قصه سعوديه اشتكى اللي بين ضلوعي

((الجزء الثاني))
قرأت الرساله عادتها ثلاث مرات..تناظر...مي مصدقه.. ياربي شلون عرف اني متعمده ما ارد.. ممكن اكون هاليومين ما اقدر ادخل..اتاخرت.. بردي... شئ عطلني...اي سبب.. رجعت راسها على الكرسي.. وتنهدت... وش يبي يوصل له... مصيري اعرف..وبدت الافكار تجيبها وتوديها وقطعتها.. وقالت: لا ابدأ اوسوس..ناقصه انا... وفجاه تلاقي علامات برتقاليه تحت... نسيت انها فاتحه الماسنجر....
وجت لقت صديقتها اللي عن طريق النت متعرفه عليها واسمها سارا.... واسمها بالماسنجر
#((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))
كاتبه..
سلام الله عليكم...
ياهوه..
ياجماعه....
يامجموعه.....
جوجو...
جي جي...
عطينا فيس...
يا بنت.....
طيب شكلك مشغوله اذا رديتي كلميني يا ويلك تطلعين وما اتكلميني...
ردت الجوهره وكان اسمها بالماسنجر...
( افعل ماهو صحيح وأدر ظهرك لكل نقد سخيف)**
وعليكم السلام ورحمة الله وبركاته...
** ( افعل ماهو صحيح وأدر ظهرك لكل نقد سخيف)
هلا والله سارونه...
( افعل ماهو صحيح وأدر ظهرك لكل نقد سخيف)**
آسفه ما انتبهت....
#((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))
اشوا عطيتونا وجه... زين والله...
( افعل ماهو صحيح وأدر ظهرك لكل نقد سخيف)**
سوري مدري مصري معليش سارونه لاتصيرين غثيثه...
((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))#
لا والله البنت شاينه اخلاقها... خير جوجو ويش فيك. فض فضي احكي اللي قوا قلبك...
( افعل ماهو صحيح وأدر ظهرك لكل نقد سخيف)**
مدري ياشيخه... محتاره بامر وضايق خلقي...
((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))#
اها اعترفي وش اللي مضيق خلقك...
( افعل ماهو صحيح وأدر ظهرك لكل نقد سخيف)**
ياخيه ابي اقلب الموضوع براسي وارتبه همن اقولك... معليش تحملي غثاي...
((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))#
ترى علب بيبسي وقزاز موجود عندي ابفلقك اللحين.. لا غثا ولا شئ ولاتنسين يا ما عرضت لك مشاكلي وتحملتي غثاي ومافلقتيني بيبسي او قزاز
( افعل ماهو صحيح وأدر ظهرك لكل نقد سخيف)**
ههه
موتيني من الضحك.. الله يسعدك... معليش مضطره اخرج اخوي يبي النت.. اشوفك ان شاء الله...
((الدنيا مليئة بعلب البيبسي والقزاز خذ لك أي علبة وافلق فيها اللي رافع ضغطك))#
اوه.. الله يعينك.. لا عادي ايش دعوى.. بس سلميلي على اخوتس.. مع السلامة..
( افعل ماهو صحيح وأدر ظهرك لكل نقد سخيف)**
ههه.. ابشري ابسلم لك عليه.. مع السلامة... وقفلت الماسنجر..
وما قفلت النت.. بس كانت منحرجه من صديقتها سارا.. ومتضايقه وكانت تبي ترد على (المجروح) بس قالت بعدين مو لازم اللحين.. وضاق خلقها.. نزلت كم موضوع تقراها عشان تتسلى.. وقفلت النت... صديقتها سارا.. اتعرفت عليها عن طريق النت.. مره حبوبه البنت.. وطيبه.. وعلى نياتها.. وتحس انها تعرفها من زمان..مع انها كانت بالبداية رافضة هذي الصداقات... بس ماتدري تحس فيه اخوات عن طريق النت افضل من اللي تقابلهم.. بس اخوها فيصل مايدري.. وكم مره تتكلم معاه على اساس انه ماعندها عن طريق النت صديقات كلهم صديقاتها اللي من المدرسه واخواتهم وصديقاتهم... اول كانت خايفه انه يكتشف بعدين صار الموضوع عادي... لو اكتشف باقوله ما سويت شئ غلط.. بس بداخلها تأنيب ضمير.. انها ماقالت له من الاول... الرسالة الخاصة مازالت تنبض بداخلها.. خايفة منها... هي ماتعطي العيال وجه.. او بالاصح رسمية شديدة بينهم.. مره.. وماتحاول تحتك فيهم.. بس المجروح.. يحاول يحتك فيها واذا غلط يعتذر ومؤدب وخلوق.. وكلامه مرتب.. ومنظم.. ما عنده عشوائية.. او تسرّع بأي رد... لدرجة انهم عندهم لعبة... لتصيد الاحطاء.. ما مسكوا عليه ولا خطأ.. لا قديمه ولا جديده..وكلهم يحترمونه يجبر الواحد انه يحترمه... ويهتم بمواضيعها وخواطرها ويرد لها.. انك مبدعة.. ولازم تستمرين بالكتابة...عشان كذا هي محتاره وش ترد له... ماتبي تسيئ الادب..وبنفس الوقت ما راح تهز الرسمية اللي مسويتها مع كل العيال الي بالمنتدى... راحت مسكت كتابها وقالت: انتي ثالث فاضية للسوايف اللي مالها داعي.. ثانوية عامة.. تحديد مستقبلك.. ومسكت كتابها وقاعدة تذاكر.... بس ما زال الموضوعين شاغلين تفكيرها... موضوع الخطوبة... والعضو(المجروح) واحتكاكه الزايد فيها...
**************
سلطان جا عند بيت ابو فيصل ودق بواري علي فيصل... ورى بعض البواري عشان يزعجه ويخرج بسرعه... مافي امل يخرج فيصل.. فيه برود مو صاحي... وينزل من السيارة ويدق الانترفون.. مرتين.. وترد الجوهره...
الجوهره: نعم...
سلطان: الله ينعم عليك...
جوهره ارتبكت ماتدري وش تقول عرفت انه سلطان وقام يجيها الصوت الثاني(وتقولين ماتحبينه ها) بسرعه انتبهت انه قاعد يتكلم بس ماتدري وش قال... جوهره: ها..
سلطان: اقول آسفين عل الازعاج بس فص فص ما خرج( ينادي فيصل فص فص) ونسي انه الجوهره تكلمه وعشانه متعود ينادي فص فص ...ضحكت الجوهره بس بدون صوت.. وقالت: اللحين يجي فيصل.. الا جا فيصل.. واخذ منها سماعة الانترفون..وقالها: مين الدب سلم(سلطان يقوله سلم) قالت: مالي دخل اتفاهموا...
ويسمعهم سلطان....
فيصل: خير سلم وش تبي؟
سلطان: اشتقت لحبيبي... وروحي..
فيصل: وع منك حبيبي لاتقوله تحوم كبدي...
سلطان: ليه حامل الاخ....
فيصل: اقول بكف....
سلطان: انزل واعطيني اياه..
فيصل: طيب ثواني بلا ازعاج... تراك قلق...
سلطان: طيب فص فص بسرعه...
ودخل سلطان ينتظر فيصل بس اتاخر عليه شوي وضغط عل البوري.... الين نزل فيصل... فتح باب البيت وهو توّه يلبس البلوزة ودخل بسرعة للسيارة....
فيصل: قسم بالله انواع الازعاج... يا ابن الحلال مافيك تصبر شوي...
سلطان: لا ما ابي اصبر.. احنا متفقين على موعد المفروض تكون جاهز...
فيصل: مشيها لي اليوم...
سلطان: مشكلتك كل مره تكرر نفس الكلام.. وحرّك السياره سلطان ومشي بسرعه من عند بيتهم... اهل سلطان محافظين اكثر من اهل فيصل... حتى انهم مايسمعون اغاني.. اما اهل فيصل عادي يسمعون اغاني بس مو مره.... سلطان مايشتري اشرطه ولا شئ بس اذا شريط اعجبه ياخذه ولا يشاور صاحبه... ولولو اخته مهبولة اناشيد ومره مشي من عند غرفة لولو وسمع شريط(رحلة أمل) للمنشد (عمر الضحيان) ومره عجبه صوته وكلمات الاناشيد والحانها.. ودخل عليها وقفل المسجل واخذه... قامت لولو.. تصرخ عليه ..قسم بالله مو حقي.. حق صديقتي.. قالها..سلطان.. إن شاء الله اجيب لها واحد ثاني.. والى هاليوم ما جاب لها لانه ينسى.. ومادري ان صديقتها يوم درت بالسالفه ضحكت وقالت حلال عليكم.. بس لولو عناد ما تبي تقول له... وتبي شريط ثاني عشان يصير لها.. لانها متاكده انه الشريط ماراح يطلع من سيارته....
ويجي موال انشودة رحلة أمل... وسلطان منسجم عل الآخر... حتى انه مسكر شباك السيارة ورافع الصوت... ويخترق صمت سلطان وفيصل.. الموال.... آآآآآه... يئس الفؤاد من الحياة ملالة... رحلة أمل... فلتمنحيه امتي بعض الامل.... امل يجود به
ويقطع حبل افكار سلطان وانسجامه مع الموال... سؤال فيصل....
فيصل: اقول سلالم... عندك فرشه....
