قصة لي صاحب صبيت له دمي فكوب اماراتية والله حلوة

في بيت أم جمعة
أم جمعة ادق تلفون حق بيت أبو أحمد وفي ابو أحمد ام أحمد تزاقر على البشكارات عشان يردن على التلفون بس محد رد عليها
أم أحمد : اوف وين طسن هذيلا
راحت ترد على التلفون
أم جمعة : مرحبا الغالية
أم أحمد : مرحبتين عمتية شحالج
أم جمعة : بخير يسرج الحال شحالج انتي وشحال ولديه
أم أحمد : الحمد الله يسرج الحال شو اصبحتي عمتية ان شاء الله بخير
أم جمعة : الحمد لله يا الغالية يوم بنسير العزبة اليوم عند حلالي بصير احسن عن قبل .. قولي حق محمد ان اليوم بنطلع الساعة خمس صوب العزبة
أم أحمد : ان شاء الله من عيوني
أم جمعة : تسلملي عيونج يا الغالية ماتامريني بشيء
أم أحمد : لا عمتيه سلامتج بنتجمع عندج الساعة خمس العصر
أم جمعة: يلا برايج فديتج عشان ادق حق ام مبارك فداعة الله
أم أحمد :فداعة الله
ودقت أم جمعة حق أم مبارك وقالتلها ان الساعة خمس يتجمعون عند ام جمعة
وفي بيت ابو احمد
توهن فطيم ومريوم بينزلن من الدري
ام احمد : توالناس جان ما نزلت يالعرايس حتى الهنوف الي تنش اول وحدة بعدها مانزلت
مريوم : ليش هاي تخلي حد ينام (تقصد فطيم) معقولة الهنوف بعدها ما نشت
فطوم : هي والله غريبة بسير اشوفها
الهنوف على الدري :لا اتعبين عمرج حياتي نشيت
مريوم : صح النوم يا الاميرة النايمة
فطوم : ماماتي باباه متى بيي
ام احمد :بعد شوي
سارت الهنوف ويلست عدال فطيم
الهنوف:فطوم امس ما قدرت ارقد
فطيم : ليش وانا اقول غريبة ما نشيتي مثل كل يوم
الهنوف : امس يوم كنت برع ويا محمدوه قالي حامد لقي اختج فطيم لا اتشل عنج محمد
فطيم : غريبة ليش جي يقول هنوف لا يكون
الهنوف : مادري هذا الي محيرني
ويدخل ابواحمد واحمد بهاللحظة البيت
ابو احمد واحمد : السلام عليكم
الكل : وعليكم السلام ورحمة ( والكل قام يسلم (
والكل راح غرفة الطعام عشان يتغدون وعقب كلن راح غرفته عشان يرتاح لساعة خمس
في بيت ابو مبارك
دخلو ابومبارك وخليفة البيت وسمعوا ام مبارك محتشرة وسارو عندها في المطبخ الداخلي
ابو مبارك وخليفة : السلام عليكم
ام مبارك : وعليكم السلام
ابو مبارك : شو عندج محتشرة
ام مبارك : هالبقر حرقوا الغدا بس خليت محمد وحامد ايبون غدا من برع ويلا انروح غرفة الطعام
والكل تغدى وعقب راحو يرقدون الا الشباب عشان يجهزون الدرجات حق العزبة
الساعة خمس الكل مجمع في بيت ام جمعة
والحين توزيع السيارات
سيارة ابو احمد نيسان اخر موديل ابيض مركب وياه ام جمعة وام احمد واخته نعيمه وخدامتين قوم ابو احمد
سيارة احمد بورش كايين ومركب وياه الهنوف وفي السيت الي وراء مريوم وميثة وفطيم وعلى حضن فطيم فطوم بنت نعيمة عمة فطوم لانها تحبها وايد
سيارة فهد ولد نعيمة نيسان اخر موديل سودة وياه حرمته عايشة وخدامتين قوم ام جمعة
سيارة خليفة استيشن سودة وماخذ وياه ابو مبارك وام مبارك ويزوي وسلطان وخدامتينهم
سيارة حامد رنج ذهبي ( وفطوم ميتة عليها ) وفيها بس محمد وحامد
وسلمى اخت محمد وجمعة سارت ابوظبي ويا عيالها
والكل وصل العزبة بس اول شيء سيارة احمد وسيارة حامد عشان كانو يتسابقون وعقب وصل الكل
وفي العزبة الكل يلسو ويا بعض يسولفون ويتقهون
ام يمعة : فطيم والميث تعالوا همزوا ريولي
الباقي : شمعنى فطيم وميثة يعني
ام يمعة : لانهن بناتي
الهنوف ومريوم ويزوي: لا والله ونحن مش بناتج
ام يمعة : لا انتو من صوب امكم وفطيم والميث من صوبنا ولا شرايك ابو احمد
ابو احمد : موتوا قهر يالي تحدون فطوم
مترا الفطم يا ناس ماهي قليلة
رمش وقوس والخصر مهظوم
مثل الغزال مجيل في ضليله
ان فر عينه صارت امور وعلوم
مثل الظبي يا ناس وانا دخيله
استحت فطوم ونزلت راسها
ام يمعة : صدقت والله صح لسانك
الكل : صح لسانك
ابو احمد : صح بدنكم
فهد : اقول قوموا نلعب دراجات
الشباب : يلا
وقامو الشباب يلعبون
وسارو مريوم وميثة وفطوم يتمشون عند العراقيب برع العزبة وتعبن ويلسن على عرقوب من العراقيب
فطوم : يالله ياربي متى باخذ طيار
مريوم : بدينا عاد ويا طلبات الشيخة فاطمة تتحرينا خطابات وانا مادري
ميثة : هي والله وانا متى باخذ منصور
مريوم : سمعوا هاي الثانية شو ترمس يا حسرة علي
فطوم : اقول ميثانه بتسيرين وياي الجامعة يوم السبت
ميثة : بسرعة خطف الوقت والله قهر نحن اخر ناس ماجزين بعد امتحانات ثانوية عامة واول ناس انداوم
فطوم : هي والله قهر
مريوم : لا انتم اول ناس ولا اخر ناس اداومون بسرعة وقهر حقكم بداوم عقب اسبوعين انام على كيفي واقوم على كيفي
فطوم: صح نحن الحين بنتعب بس انتي الي بتتعبين اكثر حبيبتي وراج ثانوية عامة .... ها شو ميثانة بتسيرين ويايه
ميثة : هي بسير وياج منو بعد بيسير وياج
فطوم : شماني
ميثة : ها الخايسة تولهت حقها ما اتعرف ادق الى حقج حبيبة قلبها
فطوم :حرام عليج والله انتي ما ادقين حقها
وعند الشباب يالسين يلعبون بالدرجات وكلن يسابق الثاني
خليفة : حو محمدوه خوز من هني لا ادعمك
محمد : مابى كيفي ياي قبلك غير طريجك
فهد : يا الخيلة نش لا يدعمك
محمد : انزين بتخبركم انتو ليش جي لاصقين فيني بعدوا عني خلوني العب براحتي
حامد : سمعوا تراني تعبت
الشباب: كلنا والله
