قصة ابشركم انخطبت

ابشركم انخطبتبسم الله الرحمن الرحيم
(ابشركم انخطبت)
كنت قاعدةاجوف التلفزيون ... متابعة مسلسل ..
ويااه مشهد زواج وحدة من الشخص اللي تحبه من زمان ...
قلبت القناة على قناة ثانيه ...
لقيت عرض أزياء فساتين عرايس... قلبت لقيت خطوات وضع مكياج العروس ...
سكرت التلفزيون
التفت على ابوي اللي نسيت تماما انه كان حذالي ... قال لي ابوي :
خير إن شاء الله يابنتي؟! شو فيج؟! عسى ماشر؟!
انا تلخبطت ساعتها وفتحت له التلفزيون وقعدت ساكتة ...
هيه اكيد بسكت شو اقول؟ اقول له ابغي أعرس ؟؟؟ (يعني اتزوج بالعربي) ...
اقول له انه ربيعاتي اغلبهم تزوجوا؟؟؟
وإلا أقول له إني تمنيت أكون مكان بنت خالي في كوشتها وفي الزفة أمس ؟
يقطع الدراسة وسنينها ياشيخ ...
اوف والله غثا يا بخت جداتنا ماتطق الوحدة العشر سنين إلا هي مخطوبة
وعلى الثنعش اعرست
وان وصلت البنت ثمنطعش ما اعرست قالوا عانس!!!
هذايلاج البنات اللي عايشين صح مب حنا اللي نعجز ونوصل سن اليأس ما اعرسنا ...
أخ ابوي الله يفتح عليك وتخليني اعرس ... وتفكني من الدراسة ...
ويكوم كنت انا غارقة في الهواجيس ويرن التلفون ويقطع حبل افكاري ...
طالع الرقم ابوي وقال رقم غريب ... رد بلهجة رسمية:

• وعليكم السلام .....

الله يسلمك .....
الحمد لله بخير .....
هيه أنا أبوفلانة (منيب قايلة لاحد عشان محد يعرفني ويضحك علي) ....
لا منت غلطان انا هو ...
ماعليك زود الله يسلمك ...
من معاي ياخوي ماعرفتك ...
والنعم .... تفضل شو السالفة اللي تبيني فيها ؟....
لا ماني مشغول ...
لهالدرجة الموضوع مهم ؟!...
تفضل تكلم شغلتني ...
والتفت ابوي علي وعطاني نظرة غريبة
انا ساعتها قرصني قلبي مب من ردود ابوي بس من نظراته الغريبة
رد ابوي على المتصل : شو فيها زود طيب ؟...
لا بس مافيها أي ميزات عن الباجي ...<<<كنت برفسك يا بوي واخذ السماعة منك واكلم الريال ناشر غسيلي حتى عند الرياييل
رد ابوي على المتصل : انزين وبعدين ...اها ....
انزين شو اسمك الكامل ؟
شو تشتغل بالضبط ؟
انزين منو رمسك عني وعطاك رقمني ؟
لا الموضوع يا ولدي مب بهالبساطة ....
العملية مب بيع وشرى وبس ...
الواحد لازم يسأل ويحرص قبل يقدم على أي خطوة ...
لا موضوع انك تيي لبيتنا خليها بعدين ...
لين أسأل عن كل صغيرة وكبيرة ...
لين ما اكتفي من السؤال وأخذ المعلومات
اللي تكفي بتصل عليك تيي ونتفاهم ويكون خير إن شاء الله
انا كنت اتابع حركات ابوي وانا متشققة من الفرحة ...
أخيرا انخطبت وبتزوج مثلي مثل غيري ...
يوه أخيرا بلبس فستان أبيض منفوش
أخيرا بطلع أجهز واقضي للزواج ...
بسوي زواج كبير مرة
وبحط زفة ريميكس وطرحتي مابيها خليجية بخليها مبتكرة ...
منيرة ما عازمتها هي وخواتها
ماعزموني الأسبوع اللي طاف على الحفله اللي سووها ...
وحصة صديقة امي ما عازمتها بعد مطوعة مالي خلقها تحوسني لو حطيت اورج ...
وبشتري أغراض واشيل واحط واخطط ... بيصدع راسي بس ولو لذيذ هالصداع ...
يوم سكر الخط ابوي التفت علي وهو مبتسم ابتسامة تعجب وهو ساكت ... قلت :

• هاه بنتي ؟ متى بي يشوفني ؟
• منو
• هذا اللي خطبني تو
• وشو؟!
• خطيبي اللي تو
• شو خطبج انتي مصدقع عمرج
• هيه الي كنت ترمسه

مثل رديت ولد أم مساعد العام
للحين تراها حازة في نفسي
ترا هالمرة بضرب عن الدراسة ...
والا الاكل مقدر اضرب عنه ...
ويع ابوي بعنس من تحت راس فعايلك بخطاطيبي ...
والرسول حث على تزويج من ترضون دينه وخلقه ...
وهذا قايل قلبي انه أجودي
ترا ما اعرفه بس اتوقع انه جيه...
وترا العرس أهم من الدراسة عشان الجنس البشري ماينقرض ....
وبعدين من قال لك اني ما بكمل دراستي بكملها والله
حسيت ان عيون ابوي بتطلع من شدة علامات التعجب اللي في وجهه
بعدين انفجر من الضحك

• هي انتي وين رحتي حدك حدك لا تشطحين !!!
• شو اشطح ؟!

هذي الحقيقة والحقيقة ماتزعل
وانت الله يطول لنا بعمرك علمتنا على الصراحة وحب الحقيقة

• أي عريس وأي هم؟؟!!

انتي مصخنة ؟؟
هذا مندوب شركة يبي ايي يراويني المكنسة الكهربائية العجيبة على قولته
اللي تغسل وتنفخ وتطبخ
قومي نامي يابنيتي
ولا تكثرين قعدة جدام التلفزيون ... الحين بس عرفت ليش سكرتيه توج...
انا لا تسألون عن ويهي ...
الله يقطع أم السرعه اللي تعرفونها ....
مشكلتي اني أجزم على طول قبل أتأكد
استروا ما واجهتوا
شو رايكم ههه؟؟؟!
بس هاي مب انا
شو رايكم
صارت حق ناس خ
تحياتي
منقول