سلطان: انقهر لان فيصل يعرف انه يحب هالموال بس برضوا يعاند ولايهتم لإنسجام اللي كان فيه سلطان.. التفت سلطان جهة فيصل... وقاله ببرود... بعد مو سلم واحد سلالم...
فيصل: بلا مبالاة... احمد ربك ادلعك..
سلطان: ما ابغاها من فمك تقرّف....
فيصل: طيب انتبه للطريق ترى انت اللي تسوق... يالدب وين الفرشه بسرعه...
سلطان: لا من جد انا اللي اسوق... وقال بشكل استهزاء بفيصل...ترى فص فص... رايحين الاستراحه عند الشباب مو السوق...
فيصل: اللقافه بطلها انا احافظ على قوامي وهندامي الجميل اينما ذهبت...
سلطان: مهو لايق عليك ولد وكاشخ... وع وع وع....
فيصل: المشكلة دمك ثقيل وجاي تقول وع وع وطنش سلطان..وقام يدور بالادراج وتحته ولاقها بالكرسي اللي قاعد فيه بس من تحت لازم ينزل يده ويرجعها ورى عشان يمسك الفرشه....
وجا فيصل.. وقال الحمدلله ذالني اللحين عشان هالفرشه وليتها زينة من ابو ريالين لونها خضراء ومن زود الاهتمام تحت الكرسي...
سلطان: مشي حالك وعلى قولة القايلين الدنيا فانيه..... ورفع صوت المسجل زياده واسرع بالسياره.......
وبسرعه فيصل مشّط شعره وبخ عطر لقاه عند سلطان... وكان لابس جنز وبلوزه سوداء.. جسمه مره حلو بالجنزات... اما سلطان ما يلبس بناطيل الا بالحالات النادرة... كلهم يقولون له حلو.. بس هو كذا يحب الاثواب باي مكان... يحسها رزه واكشخ..... وصلوا الاستراحه.... وركن السياره... وسكر المسجل... ونزل سلطان وفيصل.. مشيوا مع بعض.... سلطان اطول شوي من فيصل واعرض منه... اما فيصل مو قصير... بس جسمه كل الشباب يقولون رياضي وهو آخذ بنفسه مقلب ... بس مايلبسها الا بالاستراحات واذا بيقهر الشباب يلبسه بالسوق... ودخل سلطان وفيصل الاستراحه.... الاستراحه مره روعه... مصممينها على مزاجهم... اول شئ من الباب يجي ممر طويل شوي وعريض شوي... وباطرافه اعمده متوسطة طولها وآخرها لمبات صغيره وحده صفراء والعامود اللي قدامها يكون ابيض.. اللمبات مهي معطيه النور الاساسي القوي.. لانها من فوق جاي عليها زخرفه بالحديد على شكل ورد مفتّح.. فصايره الاضاءه خافته شوي... وعلى يمين وشمال الممر..كله ثيّل( العشب الصغير).. اخضر مره... وبعد الممر.. تمشي شوي بعدين يوسع الممر ويوسع وبعدين تصير بمكان دائري.. وراك الممر اللي مشيت منه.. وقدامك بس مر بسيط مكمل للي وراه.. وعن يمينك.. ممر شوي قصير بعدين تدخل على مكان التراب.. اللي فيه المراجيح... وساحه كبيره شوي...وعن شمالك فيه ممر.. هو اللي فيه السجادات للي بيقعدون فيها وهي اكبر مساحه بالاستراحه وكلها ثيّل... واذا كملت الممر اللي من الشمال يكون موجود المسبح وغرف تبديل الملابس... ويكون فيه باب للمطبخ.... وباب المطبخ له باب ثاني من جهة الثيّل... يعني له بابين وحده من جهة غرف تبديل الملابس والثانيه من جهة الارض الواسعه اللي يجلسون فيها.... مشوا سلطان وفيصل ولفوا يسار جهة الشباب اللي كانوا قاعدين بالسجادة....ا
سلطان+فيصل: سلام عليكم
الشباب: وعليكم السلا ام....
حمد: ياخطير يا فص فص وش هالحركات الصعبه.....
قام فيصل يمشي ويدور ويقلد عرض الازياء... يمشي ورافع راسه وما يناظر فيهم... وخلا ظهره معتدل ومستقيم... وبدا يميل يمين ويسار... وهم ميتين عليه من الضحك... ايش رايكم بس... شكخه(يقولون للكشخه شكخه وكل شئ يعكسونه)....
محمد:تعال يا فطين.. انت من البيت الى هنا.. والا رحت اماكن....
فيصل: (مستغرب) بالبنطلون أي رحت المطعم ومقاضي موصيتني الوالده ورجعت غيرت البلوزه وجيت.... ليش؟؟؟؟
علي: لا ولا شئ اعلمك بعدين....
ياسر: صدق من وين البنطلون؟
فيصل: من (قيس)
علي: جا واقترب منه... احلى وتعلمنا للماركات.. وش عندك...
فيصل: ههه..بصراحه وديت الاهل للسوق... ودخلنا لقيس ويوم شفته سحرني البنطلون وشاورت اهلي وعجبهم هم بعد...واشتريته....
سلطان يضحك بنفسه..حلوه يا فيصل الاهل...ههه...
وقاموا يضحكون... جاهم ياسر... يالله خلنا نطب بالمسبح....
الشباب: يالله.. احلى شئ عندهم السباحه.... حمد تخصصه يجيب العاب بالسباحه ويلعبونها.. مسمينه (الكابتن صالح العريض).. طبعا الكابتن صالح العريض.. معروف انه ماشاء الله حق الالعاب وله كتب كثيرة بالالعاب. سواء مائية او مي مائية..
الشباب(علي وحمد وسلطان وفيصل وياسر)... الإستراحة لياسر ودايم يطلعون فيها... واحيانا من الفسقه والطفش يقطّون ويروحون استراحة ثانية بس ماتحصل كثير.....لانهم يقولون الجود من الماجود.. ولا للفسقنه.....
ياسر ناداهم هيا ايها الشباب دعونا نرمي بعضنا البعض في هذا المسبح لعريق هيا....
وجا فيصل بيلبس لبس السباحه وراح لغرفة التبديل وسكر الغرفه بالمفتاح داري ان سلطان يدف الباب عشان يحرق اعصابه... ودخل وغيّر الجنز لبنطلون السباحه..... اخذ بنطلونه يبي يحطه على الشماعه عشانه مكوي ويوم جا بيعلقه وينتبه ان لصقة قيس ورى بالبنطون... (لصقه شفافه مكتوب عليها المقاس بالطول اللصقه)الله يلقع ابليسهم العيال عشان كذا يسألوني قبل شوي... لا ومن الملح اللي بي رحت المطعم والبقالة...
جا للعيال الله يقلع ابليسكم افرضوا اني كملت مشاوير..وش يقولون توه يعرف للماركات...
الشباب:خ ههه..
حمد: ليش تتوقع اننا نعلمك اذا خرجت بنترك.
علي: وواحد يلقط لك صوره بجواله ويكتب اسم الصوره(يافرحة ماتمت).. وقام يضحك عليه.. بس يبي يغايضه..
فيصل: العن ابو النذاله....تضحك انت ووجهك
وجا ياسر هيا يا شباب...الى المسبح....
والشباب معاه هيا...وبدا انواع الخبال... يرمون بعض بالمسبح... وكان علي خواف يسبح..صح... بس مايحب احد يرميه بالمسبح... اول ما كان يعرف يسبح بس يوم اتعرف على العيال بالأول رافض يتعلم لأنه خايف.. والسباحه بس تبي الشجاعه.. واللي يبي يتعلم السباحه يتعلم الشجاعه اولا... وهو خالي من أي شجاعه.. بس دربوه الشباب بإصرار منهم... على السباحة وصار يسبح وماله الا شهرين..متعلم السباحة.. جاه سلطان من وراه.. ودفه بقوة بالمسبح... وقال بصوت عالي وهو يضحك...انطلق الى حيث الغرق.... علي.. قام يصرخ.. الله يقلع ابليسك سلطان... بشويش.. حرام عليك...وطاح بالمسبح... طبعا علي..مسكين هو النكبه دايم مع انه دبه ومليان وطويل ماشاء الله.. الا انه خواف... والعيال انواع الاذية اذا مسكوا على الواحد شئ ... جا فيصل وشال سلطان..وصار يغني دوها يا دوها..والكعبة بنوها.. وقاموا يضحكون ..سلطان عادي عنده احد يرميه بالمسبح... بس المفاجأة ان ياسر جا دفهم الاثنين..وكلهم طاحوا بالمسبح.... وحمد وياسر باقيين برى..وكل واحد يحاول يرمي الثاني... جا علي ومسك رجولهم ورماهم الاثنين... وبدا حمد بالالعاب... طبعا اول لعبة كالعادة ياشباب.... اطول نفس... يالله .... الشباب يالله.... ولعبوها وفاز سلطان.... جا سلطان وقال اتحداكم تفوزون عليّ بنفسين... يعني تدخلون واذا تعبتواا تطلعون وتدخلون مره ثانية وانا بنفس واحد....
الشباب: يالله...وبدا حمد العد.... وكلهم متحدينه...
حمد:واحد.... اثنين... ثلاثه.....
ودخلوا كل الشباب بسرعه.... طلع علي اول واحد بعدين فيصل بعدين ياسر بعدين حمد.... ودخلوا مره ثانيه ومازال سلطان بنفس واحد طلعوا كلهم..ومازال سلطان موجود.... قالوا خلاص غلبتنا... يا سلالم يا الدب.... جا علي...ويقول شكله مات... انقذوه..
