دونات سعوديه جديده صح بس النكهه غير ومن مطبخي وبالخطوات المصوره بعد

السلام عليكم ورحمه الله وبركاته
دونات سعوديه
ادري بتستغربون فيه دونات سعوديه ايه نعم وانا اللى اكتشفتها << ابن حيان
وذلك مناسبه با اليوم الوطني << الله يخلي الصدفه
المهم مالكم با الطويله
قلنا نحتفل مع الشعب وبنطلع منتزه وناخذ قهوتنا معنا
عاد هنا انا فكرت << لافكرت مصيبه
قلت ابي اسوي اكل يكفي الكل ولا يحتاج تبريد
المهم سويت سينابون قرفه با التوفي بعجينتي ^_^<<<< قسم با الله يا ناس انه خطيير بكل معنى الكلمه طري طراوه غير طبيعيه ووكله يقوطر توفي
وقريبا ان شاء ربي قبل مشئتي بنزله لكم
وسندوتشات
وحركات
مالكم با الطويله
ماكان فيه هيل علشان القهوه << وستي تروح تطحن هيل با الطاحونه
المهم وزحمه الشغل خلصت الدونات وقليتها
كنت بسويها بتوفي بس اللى نقصت القشطه ووصيت فيها ولمى جابوها << بعد جهدن جهيد راح الوقت مايمديني يا الله بعد اصب القهوه
وستي تروح تفكر ياربي وش اسوي للدونات قلت يابنت سكر مطحون
المهم عاد انا طاحنه في الطاحونه :ق1: هيل وباقي فيها شوي من الهيل
واحط سكر من دون ماادري ان الطاحونه باقي فهيها هيل من العجله واطحنه واجيب كيس واحط السكر واحط الدونات فيه واخلطهم واقعد اصفهم با الصحن واغلفها
واتجهنا نحو الممنتزه
راحوا البزران يحوسون وحنا جالسين نسولف << مسويه البنت الثقيله قاطه معهم
وفتحوا الاكل وقاموا ياكلون
المهم كلن قام يمدح ماشاء الله طعمها يجنن يبي لها قهوه صبوا صبوا << طن وش اللى يجنن مو لها الدرجه عاد
حسيت با الكميه تنقص قلت يابنت الحقي على عمرك وذوقي
قسم با الله يابنات اني ما اكذب عليكم ( من حلف با الله فصدقوه )
اجمل ب 7000000000 الف مره من العاديه
فيها طعم غير طبيعي وماتحسين انه هيل ابد
فيها نكهه مميز
انا ماصدقت قلت يابنت لازم اسويها مره ثانيه واتاكد هو الهيل اللى مسوي عمايله ..؟؟
ورحت سويتها وصورتها لكم با الخطوات المصوره
وطلعت مره حلوه
اترك لكم عجينه الدونات :
1 حبه بطاطس مسلوقه ومهروسه ( با الخلاط الله يعافيكم )
2 كوب كبير دقيق
كاسه سكر
كاسه زيت
ذره ملح
بيضه
1 م ص p.b
1م ص خميره
3 م ك حليب بودره
(كاسه سكر بودره
نص ملعقه هيل للتغطيه )
او شي نحط المواد السائله والبودره في طاسه عميقه ونخلطها لين تصبح بهذا الشكل
بعدين نطلع البطاطس من مويتها ونهرسها با الخلاط حتى تصبح ناعمه بهذا الشكل
بعدها نحط كوبين الدقيق فوق المواد اللى في الطاسه ونفركها لين تصير زي الرمل
بعدين خلي البطاطس لين تبرد تمام ونعجن فيها الدقيق
(في البدايه راح تحسون انها راح تحتاج دقيق بس لا تضيفون استمري في العجن
وسيمتص البطاطس كل السوائل وتصبح عجينه متماسكه بهذا الشكل
بعدها خليها تخمر ( ترى ماراح تنتفخ بشكل كبير بس انتي تحسين انها ارتاحت العجيبنه )
افرديها بشكل سميك وقطعيها وفرغي اللى جواتها
بعدها خمريها مره ثانيه ماراح تنتفخ بشكل كبير بعد لاتخافين ^_^
لمده اقلها نص ساعه
بعدها حطي زيت غزير في المقلاه وحطيه على نار متوسطه << ركزي على ها الشغله
لاهو حامي ولا هو بارد
وسط وخلي نارك ثابته طول فتره القلي
وابدي سقطي الدونات فيه بههدوء وجيبي الملعقه الكبيره << امحق وصف
وابدي اسقي الدونات من فوق با الزيت الحار لين تنتفخ تماما
صفيها من الزيت
وجيبي كيس وحطي فيه السكر البودره وملعقه الهيل وحركيه بسرعه
ثم طلعيه وصفيه في الصحن بيطلع بها الشكل
طعمه خيال بشكل مو طبيعي
بس انتبهي لا تخربينها وتاكلينها لحالك شاركي فيها العائله << طسي
ولاتخربين الدايت اذا انتي من صاحبه الدايت
واستمتعوا با احلى دونات من يدينكم الحلوه