سعد و وعد وسند للكاتبة ما عدت أقوى على جروح

1. سعد و وعد وسند..


2. روايتي الثانيه.....


3. قصتي تجمع مابين الحب والغربه وظلم المجتمع..


4. هؤلاء هم ابطال القصه.. وراح تتعرفوا عليهم مع الأحداث..


5. بيت ابو متعب..


6. ام متعب : وليش يابنتي شنو سويت..


7. سعد : ماغيرت رايها؟


8. روان : لا..

مساء الخير لكل اعضاء المنتدى الحلوين...
بعد المتابعه والتشجيع الرائع اللي لقيته مع ورايتي الأولى .. جاتني فكرة روايه ثانيه لكنها مختلفه تماما عن الأولى..... وطبعا لاتبخلوا علي بآرائكم الحلوه..
وهذا البارت الأول.. قصير شوي..
(1)

سعد و وعد وسند..

روايتي الثانيه.....

سعد.. قد نعتقد ان الذين يضحكون امامنا هم اناس سعداء.. ولكنهم بالداخل تتغلل في قلوبهم التعاسه والبحث الدائم عن السعاده.. وقد يكونوا عاجزين وفقدوا القدره على مواصلة الحياة.. وماعجزهم الا عجز نفوسهم عن الاستقامه والأعتراف بالخطأ ونسيان الماضي..
وعد .. وعدت نفسك في يوم من الأيام بالسعاده.. وقد تكون رسمت احلامك وحاضرك ومستقبلك معه.. ولكنه جاء ومزق لوحات ماضيك ومستقبلك وتركك معلقها في الحاضر.. تبكي على الماضي وتخشى المستقبل وبقيت تدور في المجهول..
سند .. كل من فينا ولد ولديه سند ماهو الا شهادة الميلاد كتب فيها اسمه واسم والده وعائلته او قبيلته اللتي يفخر بها.. ولكن ماذا يفعل من ولد بدونهم.. ولا ذنب له في ذلك.. وقد يكون مجرد ورقه اذا ان هذا السند لايدل على شخصيته واخلاقه والتزامه تجاه ربه.. ولكن للأسف هذا حكم المجتمع... يحكم عليه ان يعيش غريبا في بلده..

قصتي تجمع مابين الحب والغربه وظلم المجتمع..

هؤلاء هم ابطال القصه.. وراح تتعرفوا عليهم مع الأحداث..

وعد.. بنت في ثالث ثانوي .. البنت الوحيده عند ابوها .. ابومشاري.. اللي هو موظف كبير وله منصب ومعروف زوجته سوزان لبنانيه انسان عصامي بنا نفسه بنفسه متحرر في تفكيره ومن الطبقه الراقيه تزوج سوزان في احد سفراته للبنان .. عندها اربعه اخوان.. مشاري الكبير 35.. متزوج من بنت عمه الهنوف وعندهم ولد وبنت.. فارس 7 سنوات ولمى 2 .. نايف.. 30 متزوج من سنتين من بنت خالته ريم.. وماعندهم عيال.. خالد 24 سنه في جامعة الملك فهد للبترول والمعادن السنه الأخيره.. ومسميه له بنت عمه روان.. وليد توأم وعد.. بالصف الثالث ثانوي ادبي.. مايحب شي اسمه مدرسه.. عكس وعد الدافوره مثل مايقول.. علمي وتاكل الكتب..
اوصف لكم وعد... بنوته ناعمه.. عيونها رماديه طالعه على امها.. وشعرها ناعم وطويل لنهاية ظهرها.. ولونه اشقر رمادي.. بشرتها بيضا وخدودها حمرا.. خشمها طويل وصغير وشفايفها مثل حبة الكرز في لونها وحجمها.. دوم تفكر في سعد ولد عمها .. مسميه لها من لما كان عمرها 10 سنوات.. خجوله جدا.. ومستحيل تكلمه.. بعكس روان اخته اللي كانت تكلم خالد في الجوال.. ودوم تقول لها كلميه تعرفي عليه.. وهي ماتوافق.. مثل ماقلت لكم.. دلووعة ابوها ومستحيل يرفض لها طلب مهما كان.. وزعلها عنده في الدنيا.. ويعطيها كل اللي تبي ولو على حساب نفسه..

بيت ابو متعب..