فيصل: وانت جاهز للأفلام.... يالله سلالم غلبتنا.... طلع سلطان... اوه اوه اوه.... واخذ نفس عميق.. وقال تتحدوني ها... ..
قالوا لشباب: غلبتنا خلاص.... وكمل حمد باقي الالعاب المائية... وماخرجوا الا متأخر اتعشوا... وكلن رجع لبيته.... قال سلطان : فص فص شمينا على بيتنا(شمينا طبعا مشينا بس يعكسوا كل الكلام)...
فيصل: لا ياخي مشكور... مرتن اوخرى....
سلطان: على راحتك يابيدجان محمص...
فيصل: اكيد يا سجاده صلاة على كيفي...
سلطان: تصدق ان الفلافل مابينها وبينكم شئ.. هي فلفل وانت ملف اخضر
فيصل: اما البقدونس مره اذا انقلى سبحان الخالق تقل سلالم مصدّيه...
سلطان: انزل بيتكم وسلملي على اهلك....
فيصل: من تقصد؟
سلطان:اعقل وانزل وصرقات عطور مافي...
فيصل: اوب يالدوب انتبهت... نزل من السياره وسكر الباب وراه ويكلمه من شباك السياره....
سلطان: ترى ادعسك امشي بسرعه
فيصل: خبل تسويها.. يالله فمان الله سلملي على الاهل..
سلطان يضحك: ونزل نظارته وقال من تقصد؟ ومشي مايبغ يسمع كلامه لانه مدروخ ويبغ ينام.. وانتبه لشباك احد الغرف تهتز ستارته... ابتسم وسبح فعالم الاحلام .......
********************
طلعت من غرفتها عهود تجري على غرفة خلود.... ودخلت من دون لاتدق الباب ولا شئ... ارتبكت خلود... وجت عهود وقعدت جمب خلود بالسرير.....
عهود: سلام يالدبه....
خلود: من غير نفس.. وعليكم لسلام.....
عهود: وش فيكِ ماده البوز شبرين... لي عندك خبر انما ايه....
خلود: وش عندك....
عهود: تخيلي خالد اليوم بيخرجنا....
خلود.. قربت من عهود وهي مصدومه معليش عهود..عيدي ترى هاليومين صاير السمع عندي عدم.....
قامت تضحك عهود: انتي مو السمع عندك عدم كل شئ معدوم على بالك ما انتبهت يوم ادخل واشوفك مرتبكه ...عيني بعينك خلود.. تكلمين عيال انتي... قولي قبل ما يوقع الراس بالفاس... عشان نقدر نحل المشكله وما توصل لابوي....(تقول اللي ببالها ومايهمها شئ)
خلود: عصبت ورفعت صوتها وقامت من السرير ويدها ترتجف اقول منتيب صاحيه... روحي بس.. ترى انا مو خالد تجدعين عليّ كلام وتمشين ولا كانك مسويه شئ...
عهود: انا وش قلت لخالد اللحين...
خلود: لا ياشيخه.. يقالك ماسويتي شئ. اصلا سمعت كلامكم كنت عند باب الغرفه..
عهود: اها يعني تتنصيت علينا..
خلود: اصلا وقفت والا ماوقفت صوتك كان عالي...
عهود: طيب ليش اللحين معصبه ومقومه الدنيا لو انك ماسويتي شئ غلط على قولتك كوني طبيعيه...
خلود عصبت ووصلت معاها مره.. عهود انتي عديمة الاحساس بكل بساطة ماتهمك مشاعر أي احد ولافيك دم انقلعي برى.. روحي عن وجهي لا اسوي فيك شئ..
عهود: الحمدلله.. اكيد انهبلتي... عموما اصلا انا طالعه من زينك والا من زين غرفتك تجيب الكآبه... وتناظر الغرفه بكل اركانها وبعدين ناظرت جهة خلود اللي كنت قريبة من الباب باحتقار من فوق لتحت...
خلود: وصل حدها منها هي صح اكبر منها لكنها تخليها تفقد اعصابها بتصرفاتها وكلامها... وقالت:لا ماشاء الله تعرفين تميزين بين الكآبه والسعاده....
عهود: فلسفتك كثيره وخرابيط واجد... عموما انا وخالد اليوم بالليل بنخرج وقالي اليوم غير...كان تبي تخاوينا حياك الله...
خلود: من جد الاحساس معدوم عندك.. خالد ترى يوميا يداوم وتعبان مره وماعنده اجازة الا يوم الجمعه ولو ماهو يوم فضيل كان اشتغل فيه... كيف تطلبين منه يخرجنا بيكون تعبان ووراه بكره دوام...
عهود: تراكي مصختيها.. وقامت من سريرها... وجت عندها.. جت خلود بتمشي عنها قامت مسكتها من طرف بلوزتها.. وقامت تكلمها باستهتار.... اولا الصوت عالي تراه مضر للصحه... ثانيا.. ادري عن خالد عنده كل الهرج اكثير اللي قلتيه.وش قالوا لك مني عايشه بالبيت... ثالثا... هو اللي قالي وطلب مني... مو انا اللي قلت له..
خلود: وماتعرفين تقولين لا تعب عليك... معليش اخوي.. نخلي منصور...
عهود: تراكِ صايره رجه وترفعين الضغط.. وعلمي روحك الأدب مو تعلميني أنا... ذا اللي ناقصني بزران آخر زمن...وعموما اليوم خارجين معاه يعني خارجين... وتركت بلوزتها وابعدتها عن طريقها..ولااعطتها وجه بالكلام اللي تقوله لها خلود ولا حتى ناظرتها...... وراحت لغرفتها.....
خلود.. رجعت للسرير ورمت نفسها عليه ومسكت المخده وضمتها لها... وقعدت تحاسب نفسها.. ياربي انا غلطت عليها.. هي اكبر مني بس تصرفاتها تقهر.. ماتقدر لا مشاعر لا احاسيس.. ماهمها الا نفسها... خالد.. ياعمري عليك.. ماتشاركنا القعدات بكثره.. وعنده دوامين الصبح والمساء.. ويوم الجمعه بس اجازه.. ومع كذا تضغط على نفسك وتودينا... الله يعين... باروح بس عشان خالد مايزعل.. ولا يظن اني ما ابي اطلع معاه... لو اعرف وش فيه خالد... لو اعرف مشكلته يمكن اقدر احلها.. او اساعده فيها... يارب ساعد خالد... وابعده من همه الي هو فيه.... وريّح باله... ووفقه وين ما كان... آآآآمين... وحاولت دمعه تنزل من عينها بس منعتها... ومحت بسرعه عيونها.. عشان مايبان شئ..
وتنهدت وتذكرت اللي كان معاها يوم دخلت عهود وبسرعه كانت حاطته تحت الشرشف وبسرعه اخذته وحطته بعلبة بعدين بالدرج فوق.. وآخر شئ عشان محد يشوفه...
راحت لامها تساعدها بالمطبخ... لانها نامت الظهر والعصر وماعندها شئ بالاول كانت تبي تفتح النت بس قررت انها تروح لوالدتها.. دخلت على امها...
خلود: هلا امي... افا...وش عندك بالمطبخ...
ام خالد: بازين قهوه...
خلود جات عند امها وحبت راسها وقالت افا انا موجوده وتروحين تسوين انتي القهوه.. ارتاحي بالصالة وانا ازينها واجيك... خلاص امي....
ام خالد: الله يرضى عليك... انتظرك بالصالة بس عفيا عليك بنيتي حطي زعفران..
خلود: ابشري يمه.. اسوي احلى قهوه وتعجبك ...
ام خالد: ان شاء الله.. وراحت للصاله تنتظر القهوه تزينها خلود....
قهوة المغرب متعودين عليها يسونها... وكل العائلة تجتمع... بس احيانا تشتاق ام خالد انها هي تسوي قهوه.. وهذا يضايق خلود.. تقول امي كبيره وهي اللي تسوي.. والله فشله... مي حلوه بحقها...
**********************************
دق باب غرفة النوم... بشويش... ودخل واتكل بصوت راخي شوي... السلام عليكم...
كانت معطيه الباب ظهرها وقاعده على السرير بشكل انوثي حلو..منزله راسها شوي.. ومقرب رجلينها منها.. وتلعب بخصله من شعرها... ويوم دخل التفت يم الصوت اللي جاها... ودارت كل جسمها وردت السلام....ورجعت نزلت راسها....
... اقترب منها وقال.. يسعد لي هالوجه الحلو... شلونك.....
رفعت راسها وعيونها مليانه حزن.. بس تحاول ما تبينها.. بخير.. نزلت راسها وقالت.. وانت شلونك....
اقترب منها شوي.. ورفع راسها... الحمدلله..دام هالوجه اشوفه... وراح عند الشماعه اللي قريبه من الباب وفصخ ثوبه.. وعلّق شماغه... ولبس بجامة البيت القطن الناعم.. لونها ابيض.. واطرافها... بيج... كانت هي اللي جايبته له هدية.. من ضمن هدايا الزواج.. وقالت له مره.. انها حلوه عليك... وصاير كل فتره وفتره يلبسها...
اقترب محمد منها ورفع راسها... ما يحاول يبين لها انه داري عن الحزن اللي فيها...
محمد: ما قلتيلي من شفت اليوم....
نهى.. التفتت عليه.. وردت عليه بصوت هادي.. من شفت؟
محمد: ام... شكلك منتي مهتمه.. مو لازم اقول...
