دعواتك انت والوالد الله يطولي بعمركم
ام علي : اصيح من فرحتي فيك يا ولدي الله يوفقك
علي : الله يجعل ايامنا كلها فرح يا الغاليه
ام علي وهي رافعه يدينها : امين يا رب العالمين
علي : يمه من قالك اني وصلت
ام علي : جيت بقوم جود واسمع صوت الباب حق حمامك يتسكر خلني اروح ابشر جود يا عمري من يجي طاريك تهل دمعتي واقعد اصيح عندها وضاق صدرها علي
علي : شفتها
ام علي : جود
علي : ايه جود امس في الليل شفتها بالمطبخ يا حليلها
ام علي : الله يعينها مسكينه
علي : بتسكن معنا على طوول
ام علي : ايه يا الغالي حمد لله انك اخوها
علي : أي والله الحمد لله والا كان ما اقعد في البيت لو هي تتغطى عني شكلها مكسوره
ام علي : واللي جاها هين اقول نسينا نعلم ابوك انك وصلت
علي : لا تخافين مصلي معاه الصبح بالمسجد
ام علي : وانا اقول وش فيه ابوك كل ما شافني ضحك
علي وفيه هبال : يمه خليني اهبل بجود
ام علي : عشان يذبحك ابوك وانت الحين اللي يسمع كلامك ما يقول هذا متخرج من طب يقول متخرج من ابتدائي الله يهديك يا علي ما تركت حركاتك
علي : وانا اقدر اترك هالحركات وانا ما صدقت يصير عندي اخت خليني اطلع حرة السنين اللي راحت ههه
ام علي : ههه الله ياخذ بليسك يا علي يمكن البنت تستحي منك
علي : نو وي لازم تتعود علي وعلى هبالي
ام علي : ممدي على الهبال اثقل وانزل تحت شوي وبحط الغدا
علي وهو يضحك : ابدل ملابسي وانزل ولا تنسين قومي الاخت الجديده
ام علي تضحك على ولدها : طيب يالله انجز
وقامت جود ولما نزلت حصلت الكل مجتمع في الصاله واول ما دخلت سملت عليهم
وحبت راس عمها وخالتها
جود : مساء الخير
فهد : مساء النور
ام علي : والسرور
علي : وانا بكملها بعد والمسرات والخيرات رديه صارت ههه
وضحكو عليه
ابو علي : وانت ما تخلي تعليقاتك
ام علي : يصير فيه شي لو ما علق ههه
جود : شخبارك اليوم كيف نومتك امس ان شاء الله ارتحت
علي : لا تسألين من حطيت راسي على المخده رحت بسابع نومه
فهد يكلم جود : ها جودي شرايك بعلي
علي يناظر ابوه : ليش بتخطبني لا لا بكمل دراستي لا تحاولون مو الحين ههه
والكل ضحك عليه
جود : الله لا يقوله بسم الله علي خلاص انا بعتزل
علي : ليش حضرتك ما تبغين تتزوجين وصلتي سن اليأس وانا ما ادري تراك حتى العشرين ما وصلتيها روحي بس قالت ابعتزل ترى صباح مو احسن منك بشي هالعجوز ما خلت شاب ما تزوجته
جود : لا مشكور ان كنت انت تبي تتزوج فالبنات على قفى من يشيل
علي : لا خليني اروق بعد الدراسه اللي هدت حيلي
ام علي : الا على طاري الدراسه انت مكمله دراسه
جود : ايه
ام علي : يعني ماشيه مع الناس لا مبكره سنه ولا مأخره
جود : لا ماشيه اوكي
علي : يعني الحين انت متخرجه من الثنوي
جود : ايه الحمد لله
فهد : و كم نسبتك
علي : ما اتوقع تصير اعلى مني احم احم
جود : ليش انت كم جايب
علي : 94% بلا فخر
جود : ههه انا احسن منك
ام فهد : اكيد بتصيرين احسن من علي انت الجود
علي : لا لا لا لا لا بديت اغار بس لا تغيرين الموضوع كم جايبه
جود : بلا فخر على قولتك 96%
علي : انت صدق كنت متزوجه والا تكذبين وكيف رضا انك تكملين
جود : لا يا دكتور صدق متزوجه اما عن كيف وافق فما ادري قدرة قادر وافق
فهد : اجل لازم نسوي حفله لكم
علي : واو بارتي
ام علي : عشانك وعشان جود
علي : طيب وش ناويه تدخلين
جود : ام ما ادري الى الحين ما قررت
علي : ادخلي طب ولك مني تاخذين امتياز مع مرتبة الشرف
ام علي : لا خل البنيه تروق وشوله تغثها بالطب
فهد : مو مهم انتم وش تبغون اهم شي جود وش تبي الجود انت وش تبين
جود : احتمال اقدم ادارة اعمال او محاسبة
علي : حلو يالله الله يكتب لك اللي فيه الخير
جود : امين وياك والسامعين
