شكرأ يازحمة لقد كشفتي حالهم

السلام عليكم
كيفكم يافرشاتي
كل عام وانتم بخير
ابقولكم قصتي صارت معاي امس المغرب
اولا انا من سكان الرياض
كنت رايحه مشوار
المهم صادفتني زحمه بالطريق وانتم عارفين الزحمه وش تسبب قلق وتوتر
اضطرينا ندخل وسط حي حتى نتلاشى الزحمه
دخلنا هذا الحي الهادى ماتمر فيه الا سياره او سيارتين بالاكثير
تخيلو مين شفت على الرصيف في هذا الشارع
حرمه
وربي شفت حرمه
حرمه تبكي طلبت من السائق الوقوف ابشوف ايش سالفتها
اعطيها صدقه
المهم نزلت عندها وعطيتها فلوس
وبعدين رحت ابركب السياره غيرت راي رجعت لها اسألها
انتي ليه جالسه هنا في البرد والليل
وفي هذا المكان بعد
مافيه ناس تمر ولا شئ كيف تحصلين على الفلوس وانتي هنا
قالت لي ايش اسوي بيتي قريب
وانا متعففه ومااطر او اشحذ
ومقدر على هذا
تدرون وش عطتني
عطتني كرتوون علاج احد عيالها
قالت انا مقدر عليه ودايما اجي هنا اجمع لي قيمه العلاج
علاج سرطان الكبد الله يبعدنا عنه ويشافي ولدها
اخذت منها الكرتون وانا خانقتني العبره
ورحت ادور لها على العلاج بالصيدليات
حصلت عليه الحمدلله ورحت لها عشان اعطيها
قبل اوصل لها عرفت سيارتنا وقامت تدعي
وتبكي قسم بالله كسرت خاطري
عطيتها العلاج
وعطيتها قيمته عشان اذا احتاجت
وقلت لها خلاص
لاعاد تجلسين هنا وان شاء الله الناس ماتنساكم
وقالت الله يفرج همك مثل مافرجتي همي
تضايقت من حالها
وصرت افكر
واقول ليه العلاج مايكون ببلاش
الناس اللي على قدهم كيف تفور قيمه العلاج
مو حراام
من المفترض واللازم والواجب على المستشفيات العلاج مجانا والادويه برضو
واذا احتاج المريض الى سفر يسفر مافيها شئ
وربي حرام اللي قاعد يصير
المهم
قبل اروح من عندها
اخذت رقمها وقلت
راح انشر قصتكم في النت
واكيد فيه ناس تبي الاجر والثواب
اللي حابه تساعدها
ترسلي على الخاص اعطيك رقمها
واللي ماتقدر
على الاقل تنشر هذا القصه
مع رقم الحرمه
ولها الاجر باذن الله