رواية اصعب المتاهات

يؤؤؤؤؤؤؤؤؤؤؤؤؤؤؤؤه ماقلت لكم تراها منقولة للامانة

روايتي الجديده((اصعب المتاهات))دراما..خياليه..رومنسيه
بعدروايتي (طلبتك لا تحاكيني) وبسبب تشجيعكم وانتقادكم لي قدرت اكمل واكتب روايتي الثانيه هذه الراويه تختلف كل الاختلاف عن سابقتها وانشاء لله تعجبكم مثلها تتكلم عن الحب ولا شي غير الحب عن العشق والعاشقين اسرارهم خفايهم حكايتهم طبعا هذي القصه خيال الشخصيات الي فيها ترتبط مع بعضها بطريقه غريبه بتفهمونها مع الاحداث ولاكن لاتخلو من الواقع المرير الي يعيشه البعض ويحاول يخبيه عن الغير بسبب شعوره بالذنب او العار اطرحها لكم بقلب مفتوح وارجوا ان تتقبلونها بصدر رحب اليكم روايتي الثانيه............
((أصعب المتاهات)).....
طبعا روايتي هذي اخذت فكرتها من خاطره رائعه لوحده اسمها(امراتيه كيوت)واحب اشكرها على ابداعها في سطر هذه الخاطره الاروع ....
هذه الدنيا ليست الا متاهات
اينما اتجهت فترى متاهات
متاهات قد توصل في النهايه الى الصواب
ولكن!!
اصعب متاهه واجهتها في حياتي
واعظم متاهه تهت بها
هي متاهة الحب
الحب شعور واحساس
كلمات والحان
احرف ولغات
أعظم حب اعيشه في زمن اللا حب
حب اعيش في اركانها كطائر مجنون
او كطفل مسحور
الحب ليس كلمات
بل هو اعظم من ذالك
الحب وفاء واخلاص
شعور واحساس
الحب قلوب توهب
وعقول تسحر
فسحرها تعني عشقا
وانا في عشق الحبيب تائهة
ولكن ما نهاية هذا الحب وهذه العاطفه؟؟...
ما نهاية هذا العالم الوردي الندي؟؟..
ما نهايتها؟؟...
ما نهاية هذا العشق والهيام؟؟...
اخبروني بالله عليكم ما نهايته؟؟...
لو كل حاجة تنشرى بالدراهم **.* كان اشتريت العمر قدام لا يضيع
في حي من احياء الرياض الفقيره في بيت متواضع او اقل من المتواضع كانت العنود قاعده تغسل الصحون في المطبخ الا تسمع صراخ اخواها وامها توعدت على مثل هالاصوات الي كل يوم يتكرر قدامها هالمشهد....
حطت الصحون على المغسله وطلعت من المطبخ للصاله الصغيره وشافت امها تمسح الجرح الي على جبين اخوها...
ام بندر:انا كم مره قلت لك خلك من الهواش انت ما عدت صغيرعشان اعلم فيك
نواف:انا محترم نفسي بس هذا الكلب سالم يحب يستفزني
ام بندر:يعني هذي لو اول مره كان قلت مو متعود انت تعرفه من زمان لازم كل ما سمعت شي منه تقوم تتهاوش معه
العنود(وهي تجلس على الكنبه):بس الحكي الي يقوله سالم صدق يعني المفروض ما تزعل منه
ام بندر:يعني انتي ترضين احد يحكي عن ابوتس بالعيبه؟
العنود:والله عاد لا صار ابوي هذيك الساعه ابا انطق
نواف:انا قايل من زمان انتي ما تستحين لو ابوتس موجود كان عرف شلون يأدبتس انتي واختس ولا بندر مدلعكم
العنود:ابوي أي ابو هذا انا من وعيت على الدنيا ما شفته كله منقع بالحبوس
نواف(معصب):اقول إذلفي من قدامي لاقوم اتوطى ببطنتس الحين
العنود(قامت وهي معصبه):بروح وأفككم مني كلمة الحق في هالبيت ينزعل منها
طلعت عنود من الصاله ودخلت الغرفه الي كانت صغيره ولون صبغتها ازرق باهت وبعض الجدار متشقق ولون الصبغه نصه رايح...
