قصتي دعاء اللهم ياجامع الناس ليوم لاريب أدخلي وتعرفيها

1. والحمدلله رب العالمين

بسم الله الرحمن الرحيم
اليوم بقولكم قصتي واللي تعلمت منها اشياء كثيره قصه عاديه واقل >> لاتقولون ياسخفك على هالقصه
بس بوصلكم شغله من قصتي ... بتعرفونها بنهاية الموضوع
وان شاء الله تفيدكم
البارح بالليل وتحديدا بعد المغرب رحت السوق مع امي واختي المهم وصلنا وشرينا اشياء ومن ضمنها
ملابس لي ولأختي أخذناها من نفس المحل وخرجنا بعدين رحنا محل وبعدها على السياره على طول
بنرجع البيت وبالطريق اختي تقولي الكيس اللي فيه الاغراض وينه ندور نحوس بالسياره ابد فص ملح
وذاب تضايقت بشكل مو طبيعي لان امي واختي يقولون اخر مره كان معاي بس وين حطيته مدري
اللي قهرني اني صارلي فتره احوس بالسوق وبالقوه لقيت شي عجبني وحايسين لان كل سنه نسافر ونقضي من برا ومن شعبان يعني رمضان مافيه روحه وجيه ومشاوير عشان الزحمه بس هالمره ماكتب ربي نسافر
المهم رجعنا البيت قلي ابوي برجعكم تسألون يمكن بمحل نسيتوه او شي فرحت مع اني كنت قاطعه الامل اني القاه خصوصي السوق زحمه ونفوس الناس مو مثل بعض يعني انتي ممكن تسلمينه لاي احد لو لقيتيه غيرك نفوسهم تسولهم انهم يآخذونه
قبل ماأطلع صليت ودعيت بالسجود وبعد ماسلمت دعيت اني القاه
وبعد قلت الدعاء (( اللهم ياجامع الناس ليوم لاريب فيه اجمع بيني وبين ضالتي ))
وبعد قلت يارب استودعتك اغراضي الذي لاتضيع ودائعه
وتوكلنا على الله ورجعنا وطول الطريق استغفار لين وصلنا
ورحت المحلات اللي شكيت اني ضيعتها وفيها وسألت المحل الاول مالقيته الثاني بعد بس الثالث لقيت الكيس بكل اللي فيه وبالفواتير بعد وقاللي الهندي الله يبارك فيه (( انا لقيته ورفعته لكم ))

والحمدلله رب العالمين

ارادة رب العالمين + الاستغفار + الدعاء واليقين بالاجابه مو تدعين وبس يعني تأكدي وتيقني الاجابه والدعاء اللي كتبته دايم اقوله اذا ضاع شي مني والقاه علمتني عليه دكتوره بالجامعه الله يجزاها خير +الاستوداع (انك تستودعين اي شي الله ) يحفظه رب العالمين لك
كلها كانت كفيله اني القى الاشياء اللي فقدتها
أتمنى تستفيدون من قصتي مثل مااستفدت منها
لاتنسوني من خالص دعواتكم // أختكم الهآشمية