احمد : شو رايكم قبل ما نرجع نتسابق اخر مرة
وعند الهنوف ويزوي وعايشة حرمة فهد في العزبة يالسات يسولفون
يزوي :متى بتسافرين عايشة ويا ريلج فهد عشان يكمل دراسته
عايشة : مادري بس اظن شهر عشرة
الهنوف : يعني ما بتحظرون عرس يزوي ويا احمد
عايشة :غصب عنا جي دراسة فهد
الهنوف : وين بتسافرون
عايشة : سويسرا
يزوي :يا حظكم
الهنوف : مستعيلة على شو يوم بتعرسين ريلج بيواديج شهر عسل
وعند قوم فطوم
ميثة : صح ما قلتلكم
فطوم ومريوم : شو
ميثة : ابوي وافق ان بروك يخطب البنت الي يباها بعد ما قالت الهنوف انها اتعده شرات احمد اخوها
مريوم : والله ( منصدمة (
فطوم سيده صدت صوب مريوم خايفة عليها وعشان ما ميثة تلاحظ
فطوم : والله صدق مبروك حياتي باركيله عني وعقبالج حياتي
ميثة : ان شاء الله يارب انا ومنصور
مريوم : اف ملل بسير عند اماية
وعند الشباب وهم يتسابقون وفاز احمد عليهم ومحمد وكلهم يقولون حقهم غشاشين عيدوا من اول وبس احمد ومحمد ما طاعو لأنهم يونه تعبو فالكل رد العزبة
مريوم وصلت العزبة وسارت صوب الغرفة اللي كانو الحريم يالسين فيها بس ما حصلتهن حصلت بروك قاعد يرمس في التلفون وقاعد يقول: أفا حبيبتي أهون علييج
وهو يقول هاي الجلمة التفت وحصل مريوم وانصدم اعتذرت وظهرت ولا اراديا طاحت دموعها ومشت في العزبة وسمعت يدتها تزقرها مسحت دموعها وسارت صوبهم ويلست وياهم وبعد فترة ياهم بروك ويوم شافته حطت عينها بعينه وقالت في خاطرها :بسألك وأطلبك الجواب إنت تتعمد في العذاب .. خوفي تقول أيوه وأهاب في يوم يقتلني غلاك
وبروك في خاطرة : شو فيها البنية من يومين وهي متغيرة
قطعت أفكاره أم يمعة وهي تزقر سار صوبها ويلس عدالها ووجه كلامه لمريوم
بروك: اقول مريوم قومي صبيلي قهوة
مريوم : القهوة عدالك تبى صب حق عمرك
بروك : وانتي ما تدرين انه صغير القوم خادمهم
أم يمعة: قومي أمايه وصبي لولد عمج قهوة
قامت مريوم متضايجة وفي خاطرها متى هالريال بعاملني على اني مش ياهل
وصلو الشباب عند يدتهم
الشباب : السلام عليكم
الكل : وعليكم السلام والرحمة
اليدة : أنا بسير صوب بوشي من بخاويني
أبو أحمد وابو مبارك: تم وفالج طيب
الشباب : اسمحيلنا عنا نحن هلكانين من التعب
سارو اليدة وأبو احمد وابو مبارك صوب البوش
أحمد : الريم وين البنات
مريوم : الهنوف ويزوي وعايشة عند الميريحانة اللي اهني وفطوم وميثوه برع العزبة عند العراقيب
حامد : وهذيل وين يبن ظاهرات برع العزبة بروحهن قوموا يلا خلونا نزقرهم
أحمد :شو تبى فيهن خلهن يغيرن جو
محمد : الله يعينج يا فطوم من الحين وهو خايف عليج يوم بياخذج مادري شو بسوي بعمره
حامد: جب يا ويهك لافضحك الحين قوم يلا نش وياي ابرك من هالرمسة الفاضية
قام حامد ومحمد صوب فطيم وميثوه
عند قوم فطوم
فطوم : اوه ميثانة أمس نسيت تليفوني عندكم
ميثوه: هي صح سالني حامد عنه اليوم ونسيت أشله عنه وباجر بطرشه صوبج
وقعدوا فطوم وميثوه يسولفون ومرة وحدة يشوفون شباب بدراجاتهم حواليهم وكل وحدة منهن دياية فتمن زايغات
ميثوه : ياويلنا اليوم بقصون رقبتنا
فطوم: وبيدفنونا هني
وقعدوا الشباب يرقمونهم ويرمسون وياهن بس فطوم وميثوه مش دازيلهم ويه ومرة وحدة كل الشباب ساروا وانصدمن فطوم وميثوه بصوت يعرفونا
حامد : وانتوا شو اتسوون هني بروحكم ( وهو يصارخ (
فطوم : لاتصارخ علي أنا مش أصغر عيالك
حامد وهو منصدم : لا والله عيل عايبنج الشباب ملتفين حولج
فاطمة : والله مب أنا قيلتلهم تعالوا عندنا
محمد : هدوا بس مرة ثانية لا تظهرن رواحكن ( يلطف الاجواء (
ميثوه : انتوا ليش تعاملونا جنا نحن الغلطانين
حامد : لا فديتج عيل منو الغلطان انت الست الهانم اللي معاج ( وهو يصارخ(
فطوم : لا تصارخ أنا أبوي ما صارخ علي تي انته وتصارخ علي ( واتطالعه بنظرة احتقار من فوق لتحت وسارت صوب العزبة ) ولحقوها الباقي
وفي العزبة الكل تعشا وحطوا الغشار في السيايير ودقوا حق الدريول عشان يشل الاغراض اللي بقو وظهرن السيايير من العزبة وكانت آخر سيارة سيارة أبو أحمد وفي الطرييج انصدم ان كل سيايير العايلة موقفات فوقف السيارة عدال سيارة خليفة يسأله شو اللي صاير
أبو احمد : شوفيكم
خليفة : الدريول الاهبل شكله رقد ودعمني من ورا ولا حس ويوم هزبته جان يزعل ويحلف انه مابسوق السيارة
أبو احمد : والسيارة من بسوقها الحين ان شاء الله
محمد : أنا بسوقها اسبقوني وبلحقكم
والكل سار البيت يتغسل ويرقد
في بيت ابو مبارك
كانت ميثة على الدري خلاص بتوصل الطابق الثاني
حامد: ميثوه تعالي شلي تلفون فطوم من حجرتيه
ميثوه: مافيني باجر بشله عنك
سار حامد حجرته في الطابق الاول وتسبح وسار يرقد وهو على الشبرية يلس يفكر بفطوم وكيف رمسها وانه ماله حق يصارخ عليها بس كان خايف عليها.. ويكمل وهو مب حاس بعمره.. أبيك تعرف كل ما ضاق صدرك إني حبيب اليوم وأزود من أمس وأبيك تعرف للأبد دوم قدرك ما ياصله شخص ولا يلمسه لمس.. أنا شو اقول لا مستحيل لايكون احب فطامي ومرة وحدة يرن تلفون فطوم ويقطع حبل أفكاره
يرد حامد على التلفون
حامد :الو
......: الو
حامد منصدم بصوت لانه لواحد مش لوحدة: منو وياي
:.......... هذا مش تلفون فاطمة
..........................