العنود(وهي تجلس على السرير):اف
الهنوف الي كانت منسدحه على السرير ولافه طرحه على راسها وخدودها حمرا من الحراره....
الهنوف(وهي تحط ايدها على راسها ):وشفيتس تتاففين؟
العنود:اخوتس هذا بيفقع مرارتي
الهنوف:عادي ما تعودتي؟
العنود:هو الي ما تعود كل ما سمع كلمه عن ابوتس راح وسوى هوشه
الهنوف:ليه هو مو ابوتس مثل ما هو ابوي؟
العنود ما ردت عليها وقامت بتشغل المكيف .....
الهنوف:لا تشغلينه تراه خربان
العنود(بنرفزه):ليه بندر ما صلحه؟
الهنوف:يعني انتي شفتي هندي جاء وصلحه؟
العنود:يعني اليوم ننام بالحر
الهنوف:احمدي ربتس ترى.......
العنود(تقاطعها):ادرى بتقولين حالتنا احسن من حالة غيرنا حفظتها هالاسطوانه الي كل يوم والثاني تكرينها علي
الهنوف:ودامتس حفظتها ليه تخليني اقولها لتس؟
العنود طالعت فيها بعصبيه وراحت عند التسريحه الي كانت بعض ادراجها مفقوده سحبت مجله وجلست على السرير تقراها....
الهنوف:من وين لتس هالمجله؟
العنود:اخذتها من غاده ولا هذي حرام بعد؟
الهنوف:اول اشوفها بعدين اقول حرام ولا حلال
العنود:لا والله ارتاحي بس انتي يالله تقومين عشان تشوفينها ,صح الحراره الي فيتس ما خفت؟
الهنوف:خفت شوي
العنود:بندر قالي اذا ما خفيتي بيوديتس بكره للدكتور
الهنوف:بلا دكتور بلا مصاريف ماله لزمه انا بس اشرب عصير ليمون واصير زينه
العنود:بكيفتس
الهنوف:موالوقت تاخر ليه ما نمتي ؟
العنود(وهي تطالع الساعه الصغيره الزرقاء على الطاوله):الساعه 12
الهنوف:اجل نامي باقي اسبوع على الاختبارت
العنود:ما سوى علينا ثالث بنام تصبحين على خير
الهنوف:وانتي من اهله
قامت الهنوف بتعب وطفت المبات .....
**********************************
في ارقى احياء الرياض في حي العليا كا نت تمشي في القصر بدون هدف وهي حاطه سماعات ال i podعلى اذنها وتدندن مع كلمات الاغنيه ...
شافت جناح اخوها لمبته مفتوحه راحت عنده وطقت باب الغرفه جاء صوت اخوها من ورى الباب يقولها تفضل ....
اول ما دخلت شافت اخوها واقف عند المرايا ويعدل شعره كان شكله روعه بشعره الناعم والكثير وعيونه العسليه واحلى شي فيه خشمه الطويل والمتناسق مره مع شكله...
سديم(وهي تصفر):لا اخوي اليوم طالع معرس
فارس:فال الله ولا فالك
سديم:بل لهدرجه كاره طاري العرس
فارس:مو كفايه امي الي كل يوم تحن على
سديم:اقول فروس حبيبي وين رايح؟
فارس:رايح عند الشباب ليه؟
سديم:والله طفشانه خذني معك
فارس:اقولك رايح عند الشباب اخذك معي شسوي فيك؟
سديم:شرايك تلبسني ثوب ما راح يعرفون
فارس:نعم اقول روحي غرفتك بكره وراك مدرسه يا البزر روحي نامي
سديم:انا بزر؟
فارس:أي بزر الي يرحون المدرسه بزران
سديم :طيب يا فارس بعدين تقولي ضبطيني عند صديقاتك بس معليش
فارس:لا شدعوه سدومه حبيبتي بس والله رايح قعده كلها شباب وين اوديك
سديم:هالمره سماح بس المره الجايه لما اقولك طلعني يا ويلك...
فارس:افاا عليك على راسي والله سديم
سديم:ايه تسنع على تصبح على خير
فارس:وانتي من اهله
بعد ما سكرت سديم الباب راح فارس عشان يلبس الكاب ....