نهى: تشجعت شوي وقالت لا والله صدق من شفت...
محمد: ما يحب يثقل عليها شفت سامر.. ولد جيرانكم.. تذكرينه...
نهى:صار لازم تحط عينها بعينه.. حاولت تضغط على روحها وتمثل انها مافيها شئ.. أي سامر ما اذكر...
محمد: والله ... سامر ولد جيرانكم اللي له فتره غايب عن اهله....
نهى: لا شعوري رفعت صوتها... بالله ... وين شفته.ومتى؟ ومتى جا لأهله؟..
ابتسم محمد.. وكمل كلامه ولا كأن صار شئ... له يومين.. حليله جا لشخص شخص من معارفه... وسلّم عليه...
نهى.. يالله... ودي اعرف شلون استقبلت لخبر امه.. وخواته...
محمد.. حس باللانتصار... واسرع بالكلام عشان نهى ماتهون... ام..

الله يعطيك العافية ياقلبي
سلمت أناملك
مودتيِ لكِ
مجنونة زينب

مشكورة اختي مجنونة زينب على ردك
والحين بانزل جزء

[]((الجزء الثالث))
اجتمعت العائلة على قهوة المغرب.... ابو خالد وام خالد... وخلود... عهود جت متأخره شوي... اما منصور احيانا يجي واحيانا لا... يقول لامه.. يمه قهوتك سحر... صاير اشتهيها مع اني مو راعي قهوه.. بس خربتوني.... كانوا خلود ومنصور وعهود اتفقوا على انهم يفتحون موضوع الخطبة مع ابوهم وامهم... ومرتبين الكلام.. وقاولو ان شاء الله يجي الوقت المناسب.. ونفاتحهم بالموضوع.. لان الخطوبة طولت.. هذا وهم يعرفون العريس طولت السالفه... اجل لو من برى كان وش سوو... كان الحوار بين خلود ومنصور هم اللي متحمسين للموضوع ومتى يفتحون الموضوع... بس عهود تقول والله انكم تكبرون المواضيع.. عادي افتحوا السالفه وكلموهم يمكن لهم كلام ثاني... بس خلود مصره على رايها انه مو باي وقت تفتح الموضوع.. لازم تلاقي الوقت المناسب.. عشان تفتح مواضيع زي كذا... دخل منصور... وهو يسوي نفسه ماهو بوعيه... ويستنشق بقوه... آآآآآآآآخ يا يمه... يازين ريحة القهوه... ام وهو يمشي بشويش... اكيد طعمها يجنن... ويقترب منهم وحب راس امه وابوه.. وجلس على يمين ابوه...
مدت خلود له الفنجال: سم ياخوي....
منصور: الله يعطيك العافيه....
وابتسمت خلود وقالت له ترى انا اللي مزينه القهوه...
ابتسم منصور... احلى وعرفنا نقلد الوالده...
خلود: افا عليك اعجبك.... جت عهود من فوق وهي تمشي بسرعه ... وناظرت فيه بعدين ركزت نظراتها على منصور... وقالت وهي تبتسم.. وابتسامتها ما تطمن... وقالت تستهبل وتقلد المصاريه: متقمعين عند النبي....
قال ابو خالد.. وهويضحك عليها اللهم صلي وسلم عليه... وردوا كلهم.. اللهم صلي وسلم عليه...
وقعدت عهود مقابله لابوها ومنصور.. والتفتت على خلود.. وقالت لها.. اسكبي لي فنجانا من القهوه...
خلود: على امرك.... ومدت لها الفنجال .. اخذته عهود... وشربت الفنجال... وقالت بسرعه وبدون مقدمات وهي تناظر بابوها... ابوي .....
ابو خالد: نعم....
عهود: اهل عمي ابو فيصل اتاخروا علينا بالرد لا يكون مايبون ومستحين قالوا لك شئ... بكل برود تقولها وكانها سالفه عاديه...
منصور كان معاه الفنجال يبي يشرب منه ويوم اتكلمت عهود اهتز الفنجال اللي بيده وانكب شوي من الفنجال على رجله.. وقاعد يبلع ريقه.. ويحاول يستوعب اللي يصير... اما خلود صارت خايفه على منصور.. وخايفه من رد ابوها... وبس موزعه نظراتها بين ابوها ومنصور... ودقات قلبها تزداد... وبقلبها حقد وغضب من اختها عهود.. شلون ترمي سالفه زي كذا لا وقت مناسب ولا اتفقت معاهم......وهذا هم مخططين من اللي يفتح ومن يتكلم وش يقولون؟؟؟ وهي ولا عليها.. ترمي السالفه مهمه او ماهي مهمه كل شئ عندها عادي...
اللي تكلم هو ام خالد... تكلمت بهدوء وتبي تهون المواضيع اللي دايم عيالها يسون من أي شئ قضية... ناظرت بعهود وقالت لو مافي نصيب بيقولون... ومابيننا شئ..
عهود... مصختها مره... وقالت: طيب الى الان ليش ما ردوا ما كأنهم طولوها... ومنصور وين بيلاقوا مثله.... خلود انقهرت مره ودها تقطع لسان عهود..زودتها مره.. ولا كان اخوها موجود... وكأن السالفه سالفة لعب مهوب جد....
منصور كان مصدوم ..مو قادر يتكلم وهو واثق من نفسه ومتأكد إن كلام عهود ميه بالميه.. وين يلاقوا مثلي....
ابو خالد: اللحين وش دخلكِ انتي... خلاص هم بيقولون وابو فيصل.. امس مكلمني....
منصور.. ابتلع ريقه... وحاول يجمع الكلام...مع انه بداخله اصرار على انه مافي احد مثله..وانعرض عليه بنات من بعض الرجال اللي مايعرفونه.. وااثق لدرجة الجنون.. بس الواحد احينا يفقد اعصابه...هو صح وده بالجوهره بس مايصير نصيب باي طريقه ولا ينرفض... واللي يهمه انه بعدين بيقولون تقدم لاحد قبل كذا ورفضه... والتفتت جهة ابوه وشد على اعصابه ووازن صوته وتكلم بلهجة الواثق..
.يبه: وش قال ابو فيصل..........
كل العائلة يبون يعرفون الرد.. حتى ام خالد.. تبي تعرف لان ابو خالد ما طرى لها اصلا انه تواجه مع ابو فيصل...او تكلم معاه بسالفة الخطوبة.. خلود خايفه على منصور..خايفه على مشاعره.. خايفه انه يكون تعلق بها.. لانها كانت آخذه راحتها احيانا وتسولف عنها... يمكن اعجب فيها وانا السبب..واحيانا تتطنز على انها زوجته وانك بتدلعها اكثر مننا... اما عهود كانت تنتظر الرد بس لقافه تبي تعرف الرد وبس.. وتتناقش معاهم دايم بس عشان تبي بالنهاية يصير عرس وتكشخ هي.. من تزوج؟ بنت مين؟ اخوها مو اخوها... عادي عندها....
انتبه ابو خالد على حرص الجميع انهم يستمعون لجوابه...
وقال: ابو فيصل قال البنت بثالث ثانوي وثانوية عامة.. بس تنتهي تعطيك الرد.. وإن شاء الله مايصير خاطرك الا طيب....وانا بصراحه مئيد ابو فيصل بكلامه يعني ثانويه عامه المفروض انا ما استعجلنا.
سكت الجميع على جواب ابو فيصل مهم عارفين هو حل للي يبون يوصلون له.. والا افهموها نبي نطولها وانتوا تراجعوا... منصور حاس بضيق متوقع ان العرس بيصير ببداية الاجازه.. يعني المفروض اللحين متملكين.. وعهود... قامت على صوت جوالها ولا علقت على الموضوع لأنه مايهمها... اما خلود راحت بافكارها مع اخوها منصور..ودها تواسيه ماتبيه يزعل... وتبي تقويه وتقوله مايصير الا الخير.. بس تخاف تعطيه امل بهالخطوبة وبعدين يصير العكس... مترددة مره.. وصارت تقهوي ابوها وامها... ومنصور ما تحمل القعده حاس انه ثقيل..ومثقل على روحه وعلى غيره... فخرج بره .. بس بشكل ما يلفت للنظر عشان ما يبين لوالدينه.... خلود كانت بتلحق على اخوها بالحوش بس نادتها عهود من اعلى الدرج والتفتت خلود... وقالت نعم عهود وش تبين..... عهود... قالت وهي مستعجله.. هذا خالد اتصل ويقول تجهزوا بعد العشاء اول مايجي بياخذنا....
ام خالد: وين رايحين؟
عهود: وهي فوق ولا كلفت على عمرها تنزل تكلم امها بصوت عالي عشان تسمع..بيخرجنا خالد ليوم..
ابو خالد: وانا ماخبرتوني...
خلود.. انحرجت مره.. صحيح مو هي اللي خططت للخرجه.. والمفروض عهود هي اللي تتكلم.. بس ماتدري وش تقول؟.... وكانت منزله راسها..وهي تفكر... بس جت عهود.. وقالت لابوها...وهي من فوق الدرج ولا نزلت.. بس كانت رافعه صوتها وتقول... ابوي.. ذا ولدك وبسيارته خارجين وبنكون معاه يعني.. انت ومالك لابيك..مدري انت وولدك واحد..وضحكت.. وضحك على عليها ابوها... ناظرت بخلود... وقالت ... يا هوه....ولا سمعتها خلود..