ظنكم حامد يحب فطوم
ومنو تعتقدون اللي داق على تلفون فاطمة
الجزء الثالث
يرد حامد على التلفون
حامد :الو
......: الو
حامد منصدم بصوت لانه لواحد مش لوحدة: منو وياي
..........: هذا مش تلفون فاطمة
حامد: ليش منو تكون انته
.............:انته الي منو وليش تلفون فطوم عندك
حامد : شو يخصك انته بتقول منو ولا شوه
........:
حامد : بترمس ولا شوه
.........: انا عادل
حامد : منو عادل بعد( وفي خاطره اكيد عادل صاحب المسجات (
عادل: ولد خالها ومنو انت (عادل ابيض وعمره 20 ويدرس هندسة وحبوب وايد وطويل(
حامد :مرحبا الساع باهل السعودية شحالك
عادل مستغرب: منو
حامد : انا حامد
عادل (يفكر منو حامد ...هي حامد ياويلي بيذبحني لاني ارمس فطوم ):هلا حامد اخبارك ياريال طيب
حامد : الحمد الله يسرك الحال
عادل كان يتكلم في الصالة وكان في الصالة ابوه خالد وحرمته نعيمة الي تستوي عمة حامد وهي ردت من العزبة المغرب لأن كان وراها سفرة للسعودية لريلها ووصلها ولدها المطار مع حرمته وعادل يوم عرف ان حامد هو الي يكلمه من تلفون فطيم مات خوف فقاله: اندوك عمتك تبي تكلمك
نعيمة : مرحبا الساع بولد اخوي
حامد : مرحبا ملايين ولايسدن بذمتيه شحالج عمتيه وشحال فطامي والحمد الله على السلامة انشا الله ماتعبتوا
نعيمة : الحمد الله يسرك الحال لا والله ماتعبنا في الطريج شو يسوي تلفون فطوم عندك من الحين جيه ترد على التلفون عيل باجر لو خذيتها شو بتسوي
حامد( ويهه قافط ):انا .....لا.. فطامي ناسيه تلفونها عندي
نعيمة : والله في تطور بعد يناديها فطامي و لا بعد ناسية تليفونها عند حبيب القلب
حامد قافط ومستحي من عمته ما يعرف شو يرد عليها: خلاص عيل برايج بسير ارقد ورايه باجر نشة من الصبح
نعيمة : عيل خلاص برايك فديتك سير ارقد
حامد : اقول عموه ليش عادل داق حق فطامي
نعيمة: ليش تغار
حامد : اف منكم الواحد مايقدر يرمس أي شيء الى مسكتوا عليه
نعيمة : اعصابك حبيبي انا القايلة حق عادل يدق الحين حقها لين ما البس فطيم بنتي لان فطامي موصتني اييب شيء حقها
حامد : والمسجات
نعيمة : الله يعينج يا فطيم على حامد
حامد : عموه
نعيمة : شو بعد انا اطرش حقها مسجات
حامد :ليش وين تلفونج
نعيمة: تلفوني فديتك مايشتغل هني وانا وهي متفقات الي اتشوف مسج حلو اطرش حق الثانية خلاص ارتحت الحينة
حامد: هي عيل جي السالفة يلا برايج وراي نشه من الصبح
نعيمة :هي لازم الحين برايج خلصت حايتك خلاص ما بطول عليك فديتك سير ارقد تصبح على خير
حامد وهو يضحك :ههه وانتي من اهل الخير ..... وسكر التلفون ورقد وهو مرتاح
ومر يومين واليوم هو السبت وهو يوم الرعب حق فطامي وميثة بنت عمها وربيعاتهم لان اليوم هو اول يوم في الجامعة حقهم واتفقو ان فطامي اتمر على ميثة وعقب شمة ويسيرن مع بعض الجامعة
وفي بيت ابو احمد
ام احمد : فطامي ماما نشي يا الله
فطيم : امايا ابا ارقد والله امس ما رقدت
ام احمد : والله انا ما قلتج سهري على النت انا بخلي ابوج يقطعه
فطيم : لا امايا حرام لو قطعتوا النت جنكم قطعتو روحي
ام احمد : بسم الله عليج يالله نشي
مريوم : اف شو ها ما اتخلون الواحد يرقد
فطيم : هي شو عليج انتي دوامج بعد ثلاث اسابيع والله قهر آخر وحدة أأجز واول وحدة اداوم
ام احمد : انزين فديتج يا الله نشي
فطيم : ان شاء الله الحين بسير الحمام بتغسل وعقب بتلبس وبنزل اتريق وياج
ام احمد : يلا بس لا تتاخرين عشان يلحق انج اتمرين على ميثة وربيعتج شمة
فطيم : ان شاء الله
ونشت فطيم وسارت تتغسل ولبست تنورة جينز عليها ورود وردية وليست قميص وردي بدون ايدين ولبست فوقهن عباتها المفتوحة وشيلتها الساري عليها وردي وحطت على ويهها كريم فير اند لفلي ورسمت عيونها بجحال وحطت غلوس ونزلت عند امها تحت عشان تتريق ويا امها
وفي بيت ابو مبارك
نارسي الخدامة : ميثوه ميثوه ......يلا قوم في مدرسة مال انتي
ميثوه : الله ياخذج قولي امين نشي عن ويهي برقد
نارسي : زين انا الحين روح عشان قول حق ماما
ميثوه : سيري انجلعي عن ويهي
وسارت الخدامة عند ام مبارك محتشرة ان ميثوه ما طاعت تنش
ام مبارك وهي تدخل غرفة ميثة: ميثة يا ميثة يلا نشي امايا
ميثة : امايا والله فيني ارقاد
ام مبارك : قومي فطوم بنت عمج يالسة ادق هرنات وانتي بعدج ما نشيتي
ميثوه : قولي والله امايا ...وميثوه طيران على الحمام
وام مبارك يالسة اتضحك على بنتها لان فطيم بعدها ما يت
ونرجع لبيت ابو احمد
نزلت فطوم ولقت امها وابوها يتريقون
فطوم : خلاص انا زعلانة شو هالخيانة تتريقون بدوني
وسارت وايهت ابوها وحبت امها على خدها
ابو احمد : تعالي فديتج تريقي ويانا
فطوم : هي الحين بعد ما خلصتوا
ابو احمد : لو بطن بينفجر بنيلس ناكل وياج
فطيم : بسم الله عليك في عدوينك ان شاء الله
وفي هاي اللحظة نزل احمد من الدري عشان يتريق ويظهر ويا ابوه الشغل
وسار وحب راس ابوه و حب خد امه وحب فطوم على خدها
احمد : اشحالكم
الكل : الحمد الله