ابومتعب.. الأخ الوحيد لأبو مشاري .. موظف في ارامكو.. على وجه تقاعد.. عكس اخوه ابومشاري المتحرر.. انسان متزمت ومتمسك بالعادات والتقاليد ولو كانت ماتنفع لهذي الأيام.. عندي 3 اولاد و3 بنات..
متعب.. 37 متزوج من بنت عمته اشواق وعنده 3 عيال بدر وبندر وبدور.. سعد آآآآخ منه بس.. 26 سنه.. خطيب وعد.. طويل وعريض.. يحب الرياضه.. دووم كاشخ وعيونه ذباحه.. خشمه سلة سيف.. والسكسوكه محليه وجهه.. شعره ناعم واسود.. ام عيونه زايغه.. كل بنت يشوفها يذوب عليها.. ولا يفكر في وعد حاط بباله هي لي مهما كان.. ياسر 22 سنه في الجامعه .. شاب خجول جدا..الهنوف..زوجة مشاري.. رزان 20 في الجامعه بعد تخصص انجلش مخطوبه لولد خالها منصور وهو مسافر يدرس الخارج .. روان.. في ثالث ثانوي بعمر وعد وصاحبتها الروح بالروح.. جريئه شوي.. تموت في شي اسمه خالد.. ولما نجحت في اول ثانوي اشترى لها جوال وعطاها اياه عشان تكلمه وهي ماصدقت خبر.. طبعا من ورا ابوها لأنه ممنوع البنت تاخذ جوال قبل الجامعه..
في احد احياء الدمام الراقيه..
في بيت ابو مشاري..
وعد مع روان في الصاله فوق..
وعد : شنو قاعده تسوين؟
روان وعلى حظنها لاب توب وعد.. شنو اسوي داخله الشات..
وعد : نطت جنبها وعينها على الشاشه.. يامجنونه.. تسولفين معهم في العام؟؟
روان : ايه شنو فيها..
وعد : تكلمين شباب.. وخالد..
روان : وهي مركزه على الشاشه.. شفيه خالد.. يعني تبين تقنعيني انه مايكلم بنات في النت.. يااختي عيشي حياتك بكره تتزوجي وسعدوو يصك عليك..
وعد : ضربتها على جبتها.. اسمه سعد..
روان : ماترضى عليه.. مالت عليكم انتو الأثنين..
وعد : للحين ابوك مااخذ لك لاب توب؟؟
روان : من وين ياحسره.. هو جوال مااخذ لي.. ورفعت وجهها.. الله يخلي خالد بعد عمري..
وعد : الله يعينك بصراحه مااتمنى اعيش مثلك ابد..
روان : اقول .. لا تحطي على الجرح ملح..
وعد : لا سكر..
روان : بايخه..
وعد : مثلك..ههه
احم احم.. عندكم احد..
وعد : اقول اخوي.. لاتسوي نفسك ماتدري انها هنا..
روان : وهي تعدل شيلتها على شعرها..
دخل خالد : السلام عليكم..
وعد وروان ..وعليكم السلام..
خالد : يطالع روان وينزل عيونه.. شلونك بنت عمي؟
روان : وهي منزله راسها.. الحمدلله..
وعد : تطالعهم اثينيهم.. يمه من الحيا..
خالد : عن اذنكم ومشى لغرفته..
روان : اذنك معك.. رجعت على ورا وتنفست نفس طويل.. وهي تلعب في شعرها..
وعد : ايوه يالرومانسيين..
روان : ضربتها على كتفها.. احسن منك ياللي تستحي..
وعد : لا حبيبتي .. مستحيل اكلمه قبل مايصير شي رسمي..
روان : خلي خجلك ينفعك..
في مجمع الظهران..
سعد : جالس في كوفي شوب.. اقول سلطان(خويه).. ناشفه اليوم..
سلطان : مع ان اليوم الخميس اجازه.. لكن... شوف هذيك..
سعد : وينها.. ايه اللي عندها كيس احمر..
سلطان : ايه.. اسمع اللي معها لي..
سعد : وهو يقوم.. مثل ماتبي.. انا عجبتني ام الكيس الأحمر..
قاموا ومشوا ورا البنات.. طبعا البلوتوث مشغل..
سعد : ياراعي الأحمر.. عذبت قلبي والله..
البنت : ضحكة دلع..هههاي ولفت عطته نظره..
سعد : انصدم.. متلثمه وعيونها كلها مكياج.. وعطرها بيخنقه من قوته.. واظافرها ملونه بأحمر صارخ.. وهو يرفع حواجبه.. البلوتوث ياحلوه..
البنت : ملكة الدلع.. ارسل لها رقمه وقبلت..
سلطان : عطنا وجه ياحلو..
البنت الثانيه : مشت ولا كأنه يتكلم.. تقول لخويتها.. انتي ماتستحين..
البنت : وش فيها الدنيا..........
في بيت ابومتعب..
ابومتعب : وهي يسحب التلفون من يد رزان : منو تكلمي صار لك ساعه؟؟
رزان : وهي ترجف.. زميلتي في الجامعه..
ابومتعب : وليه مطوله؟؟
رزن: ...............أأأ
ابومتعب : مسك كتفها.. تكلمي لا اذبحك..
رزان : تدري انا امس كنت مريضه وغبت.. اسألها عن محاضرات امس..
ابومتعب : وهو يهز كتفها.. مره ثانيه ان شفتك ماسكه التلفون بذبحك.. ورماها على الأرض وراح..
رزان : وهي حاضنه نفسها وتبكي.. متى ترجع يامنصور وتريحني من هذا العذاب..
جات لها امها.. مسكت يدها : قومي يابنتي..
رزان : وهي تقوم.. وتتكلم وتبكي.. كله منك..