خلود.. تفكر ومنسجمه مره.. صح طلعتها من ورطة الاستئذان.. بس اسلوبها مو حلو مع ابوها وامها اول... وانقهرت مره...وبعد اليوم بنخرج..بنخرج..وعهود تسوي اللي ببالها دوم... وقطع عليها تفكيرها صوت عهود... هيه.. قالتها بصوت عالي عشان تسمع... اسمعي خلود سويي شاهي.. خالد يقول مره مشتهي شاهي... خلود.. انقهرت من عهود بس عشانها قدام ابوها وامها سكتت وما قالت شئ.. اللحين خالد مخرجنا وبسببك واكيد قال لك انتي سوي لي... بس لازم انا اللي اسوي... وقالت لعهود ببرود.. ان شاء الله باسوي... وتذكرت منصور.. بس وين.. أكيد راح... خرجت الحوش ما لقته فيه..راحت للملحق مسكر الانوار وباين انه محد فيه ما راحت له تتأكد لانها تخاف الحالها واللحين وقت مغرب... عرفت انه خرج بره... الله يعينه... وراحت تسوي الشاهي وتحطه بالترمس عشان مسويته بدري.. وتبي أي شئ يشغلها عن منصور... فسوت الشاهي وعقلها مشغول بمنصور.. وحطت نعناع مغربي لأن خالد يحب المغربي ومايفضل الحساوي... وراحت لغرفته بعدين تنتظر خالد يرجع.................
******************************************
فتحت النت وفتحت المنتدى اللي مشاركه فيه وكتبت اسمها...
اسم المستخدم: عود أذان
المعرّف:******
شكرا لتسجيل دخولك يا.. عود أذان.... وانفتحت الصفحه الرئيسية... كالعادة اللقافه ما تتركها الجوهره.. نزلت تحت شافت المتواجدوان الآن.. (7عضو.56 زائر)
,المجروح,جوري,السامر,عود أذان,شقحاء الحضريه,بنت ابوهاsOoOso
سوسو هي صديقتها اللي تعرفت عليها عن طريق النت .. وفتحت منتدى الفرفشه.. ودخلت على لعبة(اكس&او)وقامت تلعب بهاللعبه والبنات الموجودين يشاركوها.. وعناد بين البنات والعيال.. ويتحدون من يجمع نقاط اكثر البنات والا العيال.. وفتحت بإطار جديد منتدى الخواطر... لقت خاطره كاتبها المجروح.. وحاط صوره بالفوتوشوب مزينها بس الوانها غامقه آخذ درجات البني.. والخاطره مره حزينه.. وغامضه كأنها عن الرحيل والهجران.. مره أثّرت بالجوهره.. كتبت رد بالوان الفصفوري وكثرت لون الوردي...
(هذه الدنيا فلا تهتم.. ابهج ناظريك بألون الطيف تجد نفسك سعيدا.. أدر ظهرك للشئ الذي يتعسك.. ابتهج.. ابتسم.. غيّر من نمط حياتك.. تجد الدنيا تبتسم لك.. اجعل الشئ الذي يكدرك.. من توافه الأمور.. واستخدم الوان الربيع تفتح لك ابواب السعاده)
مع تحيات.. عود أذان...
رد عليها المجروح بلون بني غامق... يجيب الهم والكدر...
اتمنى ان اغير من حياتي.. التفت للدنيا بوجه آخر.. ان اتعلم الحب الطاهر النقي.. ان اجد من يحتويني... وتفتح لي حياة جديدة تناديني بصوتها العذب وتقول هلم اليّ.. ها انا لك وانت لي... فأدرت ظهري وابتسمت عليّ اجد ما كنت اتمنى ولكن لم اجد الا السواد يخلطه السواد.. والوجوه المظلمه...والهم والكدر.. فرثيت لحالي... وعاودت العبوس.. وعلمت انه لن يتغيّر... والوان الربيع لا تروق لمجروح مثلي...
محبكم.. المجروح...
الجوهره يوم شافت الرد انصدمت.. من رده.. شكله بهم..وغم.. الله يعينه.. وهي كانت كارهته بسبب الرسايل بس يوم شافت الرد حزنت عليه.. ويوم جت بتسكر المنتدى والنت لقت نافذة صغيرة تبين انه فيه رسالة خاصة ومكتوب العنوان.
وين اللي ؟؟؟؟؟؟
ارتجفت الجوهره من الرساله لان المرسل المجروح.. صايره تخاف منه. ومن رسايله ومن تالي زايد حاله... وتخاف لو جا فيصل ودخل عليها او فتح المحفوظات وش تبي تسوي... وين تودي وجهها..وش تقوله..لان فيصل يعرف المنتدى اللي تدخله وكم مره دخل عليها وهي تتصفح المنتدى بس ماتدري شاف الاسم اللي داخله فيه او لا... والمجروح برسايله كأنه يعرفها ويتكلم بثقه... ضغطت على موافق بسرعه.... وانفتحت الرساله...
بسم الله الرحمن الرحيم....
حاط الخاطره اللي كاتبها وردها اللي رادته بالخاطره ب.. وبعدين كاتب...
وين الوان الربيع القاها اذا راعيها مفقود.. وشلون الّون صفحتي والقلم مفقود.. اجتمع حبي وفقدهم وصارت حياتي غموض.. اشتهي لو باللقاء مره.. لكن عنادهم موجود.. ابيك تفهمني لو مره.. وانا بالحب مشهور...

وحاط وجيه حزينه.... بسرعه قفلت الصفحه وسحبت سلك النت.. وراحت للمحفوظات ومسحت كل الموجود عندها.. وحطت على النت وبعدين خصائص ومسحت الكوكيز... وسحبت فيش الكمبيوتر عشان لو كان باقي شئ من المحفوظات ينمسح ولا يبقى شئ...
ومن بعدها كل ما ردت على موضوع صار يرد لها على الخاص الرد الاساسي.. ويرد على الموضوع بكلام بسيط... واي موضوع هي منزلته يرد عل الموضوع بس رسايل خاصه يرد اكثر... وهو يعرف يضبّط صور بالفوتوشوب... وكل ما نزل له شئ جديد كل الاعضاء يردوا والجوهره تحاول ماتبين شئ وترد مثلهم وكالعادة يرد لها بالخاص.... والى الان تفكر شلون تتخلص من هالمضايقة.. والي قاهرها انه بالمنتدى يسوي روحه ثقيل وعاقل.. وشبه ملتزم..و مو راعي خرابيط.. بس ماقالت لاحد... وحاولت تبتعد عن المنتدى شوي شوي.. بس كل مافتحت المنتدى تلقى رسايل عتاب ورسايل شوق وحب.. بس ماهي عارفه تقول لمين.......... لصديقاتها اللي يعرفون انها مسجله بالمنتدى والا لاحد قريباتها............بالاول كانت ميته خوف من هالرسايل اللحين صارت من كثر مايرسل عادي... او انها تمسح كل رسايله ولا ترد عليه.......
*****************************
جا خالد من الدوام... كان تعبان بس واعد خواته مافي مفر انه يرتاح ويوديهم بعدين.. ومن زمان ما خرج معاهم.. فناوي ان هالخرجه تكون رايقه.. وتذكر يوم عهود تقوله بصراحه ممله الخرجه معاك.. وعشان كذا ناوي يونسهم بهالخرجه... خالد.. طويل ونحيف. بس عظامه عريضه اللي يشوفه يحسبه مليان بس عظام وجهه تبين انه نحيف.. طول الوقت بغرفته.. ومايشاركهم بجلساتهم كثير.. واذا جلس ما يكثر بالهرج.. غامض.. وكم مره يفكر يخرج من البيت بس اترجوه امه وابوه وقعد بس عشانهم.. اخواته من كبروا وهو على هالحال..يحسون ان فيه شئ بس مهم متأكدين وكم مره يسألون امهم بس تقول ما فيه شئ.. واحيانا يحسونه عادي لانه هادي ومايحب الإزعاج.. وكثر الهرج والمناقشات.. وغالبا يعلق بكم كلمه ويسكت حتى لو السالفه مهمه... عهود تظن انه شايف نفسه ومو معطي البنات وجه.. وانه متكبر عشانه ولد.. وتقول الله يعين حرمتك اذا تزوجت.. اما خلود حزنانه عليه وتحس ان فيه شئ.. بس تقول يمكن التزامه هو اللي مخليه كذا يعني مايحب الدنيا ولا يكثر بالهرج.. لأن ماشافوا منه شئ غلط.. فتعتقد ان بسبب الذنوب يخاف ربه ويكره هالدنيا وكانت تقول يا حظه لو هو كذا ازين مننا اللي نذنب ولانهتم.. الله يتوب علينا... دخل مع الباب الرئيسي للبيت ومر على المجلس الخارجي لقى ابوه معاه احد شيّاب حارتهم.. دخل وسلم على ابوه والشايب صديق ابوه...وكالعاده وش اخباركم .. ويروح معليش توني راجع من الدوام وتعبان...ويخرج... وبعدين دخل من باب البيت الداخلي.. ومرورا بالصاله.. رقى الدرج... وقف بالصاله الصغيره اللي فوق ونادى على عهود... عهود كانت منسدحه على سريرها بعد ما صلت العشا وتنتظر خالد يرجع اول ماسمعته.. بسرعه قامت من سريرها وهي تقول طيب.. طيب..جايه... وجت عنده... قالها خالد.. ها جاهزين... عهود: ايه جاهزه.. بس ما ادري عن خلود... دقايق اشوفها واجي...