فهد : اقول يا ام علي متى بخاطرك نسوي عزيمه رجعة علي بالسلامه
ام علي : اليوم الاثنين وش رايك نخليها الاربعاء وتكون بالمزرعه ونام هناك ونرجع الجمعه او السبت على حسب راي اخوانك
علي : ونااسه زمان عن المزرعه والله ذكريات
جود : تصدق عمري ما رحت مزارع
علي : ليش وين تروحين انت وعمي اول
جود : من تبدا الاجازه لين تخلص واحنا في الشاليه اجازه بجده واجازه بالخبر والا نسافر برى المملكه
علي : اجل انت بحريه يبغالك كم كورس وتصيرين صحراويه
جود : ههه حشى دراسه صارت
علي : اصلا انت وش يعرفك بالمزارع عشان كذا لازم تتعلمين مضبووط اصوول الذهاب الى المزارع
جود : حسناسوف اتعلمه منك يا ابن العرب
ام علي : ههه حسبي الله على عدوانك يا علي شكلك عديت البنت
فهد : ان شاء الله اليوم بكلم اخواني وخواتي واشوف الوضع
ام علي : على خير
وفي المغرب كانت جود بغرفتها مانزلت جود وهي قاعده على الكنفه اللي جنب سريرها وبيدها مجله ومشغله فقدتك لل الجسمي وعايشه جو مع الاغنيه
وفي الصاله علي وامه وابوه
علي : يمه وين جود ما شفتها من العصر
ام علي : بغرفتها ما نزلت رح شفها واقعد معها شوي
فهد : وش رايك وانا ابوك تاخذ اختك وتطلعون تتمشون خلها تغير جو من جت وهي ما طلعت من البيت
علي : ابشر باللي تبيه يا الغالي خلاص بروح اقولها تامروني بشي قبل ما اروح لها
::سلامتك ورضاك
و طلع علي من الصاله
ام علي براحه : اللي يشوفهم يقول يعرفون بعض من سنين ما كأنهم البارح اول مره يجتمعون
فهد : الله يديم عليهم علي طيب وجود بعد والله يحننهم على بعض
بغرفة جود سمعت الباب يطق
جود : مين
علي : في متشرد يبغى مأوى ممكن
جود : ههه تفضل
علي : سلام يا عسل
جود : وعليكم السلام اخبارك علي
علي : تمام ..ليه ما نزلتي تحت
جود : ما ادري صراحه ما كان لي مزاج انزل قعدت اقرا مجله وانسجمت معها
علي : مضايقه
جود : لا بس ما فيني حيل على نزلت الدرج
علي : اللي يسمع كلامك يقول عجوز والا بتنزل من برج المملكه
جود : ههه
علي : اقوول وش رايك نروح نتمشى
جود : وين مره خاطري اطلع
علي : أي مكان المهم نطلع والا اقولك خلينا نروح السوق نتشرى
جود : ههه صراحه شي عجيب
علي يناظرها بطرف عين : ممكن اعرف ليش تضحكين قايل نكته وانا ما ادري
جود : بصراحه اول مره بحياتي اشوف رجال يقول خلينا نروح السوق غريبه
علي : اجل اموت في شي اسمه تشري عداني سعود كنت اطنز عليه وصرت مثله
جود : ما تعرف ان الطنزه تلحق صاحبها ومن سعود هذا
علي : هذا يا طويلة العمر صديق الغربه ومو بس صديق الا اخو غالي علي
جود : حلو يكون لك صديق تثق فيه وتحسه جنبك بالوقت اللي انت تحتاجه
علي : والله انك صادقه الحين الصدييق عمله نادره ولازم الواحد يتمسك فيه وانت ماعندك
جود : الا عندي بس تزوجت وراحت لجده الله يسعدها ويهنيها بحياتها
علي : الله يوفقها يالله البسي عبايتك انتظرك انا تحت بالسياره
ولما نزلت جود في الصاله مرت على عمها
جود : عمي بطلع مع علي تامرني بشي
فهد : سلامتك ورضاك يا بنتي اهم شي انتبهي لنفسك
جود : الله يسلمك عمي
فهد ويمد لها بطاقة صراف : خذي البطاقه عشان اذا بغيتي شي تاخذينه بدون ما تحتاجين احد
جود حست بشوية احرااج : يطولي بعمرك عمي ما يحتاج الخير كثيير
فهد : يا بنتي خلاص انا ابوك واي شي تبينه ما يردك الا لسانك وخوذي البطاقه وما ابي أي نقاش فاهمه والا لا ..بأسلوب مرح.. ناس ما تجي الا بالعين الحمراء
جود وتضحك على عمها : مشكور يا عمي ما تقصر ويالله فمان الله
ابو علي : فمان الكريم
وطلعت جود لعلي بالسياره
و خلصو متسوقين ويمكن جود ما ركزت على الاشياء اللي بالسوق من كثر ما علي خلاها تضحك من تعليقاته اللي ما تنتهي و راحو لمطعم يتعشون