فطوم : الحمد الله انك نزلت عشان اتريق وياك
احمد : ليش كنتي تستنين احد يتريق وياج
فطوم : هي
احمد : يا الدلع الله يعين ريلج عليج
فطوم : اصلا الي بياخذني يحب ايده من جدام وورى لان خذه الشيخة فاطمة
احمد : انتي ليش جي خقاقة الله يعينك يا حامد من الحين قلبي وياك
فطوم : والله يحقلي اتخقق الكل يتمناني ولا شو باباتي وماماتي
ابو احمد : صح كلام فطوم
ام احمد : صح انا ما بخلي فطيم تعرس بتيلس وياي ما استغني عنها
احمد : يا الدلع مفروض مريوم الدلوعة لانها اخر العنقود لكن فطيم شالة الدلع كل حقها الي يشوفها يتحراها اخر وحدة فينا انولدت مب جنة مريوم عقبها
فطيم : فديتني ياربي ليش غيران الحين بتعرس وحرمتك بدلعك شو تبى بعد
احمد : قفط وتم ساكت
فطوم : او ....يلا امايا عشان ما بنتاخر
وطلعو فطوم وامها ويا الدريول وعقب خطفو على ميثة وعقب شمة ربيعة فطوم وسارن الجامعة
شموه : خيبه يا الزحمة
ميثة : شكل البنات يخوف
فطوم : شو بيكلونج بس انتي خليج واثقة من عمرج وطنشي الباقي
ووصلن البنات الجامعة ونزلن
فطوم : يلا امايا مع السلامة
ام احمد : الله يحفظكم
ودخلن البنات الجامعة وسارن عشان يخذون البطايق
في بيت أبو مبارك
يرن تلفون حامد
حامد وهو شبه واعي : ألو
منصور : بسك خست رقاد يله قوم نتحوط لأن ورانا أسبوع حبسة
حامد : إجلب ويهك خلني أرقد ويوم بنش بدقلك
منصور : شو أتحوط بروحي يعني إمحق ربيع
حامد : لا تزعل يا الذكي وراك باجر نشة من فير الله و مابتشبع رقاد
منصور: صدقك والله يله برايك ويوم تنش دقلي فداعة الله
حامد :فداعة الرحمن
وفي الجامعة
فطوم : وين ميروه تاخرت
شموه : هي صح
ميثانة : حتى ربيعتي اسما ما اشوفها
فطيم : خلاص بدق حق ميروه ......وقعدت فطوم ادور تليفونها ...اوه صح ميثوه وين تلفوني
ميثوه : اوه والله اسفة نسيت اشله من حامد
فطوم : يا الفظيحة من 3 ايام وهو عنده والله انتي محد يقولج شيء
ميثوه : سوري حياتي والله نسيت
فطوم : خلاص برايه لا تنسين اتشلين عنه يوم بترجعين البيت
ميثوه: اوكي
شموه :شو سالفة
وفطوم قالت السالفة حق شموه
وتمن يسولفون الين ما يا الدريول
وفي السيارة
ميثوه :صح فطوم نسيت اقولج ان محمدوه سافر يوم الخميس الي فات
فطوم : لا جذابة مايخصني والله خايس ليش جي يسوي فيني الحين بدقله .....اوه نسيت ان تلفون عند حامد والله قهر بصيح شو جي
ميثوه وشموه يضحكن على فطوم وقالتلها ميثوه: تستاهلين قتلج انه ما بيظهرج اخوي واعرفه
فطوم : والله لا اخليه يندم وانا حليلي اقول ان محمدوه غير عن اخوانه متفاهم وبيظهرني واخر شيء جي يسوي فيني وجذاب يحلف حقي اخ يالقهر

الجزء الثاني
وفي بيت ابو احمد
الهنوف ومريوم مندمجين ويا التلفزيون يطالعون مسلسل اجنبي ونزلت من ام احمد من الدري ويلست وياهم في الصالة وزقرت الهنوف ويت الهنوف ويلست عدال امها
الهنوف : هلا امايا شو تبين
ام احمد : فديتج الهنوف امس يدتج رمستني ان محمد ولد عمج يباج
الهنوف:امايا مستحيل محمدوه يباني
ام احمد: حتى انا انصدمت بس محمد ريال والكل يتمناه وانا اول وحده اتمناه حقج وانسان متفاهم ومنفتح عقليته شوي عن اخوانه
الهنوف : امايا ما اقدر احسه شرات اخوي ما اقدر اتخيل اني بخذه
مريوم : الهنوف حرام عليج والله محمد فنان وسوالف والكل يتمناه
ام احمد : الهنوف انا ماريد ردج الحين انتي فكري عدل وصلي صلاة استخارة وعقب ردي علي
الهنوف : ان شاء الله
وفي السيارة فطوم وصلت شموه بيتهم والحين توهه واصلة بيت ابومبارك
فطوم : ميثانة يلا اترياج لا تتاخرين بسرعة ييبي تلفوني
ميثة : اوكي ثواني
وفي بيت ابومبارك
رن تلفون اليازية ومكتوب على الشاشة عمري
يشوف خليفة التلفون ويمطه قبل يزوي ما اترد
يزوي : ورفجة والله تيبه
خلوف : مابى يلا اعترفي منو اتكلمين اكيد حبيب القلب احمدوه عشان جي مستحية
يزوي: خلوف حرام ييبه قبل ما يبند
وتدخل ميثوه تربع وهي تقول : السلام عليكم وتسير حجرة حامد
يزوي وخلوف يتبادلون النظرات ويقولون في نفس اللحظة : شو فيها
ويزوي مرة وحدة اتمط التلفون من ايد خلوف وتشرد فوق عشان اتكلم احمد
ويضحك خلوف على حركاتها وسار يشوف ليش ميثوه تربع حجرة حامد
وفي حجرة حامد
ميثة : اف حامد يلا قوم وين حطيت تلفون البنت يلا تستنى في السيارة برع
حامد : ميثوه حرام عليج برقد
ميثوه : انزين قولي وينه
خليفة : شو فيكم يلا حمود نش بسك ارقاد
حامد: يعني الواحد ما يعرف يرقد في هالبيت وانتي الثانية شو تبين
ميثوه : شو يالسة انا من الصبح اتحرطم هندي اقولك فطوم في السيارة تستنى حظرتك تعطيني تلفونها
حامد وهو فاج عيونه : فطوم اهني
خلوف وهو يضحك: شوي شوي لا تظهر عيونك من مكانها
ميثوه : يلا خلصني البنت تستنى برع
حامد :بتلقينه على التسريحة شليه
وشلته ميثة وعطته فطوم
وحامد سار يتغسل ودق حق اربيعه منصور قاله تعالي الحين
والكل في الصالة يتغدون وعقب نشن يزوي وميثوه وراحو الخيمة الي في الحوش
ودخلن الخيمة وتمن يسولفون