فارس:ول ذلتني على صديقاتها عاد كلهم يحنون
اخذ مفاتيح سيارته الرنج وجواله وطلع من الغرفه لبره القصر....
*********************************
قامت من النوم مفزوعه وجها معرق مع ان المكيف بارد سندت راسها على السرير وهي تتنفس بصعوبه وحاطه يدها على مكان قلبها رجعت شعرها على ورى وخذت نفس عميق عشان ترتاح شوي....
نزلت دمعه من عيونها يا كثر ما بكت ورموشها تبللت من الدموع وللحين ما جفت كل يوم تحلم بكوابيس حتى بعد موته ما تخلصت من الكوابيس....
طالعت الغرفه حولها بخوف تحس انه موجود فيها فتحت الدرج وطلعت القران قررت تقرا شوي اكيد بترتاح بعد ما قرت نص السوره رجعت القران الدرج وهي تحس بالراحه والامان ....
تعوذت من ابليس ورجعت حطت راسها على المخده خايفه تغمض عيونها وتشوف وجه مره ثانيه تكره وتركه كل تفصيل بوجه تحس باشمئزاز لمجرد انه يخطرعلى بالها تنهدت بعمق تحاول تخفف من الجروح والالم الي خلفها فيها غمضت عيونها بتعب واستسلمت للنوم....
*********************************
طلع من الفله مع صديقه وركب سيارته طالع ساعة الرولكس الي بيده وشاف الساعه 7 الصباح....
سلمان:بتروح البيت ؟
فارس:ايه راسي مصدع بروح احط راسي وانام
سلمان:ايه طبعا بعد ما شفت الحبيبه اكيد بتروح تنام
فارس:ههه أي حبيبه هذي حالها حال غيرها
سلمان:عاد هي تموت عليك
فارس:كلهم يمتون علي مو بس هي
سلمان:بس هي اكثر وحده طولت معها؟
فارس:لانها ما تحن ولما اقولها ابي اشوفك على طول تجي مو تقعد تتعذر مثل غيرها
سلمان:لانها هايته ما عندها اهل يسالون عنها
فارس:وانا اموت على الهيتات لا عندها ابوي يقولي لا تطلعين ولا امي تقولي وين رايحه وين جايه اريح راسي
سلمان:والله انك لعاب
فارس:افاا عليك اعجبك
طول فارس على صوت اغنية (هلي لا تحرموني منه ) وطلع بره اسوار الفله ....
*********************************
في اليوم الثاني على الساعه 12ونص الظهر وصلت العنود البيت وهي تعبانه وميته حر دخلت الغرفه وشافت المكيف يشتغل قطت العبايه والشنطه وطارت على المطبخ ....
العنود:هنوف المكيف يشتغل
الهنوف(وهي تقطع السلطه):ادرى اليوم جاء هندي مع بندر وصلحه
العنود(وهي تدور من الفرحه):ياي يا حبيلك يا خوي
الهنوف:أي والله محد مريحنا بالبيت كثره
ام بندر(وهي واقفه عند الباب):ليه انا موريحتكم
العنود والهنوف طالعوا بعض بارتباك .....
العنود:لا يمه بس الهنوف تقصد ان بندر هو الي يصرف علينا
ام بندر:ومين الي خله يصرف انا الي كبرته وعلمته لين صار عنده دراهم ولا هو قبل ما يسوى شي
الهنوف طالعت بالعنود بنرفزه من كلام امها ورجعت تقطع السلطه...
العنود:عن اذنكم
ام بندر:وانتي ما خلصتي الغدا؟
الهنوف(من دون ما طالع فيها):الا بس بخلص السلطه
ام بندر:اخلصي بعد شوي بيقوم اخوك من النوم
اول ما طلعت امها من المطبخ تنهدت الهنوف بارتياح امها مسيطره على الكل بشكل فظيع الا نواف ما تقدر عليه يمكن لانه طالع على ابوها ويذكرها بزوجها الي فقدت حنانه ومن يوم ما خذته ما تهنت معه ....
طلعت العنود من الحمام وهي تحس بانتعاش من الماي البارد لبست جلبايه عاديه جدا بس مريحه نشفت شعرها بالفوطه بشكل سريع ورفعته كان اسود وطويل ....
اول ما وصلت للصاله شافت اخوها بندر توه داخل ركضت له وسلمت عليه....