...في المطعم
جود : علي كلمني عن عماني وعماتي وعيالهم بصراحه ما قد شفت عيال عماني وعماتي
علي : اوكي بقولك واحد واحد و نبدا من عمي عاصم طيب بس اللي ما يعرفه يقول هذا انسان خبيث ومرته حبوبه مره ( ليلى )
وعنده 3 اولاد وبنتين زياد الكبير عمره 26 ما تزوج وبعده محمد 24 متزوج من سنه تقريبا واخذ بنت عمتي الجوهره طيف وبعده توأم بنات هلا وغلا 17 سنه وبعدهم ياسر 15 سنه
جود : هذا عمي عاصم طيب وعمي عادل
علي : عمي عادل يا طويلة العمر انسان يحب الناس وعنده استعداد يضحي عشان أي احد محتاجه انت داريه انه وقف ضد ابوك لما جا يزوجك خالد وراح لخالد بس ما رضى وزوجته متوفيه وعنده ولدين وبنت نواف عمره 24 ونوف 19 ونايف 17
جود : اعمار عيال عمي عاصم وعمي عادل متقاربه
علي : ايه مره وعمتي الجوهره عندها احمد 25 سنه وطيف 20
وعمي سلمان عنده بنتين منار 18 و شوق 17
وعمتي العنود عنده ولد وبنت مشعل 15 ومشاعل 12
عرفتيهم الحين والا اعيد
جود :لا مشكور تصدق كنت كل ما احاول اسئل ابوي عنكم يجيني خوف ولا اسئل
علي : ليه
جود : الله اعلم بس تصدق احس اني متشوقه ودي اشوفهم
علي : الكل راح يعجبك بتشوفين
جود : ماشاء الله عليك حافظ اعماارهم بعد
علي : ههه يقولون عني بطاقة العايله
جود : ههه اقول ما شبعت
علي : لا يا حلوه قاعد اعد لك العائله الكريمه لي ساعه وين تبين اكل
جود : ههه خلاص كل احد ماسكك
ورجعو البيت
ومن بكره مر اليوم بسرعه الكل منشغل بتجهيزات العزيمه
وجاء يوم الاربعاء

البارت الرابع..
جود.. قمت من النوم واحس اني شبعت والتفت شفت منار نايمه وشفت الساعه 6 الصباح يا الله بدري وش مقومني انا هالوقت حاولت ارجع انام بس ما قدرت ارجع
اخذت لي شور ولبست بدله ورفعت شعري ونزلت شفت نيني<<الشغاله
جود مبتسمه ل نيني : كيفك نيني
نيني : همد لله
جود : في احد قام من النوم
نيني : نو مس كولو نوم الا مشأل وياسر من ساعه 5 قوم
جود : خلاص بروح اشوفهم
رحت المطبخ اخذت لي كوب حليب وطلعت برى الفله كان الجو حلو وشفت مشعل وياسر قاعدين ياكلون فرحت لهم ولما شافوني حسيت انهم منحرجين شوي مني لاني امس ما كان بيني وبينهم احتكاك
جود : صباح الخير لاحلى شباب
مشعل وياسر : صباح النور والسرور
جود : معليش اقعد معاكم
ياسر : اكيد معليش والا مشعل
مشعل : يبغالها سؤال
جود : اخباركم وبأي سنه تدرسون
مشعل : الحمد لله بخير واحنا ندرس بثالث متوسط
جود : ماشاء الله عليكم رجال
ياسر مبتسم : افا عليك نعجبك حنا
وبدينا نتكلم حسيت اني سلكت معاهم بالسوالف وصرنا نسولف ونضحك وحسيتهم اخذو علي
ياسر : مشعل خلنا ناخذ جود تشوف الخيول اللي جابها امس عمي عادل
مشعل : اوكي ها جود شرايك تجين تشوفينها
بصراحه اتحمست معاهم : ايه اكيد بجي معاكم يالله سرينا
ورحنا للاسطبل حق الخيول وكان مليان خيول
جود : واو مرره تجنن اشكاال الخيوول
ياسر : كل واحد من العيال له خيل
مشعل : احلا واحد الكايد حق نواف
جود : وش هالاسم
ياسر : اسئلي نواف كل ما قلنا له ليش قال لانه كيده عظيم
مشعل : انت ما تعرفين نواف هاذي حركاته
جود : بصراحه مره حلوه اشكالهم انتم ما لكم
ياسر : على قولتهم اكبرو شوي بس عمي عادل قال لنا اذا شفتكم اتمكنتو على الخيول وضمنت انكم ما راح يصير فيكم شي بيعطينا اثنين واحد لي واحد لمشعل
مشعل : ادعي لنا اليووم عمي بيشوف وبيقرر اذا راح يعطينا والا لا
جود : ان شاء الله تحصلون اللي خاطركم فيه
و رحنا نتمشى ثلاثتنا وكنت مبسوطه عليهم وع سوالفهم ورحنا ورى المزرعه وكان شالي على راسي بس طالع شوي من شعري ولما طالعت السااعه لقيتها 8 تقريبا
جود : يو تصدقون مر الوقت وما حسيت فيه الساعه ثمان لنا تقريبا ساعتين ندوور