يزوي وهي اتثاوب: انا بسير ارقد
ميثوه : انا الحين الي مداومه ما فيني ارقاد وانتي الي راقدة تبين ترقدين
يزوي : والله كيفج ما تبين ترقدين انا امس ما رقدت
ميثوه : عاد الي يقول ما شاء انا الي رقدت ومتلحفة كلي عشان ما اسمعج ترمسين احمد وصوتج واصل اذني
يزوي استحت: والله كيفج انا بسير ارقد
وقعدت ميثة اطالع المجلة الي بايدها هي تشل لحمد عامري وصوتها جنان وهي اتشل ويوم وصل منصور ربيع حامد الخيمة وسمع صوت ميثة وغصب عنه انجذب لداخل عشان يعرف مصدر الصوت ويوم دخل شاف جدامه ملاك وكانت ميثة حاطة الشيلة البيضة على جتفها ورافعة شعرها لفوق ومنزلة قصتها ويوم ميثة شافت ظل جدامها ورفعت عيونها لمصدر الظل انصدمت يوم شافت منصور حبيب قلبها كانت اخر واحد تتوقع اتشوفه وميثة انصدمت وما عرفت شو اتسوي وعقب منصور نزل راسه وميثة ربعت برع الخيمة لحجرتها ابسرعة وهي فرحانه وقلبها يدق وخايفة بنفس الوقت لا ايعرف حامد وقعد منصور يفكر في باله:
من هالحلا قلبي وقف سميت بالله عليك
ذبحتني بسهم العيون...جرحتني بطرف الجفون
والمشكلة صعب علي اعرف من تكون
ودخل علييه حامد
وفي بيت ابو احمد
تدخل فطوم : السلا م عليكم
الكل : عليكم السلام والرحمة
ام احمد: فطوم سيري حبيبي غيري ثيابج عقب نزلي يلا عشان نتغدى
فطوم : ان شاء الله
وسارت فطوم الحجرة وغيرت ثيابها وسمعت دق على باب الحجرة
فطوم : منو ادخل الباب مفتوح
الهنوف : شحالج شو سويتي اليوم
فطيم : الحمد الله بس والله هلكانة موت
وقالت الهنوف السالفة حق فطيم عن محمد
فطيم : والله ما صدق الصراحة ما اتوقعت محمدوه يحب
الهنوف: اتحدين هذاك اليوم شوقال حامد الحين عرفت السبب
فطيم : صح كلامج وانتي شو قررتي
الهنوف : ما ادري انا احس محمد شرات احمد اخوي بس بصلي وعقب برد على امي
فطيم : الله يعين يلا حياتي ننزل وانتي لا اضايجين عمرج كل شخص ومكتوب نصيبه في هالدنيا
ونزلو يتغدون ويا اهلهم ويتخبرون فطوم عن الجامعة
وعقب الغدا الكل في الصالة يشربون شاي
ابو احمد: بنات جهزوا عماركم اليوم عشان اتسيرون ويا اخوكم تتنقون فساتين حق ملجة ولد عمكم مبارك هالاسبوع
البنات : ان شاء الله ابوي
فطيم : يلا انا بسير ارقد تعبانه قبل ما اتروحون بساعة قعدوني
ابو احمد : فطيم تعالي وياي الحجرة
فطيم وهي خايفة: ان شاء الله
مريوم : لا والله الهنوف أمي تباها وفطوم أبوي يباها وأنا محد يباني ليش انشا الله بنت البطة السودة ولا مقطوعة من شيرة أقول حمود قوم قوم أباك بسالفة
الكل يضحك على خبالها
مريوم تمزح : مش منكم من اللي يعيش معاكم (نشت وراحت حجرتها ترقد(
فطيم وهي تلحق ابوها وتاشر وراها حق اخوانها شو اسالفة هم ياشرون حقها ما انعرف
ودخلت فطيم حجرة ابوها ويلست وياه على الكنبة الموجودة في الغرفة ويلست امها على السرير و فطوم ميتة خوف
ابو احمد : بقولج سالفة بس نحن انتهينا منها بس هي اتخصج ولازم اتعرفينها
فطوم : شو ابوي
ابو احمد: احمد ولد خالج خالد يا يخطبج بس نحنا رديناه لان انتي محيرة حق ولد عمج وعشان انا وامج مستحيل نستغني عن وحدة من بناتنا وانخليها تسير برع الامارات عنا وبعدين نحن انشوف انج صغيرة على العرس
فطيم : مشكور ابوي انا اصلا اعد احمد شرات اخوي ونحن مترابين ويا بعض فمستحيل اخذه وانا ما اريد اعرس اريد اتم وياكم انته وامي
ام احمد : فديتج والله بس الوحدة اذا ياها نصيبها لازم اتعرس واتسير بيت ريلها
فطوم : والله انا كيفي ما اريد اعرس
ابو احمد : فطوم لا اتقولين جي ماحد بتم حقج غير ريلج وعيالج
فطيم : ابوي بس الله يخليكم سكروا السالفة انتو اصلا تبون الفكة مني بس بتم على قلوبكم
ابواحمد وام احمد يضحكون
فطوم : شيء بخاطركم انا بسير ارقد تعبانة
ام احمد وابواحمد: سلامتج
وظهرت فطوم من الحجرة وسارت حجرتها عشان ترقد
سارت الهنوف حجرتها جان يرن تلفونها
الهنوف : هلا والله بالجاز ( الجاز هي يزوي بنت عمها (
اليازية : أهلين شحالج الهنوف
الهنوف: الحمد لله يسرج الحال أخبارج انتي
اليازية : الحمد لله حياتي بطلبج طلب قولي تم
الهنوف : على حسب الطلب ممكن ما أقدر أسويه
اليازية : لا تقدرين بس انتي قولي تم
الهنوف : خلاص تم يلا قولي
اليازية: بنسير دبي عشان نشتري فساتين ونباكم تسيرون ويانا
الهنوف: نحن بعد سايرين اليوم ليش مش انتو اللي تروحون ويانا
اليازية : خلاص أوكي بس متى بتظهرون
الهنوف : الساعة ثلاث الظهر
اليازية : خلاص اوكي نترياكم متى ما تظهرون دقولنا
الهنوف : اوكي شاو
اليازية : شاو
وبندت الهنوف عن الجاز وسارت ترقد
وفي السعودية
نعيمة : خالد حبيبي لازم انرد هذا الاسبوع الامارات
خالد : ليش مايلستي غير اسبوع
نعيمة : ادري حياتي بس بروك ملجته هالاسبوع
خالد : ولد اخوج ماشاء الله متى خطب اصلا
نعيمة : بروك خطب وحدة من دبي اسمها موزة
خالد : اها مبروك الله يعطيه على قد نياته اشاء الله
نعيمة : انزين حبيبي انا بشتري فستان من هني ويوم الثلاثاء خلانا انسير الامارات
