طلاق وسحر وطلاق ثاني فضفضة من قلب مغلي بالهموم والآهات كلكم ادخلوا وقولوا لي حل

1. يارب ارحمني يارب ارحمني يارب ارحمني ..

بسم الله الرحمن الرحيم
أخواتي
السلام عليكم ورحمة الله وبركاته
كثير منا يحس إن عنده هم اكبر من غيره .. وكثير منا يحس إن مااحد حاس فيه
وكثير منا يتمنى أحد جنبه ويحكي له كل مايحس فيه من مشاعر واحاسيس ..
صح الدنيا فيها الخير وفيها الشين لكن الخير يخص والين يعم ........
حبيباتي
ابحكي لكم قصتي واعتبروها فضفضة عجزت ألقى نفسي حل عايشة في دوامة ..
أبغى حل ينسيني الهم يمسح دموعي .. الحمد لله عندي حسن ظن بالله لكن الشيطان والمشاكل اللي حولي ماهي مخليتني بحالي ..
اسمعوا مشكلتي وبالأحرى قصتي .. انا اول مرة انشرها هنا لأني ارتحت لكم صح مااشارك كثير لكن اقرأ كثير من المواضيع خصوصا في هذا القسم ...
انا قبل ثمان سنوات تزوجت وقعدت معه سنة وشوية وطلبت الطلاق عشانه فصل من وظيفته وتاجر بالحرام .. وبعد كذا اكتشفت وجود سحر عندي جاتني حالات صرع وبكاء وخنق وضيق والآم مالها اول ولا آخر لدرجة كرهت المستشفيات تى الوالد آخر مستشفى قال الدكتور بنتك مافيها شيء ودوها لطبيب نفسي .. عشت تايهة سنة كاملة التجأت ربي ادعي في كل وقت وكل حين إلين شفت احلام والقى احد في الحلم ينصحني بالرقية وان فيني سحر ماصدقت بكيت من قلبي دم .. قلت اقرأ البقرة قريتها بس الألم والتعب مايخليني احس بتدبرها ولا أحس بشيء بكلماتها لدرجة إني مااصدق إني خصلت قرايتها .. تعبت حيل ووداني الوالد لشيوخ لأنه ماهو مصدق ابدا واكثر من واحد اكد السحر .. وبعدها التجأت لربي يفكني من هالسحر ويشفيني وبعد ماعاناة سنتين من العلاج الحاد والسفر والتعب والضرب لدرجة ماتتصوروها عزلت الناس كلها والله والحمد لله بعد هالصبر حسيت بشفاء صح باقي شوية لكن الحمد لله اقدر اقرأ قرآن (ماشاء الله لاقوة إلا بالله) هناك فيه اشياء تنغصني مثل حركات في جسمي لاشعورية تصير لي مثل هزة في البطن وخنق في الحلق وتجيني بأي وقت عشان كذا انحرج منها .. بعد كذا تقدم لي عريس ثاني وكان متزوج قلت للوالد انا شرطي ان مرته توافق وتكون على علم بهالزواج وقالهم الوالد عاد مدري عن الرجال قال لها او لا .. المهم جات هي وباين عليها الغيض والقهر .. طيب انا شرطت موافقتك ليه هالغيض .. ........ بس زي ماقلت يمكن ماقال لها .. المهم تزوجت وقال لي يوم من الأيام استغربت من شرطك قلت انا ماابغى ادخل على بيت واخربه انا ماايغى مشاكل قال انا الحرمة اللي تعصيني مالها إلا الطلاق استغربت من تفكيره .. قلت (إن كيدهن عظيم) انا بس زي ماقلت ما ابغى مشاكل واسأل الله لي ولها التوفيق .. كان عنده الرجال هو اللي يتحكم بكل شيء والمرأة ضعيفة وحيلتها الدموع وتفكيره سطحي ورجال متسلط المهم عاملته والله العظيم كزوج وعاملت اولاده كاولادي .. المهم تغير علي يخاصمني يضربني زوجته ترسل اولادها وتنكد علي عيشتي وهي تخرج بكيفها واذا بتنام عند اهلها تسلط احد عيالها عندي ووين في غرفة نومي وانا بيتي ماهو مأثث رفض يأثث يعتذر وصار الأولاد يفتشوا بكل شيء كلمته انا مابغى احد يدخل غرفة نومي قال لاتطردي اولادي واعتذري لأمهم ومن هالكلام في الآخير طلقني ورماني بعد الضرب والشتم حتى قال المفروض ابوك يبني لك غرفة فوق السطوح يحطك فيها يارب انا متعلمة وبنت ناس ومن طبقة غير عنه .. وماقصرت حتى الحمل حرمني منه ويقول هالكلام وزوجته حامل ذاحين طيب ايش اللي غيرك علي وبعد شهور قليلة تطلقني انا ايش ذنبي .. هذا طلاقي الثاني .. وطلاق ظلم وربي تخيلوا يجيب لي بنته عمرها 10 سنوات يقول اعتذري لها ولا انت طالق بالثلاث .. وهذا كلامه تغير فجأة وصار كلمة الطلاق على لسانه وآخر مرة خرجت بكرامتي قلت له انت تظلمني قال ادري قلت خلاص مادام ماتبغاني وتعاملني بالمعالمة خلاص اروح لأهلي وينتهي كل شيء بيننا فرح كثير وقال خلاص روحي ولا ابغى منك شيء وبعد مارحت ارسل ورقة الطلاق الله لايوفقه لادنيا وللا آخرة قسما بالله يابنات ماتدرون قد ايش انظلمت معاه .. عروس وتطلق طييب ايش ذنبي .. وربي بنته تنام عندي وتتبول في غرفتي وانتم بكرامة وانا استحمل من غير الثانية اللي تجيني بملابسها القذرة وامها لاهية مع الجيران لا وحامل ماحرمها وانا حتى المصروف حرمني ليه تغير فجأة ... يارب .
ذاحين في بيت اهلي في شهور عدتي وانا ماني مصدقة اللي جرالي .. ابكي دم كل ليلة اتذكره واتحسب عليه والله اذا زوجته مسوية شيء عساه ينقلب عليها لأن اول الأشهر روعة معاي وفجأة تغير .. يارب .. ترحمني ...
طفشانة ضايقة في الدنيا .. وفوق كل هذا مااحد حاس فيني ابكي لوحدي واجلس لوحدي صح اضحك معاهم واهرج احيانا لما اخف شيء لكن الهم يبقى في القلب ..
ودي اونس نفسي طلبت الوالد يقدم لي على وظيفة يقول مو لازم .. طيب ليه مو من حقي الوظيفة قدمي على الديوان وبس ليه طيب شهاداتي وين تروح انا اكثر وحدة من اخواتي مهتمة بالعلم واخذت بعد الجامعة اكثر من خمس دورات ماشاء الله وين احط الشهادات .. يارب ارحمني ...
احتاج مصاريف خاصة احتاج مجتمع اونس نفسي معاه ومااحد حاس فيني اخواتي متزوجات واللي عندي اصغر مني بكثير لا وحدة منهم تقول تفكيرك مثل جدتي طيب ايش ذنبي اذا لي زمن اكثر من اربع سنوات مادرست ولا توظفت ولاشفت التغييرات اللي في البنات ..