العنود(وهي تشيل اكياس البقاله من يده):هلا وغلا بالحامل والمحمول
بندر(بضحكته الحلوه):ههه نصابه مو لي عشان الجلكسي الي معاي
العنود من سمعت اسم الجلكسي جلست على الارض وفتحت الكيسه قعدت تحوس فيها لان لقت الجلكسي....
العنود(وهي تحط على جهة قلبها):اه حبيب قلبي
بندر:ههه انتي اصلا مجنونة جلكسي
العنود:في احد ما يدمن على الجلكسي
بندر:اقوول يا الخبله قومي شيلي الاكياس
العنود(وهي تشيل الاكياس وتوقف):صح نسيت اقولك مشكور لانك صلحت المكيف الله يعطيك العافيه
بندر:ويعافيك انا لو ودي كان اجيب لكم الدنيا كلها
العنود:فديتك حبيبي ما نبي من الدنيا الا سلامتك
بندر:الله يسلمك انا بروح ابدل وقولي لهنوف تحط الغدا
العنود:من عيوني الثنتين
ابتسم لها بندر ابتسامه حلوه وراح عنها .....
حطت الغدا على الطاوله وطالعت الساعه واستغربت بالعاده ما يتاخر كذا راحت المطبخ تجيب الجيك حق العصير وسمعت صوت الباب ينفتح عرفت انه وصل طلعت من المطبخ للصاله وبيدها جيك العصير...
لمياء:الحمد الله على السلامه شفيك تاخرت؟
ماجد:ليه يهمك اذا تاخرت ولا جيت بدري؟
لمياء:طبعا مو انت ......
ماجد(يقاطعا):لا تقولينها حنا متزوجين ولا كاننا متزوجين
لمياء ما عرفت ترد عليه وشغلت نفسها بانها تحط الكاسات على الطاوله.....
ماجد:انا بروح ابدل وانزل اتغدى وبلا كثرت حكي
طلع ماجد لفوق الدور الثاني وجلست لمياء على الكرسي تفكر بحالتها مع ماجد ,كل منك دمرت حياتي وانت عايش وبتظل تدمرها وانت ميت ..
انتبهت لماجد الي نزل وجلس على الطاوله بهدووء عدلت جلستها وغرفت له بصحنه وغرفت لنفسها كان الجو متوتر بينهم ياكلون من غير ولا حرف الصمت كان سيد الموقف بينهم ....
كان ياكل ويرفع عيونه يطالعها بين وقت والثاني ,حتى وانتي تاكلين هاديه وحلوه من دون أي حركه غلط ودي اقرب منك وامسح دموعك وانسيك جروحك بس مو بيدي كل ما اشوف عيونك البريئه اتذكر انتي شنو مهما كنتي نظيفه من بره الي فيك بيحسسني انك نجسه من داخلك وما اقدر اقرب جمبك...
********************************
الامارات- دبي
وصلت السياره الجاغور عند الشركه وجاء الحارس وفتح الباب .....
نزلت من السياره بكل غرور وكبرياء ...
الحارس:صباح الخير طال عمرك
ماردت عليه وكملت مشيها للشركه اول ما دخلت الشركه بدا الكل يسلم عليها كانت متعوده على سماع هالكلام كل يوم .....
طلعت بالاصنصير لفوق لحد الدور الي فيه مكتبها .....
السكرتيره:صباح الخير
فجر:صباح النور جيبي البريد بسرعه
السكرتيره:حاضر
دخلت السكرتيره للمكتب وسكرت الباب ....
فجر:شنو المواعيد الي عندي اليوم؟
السكرتيره:في موعد مع مدير شركة الحديد بس في وحده اتصلت اليوم والت انو بدا تاخد موعد
فجر:من أي شركه؟
السكرتيره:من شركة سعوديه لمشعل الجاسر
فجر(شد انتبها الاسم):متاكده اسمه مشعل الجاسر
السكرتيره:ايوه هي الت لي اسمو هيك
فجر قامت من الكرسي وراحت وقفت عند الدريشه تطالع المنظر كان مكتبها يطل على عمارات دبي الروعه بترتيبها وارتفاعها ....
فجر:عطيها موعد قريب
السكرتيره:ما في الا بعد اسبوع لانو....