خالد: على طريقك الله يعافيك كوب ماء...
عهود: ابشر ثواني واكون عندك...
دخل خالد الغرفه.. ونزل ثوبه وشماغه.. والعقال... وفضخ شرابه وجزمته السوداء... لازم اذا راح الشغل يكون بشكل رسمي مره...قعد على كرسي المكتب ينتظر عهود.. ونسي انه لابس بس سروال سنة وفنيلة.. دخلت عليه عهود وضحكت..
قالت: من زمان ما صار شكلك كذا تصدق طالع كأنك بنقالي... ابتسم خالد..وبنفسه مستحي وحاس شئ بنفسه.. يكره احد يشوفه بهاللبس.. ويحس ان الواحد اذا كبر وعنده بنات اذا كان متزوج او اخواته كبار مو لازم يشوفونه بهالطريقه... بعكس منصور اللي ولفو على شكله وهو بسروال السنة والفنيلة..او يلبس احيانا وزره.. اخذ الكوب وقال يالله ابشربه وانزل وبالاقيكم جاهزين...
عهود وهي خارجه بسرعه: ان شاء الله اللحين اجهز...
خالد ما قام من مكانه الا يوم خرجت عهود يوم خرجت راح وقفل غرفته ولبس ثوب البيت ... وشرب كوب الماء.. .. وداري عن حوسة الحريم انسدح شوي.. يبي يرتاح.. وقام لبس ثوب ابيض(غير ثوب الدوام) وطاقية وشماغ من دون عقال... ولبس نعال ابو اصباع... فتح باب الغرفه ونزل تحت ينتظرهم بالصاله... ولقى امه.. جاي جهته.. سلم على راسها وقال : يمه ابخرّج البنات تجين معانا..
ام خالد: لا يا وليدي.. ابي الراحه هنا...وجلست على احدا لكراسي
خالد... جلس جنبها عل الكرسي وقال:طيب ارتاحي بس جربي تروحين معنا....
ام خالد: لا الله يجزاك خير.. انا ارتاح هنا...
خالد: اهم شئ تكونين مرتاحه هنا والا هناك....مايحب التلزيم والحنّه...
وشاف خلود وعهود نازلين من الدرج وانتبه ان عهود مي لابسه شراب... اول ما نزلت قالت عهود: جاهزين يالله..نمشي..
خالد ناظر جهتها وبعدين قال وهو ما يطالع فيها... لا منتي جاهزه روحي البسي شرّاب...
عهود: بسرعه جاوبت وهي متوقعه من السؤال:والله ما لقيت شرّاب... بعدين بالليل من يشوف...
خالد.. مازال مايناظر فيها وقال: لا ليل ولا شئ روحي البسي خوذي من عند امي من عند خلود.. بس بدون شرّاب مافي خرجه...
عهود..من غير نفس قالت :طيب... صارت تهمس بدا النكد... وقالت لامها : يمه اباخذ شرّابك طيب...
ام خالد: طيب... وبسرعه رقت الدرج وراحت غرفة امها ولقت الشرّاب تحت الشمّاعه.. اخذته وقعدت ولبسته .. ونزلت بسرعه ولقت خالد وخلود مهم فيه... سألت امها وين راحوا... قالت لها امها: قالوا انهم ينتظرونك بالسياره...وبسرعه خرجت وعدلت غطاها وخرجت... وركبت السياره...
عهود: السلام عليكم....
خالد+خلود: وعليكم السلام.....
خالد بدا يحرك السياره وقال لهم سويتوا شاهي..
عهود بسرعه: ايه سوينا شاهي معاكِ السله خلود....
خلود: ايه معي السله وجبت شابوره بعد...
خالد ناظر بالمرايه على خلود وقال لها: صبي لي شاهي الله يعافيك.... خالد يتكلم بهدوء وبصوت واطي شوي... لو ايش مايرفع صوته.. وخلود يوم كانت تحكي صديقتها الروح بالروح وبنت خالها ليلى كانت تقولها حتى صوته احس انه حزين...
صبت له الشاهي واقتربت بين المقعدتين وقدمت له البياله عند يده لانه يسوق ومايقدر يرجع يده ورى... اخذ الشاهي.. وقالها سلمتي... خالد يحب الشاهي مره واذا ما شرب يوميا يصدع... قال خالد.. وهو يوجه الكلام لهم الاثنين حددتوا مكان... تنمشى فيه اليوم والا لا....
عهود : لا ما حددنا.. أي مكان خرجنا...
خالد: وانتي خلود ما بالك شئ...
خلود:لا مبالي شئ.. عادي أي مكان على ذوقك....
خالد: طيب اول ناخذ لفه بالشوارع ونشوف العالم ...بعدين نفكر بمكان نجلس فيه....
صار الصمت بالسياره محد يتكلم وهم متعودن على خالد ما يتكلم معاهم عشان كذا سكتوا ومايدرون شلون يفكر تخاف وحده منهم تتكلم عن شئ او تمزح بشئ ويطلع ما يحبه والا يصير أي شئ... وصار الصمت هو حديثهم بالسياره..... خالد عادي عنده الوضع بس يوم يتذكر كلمة عهود ... يتغير هالشعور وانه قال انه بيونسهم... فحب يكسر الصمت..
قال: ها يابنات تبون نتحدى بأسئلة يعني أنا فريق وأنتم فريق.. وكل واحد يسأل خصمه واللي يجاوب اكثر هو الي يفوز.. عهود وخلود مهم مصدقين وبسرعه قالوا بصوت واحد:طيب.....
قالت عهود: انت الأول ابدأ بالأسئلة......
خالد حس نفسه انه متورط... وقال ايش رايكم نقلبها مساجلة شعرية....
عهود: اها منت قد التحدي...
خالد: بكيفكم بس احس المساجلة اكثر حماس والا لا يا خلود...
خلود انتبهت عليه وقالت الا حلوه اكثر... واتحمس معاها اكثر...
عهود قالت بلا مبالاة:والله بكيفكم انا ميح بالاشعار.. الا اذا تبون اناشيد البزران اللي بالمجد... انا جاهزه....
قاموا يضحكون عليها خلود وخالد... هالبنت بايعه الدنيا...
قال خالد لخلود... طيب نبدأ من عندك... انتي الصغيره يالله...
خلود: طيب ...ام....
سارعي للمجد والعليا مجدي لخالق السما...ههه
خالد ابتسم.. وقالها: وش هالابيات الخطيره طيب حرف الألف صح....
أمتي هل لكِ بين الأمم منبر للسيف او للقلم....
حرف الميم.....
عهود: ام... حرف الميم..حرف الميم.. ها خلود ما بالك شئ....
خلود.. متحمسه باللعبه مره... وما تبغ تخسر...وقالت لعهود: لا مالقيت بسرعه انتي لقيتي...
عهود قايلتلك انا ميح...
خالد يضحك عليهم وقال ترا نص دقيقه بس مسموح...
عهود: حرام عليك وشو نص دقيقه.... أيه لقيته....
ما اجمل القمرا بالليل ان ظهرا متبسما حلوا بين النجوم سررا
ما اجمل ما اجمل ما اجمل القمرا......
تبسم خالد وخلود عليها..ما عندها الا اناشيد الاطفال..... خلود قالت لا ما يصير نبي اشعار صدق... قامت تتكلم عهود بطريقة تستفز فيها خلود... يالله ياللي مايصير وش عندك من بيت...
خلود تسوي روحها ما اهتمت بكلام عهود بس بنفسها ضايقه من طريقتها... قامت تتكلم عادي وتقول...ام ايه.. لقيته......
مالي وللنجم يرعاني وارعاه امسى كلانا يخاف الجفن غمضاه
يالله حرف الهاء....
خالد: قعد يتذكر وعهود تلخبطه ... ها انهزمت قول بسرعه قول....
خالد: بلا رجه اللحين اجيبه... أيه......
هجوت زهيرا ثم إني مدحته وما زالتِ الأشراف تهجى وتمدح
خلود ضمت شفايفها وصفرت تصفيرتين... العن ابو الأبيات وش هالخطاره...
خالد: ابتسم وقال لعهود وخلود يالله حرف الحاء..... وناول خلود البياله لاهنتي صبي لي شاهي... اخذت خلود البياله وصبت له وقدمت له البياله... وخلود وعهود يفكرون... وتذكرت بيت شعر بأولى ثانوي وكان عاجبها... وكانت بنت خالها ليلى دايم تقوله اذا لعبوا مساجله.... وقالت وهي تحس بالانتصار....
حتّام نكتم حزننا حتّاما وعلام نستبقي الدموع علاما.....
وقالت عهود يالله حرف الألف.. خالد قاعد يفكر بالبيت وعجبه مره... وقال لخلود: عيدي البيت خلود..... خلود بكل أريحية تعيده.. وتمطمط بالكلام كأنها شاعر يلقي قصيده...