مشعل : حتى حنا ما حسينا صح ياسر
ياسر : ايه صح جود تطلعين معنا مره ثانيه والا بتفتكين من حشرتنا على قولتهم
جود : لا بصراحه استانست معكم وان شاء بطلع اكيد
مشعل : خلاص قومي بكرا بدري وبتحصليننا قايمين ننتظرك
جود : اوكي ان شاء الله اذا قمت على طول بطلع لكم
ومشينا نرجع للفله
"" كان احمد يطالع جود ومره مبسوط ان شافها الحين بيعرف من هي بدون ما يروح يسأل حد.. يا ويل حالي بس اكيد امي داعيه لي اشوفهاعلى الصباح فديتها والله تهبل برووح لهم وطبعا تنحنحت عشان تنتبه وتتغطى
احمد : صباح الخير
كلهم : صباح النور
احمد : اشوفكم قايمين بدري شعندكم
كانت جود ساكته
مشعل : ما عندنا شي بس نقوم بدري عشان نستانس والجو الصبااح جنان
ياسر : واليووم مره استانسنا مع جود
احمد بخاطره .. اخ يا قلبي طلعت جوود فديتها شكلها مستحيه مني
احمد : كيفك جوود اليووم
جود وهي مستحيه منه لانها للحين موقف امس ما نسته: بخير جعلك بخير وانت اخبارك
احمد : حمد لله عسى ما ضايقوك هالاثنين
ياسر ومشعل يطالعونه بنص عين
مشعل : شف من يتكلم يا ياسر
ياسر : مسوي فيها يا احمد عشان جود فيه شقالو لك ما عندنا ذوق
وظلو يغايضوون في بعض
جود تضحك : ههه خلاص اكلتوو الرجال
احمد بخاطره فديت هالضحكه : شفتي يا جوود كيف ظالميني
ياسر : استغفر الله اقوول جوود احنا بنمشي بتروحين معنا
جود : أيه يالله مشينا
جود .. صراحه ضحكت على احمد و مشعل وياسر وهم يغايضون ببعض ولما قربنا من الفله شفت عمي عاصم طالع من الفله ولما شافنا ابتسم
عاصم : صبحكم بالخير
جود : صباح النور عمي
عاصم : شخبارك يا جود عسى مرتاحه
جود : بخير جعلك بخير يا عمي والحمد لله مرتاحه بشوفتكم
عاصم : اشوفك مع ياسر ومشعل
جود : أي فديتهم من الصباح وانا معهم
مشعل : أي خالي ونسناها ولا ضايقناها ليت كل البنات مثل جود هذولا مغرورين على ايش ما ادري
ياسر : خلك منهم اصلا هالبنات يحبون يتفلسفون
وظلو شوي يتناقشوون
كل هذا وانا وعمي عاصم كنا نطالعهم وانا فيني الضحكه وكاتمتها عاد بغيت استاذن منهم بروح ارتاح
جود : يالله تامروني بشي انا برووح اشوف اذا البنات قامو
عاصم : سلامتك ورضاك
رحت عنهم وانا راقيه صادفت علي توه قايمه وشكله معصب وكان شكله يضحك
جود : صباح الخير علي
علي يناظرني وهو معصب : أي خير وانا اصبح على وجه هاللي منيب قايل ما خلاني انام قسم بالله انه قلق
جود كاتمه ضحكتها عشان ما يعصب عليها زياده : من هاللي مسوي لك قلق
علي وهو يتوعد : وفيه غيره احمدوه يشوف شبسوي فيه مردوده تدرين انه كسر كاس جنب راسي عشان يقومني
هنا انا ما قدرت امسك نفسي كان شكله يضحك : ههه
علي يناظرني بطرف عين : جودي لا تضحكين لا اطلع حرتي فيك زين ما صار فيني شي
جود : ههه اما احمد هذا شي عليه حركات ههه
علي : الشرهه مو عليك على الي يقولك
وراح عني بس لحقته
جود : علي خلاص لا تزعل والله سوري بس لا تزعل
علي : انا برتكب فيه جريمه على حركاته بس انت شوفي متى
جود : ههه سو اللي يريحك انا بروح
ورحت وانا اضحك على شكله واسمعه يقولي جود يكفي يا الدوبا شايفتني نكته
ورقيت غرفتي حصلت منار توها طالعه من الحمام ابتسمت يوم شافتني
منار : صباح الخير للي قايمين مع زقزقة العصافير
ضحكت على كلامها : ههه صباح النور منو تعرفين شغل فلاحين احاول احسس نفسي ههه
منار : ههه اهجدي واللي يعافيك انت نايمه بعدي وقايمه قبلي بعهههد حسيت فيك يوم طلعتي
جود : اجل ازعجتك بس جد الصبااح كان الجو جنان
منار : ادري ان الجو حلو بس بعد النومه جنان ههه
جود : ههه النومه جنان انا معك يا حلوو النوم تنسين الدنيا كلها
منار : والله انك صادقه اقوول البنات قامو والا بعدهم