خالد : ان شاء الله من عيوني كم نعوم انا عندي
وغرفة سلوى بنت خالد ريل نعيمة (سلوى بنت خالد من حرمة ثانية وهي بيضة وايد وحلوة وكيوت وايد وهي اول ثانوي(
سلوى : بس يا فاطمة ذبحتيني قتلك اجلسي عدل فاهمة
فطوم : مابا ...اريد العب
سلوى : طيب انا اوريكي ما بوديكي المخازن اليوم
فطوم قعدت اتصيح : خلاص اسفة بس ودني
سلوى : طيب قعدي ولا تعملي حاجة ابغى اقرى المجلة بهدوء ممكن
وفي غرفة احمد ( احمد عمره 22 وهو ابيض وطويل ويدرس طب ومن هو صغير يحب فاطمة بنت عمته (
عادل : ابوي كلم عمتي انك تريد بنتها فاطمة
احمد : ايي
عادل : طيب وش ردو
احمد : شكلها ما تبيني لان قالو البنت صغيرة بس انا اريدها
عادل : انزين استنها لين ما اتخلص دراسة
احمد : ما اقدر لانهم لمحوا حقي ان ولد عمها يبيها قولي وش اعمل
عادل : يا احمد هذا النصيب وهذا مكتوب من عند ربك
وبيت ابو احمد
وفطوم ماياها ارقاد وقعدت اطالع مسجاتها وانصدمت ان في مسجات واصلة حقها اول مرة اطالعهم ومفتوحات يوم شافت متى انرسلوا حقها تذكرت انه كان التلفون عند حامد
فطوم وهي معصبة وشوي وبتنفجر : هذا شو يخصه يشوف تلفوني باي حق ( وهي اتصارخ (
مريوم : بسم الله الرحمن الرحيم شو فيج جي اتصارخين مينونة اتكلمين عمرج
فطوم : ا يا القهر بموت شو يخصه يشوف مسجاتي والله بموت انا انسانه كله مرة وحدة اول شيء محمدوه وعقب احمد والحين حامد والله بنتحر
مريوم :بسم الله عليج حبيبتي شو فيج فطوم
فطوم : انا الغبية انا اصلا كيف حبيته لو خذيت احمد احسلي بس المنحوس طول عمره منحوس
مريوم : احمد منو احمد
فطوم : منو احمد بعد ولد خالي
مريوم :ليش هو خطبج
فطوم : هي بس امي وابوي ردوه عشان السيد المحروس حامد بيه
مريوم وهي تضحك : والله متى افا ما اتقوليلي يا الخاينة شو فايدتيه في الحجرة صمنديقة
فطوم : والله بروحي انا دريت اليوم يوم ابوي زقرني عقب الغدا و قالي ولا ازيدج من الشعربيت محمدوه الخايس سافر وتقوليلي ليش اتصارخين
مريوم : انا ما قلتلج انه شكله جذاب
فطوم :انا الغبية اصلا خلاص باخذ قاعدة بعد اليوم الرياييل مالهم امان
مريوم :هي والله صدقج تعرفين فطامي من يومين يالسة افكر في بروك احس اني قصيت على عمري يوم قلت احبه احس بس انه كان اعجاب او بالاصح انها فترة مراهقة و مادري لين الحين كيف حبيته
فطوم :الحمد الله مريوم يوم ان الله هداج ويسر لج امرج حبيبتي كلن مكتوب له نصيب في الدنيا وبياخذه ومحد يقدر يغير هذا الشيء
مريوم : ليش شايفتني جدامج مينونة
فطوم : والله هذا جزاني اني معصبة وشوي بنفجر ويالسة ارمسج
مريوم : اعصابج يالسة امزح وياج صح شو سالفة التلفون وحامد
فطوم : اتصدقين اني اكرهه تخيلي قاري مسجاتي وفاتح مسجات من تلفوني اول مرة اشوفهم
وقامن فطوم ومريوم يلبسون
في بيت أبو مبارك
حجرت ميثة واليازية
يزوي : ياربي ما أعرف شو ألبس
ميثة : هي لازم ما تعرفين شو تلبسين بتسيرين ويا حبيب القلب والله لأراويج انتي وفطوم جان ما قفطكم جدام أحمد وحامد
اليازية : ليش حبيبتي شو مسوتلج ماكله حلالج وله شكله منصور صدق مأثر علييج
ميثوه: اه يايزوي والله غرشوب هالريال طيحني من أول نظرة
يزوي : انزين انتي ما قلتيلي شوشوتي يوم شفتيه
ميثوه : يعني شو رايج أكيد ربعت برع الخيمة
يزوي : يويهج صدق غبية
ميثوه :لا والله شو تبيني أسوي عيل
ومرة وحدة سمعوا صوت سيارة جان تربع ميثوه صوب الدريشة لأنها كانت عارفة ان هذي صوت سيارة منصور وكانت دريشة الغرفة فوق الحوش
نزل حامد وطلع منصور برع البيت بسيارته
ميثوه: أوف مانزل عشان أجحل عيوني فيه
يزوي نقعت ضحك على اختها الخبلة
والساعة 3 دق حامد حق أحمد
حامد : مرحبا
احمد: مرحبتين
حامد : ها وينكم متى بتسيرون
احمد: والله نحن جاهزين بس نتريا عيال عمي سالم
حامد : ليش بسيرون ويانا .. أصلا متى ياو من قطر
احمد : هي بسيرون ويانا ترى من يومين يايين عند أبوهم في أبوظبي وبيون ويانا... برايك هاذم وصلو
بند احمد التلفون وسار صوب عيال عمه
(اللي من قطر من حرمته الاولى وهي متوفية وهم ولدين وبنت اكبرهم جابر عمره 25 ومعرس وحرمته حامل عشان جذي تمت في قطر عند اهلها... وبعده ثاني عمره 24 وهو أبيضاني وحلو وملامح تذبح وهو شيوخي في فزته.. آخر العنقود سارة عمرها 22 وهي حلوة ومزيونة وشخصيتها قوية وحبوبة وراعية سوالف(
احمد: مرحبا الساع نور البيت
جابر وثاني : منور باهله
وساروا ووايهو احمد ويات سارة
سارة : شحالك احمد
احمد : الحمد الله يسرج الحال اشحالج انتي
سارة: الحمد الله
احمد :قربو قربو داخل عن الحر
ودخلو داخل الصالة الرئيسية وسلمو على عمهم وحرمة عمهم
ابو احمد : مرحبا الساع بعيال اخوي نور البيت (وسار وايهم) شحالكم
جابر وثاني وسارة : الحمد الله يسرك الحال عمي
ام احمد : شحالك يا جابر وثاني منو هاي الحلوة والله كبرتوا احيدكم وانتو يهال
جابر وثاني وسارة : يسرج الحال لازم الواحد يكبر محد يتم اصغير وشحالج انتي عموه