ام متعب : وليش يابنتي شنو سويت..

رزان : من الأول سكتتي على ظلمه لك ولنا وشوفي وين وصل فينا الحال.. يضربني وانا عمري 20 ومخطوبه.. ةوهي رايحه فوق.. متى اتزوج وارتاح من هذا البيت اللي كله نكد..
ام متعب : تطالعها وهي رايحه.. الله يهديك يابنتي ويوفق لك.. جلست وحطت يدها على خدها.. ش سوي يابنتي هذا نصيبي.. ولد عمي وخالتي.. واهلي لو شكيت لهم من الأول قالوا المره مالها الا بيت رجلها.. جا ابومتعب وهو يتنفس بسرعه.. بنتك الصغيره وينها؟
ام متعب : في بيت عمها..
ابومتعب : للحين (الساعه 9:30)
ام متعب : الليله الجمعه.. وماوراها مدرسه..
ابومتعب : كلمي اخوها الزفت سعد قولي يروح يجيبها.. اذا ماجات الساعه 10 جنازتها الليله انتي وهي.. وطلع..
ام متعب : مسحت دمعتها .. واتصلت لسعد.. يمه وينك؟
سعد : وهو يركب سيارته.. جاي البيت.. سمي يمه...
ام متعب : سم الله عدوك.. اختك في بيت عمك جبيها ولا تتأخر تعرف ابوك..
سعد : ابتسم..ههه... طيب ..
دق على بيت عمه..
ردت وعد : الو..
سعد : يالبى هالصوت..
وعد : احمر وجهها.. ه...هلا س..سعد..
سعد : ههه هلا بك.. شلونك..
وعد : الحمدلله.. هذي روان.. وعطت روان التلفون..
روان : وهي تاخذه... يعني متى راح تبطلي خجل..
وعد : كيفي.. واخذت اللاب توب من حضنها..
روان : هلا سعد..
سعد : هلا فيك.. شفيها بنت عمك..
روان : وهي تطالع وعد,., تستحي..
سعد : ههه طيب انا جاي لك الحين.. خليك جاهزه..
روان : تو الناس..والليله الجمعه..
سعد : اوامر الوالد..
روان : اوف.. طيب..
بعد ربع ساعه.. وصل سعد..
روان وهي تسحب وعد.. خليه يشوفك ياخبله..
وعد : وهي تسحب يدها.. مابي مابي..
روان : تركت يدها.. وهي تعدل الشيله.. ياغبيه.. انتي باقي لك ترم واحد وتخلصي ثانويه.. وهي راح يتخرج خلال تسعه شهور يعني مسألة وقت.. راح يشوفك اليوم او بكره..
وعد : كل شي في وقته.. شنو راح يقول عني.. مااستحي..
روان : هذا انا اكلم اخوك.. يعني مااستحي على قولتك..
وعد : انتي بكيفك.. وتكتفت..
روان : براحتك.. اسمعي نصيحتي وكلميه على الأقل في المسن.. عشان تتعرفي عليه..
وعد : اتعرف عليه ايام الخطوبه..
روان : اووه وانا ليش اصدع راسي معك كل مره نفس السالفه.. يلا بايو
وعد : وهي تسكر الباب.. باي..
سعد : هلا وغلا شلون بيت عمي؟
روان : تطالعه بنظره.. ههه قال بيت عمي قال.. وعد بخير..

سعد : ماغيرت رايها؟

روان : لا..

وعد.. وقت النوم.. بدلت ملابسها ولبست دشداشه وردي فاتح.. للركبه.. نامت على سريرها الكبير وهي حاضنه مخدتها.. تتذكر سعد لما شافته من شوي.. يالله يجنن.. اكيد يفكر فيني الحين مثل ماافكر فيه.. غمضت عيونها وهي تتخيل يوم عرسها على سعد........
سعد.. بعد ماكلم البنت اللي رقمها.. فقل جواله الثاني (الخاص بالبنات) ونام.. حط يده ورا راسه.. وبعدين يعني.. قرفت من البنات والترقيم والمعسل والاستراحات والشباب وكل شي.. غمض عيونه..آآآآآآآآآآه,, حاسس بضياع,, وعد بنت عمي.. مااستهالها.. البنت خجوله جدا.. وانا.... ضحك على نفسه..
سند.. تعبت من الغربه.. ودي ارجع البلد.. لكن ارجع لمنو؟؟؟