جود : لا ما احد قام منهم
منار : جاك يا مهنا ما اتمنى ههه هلمي بنا اليهم
جود : ههه شكلك ناويه عليهم نيه
طلعت انا ومنار وحصلنا البنات كلهم قامو من النوم
منار منقهره : قهههر ما لحقت عليكم
جود : ههه جزاك هذا الشر
غلا : اكيد ناويه علينا اعترفي وش كنت ناويه تسوين
منار : ابد بس كنت بشغل الاستريو و برشكم بمويه بس ما لحقت اخ بس
شوق : احمدي ربك انا قايمين والا وربي لو سويتيها لا ارتكب فيك جريمه
هنا انا ضحكت : ههه ذكرتيني بكلام علي قالي نفس كلامك لان احمد مسوي له ازعاج ههه
هلا : تعلمينا بأحمد يمووت بحركات الهبال
ومر الوقت بسوالف وضحك وجد حسيت اني مرتاحه معهم اشوف الكل مرحب فيني ومو متضايق بوجودي كل شي صار عكس تصوراتي بحياتي ما اتوقعت اني بعيش بين عايله ما فيها تنافر بس ما تمنيت شي كثر ما اتمنيت ان ابوي يكون حاضر هاللمه الحلوه تذكرت ايام اول كيف كنت عايشه بدون ما احاول ان اتعرف عليهم بديت احس ان هالطلاق سوا فيني خير خلاني اتعرف على اهلي وناسي هذا كله وانا ما شفتهم الا يوم واحد .. وما حسيت الا بيد على كتفي
: الحلوه شقاعده اتفكر فيه
التفت لها وابتسمت : ولا شي عمتي
العنود : اجل لك ساعه ساكته ليش
رديت عليها : لا تخافين عمتي وربي اني مبسووطه بينكم و تحسفت على السنين اللي ما كنت اعرفكم فيها
قربتني منها وباستني : يا حبي لك يا جوود والله وحنا اكثر وجودك معنا مفرحنا ومريحنا
طالعتها بهدووء : تمنيت ابووي يكون بينا الحين
العنود تنهدت : الله يهديه ويالله انسي الموضوع وتعالي نروح نشوف عمانك اذا محتاجين شي
ونوف شافتني انا وعمتي العنود طالعين نادتنا
نوف : جود عمتي وين رايحين
العنود : بنروح لاخواني تعالي معنا اذا تبغين
نوف : يالله بجي معاكم بس ثواني اجيب شالي
جود : اوكي
ورحنا لعماني اللي كانو قاعدين على الطاوله اللي جنب مجلس الرجال الخارجي
عادل : هلا بهالوجيه الطيبه
العنود : هلا بك زوود شلونكم عساكم بخير عسى ارتحتو امس بنومكم
فهد : الحمد لله ارتحنا الله يديم علينا هالامن اللي عايشين فيه لو الظروف اللي حوالينك تكون قاسيه بس الامن يكون موجود يهون عليك كل شي
جود : والله انك صادق يا عمي احنا بنعمه كثيير ناس يحسدوننا عليها فديت بو متعب والله مو مقصر الله يطول بعمره
الكل : امين يا رب
عاصم : اقول ما دامكم يا اخواني مجتمعين شرايكم نسافر سوا
نوف : والله انك صادق يا عمي حلوو السفر واللمه
انا مره تحمست بس ما حبيت اعلق وشفتهم تقريبا اتفقو
وعمي عادل يكلمني بحنانه المعهود : ها جودي ما قلت رايك
جود : اللي يريحكم يا عمي انا معكم
فهد : حبيبة عمها تحب تمشي على شوره صح جودي
جود : وانا اقدر اقول لا اكيد
فهد بدا اسلوبه المرح : احسب بعد ناويلك على نيه بس انت اصبر سويه
الكل ضحك على عمي فهد وعلى مزحه ولا كانه كبير بالعمر
سلمان : الحين الدور عليك يا ام مشعل شوفي الحريم اذا موافقين على السفره والا نكنسل الموضوع
ام مشعل : ابشر يا اخوي يالله نوف وجود بتجون معي
ورحت انا ونوف مع عمتي العنود عند الحريم
عاد كانو يسولفون وانا ونوف مره مستانسين على اللي السفره
شوق تكلمني : الحين انت ونوف شعندكم تتبسمون
نوف : يا بنت الحلال انتظري الحين عمتي العنود بتقول وبتعرفين السالفه
منار : اجل السالفه عند عمتي العنوود الحين بخليها تقوول
هلا : خلي الموضوع علي
غلا : تكلمت سوبر ومن العايله ابعدو عنه
جود : ههه حلوه سوبر ومن
هلا : اعجبك انا اسمعو عمتي العنود
العنود : سمي يا هلا
هلا : يقولون بتقولين لنا موضوع يا ليت لو تعجلين لنا
الجوهره : امنيتي يكون في شي ما ودكم تعرفونه
غلا : يا عمتي يا حبيبتي ليش ما تبغين نكوون واعين باللي يدور حوالينا هذا اسمه نباهه