يارب ارحمني يارب ارحمني يارب ارحمني ..

ام ي ودي اتقرب منها وهي ماتقصر تدعي لي الله يخليها لي ويرزقني برها بس احيانا افقد اعصابي لما تتدخل في جلوسي على النت او كلامي بالجوال مع إنه نادر جوالي يرن لأن رصيدي صفر اغلب شيء بس اخليه بيدي عشان الاناشيد .. والملاحظات اللي احطها فيه ... والنت اونس نفسي فيه ماهو عيب ..
طيب ليه بس انا اللي امي تخاصمني على النت والجوال وصحباتي عادي يارب ارحمني ..
طيب انا مسامحتها ومن حقها تسوي اللي تبي انا ابغاها تحس إني مو صغيرة انا عمري بالثلاثين ليه تعاملني مثل اختي اللي فوق 15 ... يارب ارحمني
يعني الوالد رافض الوظيفة ... ورافض اني اقدم على الخاص او التعاقد او ادخل تحفيظ
طيب ليه .. ايش ذنبي .. اختي اللي قريبة من عمري مع زوجها واولادها واذا جات احس تفكيرها غير وهي تقول انا تفكيري مثل جدتي .. طيب إذا انا مااعرف فهميني .. يارب ارحمني
بنات وربي ابكي مدري ايش اقول
وحدة تقول لي من اهلي حظي ماهو زين طيب ايش ذنبي يارب ارحمني
بنات قولوا لي ايش اسوي
خلاص بس ابغى وظيفة وربي محتاجتها نفسيا وماديا ...
وايش اسوي مع امي ومع اخواتي
لاتقولوا جاملي تعبت من المجاملة ...
صح إني توي طالعة من زواج فاشل لكن ماانكر امنيتي بضمة طفل .. يارب ارحمني وارزقني
يارب ارحمني .. يارب ارحمني يارب ارحمني
اختكم اللي حاسة بمرارة الألم والآه
ألماسة الحجاز