فجر:اسبوع لا عطيها موعد اقرب من كذا م(بتفكير) خلي الموعد بعد بكره
السكرتيره:بس الجدول كتير مزحوم
فجر:مالي شغل شيلي أي موعد مو مهم وحطيها مكانه اهم شي بعد بكره
السكرتيره:حاضر متل ما بتامري
طلعت السكرتيره من المكتب بعد ما حطت البريد على الطاوله ....
فجر رجعت بذاكرتها لورى جت ببالها صورة امها وابوها شكلها وهي جالسه على الارض خايفه وترجف ودموعها من الخوف جامده بعيونها ما تنزل...
حست انها بتتعب اذا تذكرت واصلا المكان مو مناسب لذكريات مثل كذا حركت راسها تبي تشيل هالافكار من بالها ورجعت للمكتب تكمل شغلها ....
*****************************
على الساعه 4ونص قام من النوم بكسل عدل شعره وراح على الحمام يغسل وجه اخذ زيجاره ....
طلع من الغرفه وهو يدخن بيجامته البربري وهو يحس جسمه مكسر من الرقص والسهر امس نزل لتحت وهو يسمع صوت البيانو متعود يسمعه كل يوم بالوقت هذا ...
راح لغرفة الموسيقى وشاف الباب مفتوح .....
دخل فارس وهو يسمع صوت اخته الحلو والهادي وهي تعزف وتغنى مع الحان البيانو على اغنية (شو اخبارك _نوال الزغبي).....
بعد ما خلصت عزف سمعت صوت تصفيق وراها التفتت وشافت اخوها فارس يصفق لها ....
فارس:برافوا بصراحه نوال اذا سمعتك بتعتزل
ليان(بصوتها الدلوع):مرسي بس بليز من دون دخان
قربت عنده وسحبت الزيجاره وقطتها بالطفايه .....
فارس:حرام عليك توني بادي فيها
ليان:احسن اجل من اول ما تقوم النوم تدخين يا اخي ارحم نفسك شوي
فارس(وهويقلد صوتها):ارحم نفسك شوي انتي الي ارحمي بلاعيمك لا تتقطع
ليان:انا اغني هذا يسمونه فن لاكن انت وشو فايدتك
فارس:اقول لا يكثر بس خليتي الحرمه تتفرج على هواشنا
التفت ليان لناديه المدرسه حقت البيانوا الخاصه فيها ....
ليان:سوري ناديه
ناديه:لو مو مشكله على العموم انتي كتير متحسنه وصوتك كمان هلى انتي جاهزه للمسابقه
ليان:والله بس حاسه اني للحين مواوكي يبلي شوية تدريب
فارس:الحرمه تقول لك انتي جاهزه ولا انتي تحبين تتدلعين وبس
ليان:فارس لو سمحت خلك بره الموضوع
فارس:ييو ابركها من ساعه
طلع فارس من الغرفه ورجعت ليان تكمل تدريب مع المدرسه ....
بعد نص ساعه طلعت المدرسه من القصر وراحت ليان للصاله الداخليه وشافت فارس جالس يطالع التلفزيون...
ليان:سديم ما صحت من النوم؟
فارس:يعني تشوفينها جالسه معاي الحين
ليان:يمه منك اسال بس
فارس:اساله ماصخه مثلك
ليان:انا ما صخه طيب كله عند ماما
فارس:الحمد الله والشكر صرتي بالجامعه وللحين بروح اعلم ماما
ليان(وهي تقوم بعصبيه):الشرهه على لاني جالسه معك
طلعت من الصاله وركبت الاصنصير لفوق وصلت لجناح اختها ودخلت دقت باب الغرفه ما سمعت ردها طقت اكثر من مره بس بعد ما ترد....
ليان:اكيد ما ترد صوت المسجل واصل لين اخر البيت ....سديم(وهي تطق الباب)سديم سكري المسجل ...افف مستحيل تقوم
طلعت من الجناح ودخلت جناحها كان لونه وردي السقف والارضيه الجدران كان مثل ما يقولون عالم البنات المثالي...
دخلت لغرفتها وشافت لوليا الخدامه والمربيه الخاصه فيها ترتب المجلات على الطاوله...
مشت وجلست على الكرسي الهزاز وهي تلعب بشعرها بملل...