العنود : اتركونا من نباهتكم الحين اخواني يقولون شرايكم نسافر مع بعض
ام زياد ليلى : والله انا ما عندي مانع اذا الكل موافق
ام علي : وانا مع الجماعه اللي يريحكم
ام منار : انا مثل ام علي انا معكم
العنود : وانت يا الجوهره
الجوهره : اذا احمد يبي يروح وعنده استعداد انا ما عندي مانع
طيف : ايه يمه تعالي خلينا نروح معهم
غلا : اقوول طيف تراك متزوجه اخووي ليش تقولين لامك نروح قولي اقول لمحمد
طيف : يا ربي شسوي فيك ادري ان محمد ما راح يرفض بس اذا مامتي حبيبتي ما راحت انا ما راح اروح مع محمد بقعد معها
منار : هي انت يا الخبله لا تتركين زوجك عشان ما يلف هنا والا هنا صدق خبله
جود : يا قلبي انا عليكم اكيد هي وزوجها متفاهمين انت وش دخلكم
طيف : علميهم اعوذ بالله منهم هالعزابيه
الكل : ضحك على كلام طيف
العنود : خلاص اجل بكلم اخواني وبقولهم انا موافقين
الجوهره : انتظري بشاور احمد قبل
العنود : وانت مصدقه انه بيرفض خليه بس يقول لا شوفي وش بسوي فيه
الجوهره : اجل خلاص انا معكم وان شاء الله احمد ما يقول لا
علي يكلم احمد : الحين ممكن اعرف ليش ساكت ولا تفكر بحبيبة القلب و ودك تعرف من هي
احمد بخاطره .. اقوله والا اسكت اخاف اقوله يزعل عشانها اخته وانا طوول امس اتغزل فيها عنده بس ادري ما اقدر ما اقوله ما في الا اني اعلمه انها جود وارتاح
: واذا قلت لك اني عرفت من هي
علي : يا اكشن والله وتحقق مرادك يا الدوب
قعدت اناظر علي كيف مبسوط عشان قلتله اني عرفتها بس هل بتدوم والا بيزعل
: ام اللي شفتها امس ...... جود
علي يطالعني وهو مستغرب : وكيف عرفت
احمد : شفتها اليوم الصباح مع ياسر ومشعل وعرفت انها جود
علي : وانت يا اللي ما تستحي ورى ما تغض البصر
احمد : اقول اهجد انا ما كنت ادري انها معهم وشفتها بالصدفه ويوم رحت لهم قالو انها جود
علي : والله يا احمد ان كنت على كلامك امس تبي تتزوجها ما ظنتي انها توافق
طاح قلبي لما قالي علي هالكلام : ليش هي في احد خاطبها
علي : مو عن ان احد خاطبها اول شي هي بعدتها للحين وثاني شي هي مو متقبله فكرة الزواج مره
حسيت ان الدنيا تسكرت بوجههي لما علي قالي هالكلام : يعني هل هي رافضه الزواج الحين والا رافضته كله بصراحه انا جزمت اني اتزوج من شفتها
علي : والله ما ادري يا احمد
قعدت ساكت شوي
علي : احمد اذا تبي جود انتظر عليها شوي لين ترتاح وتستقر وبعدين بفاتحها بالموضوع و اوعدك اني بحاول قد ما اقدر اني اقتعها لاني ما بحصل احسن منك لجود
بصراحه حسيت براحه من كلام علي لي : قل امين الله يسعدك يا علي ريحتني
علي : ههه يا حليلك يا احمد والله وكبرت ونويت تتزوج
قعدت انظره بطرف عين : ليش طايح من عينك للهدرجه
علي وتذكر سالفة احمد معاه الصباح : لا سلامة راسك والا اقول ما راح اقولها عن موضوعك مهما صار يا الدوب
طاح قلبي : ليش
علي يقهههر احمد : نسينا ما كلينا نسيت وش سويت فيني الصبح هذا
احمد : حقك علينا يا ابو فهد
علي : لا لا لا تحاول
احمد : اقول علوي اعقل بس اعتذار ةاعتذرنا عاد لا تخرب علي وربي تراني مأمل فيك تقنع جود
علي : رحمتك بس لا تقولي عليوي مالت عليك اقول قم خلنا نروح نشوف العيال اذا يبون نسبح
"" جود.. كنت انا و نوف نتمشى بلحالنا ولما كنا باخر المزرعه شفنا منار واقفه مع نواف عاد نوف شهقت : وربي حسيت ان ورى هالاثنين شي
جود : ليش
نوف : هالبنت تكابر واخوي ذايب فيها
جود : طيب ليش هم واقفين هنا
نوف : قلتلك نواف كم مره يلمح ع منار عند امي وهو اصلا منذ مبطي وهو يحبها ويعشقها
جود : ههه وماذا عنها اهي تحبه يا فتاة العرب