حتّام نكتم حزننا حتّاما وعلاما نستبقي الدموع علاما
وعهود تقوله يالله خالد حرف الألف وخالد سابح بأفكاره بعيد مع البيت الي قالته خلود... ولا هو يمهم..وعهود عشانها بالليل ومغطيه ومن المستحيلات تفتح النقاب عند خالد ماهي شايفه خالد وعلمات وجهه شلون صارت... وتحسبه قاعد يفكر بالبيت وما زالت تغايظه ..خالد اعترف انهزمت...لالالالا فريقنا فاز عدت نص دقيقه... وبعدين صرخت عهوجد يالطيف شوفوا الحادث ولا شعوري فتحت النقاب تشوف... هي وخلود.. طبعا خالد مو معاهم ولا انتبه لهم انهم فكوا النقاب..... والتفت خالد على الحادث الفظيع اللي كان على يمينهم بالتراب...ومروا من عند حادث فظيع السياره الأولى مع الجنب مهشمه مره.. ومعدومه ومن قدام بعد والبنات يقولون يا لطيف يالله.. يارب استر... وجت عهود وقالت يالله شوفوا هناك السياره الثانيه..شكله حادث كبير... وكانت السياره الثانيه مره بعيده.. والاسعاف مايشوفونها وتقول خلود:شكلها الاسعاف اخذت المصابين... الله يعينهم... الله يستر يارب.... بس خالد ما كان معاهم كان مع بيت الشعر ويوم شاف السياره..... سبح بأفكاره بعيد... وجاه صوت صراخ... وشئ اسوود... تراب...غبار... شئ متناثر.. الدنيا مقلوبه فوق تحت... عجوز تصرخ تلعن... شايب عصاه جمبه... ضحكة لؤي.. بعدين بكائه... عالم متجمعه.. اختفوا الناس... صوت عالي يصرخه وينعاد هالصوت بإذن خالد...وقوي مرات ومرات ضعيف... بصوت مبحوح وماتقطع وكله مليان حقد وغضب .. الله لايوديك الا لجهنم... الله لايوديك الا لجهنم...الله لايوديك الا لجهنم...كلمات ترن بإذنه ماعاد يسمع شئ من حوله... راسه فيه دوار ... سواد بسواد... غبار غطى على عيونه...بدا مايستوعب اللي قدامه ولا يشوفه..شئ يطيح عليه..عالم اسود..دوامه...دوار.... صوت عالي بإذنه... بدا يرتجف ويرتجف.... ويرتبك ويحاول يسيطر على السيارة... ويمسك الطارة بيديه الثنتين وشاد على روحه.. كانت بهالوقت عهود تكلمه وتقوله خالد يالله لطيف شفت الحادث ... وانتبهت انو مو معاها... وشافته مو قادر يسيطر على نفسه ويغمض عيونه ويفتحها واسرع بالسياره تقوله خالد..وش فيك...خالد...ولايرد عليها.... طيب عطني البيالة ... ولايكلمها صرخت عليها خلود خوذي البياله من يده.. واخذتها وهي مي عارفه وش تقول.. انتبهت ان السيارة بدت تميل يسار... قالت خالد... انتبه شوف السياره بدت تميل وخالد مسرع ولا يرد عليهم... يا خالد سياره قدامك ابعد عنها....

((الجزء الرابع))
يا سلام اليوم يوم الاربعاء... ومبارة الهلال والاتحاد عل الكاس يوم الخميس يعني بكره... لفت لولو على صديقتها سماح...
لولوه** ام.. بكره الهلال فايز فايز... لاتعبين روحك وتشوفين المباراه....
سماح** عيدي..عيدي.. ماسمعت.. بكره اتحادي.. من فوق خشوم الهلالين...
لولوه** اتحدى... اصلا الهلال عالمي وله بطولات وصولات وجولات... ولاعبينهم ياخذونهم الفرق الاجنبية.. اما انتم..ام.. ولا لاعب صح....
سماح** لاعبينا واثقين من نفسهم ومايحتاج فرق برى تعلمهم.....
لولوه** مساكين تصبرون نفسكم باي شئ... عموما الميدان يا حميدان وبنشوف بكره من اللي بيفوز....
سماح** قلت لك ريحي بالك بكره اتحادي....
جت شيماء تبي النقاش يروح... ومايتهاوشون... ايش رايكم اللي فريقها يفوز تعزمنا يوم السبت....
سماح** هذي اللي همك بطنك... بس لعيون الإتي اعزمك....
لولوه** انا لي مفاجأه أخرى اذا فاز مع اني متأكده انه بيفوز.. بس باخلي المفاجأه بوقتها...
شيماء** الله يقلع ابليسك حمستيني... وشي....
لولوه** لالالالالالا قلت مفاجأه...
حورية** الحمدلله ان ربي ما بلاني مثل ما بلاكم... والا اللحين اطامر مثلكم....
لولوه** بالعكس وناسة...صح شدة اعصاب.. لكن روح الحماس فيها...
حورية** احم احم.. لاتحاولين ما ابي اتابع......
جت حوريه وتبي تلفت الانتباه بطريقه يحبونها شلتها..وقالت:تعا الوا... بنا ات......
البنات بصوت واحد** وش فيه.....
حورية** ماسمعتوا شريط للشيخ سليمان الجبيلان.. اسمه(وهم الحب)
لولوه** بصراحه دايم اشوف الاشرطة بس عمري ماسمعت...
سماح** حتى انا....
شيماء:وانا بعد..
حورية** خلاص ابجيب لكم ان شاء الله الشريط وتسمعونه....
لولوه&سماح&شيماء.. ما كانت تهمهم الاشرطة الدينية ولا كانوا يحرصوا عليها مع ان عوائلهم محافظة الا ان حب المباريات طغى على تفكيرهم بأي شئ ثاني... وحوريه شافت فيهم الاخلاق الزينة.. وتقبلهم للأشرطة الدينية فحبت تدخل بشلتهم وخطوة خطوة حتى تخليهم يحبون الاشرطة الدينية ويتركون المباريات والهواش اللي ماله داعي....
شيماء** لولوه شوفي أريج تناديكِ...
لولوه** انا
شيماء** ايه انتي....
لولوه راحت عند أريج اللي كانت بالصف الاول وكانت خارجه من برى وتوها دخلت الفصل... كانت استاذه ايمان.. واقفه عليهم انتظار.. استاذه ايمان استاذة الدين... محبوبة من الكل... ماتحب تهاوش وتصرخ وتستغل سيطرتها بتنفير البنات منّها وتعتبر مرحلة الثانوية ماهي مرحلة هواش..بالعكس الواحد لازم يفهمهم ويتكلم معاهم على انهم كبار.. ومتبعه اسلوبها مع الكل.. حتى انهم يحبوها اللي درستهم والي ماتدرسهم... وعشانها تلقي محاضرات احيانا وقت الجمعيات... فالمدرسة كلها تعرفها ويحبونها.......
لولو**وصلت عند اريج وقالت: نعم اريج...
اريج** استاذه ايمان تبيك...
لولو** (ببلاهه) تبيني انا...
وبدل ماتخرج برى.. بسرعه راحت للشله وقالت لهم استاذه ايمان تبيني.... وش سويت انا؟ ياربي.....
شيماء** روحي استاذه ايمان طيبة ما راح تسوي لك شئ...
امجاد**اللي من اول ساكته وتابع حديثهم بصمت بس تكلمت اللحين وردت على لولو وقالت: روحي.. روحي من قدك استاذه ايمان نادتكِ...
لولو** اخاف اكون مسوية شئ... والله اني خبله... استحي منها....
شيماء** يابنت روحي.. اللحين وش تقول عنك.. تخاف من أي شئ...
لولو** أي والله وبسرعه تروح....
خرجت من الفصل وسكرت الباب وراها تدري ان البنات بيراقبونها... تنهدت وقالت... ام.. استاذه ايمان....
استاذه ايمان.. كانت لافه الجهه الثانيه وما انتبهت على لولو وهي خارجه.... ويوم اتكلمت لولو... انتبهت لها....
استاذه ايمان** هلا لولو... وقربت الكرسي اللي جمبها وقالت اقعدي....خلنا نسولف...
لولو** ( انهبلت ) ها..لالالا..كذا مرتاحه...
استاذه ايمان ابتسمت وقالت:ى .. على راحتك.....
لولو** هلا استاذه تبين شئ.... طلبتيني....
استاذه ايمان** ما توقعت رد لولو كذا بس حست بالارتباك اللي فيها.. وانها ممكن تقول أي شئ....وقالت: ابي اسولف شوي معاك...
لولو** ليه مسويه شئ انا(تحس ان بين الاستاذه والطالبه مجرد درس وواجب وانتهينا)....
قامت تضحك استاذه ايمان*** تقريبا انتي مسويه شئ...
لولو** وشو؟؟؟؟
استاذه ايمان** يعني بصراحه انا مايهمني مستوى الطالبه الدراسي بمقدار المستوى الاخلاقي... الواحد تروح الايام وتجي ومايتذكر الا الناس الطيبه اخلاقهم... سلوكياتهم.....الاشياء الرائعة هي اللي تبقى... اما الشاطرات كل سنه فيها شطّار...
لولو نقز ببالها المباريات لايكون سمعتني وانا مسويه فيها قمة الاخلاق والا دب ... فشيلة.. لا وبعد قاعده اقول فريق الهلال قوه ووسامه واصرخ... انواع الفشايل.....
استاذه ايمان** لولو لي ماتجاوبين....
لولو** ليش وشو السؤال؟
استاذه ايمان** اقول الشقاوة والرجة اللي سويتها متى بتنتهي؟
لولو** المشكلة انها بدون تاريخ انتاج يعني من دون تاريخ انتهاء...
استاذه ايمان**ههه.. ضحكت بصوت عالي من اول عاجبتها هالولو وتحس انها يبيلها شوية سمكرة وتطلع طالبة ماحصلتش....
قالت لها** يعني ما في امل العقل يرجع...
