رجعت من السفر

1. السلام عليكم يافراشات

السلام عليكم يافراشات

ولهت عليكم وايد احنا البارحه بس راجعين من السفر..أدري ماطولنا خمس أيام بس
عاد بحكيلكم بالتفصيل علشان اللي ناوي يروح نفس المكان يستفيد..طبعا للتذكير احنا سافرنا تايلند..ووصلنا مطار بانكوك.. الصبح ..وعلى طول رحنا اندور على هوتيل نسكن فيه بصراحه أحسن هوتيلاتهم اسمه صحارى وواحد ثاني اسمه غريس من ناحية النظافة ومن ناحية قربهم من المستشفى..احنا مالقينا حجز في الاثنين واضطرينا نسكن بواحد بعيد شويه عن المستشفى ..المهم حطينا اغراضنا وطيران على مستشفى بانكوك ..صحيح نسيت أقولكم ان هذا المستشفى هو أحسن مستشفى عندهم... طولت عليكم صح؟؟ ماعليه استحملوني شوي .. المهم ..دخلنا المستشفى وطلبنا مترجم وأخذونا على قسم العقم ..طبعا زوجي فحصوله السائل المنوي والحمدلله ماطلع فيه شي..وصل دوري..دخلوني على الدكتور وقعد يسألني ..كم صار لج متزوجه..وشو الأدويه اللي أخذتيها ..و..و..و..يعني استجواب عن كل شي..وطلب يسوي لي سونار مهبلي ..أنا استحيت وقلت له لازم الممرضة هي اللي تسوي لي السونار ..قال لي مامشكلة هيه بتغطيج كامل وبتسوي لج السونار بس أنا اللي بمسكه بعدين علشان أشوف الرحم... استسلمت للأمر الواقع وافقت وتوكلت على الله ..وطبعا المترجم دخل علشان يفهمني كلام الدكتور ..المهم طلع الرحم عندي سليم ولله الحمد ما عندي أي مشكله و شاشة السونار كانت باينة وواضحة مو نفس عياداتنا ..الدكتورة تقعد تمقل عينها في الجهاز ساعه حتى تقول النتيجه..الخلاصة ان الدكتور قال لنا فحوصاتكم سليمه لكن طلب مني أسوي أشعه صبغية بعد يومين من انتهاء الدورة ..وطلبت منه يعطيني منشط نفس الكلوميد يعني بس ما رضى قال لازم الأول أتأكد انه مايكون عندي انسداد بقناة فالوب..رجعنا من السفر واحنا مستانسين علشان فحوصاتنا سليمه وبنفس الوقت تضايقنا لأنا ماعرفنا سبب تأخر الحمل وفي النهاية اقتنعنا بأن الحكمة لله وحده ..وأن الرزق بيد الله ..وأن والطب والعلم مهما تطور بيتم ناقص.."وفوق كل ذي علم عليم" والله يرزق الجميع بالذرية الصالحة