لوليا(بلهجتها اللبنانيه):شو بكي هيئتك كتير زعلانه
ليان:طفشانه
لوليا:شو رايك نروح على الجيم؟
ليان:لا
لوليا:طيب بنروح على السومينق بول
ليان(بتفكير):م لا ما بدي
لوليا:طيب شو رايك نطلع نتمشى؟
ليان:اوكي بس وين نروح
لوليا:الي بدك
ليان:اوكي
لوليا:انا باتصل بالسواق وانتي جهزي نفسك
ليان:اذا كذا بدق على ريناد ورنا يطلعون معنا
طلعت لوليا من الغرفه وسحبت ليان الجوال تدق علي ريناد....
رنا:هلا والله
ليان:هلا فيك شخبارك ريناد؟
رنا:انا موريناد انا رنا
ليان:صدق ملقوفه هذا مو جوال ريناد ليه تردين؟
رنا:اخاف ابوي عاد
ليان:يمه منك طيب شخبارك؟
رنا:تمام اخبارك انتي؟
ليان:بخير بتروحون مكان اليوم؟
رنا:ليه تبين شي؟
ليان:بطلع وودي تجون معاي
رنا:اول شي على وين؟
ليان:مم مدري شرايك بالفيصليه؟
رنا:اوكي بقول لريناد مع اني متاكده انها بتوافق
ليان:خلاص بمر عليكم لا تطولون علي؟
رنا:افاا عليك بخيلك ساعه تخسين بالسياره
ليان:وجع انشاء لله ترى والله ما امر عليك
رنا:مالت عندنا بدال السواق 3 نروح بواحد منهم
ليان:يعني امر ولا لا؟
رنا:لا احنا بنمر عليك
ليان:اوكي بنتظرك
رنا:باي
ليان:باي
سكرت رنا من ليان وطلعت بره الجناح تنادي ريناد.....
رنا(بصراخ وهي تطل من فوق الدرج):ريناد
ريناد(وهي تطالع فوق):خير شتبين؟
رنا:يلا قومي بنطلع
ريناد:على وين؟
رنا:الفيصليه مع ليان
ريناد:وع الدلوعه لا ما ابي
رنا:يلا نروح نستهبل تكفين
ريناد:افف اوكي بجي
دخلت رنا للجناح وراحت لغرفة الملابس تطلع لبس....
اختارت بنطلون جينزازرق غامق مقطع من عند الركبه وبلوزه زيتيه وفيها رسمه من قدام بالفضي...
رفعت شعرها الكيرلي البني حطت كحل اسود ومسكرا وقلوس لحمي...
ريناد(وهي تدخل الغرفه):يمه منك حق الطلعه جاهزه متى لبستي؟
رنا:اقوول روحي البسي لا تسوي لنا بنت خالتك سالفه
ريناد ما ردت عليها ودخلت لغرفة الملابس اختارت برمودا جينز فاتح وبلوزه صفرا فيها كتبات بلانجليزي من قدام....
حطت بشعرها جل لانه قصير بوي بس طويل شوي نازل على رقبتها ....
ريناد(وهي تعدل شعرها):افف هالشعر يطفش
رنا:ييو مسكينه انتي وشعرك الناعم
ريناد(طالعها بنص عين):شقصدك؟
رنا:ولا شي
ريناد:دقيتي على السواق؟
رنا:تبين اقوله باي سياره نطلع؟
ريناد:نروح بال Bmw
رنا:لا خلينا نروح بالكسز
ريناد:لا المره الجايه
رنا:اوكي بدق عليه
طلعت رنا وريناد من القصر وركبوا بالBMW السوداء الواقفه عند الباب ....
*****************************
انزعجت من صوت اختها وقامت من السرير بكسل ...
راحت عند المسجل وقصرت الصوت دخلت الحمام وغسلت وجها طلعت من الحمام وراحت عند المرايا تعدل شعرها....
فتحت الدرج الاول وطلعت منه بكيت الزجاير ودخنت زيجاره ....
طلعت للبلكونه وجلست على الكرسي وهي تطالع حديقة القصر الكبيره وهي تدخن ...
انتبهت لجوالها الي يدق وشافت اسم اختها على الشاشه...