سارة : تسلمين عموه مستحيل تنسيني انا سارة الي كنت لاصقة فيج اربع وعشرين ساعة
ام احمد : الحمد الله لا طبعا مستحيل انسى أي واحد منكم يلسوا استريحوا يا بنات تعالو سلمن حشى عرايس كل هذا تتلبسن
ونزلن الهنوف وفطوم من الدري بعبيهن وشيلهن وكل وحدة راسمة عيونها بالشحال وحاطة غلوس
وانصدمو ثاني وجابر وسارة بالهنوف وفطوم لانهن بسرعة كبروا وحلوات وايد
الهنوف وفطوم : السلام عليكم اشحالكم ....وسارو صوب سارة عشان يسلمون عليها
جابر وثاني : وعليكم السلام ورحمة الحمد الله اشحالكن انتن
سارة : يا هلاو الله بنات عمي ماشاء الله بسرعة كبرتوا
فطوم : لو سمحتي لا تغلطين انا صغيرة توه عمري 15
سارة : صدق عمرج 15
ابو احمد وام احمد والهنوف واحمد يضحكون على شكل سارة وجابر وثاني وهم منصدمين
فطوم : لا اتمصخر وياج انا عمري 18 اول سنة جامعة
سارة : صدق ما صدقت ان عمرج 15 بس بعد ما اتوقعت انج في الجامعة
سارة : الصراحة نسيت اساميكم ممكن اتسون رفريش حق ذاكرتي
الهنوف : انا الهنوف اكبر وحدة من البنات وعمري 20وهاي الي جدامج فطوم وطبعا عرفتو ان عمرها 18 والي فوق مريوم وعمرها 17
سارة : اها انا سارة وعمري22
وفي هاي اللحظة تنزل مريم الدري وهي تربع
مريوم : ايرني وين شيلتيه
وكل الي في الصالة انصدمو بشكل مريوم
وتربع مريوم مرة ثانية الدري لفوق
وثاني انصدم بشكل مريوم وعلى طول دخلت قلبه على حركاتها العفوية وضحك عليها بخاطره
لبست مريم شيلة ثانية ونزلت تحت تسلم عليهم ولقت في الصالة سارة واخوها جابر وراحت وسلمت عليهم وعقب كلهم ظهروا عشان يركبون السيارات واتفقو ان احمد والهنوف وفطوم بسيارة احمد و في سيارة ثاني ثاني وجابر وسارة ومريوم
مريم تكلم فطوم معصبة :لا مستحيل انا ما اعرفهم بس انتو على الاقل يلستوا وياهم
فطوم :يلا بلا قلة ادب سيري عندهم تدرين اني مفولة واذا رحت عندهم بطيح حرتيه فيهم
مريوم: اوف منكم
وراحت ركبت مع قوم عمها ويلست ورى سيت ثاني وسلمت على ثاني لأنها ماسلمت عليه
ثاني يوم ركبت مريوم السيارة ياه فضول يبى يعرف كيف شكلها ويعرف صاحبت هالصوت الطفولي وعدل المنظرة اللي جدام عشان يشوفها
ويوم شافها تم مبهت معقولة في فهاي الدنيا انسان بها الجمال والله انها ملاك اه يا ملاكي
ووصلوا صوب بيت ابومبارك
ونزل الكل يسلم على ابومبارك وام مبارك وعيالهم وتزهبن ميثوه ويزوي وحامد تزهب وطلعو من بيت ابو مبارك الساعة أربع الا ربع وركب حامد واخواته في سيارة احمد
وفي سيارة احمد ركب احمد وحامد والهنوف واليازية وميثة وفطوم
وسيارة ثاني نفس الركاب
وفي سيارة ثاني
سارة : والله نورت السيارة بوجودج مريوم
مريوم : تسلمين حياتي منورة باهلها
ثاني وجابر : تسلمين الغالية ...
وتمت سارة تسولف مع اخوانها ومريوم بس ما كانت مريوم ماخذه راحتها عشان جذي ما تكلمت واايد لانها ما تتذكرهم
وثاني يطالعها من المنظرة ويقول في خاطرة:اه .. ياويلي من عيونك في لحظة صرت مجنونك وأنا يا زين ما تحمل ..هونك يا الظبي هونك ..
وفي سيارة احمد
حاطين حمد العامري
فطوم وميثوه يالسين يرمسون بصوت واطي
فطوم : والله اخوج سخيف اكرها احسه وايد متسيطر الحين شو يبى تلفوني يطالعه
ميثوه : فطوم حياتي هدي يمكن ضربه فضول
فطوم : لا والله
احمد : شو عندكن محتشرات
حامد : طبهن اكيد سوالف فاضية
فطوم خلاص فولت الدخان طلع منها : لاوالله صدق الي قال كلن يطالع الناس بعين طبعه
حامد : الاعتراف بالحق فضيلة
فطوم : اللي فوق راسه ريشه يتحسسها
الكل مستغرب من لهجة فطوم وخصوصا حامد ويقول في خاطره: ليش فطامي ترمسيني جي ..اه ياقلبي شكلها زعلانه علي .. شو سويت عشان أزعلج يا الغالية
احمد يقطع افكار حامد : هاا وين وصلت
حامد يطالعه وهو مش فاهم
احمد : شو فيك سرحان
حامد : هيه لا بعدي ما وصلت
الهنوف : يعني تعترف انك كنت سرحان
ميثوه : هي أكيد سرحان كيف متبونه يكون سرحان وحبيبه القلب وراه ماتشوفونه من الصبح يطالعها من المنظرة
حامد ويها قافط ومايعرف شو يقول وفطوم مش هامنها كلام ميثوه وجنها مش هي اللي تقصدها
احمد : شوفو كيف احمر الريال
ميثوه تاخذ تلفون فطوم اللي كان بحضن فطوم وتصور حامد
جان تعصب فطوم وتاخذ التلفون من ميثوه وتقرصها قرصه بعمرها ما بتنساها
ويوم خذت التلفون شافت الصوة وقالت في خاطرها اعذرني بس ما تستحق تكون بين صوريه ومسحت الصورة
ويوم شافتها ميثوه: فطوم ليش مسحت الصورة صدق انج سبالة
فطوم:ليش حبيبتي انشا الله تبيني اخليها عشان اللي يشوف الصورة يشك فيني
حامد بطل حلجه عشان يقول ليش يشكون فيج اذا الكل يعرف انج لي واللي ما يعرف فرصة انه يعرف اريد العالم كله يعرف انج لي.. بس مثل مابطل حلجه سكره استحى يقول جي وجدام الكل هو من دون شي ماسكين عليه وين اذا بينلهم انه اللي يقولونه صدق شو بسوون فيه
تمن البنات يسولفن ويا احمد وحامد سرحان بعالم ثاني عالم فطامي اه يا الفطيم شفيج علي شو سويتلج يالغالية..صدق من قال في هالزمن اذا جرحت وعذبت .. يحبونك.. واذا حبيت وتعذبت .. ينسونك.. صدق زمن