نوف : انا حاسه انها تحبه بس تكابر لو تشوفينها العام يوم صار فيه حادث مسويه انه ما يهمها بس هي تحبه بس المشكله مو راضيه تحسسه بمشاعرها خبله هالبنت ليتها تعدي هالجدار اللي احبه
جود : يو يا نوف وش قلنا مو قلنا ننساه
نوف : اف بس ننساه يا صعبها بس انا ما زلت عند وعدي اني بحاول وهاذي مناروه دواها عندي
جود : الله يعينها بس انا اوريها امس مسويه لي تحقيق الا انا احب وهي مسويه نفسها ما تحب وما تبغى تحب واخرتها من تحت لتحت
نوف : ياما تحت السواهي دواهي بس دواها عندي
جود : ههه الله يعينها عليك
جود..ومن بكرا استعدينا كلنا عشان نرجع للرياض وبداخلي ما تمنيت انا نرجع الايام اللي فاتت حسيتها من احسن الايام اللي مرت علي حسيت بأشياء كثيره حلوه وبصراحه ما استانست الا على نوف وهي تنغز على منار بالكلام اللي انقلب وجهها من طرت نوف سالفة نواف بس ضحكنا ضحك عليها هي و نوف
....... الكل بدى يركب السيارات ولما جيت بركب نادتني منار
منار : جود
التفت لها : سمي
منار : سم الله عدوك بس شوفي مو نرجع لبيوتنا ونرجع زي ما كنا نبي نظل نتزاور وبيننا الو اتفقنا يا عسل
جود : اتفقن يا قشطه اوامر ثانيه
منار : سلامتك ورضاك
وكانت شوق تنادي منار : منو يالله اخرتينا ما صارت
منار: طيب جايه جايه
جود : روحي لا تأخرينهم
منار : الله يعظم اجري بس يالله بروح باي
جود : بايات
ولما ركبت مع علي كان احمد توه جاي بيكلم علي
احمد : اقول ل تنسى اللي قلتلك ترى بذبحك لو ما صار
علي : يا ولد الحلال قلت لك طيب اعتمد بحاول
احمد : ولا تسرع
كنت اناظرهم وانا مو فاهمه أي شي من كلامهم
علي طارت عيونه : اقول احمد شرايك تجي تسوق بدالي
احمد : ترى بصدق واسويها
علي : اقول احمد خلنا نمشي ورح لعمتي الجوهره شكلها ملت من قعدة السياره
احمد : يالله اجل فمان الله جود تامريني بشي قبل ما اروح
انا ما كنت منتبه انه يكلمني الا لما نبهني علي : جود احمد يكلمك
جود : سم
احمد بخاطره هاذي اللي بتجيبلي سكته يا ويل قلبك يا احمد : سم الله عدوك بس تامريني بشي
جود انحرجت من احمد : لا سلامتك ورضاك
احمد : اجل فمان الله
ولما بدينا نحرك كنت ساكته وحسيت ان علي مستغرب من هدوئي
علي : الجوود شفيك ساكته
جود : ما فيني شي بس قاعده افكر كيف بتكون سفرتنا
علي : ان شاء الله بنستانس وبنفرح بس طبعا ما راح نسافر الا بعد تقديمك انت ومنار
جود : الله يكتب اللي فيه الخير
علي : اقول جودي سمعت اخر خبر
جود : ههه وش خبره بعد
علي : نواف ولد عمي عادل
من قال نواف حسيت ان منار لها دخل بالسالفه : شفيه
علي : عمي عادل فاتح عمي سلمان يبي يخطب له منار تخيلي الوضع انت بس
ما ادري ليش جتني الضحكه : ههه والله حركات منار ما تلعب
علي : اسكتي لا يسمعك نواف تراه مضيع الود هند منار عمايل الحب وما ادراك ما الحب
ابتسمت : الله يوفقهم ويكتب لهم اللي فيه الخير
علي : امين و عقبالك
ومن قالي قبالك كشرت : اقول علي يا ويلك لو قلت هالكلام مره ثانيه ترى بزعل و ان شاء الله عقبالك انت مو انا
علي : ههه اعوذ بالله كل هذا عشان عقبالك خلاص ما راح نعيدها طال عمرك اوامر ثانيه
ناظرته وابتسمت : سلامتك يا الغالي
ابتسم لي وكملنا الطريق سوالف
وبعد يومين كنت قاعده على الابتوب شابكه النت ما ادري الا ومنار تفتح الباب هي وشوق
منار : نحنو هونا
رديت عليها : ههه هلا وزود غلا بك يا بنت العم
شوق : اسكتي يا جود لا يجون هلا غلا الحين يطبون علينا
منار : ههه ليش ع الريحه هم
جود : اهجدو بس اخباركم علومكم تصدقون انكم وحشتووني
منار : والله وانت اكثر قلت بنت عمي ما جتنا حنا نرووح لها
جود انا كنت ابي اشوف منار اذا راح تتكلم عن موضوعها والا لا: زين انكم جيتو لاني وربي طفشانه اخباركم وش عندكم علوم جديده