سديم(بدون نفس):خير شتبين؟
ليان:سديم ليه ما قمتي لما كنت اناديك؟
سديم:مزااج ما ابي اقوم
ليان:طيب شرايك تطلعين معاي انا ورنا وريناد؟
سديم:لا
ليان:طيب ليه انتي ما عندك شي؟
سديم:لينوو لا تلوعين كبدي توني قايمه من النوم
ليان:سديم بليز اطلعي معنا
سديم:اقوول عاد على شحم
وسكرت السماعه بوجها ....
ليان انقهرت منها وضربت رجولها بارض بعصبيه ....
وصلت رنا وريناد لقصر ابو فارس ....
ادخلوا للقصر وسمعوا صوت التلفزيون في الصاله الداخليه...
راحوا عند الصاله وشافوا فارس جالس يطالع التلفزيون وكان سرحان....
رنا وريناد طالعوا ببعض وقرروا يطفرون فيه...
ريناد(بصراخ):هاي
فارس فز من مكانه من صوتها المزعج واول ما شافهم غمض عيونه ومسك راسه بعصبيه....
رنا(وهي تجلس جمب فارس):مرحبا الساع شخبارك ولد خالتي؟
فارس(طالع فيها منزعج منهم):كنت بخير بس من جيتوا اعتفست
رنا:افا والله هذا وحنا ضيوفك
فارس قام من مكانه من دون ما يرد عليها ....
ريناد:لا لا معقوله رنا ترضين يطنشك لا وشوفي شلون يطالع فيك يعني انتي ولا شي
رنا راحت عند فارس ومسكت ذراعه....
رنا:انت ها ليه ما ترد علي؟
فارس(وهو يطالع يده):بعد قاطه الميانه اشوف وماسكه يدي
رنا:ليه موماليه عينك؟
فارس:اقول بنات خالتي انتوا ليه جاين عندنا
ريناد:عاش مصرف
فارس يطالع فيها مستغرب ....!!!
ريناد:شفيك تطالع فيني كذا كاني من الفضاء
فارس:انتوا جاين عشان ليان صح
رنا:ايه بنطلع
فارس:حلو يلا روحوا لها
رنا:بل طرده محترمه
فارس:لا طرده ولا شي بس انا تعبان وانتوا ازعجتوني
ريناد:اقول رنا تعالي نروح فوق عند ليان
رنا(وهي تمسك يد ريناد):يلا
اطلعوا من الصاله للاصنصير وقعد فارس يضحك عليهم وعلى اسلوبهم....
******************************
كانت الهنوف قاعده تطالع التلفزيون والعنود تكلم بالتلفون صديقتها غاده....
ام بندر:اقول العنود سكري السماعه ماعندنا فلوس ندفع الفاتوره
العنود(وهي تحط يدها على السماعه):يمه هي الي داقه علي
ام بندر:اذا كذا كلميها
العنود ابتسمت على كلام امها وكملت سوالف مع غاده...
بعد ما سكرت دخل اخوها بندر البيت.....
بندر:السلام عليكم
الكل:وعليكم السلام
العنود:اقول بندر خالينا نطلع طفشانين
بندر:وين تبين تروحين؟
ام بندر:ماله داعي المصاريف الزياده اجلسي بالبيت احسن
العنود:يمه تكفين والله ملينا من جلسة البيت
الهنوف:أي والله يمه ما راح نشتري شي بس نتمشى
ام بندر:بكيفكم انا بجلس بالبيت
العنود:ها شقلت بندر؟
بندر(بتفكير):م طيب بس ما نطول
العنود:تامر امر
راحت الهنوف والعنود للغرفه يبدلون مستانسين عشان الطلعه.....
طلعوا من البيت وركبوا سيارة بندر هونداي رايحن على الفيصليه .......
******************************
*تتوقعون ليه فجر شد انتباهها اسم مشعل الجاسر؟
* تتوقعون شنو علاقة ابو فارس بام بندر وعيالها؟
*شنو اكثر شخصيه شدة انتباهكم وعجبتكم؟
>>>>>>>>>الج

انتظر ردودكم على البارت وابغى تشجيع مومحلل الي يزور بدون مايكتب رد اوكي

حبيبتي الروايه موجوده
في واحده نزلت بارتات منها