بعد ساعة الا ربع من طلعتهم دق ثاني حق احمد
ثاني :هلا احمد
احمد:اهلين
ثاني : اقول ماشي شيشة قريبة
احمد : ليش ماشي بترول عندك
ثاني : في بس شويه وما اعتقد يكفي لين مانوصل دبي
احمد : اوكي مش مشكله اعتقد في وحدة قريبة على الدرب بنوقف عندها
ثاني : اوكيك مشكور
بعد خمس دقايق وصلو الشيشة
نزلن البنات وحامد واحمد يتشرون ومن سيارة ثاني نزل الكل الا ثاني
مريوم اول ما شافت فطوم راحت نقزت عندها
مريوم : هلا يا البطة
فطوم : البطة بعينج
مريوم: بل عليج شكلج متفتفه شفيج
فطوم : مافيني شي
مريوم : كل هالدخاخين اللي ظاهرة منج وما فيج شي
وصدفة سمع حامد آخر جملة جان يقول حق فطوم : يعلني افدا هالدخانين يارب
فطوم اطالع حامد من فوق لتحت وسارت عنه مب دازتله ويه
مريوم وحامد يطالعونها منصدمين وانكسر خاطر مريوم على حامد فحبت تغير السالفة فقعدت تتأفف بصوت عالي
حامد :شفيج بعد انتي
مريوم : كل اللي فيني بعد شفيني
حامد : والله ماشوف شي فيج جنج أسد واقفه جدامي
مريوم : بسم الله علي أقول تشاهد على ويهك
حامد : ههه أشهد ان لا اله الا الله
يت ميثوه والهنوف وشافو حامد يضحك
الهنوف : شفيك تضحك ضحكنا معاك
حامد : اضحك على اختج الخبلة
ميثوه : اذا تضحك عليها بصراحة ما استغرب
مريوم : لا والله شو قصدج وبعدين والواحد ما يقدر يناقشكم بمشاكله
الهنوف : شفيج بعد
مريوم : استحي اركب معاهم ما اعرفهم عدل والله طول الدرب وانا ساكته .. استغفر الله تقريبا تمت ساكته
ميثوه : تم ساكتة لا مستحيل.. لالا ما أصدق انجاز
مريوم: يا ويهج سخيفة
الهنوف: ياربي يا كثرما تتحرطم ها البنية
حامد : شوفي بقولج قاعدة اذا تمتي مستحية وساكتة بتمين طول الدرب كارها عمرج وملانه بس اذا خذيت وعطيتي معاهم بتسولفين وبتضحكين وبتغيرين جو
ميثوه والهنوف وهن يضحكن : ومنكم نستفيد
حامد: جب انتن ... ويوجه كلامه حق مريوم: وصلت المعلومة
في جها ثانية في السبرماركت
يزوي: حياتي برايج بسير السيارة
فطوم : أوكي
سارت يزوي السيارة
اما فطوم طلبت من الهندي قهوة
الهندي: with suger
فطوم:without suger
جابر: تشربين القهوة بدون سكر
فطوم : هيه لأني ما احبه مع سكر مستحيل اشربها مع ذرة سكر
جابر: مستحيل كيف تشربينها مرة
سارة من وراهم : تتحراها حرمتك تصدقين قهوه اللي تشربها مليانة سكر تقولين حلوى سايلة
جابر : ساروه عن الغلط على حرمتيه خلينا نرجع جان ما أخبرها عليج
سارة : انزين انا ما غلطت حرمتك تموت على السكر والحلو
فطوم: اكيد عيل حرمتك حلوة و من حلاتها تحب السكر
في سيارة احمد
ركبت يزوي السيارة ويوم سكرت الباب وراها كان احمد جدام استحت يزوي لانها كانت بروحها وياه
احمد في خاطرة اخيرا تمينا روحنا
احمد : شحالج الجاز
اليازية: والله اخبار الخير بوجودك
احمد: فديت روحج والله ياعسى دوم مب يوم
اليازية: انت اشحالك حبيبي ربك بخير
احمد: بخير دامي بعيونج وبقربج .. فديتج والله تولهت عليج
يزوي محمرة وميتة من المستحا
احمد: يعلني افدا هالحيا والمستحا
ويوم خلص أحمد كلمته دخلت الهنوف والميث
الهنوف: احم احم اشوف الحبايب عايشين في جو رمنسي
احمد : وانتي شو يخصج يعني لازم تخربون علينا الجو
ميثوه تلصق عند يزوي وتصاصرها : العقبال لي انشا الله
في السوبرماركت
فطوم كانت تحاسب
ياها حامد وقال: انا بدفع
فطوم : مش لازم عندي فلوس .. مشكور
دفعت وظهرت ويوم ظهرت ما حست الا بحامد يمسك ايدها
فطوم منصدمة : فج ايدي
حامد: فطوم شفيج علي
فطوم بصوت أعلى شوي : قتلك فج ايدي ماتسمع
حامد فج ايدها : فطامي سامحيني مادري شو ياني
فطوم ماردت عليه بس تلومت وايد فيه وقالت في خاطرها : صح هو فتح مسجاتي وما يحقله بس انا وايد قسيت فيه وحطيت حرتيه من محمدوه فيه يا ربي ليش جي سويت
وسارت السيارة صوب السيارة وسار وراها للسيارة
وركب جابر وساروه ومريم السيارة
سارة عطت ثاني كيس في حلاو وعصير وايس كريم
ثاني : مشكورة
سارة: لا تشكرني اشكر الريم هي اللي ذلتني داخل عشانك خذي هذا وخذي هذا
ثاني في خاطرة فديتها تهتم فيني
ثاني : مشكورة الريم ماتقصرين
مريوم: أفا ياولد العم مابينه شي انته شرات اخوي.. وبعدين عشان اظمن وصولي سالمة لدبي مافيني شي يستويلنا في الدرب عشان بطنك
ثاني في خاطره هاللسان توج اطلعينه انا أراويح
ثاني : اصلا بطني مافي شي بس أخاف بطني يعورني يوم آكل اللي يبتيه
مريوم : يا السبال مش منك من اللي يدلعك وييبلك .. أقول ييب لتسمم بس
الكل ناقع ضحك في ال

اتمنى القى تفاعل من حبيباتي الفراشات الحلوات عشان أكملها

ولا رد حرا ا ام

السلام عليكم حبيبتي المعذره انا قريت هالجزء وانقطعت فتره عن النت والحين راجعه ابي اعرف التكمله والاقيك مو كاتبه ولا بارت حرام عليك وشنو ذنبي انا اذا البنات ما تفاعلو معاك وبعدين انا مو ماليه عينك ,,,,,,,,,,,,,عشان خاطري كمليها عشاني