شوق ابتسمت بخبث : ابد الاخبار كلها عند منو بعد مو أي اخبار
منار تغير وجهها شوي
التفت على منار : ها اطربينا وخبرينا وش عندك
منار تكلم شوق : وانت ما تمسكين حكي لازم الاحراج يعني للو انت ساكته كان قلت لها
جود : لا تقعدين تضيعين السالفه يالله قولي وش عندك
منار : ام نواف ولد عمي عادل خطبني
ما ادري ليش ضحكت : ههه
منار : يا الدوبا لا تضحكين اتكلم جد
شوق : ههه والله وكبرت وصرت عروس يا منو خ
منار: ليش طايحه من عينك
جود : بدت ترد علييك يا شوق يعني البنت موافقه
منار : بيني وبينكم محتاره شوي
شوق : اقول منوو اهجدي شوي الولد من عهد نوح وهو يبيك وما صدق انك تتخرجين تجين تقولين محتاره
جود : شوفي يا منوو اذا نواف والنعم فيه وانا ما استبعد هذا عن تربية عمي عادل فوافقي وزياده على كذا ان يبغاك وشاريك
منار : يعني هقوتك اوافق
جود : اذا تبغينه وافقي
شوق : يا انا اللي بتجيني الجلطه من هالبنت المشكله انه تبيه يا بنت اعترفي عادي قولي انك تحبينه ترى مو عيب
ضحكت على كلام شوق اللي كانت متفاعله مره مع الموضوع : طيب شراي امك وعمي سلمان
منار : كلهم موافقين الموضوع الحين موقف على رايي
جود : طيب استخرتي
منار : ايه وحسيت براحه
جود : طيب وش تنتظرين بعد هذا كله
منار : خلاص بوافق بس مره مستعجل يبي يتزوج نهاية الاجازه وانا ما ابي
جود : طيب خلي زواجك بعد العيد حنا الحين بنهاية شهر 6 يعني تكون الشبكه نهاية الاجازه والزواج بعد العيد وكذا بيمديك تجهزين نفسك
شوق : حلوو كلام جود ها شرايك انت الحين
منار : اتوكلت على الله
عاد شوق قعدت تزغرت : كولولولولولولولولولولولولولولولولولويش الف مبروك يا الدوبا والله وبتتزوجين
انا ضحكت على كلام شوق : ههه العيال كبرت ههه
منار : جود اسكتي يا الدوبا
جود : والله انك تحفه وانت مستحيه ويالله مبروك يا عسل
منار : الله يبارك بحياتك وعقبالك
جود : اف يا دين محمد لا احد يقوول عقبالك
شوق : خلاص مو عقبالك عقبالي ارتحتي الحين
منار : ايه البنت تبي نايف ههه
جود : ههه نايف + شوق = اكشنات
شوق عصبت : فال الله ولا فالكم مالت عليكم انا اخذ الغبي هذاك وع وع وع بسم الله علي
جود : اقول تغير السالفه احسن لنا شرايكم نكلم البنات نقولهم يجون مو احسن
منار : الا وناسه غلا وهلا ونوف يالله كلميهم نشوف
ومرت الايام وتم موضوع منار ونواف وتحددت وقت الشبكه وراح تكون اخر الاجازه و انقبلت انا ومنار بجامعه الملك سعود قسم حاسب ومره فرحنا انا صرنا بقسم واحد
وقبل سفرتنا بيوم اللي كنا ناوين نروح مكه وجده نقعد هناك كم يوم
كانت نوف تكلمني ع الجوال : طيب جود وش السواة
جود : انت وش شاربه اليوم ابي اعرف
نوف : علمي علمك والله يعني اتجاهله يوم بدى يعطيني وجه صعبه يا جود
جود : اقول نوف يعني عشانه كلمك كم كلمه بتحنين وبتلينين له اثقلي وخليك على كلامنا اول
نوف تتنهد : طيب خلاص ابسمع كلامك الله يعين بس اهم شي كيف الاستعدادات
جود : خلصت انا من اغراضي وقبل ما تكلميني كنت مع خالتي وهي بعد خلصت تقريبا ما بقى لنا شي
نوف : السفره هاذي بتكون غير مرره
جود : ليش وش اللي متغير
نوف : اول شي انت اول مره تسافرين معنا ثاني شي منوو ونواف ههه حاسه السفر للاثنين بيكون لها طعم غير
جود : ههه صادقه الله يعين على منو
ولما وصلنا مكه طبعا كان التوزيع ان لكل عايله جناح و البنات لهم جناح والعيال بعد
ولما دخلو البنات جناحهم
غلا : يا ظهري تكسر من قعدة الطياره اف
شوق : نحمد ربنا انا بالطياره بعدين جينا بسياره على مكه والا كان علوم
غلا : والله انك صاد

مافي راد

قصه روعه متحمسه لها كثير
بس حبيت أسالك انتي المؤلفه ولا ناقلتها ومكتمله ولا لا

لا انا ناقلتها

حلوة الله يعطيكي العافيه