لولو** ماتدري ليش حست انها اهانةاو تعدي شوي عليها... سكتت شوي بس قالت مايصير تزعلين على أي شئ.... قالت لها... لا ان شاء الله يرجع العقل... وتجرأت وحطت عينها بعين الاستاذه وقالت... بابتسامه عريضة...
يعني الرجة اللي فيني هي سبب القلق اللي فيك....
قامت تضحك الاستاذه وقالت.. برافو جبتيها....
قالت: لولو... مايصير خاطرك الا طيب ان شاء الله...
الاستاذه: ان شاء الله....
لولو**تامرين شئ استاذه...
الاستاذه(بذهول)لا بس شدي حيلك....
لولو** ان شاء الله... ودخلت الفصل... وسكرت الباب وراها بشويش... واسندت راسهاعلى الباب من ورى... ..وتنهدت تنهيدة طويلة... وتذكرت ان الاستاذه قالت لها باسولف معاك شوي... الله يقلع التناحه... انواع الفشايل... بس يوم جن صديقاتها... نست كل شئ... وقعدن يسولفن ويخربطن... وجت الحصه اللي بعدها معلمة اللغة العربية... ترفع الضغط... وكلهم يكرهونها..وكم محاولة من لولو وشلتها يغثوها ويسولفون معاها عشان تروح الحصه وماياخذون درس.. وبدات الحصص وانتهى اليوم الدراسي... والكل فرحان.... اربعاء..... يا سلام....
*******************************************
قاعده عهود تفكر بالكلام اللي قالته يوم كانوا قاعدين مع بعض... لايكون احد زعل..طيب انا ماسويت شئ غلط..وما كنت اقصد شئ.. وانا ماقلت شئ يزعل... مسكت المخده الصغيره وضمتها بقوه... وراسها يفكر ودايخه من كثر التفكير..وكانت منسدحه على السرير..وانقلبت على جهة اليسار وهي تفكر.. لاتكونين موسوسه انتي ماقلتي كلمه مي زينه او جرحتي احد.. وقاعده تتذكر كلام خلود يوم تقولها انتي عديمة الاحساس.. من جد انا كذا.. ليته.. انا كل كلمة افكر فيها...لايكون احد ما فهم وش قصدي..لايكون هو حساس وانا ارمي الكلام على كيفي... ياربي معليش عديمة الاحساس بس على نفسي اما على احد غيري لا.. انا اتطنز على البنات العربجيات اللي يرمون الكلام على البنات ولاينتبهون ان هالكلمات تجرح.. صح اني ما قلت لاحد واتطنزت عليهم بنفسي..بس لايكون ربي بلاني.. لا ان شاء الله... وقطعت تفكيرها ...وهي تقول لروحها انا قلت باقطع التفكير بالعواطف لانها ما تجيب الا الهم..وبس افكر باي شئ واشغل نفسي بهالخرابيط..لازم اصير مثل العيال..ما يهمهم أي شئ مو حنا البنات على أي شئ الدمعه تنزل... واحاسيس ومشاعر..وتفكير ..واحبسي روحك بغرفه.. وعواطف..وجروح.. (كلام تقول لروحه وتحاول تصدقه وتنفذه عشان تبعد عن المشاعر والحساسيه المفرطه اللي عندها)
وقامت من سريرها وراحت تدق على صديقتها تعزها مره بس بداخلها كبرياء يمنعها من انها تقول اني مره احبك...وهي واياها مره اكثر من صديقات ويقولون لبعض كل شئ بس هي تخاف تعترف لها عن مقدار معزتها تقوم تجحدها وتتركها او تتكبر عليها صديقتها..وتقول لنفسها الشيطان ما مات..وما ابي الشيطان يكون بيننا.. طلعت من غرفتها ونزلت للصاله... وجت عند التلفون ويوم جت بتدق قالت لها امها....
ام خالد: تبين تكلمين بالتلفون
التفتت عهود لوراها وشافت امها وقالت لها:أيه
وراحت بتاخذ التلفون...جت امها واقتربت منها وترددت بالكلام اللي بتقوله بعدين اتكلمت وقالت لها:بصوت حزين ..بصوت امومي خايف من التوقع السئ..بنبره عاطفيه شديده..بنبره اشبه للتوسل اكثر من انه أمر: لا تدقين
عهود:انتبهت لامها بس حاولت انها ماتبين أي شئ وبداخلها انهار من الاشفاق على امها بس تحاول انها تكسر نظرة الخوف الي بامها ...ووتبعد القلق اللي بامها....
تشجعت وقالت: ليش يمه؟تسوي روحها مي داريه وش فيها امها...
ام خالد:نفس النظرات..ونفس النبره.. مازال الخوف يدب بداخلها..مازال القلق معاها.. بس هالمره اقوى..قالت بصوت كله امل ان الكلام اللي تقوله يتحقق: يمكن يدق خالد
عهود بابتسامه خفيفه وتحاول تقوي امها... وبنفسها راحمه مره امها: ما راح يدق
ام خالد بحزن وكانها بهالوقت تبي احد يوقف معاها ويشيل عنها همها ويصبرها باي شئ..يسقي لها بذور الامل بداخلها.. قالت: ليش مايدق؟
عهود: يمه خالد وتعرفينه زين هذا طبعه..تحاول تقوي امها..
ام خالد: ايه بس له اسبوع طالع من البيت ومادق الا مره وحده
عهود: الحمدلله انه دق بعد...يمه لاتحترين خالد هو كذا مايحب احد يخاف عليه او يحتريه... لاتشيلين همه..وبعدين يمه تراه كبير هو مو صغير.. وولد يعني العيال مايحبون احد يسأل عنهم او ينشغل باله عليهم.. وان شاء الله مو صاير له شئ..
ام خالد: كانها تواست من كلام بنتها بس ودها احد يهدي عليها ويطمنها لان بالها مشغول مره عليه وحاسه انه صاير له شئ..ومن يوم ما قالت عهود لامها ان خالد مو جاي البيت وهي تحن فوق روس بناتها عشان يعلموها وش اللي صار.. بس هم انكروا ان فيه أي شئ وقالوا لها تعوذي من ابليس.... وحاولت ابو خالد انه يشوفه يسال عنه بس مو راضي يقول هو رجال..مايصير نسال عنه... بس ماهي مطمئنه ودها لو تشوفه ..لو نظره تحس انه بخير... أي شئ عنه يبشرها انه بخير...
عهود: ها يمه وش قلتي؟
ام خالد: بايش؟
عهود: اقولك ما يخالف اكلم بالتلفون
ام خالد: ايه بس لاتطولين...
عهود: ابشري يمه...واتصلت على صديقتها نوف...
ام خالد ما هي متمطئنه مشت بخطوات ثقيله ببطء وجت بتخرج من الصاله بس ما طاوعها قلبها لان املها كبير بانه يدق.. وعشان جواله طول الوقت مغلق..والا كان باليوم اكثر من مره تدق عليه.. رجعت عند عهود وقالت لها..
عهود يمّه لاتطولين يمكن يدق
عهود ما قدرت ترجع وتعيد نفس الكلام ..مع ان بداخلها حاسه بامها وحاسه بالخوف والقلق الي عايشته امها..واتبي تاكد لامها هالشعور وما تبي تحسس امها بانها منشغل بالها عليه لانها قالت اللي عندها بالاول وماتبي ينعاد هالكلام وبنفس الوقت شفقانه على امها حيل..ودها تساعدها باي شئ..
ردت على امها بابتسامه عاديه خاليه من أي تفسير لام خالد: ابشري يمه...
وردت تكلم صديقتها نوف....لانها اتصلت وما مداها تتكلم الا وامها قاطعتها..
عهود: ايه نوف وين وصلنا...
نوف: عهود لايكون امك تبي التلفون
عهود: لا امي ماتبيه..اصلا امي ما تكلم بالتلفون كثير.. واذا دقت تدق على خوالي يوم الجمعه...
نوف:ههه... اشوى.. ايه وصلنا عند سلمان...ما كملتي لي السالفه يوم تحكينها بالجامعه وتجي سيارتي واخرج..
عهود: ايه صح ما كنتي موجوده..وتحمست عهود وهي تحكي لنوف السالفه...اسكتي بس.. لو تدرين ذاك اليوم.. الصراحه قلبي وقف.. قسم بالله احس ان شعري وقف من الخوف
نوف تستهبل: أي شعر
عهود:ههه..ملزمه تعرفين
نوف: اكيد
عهود: منب قايله..كل شعري وقف...خايفه احد يكشفني اويدخل علي سلمان..انواع الفشايل؟؟ المهم افتح درج تحت سريره.. وشكله درج خاص.. استغليت الفرصه كلهم مسوين سناعه ورايحين المطبخ..وخلود وليلى جايبين فلم هندي مدري من وين ويشوفونه... تخيلي يعني واحد ماتدرين عنه ولاشئ غامض هالسلمان..حتى خواته مايحكوني شئ عنه...ولايسولفون عنه كثير مثل احمد..المهم فتحت الدرج بشويش وطبعا كنت مسكره باب الغرفه ومحد فقدن..على بالهم اني بالملحق افتش ورى العيال..متعودين علي..حتى عيال خالتي لاجيت ضفوا كل اغراضهم اللي بالملحق..يدرون اني اتفقد اماكن العيال..ودايم يتطنزون عليّ بس ما علي منهم..اهم شئ اعرف وش ورى العيال...عاد اول مافتحت الدرج..الاقي اشرطة اغاني بس الغلاف من دون الشريط.. وتجراف لونه احمر.بس قماشه شئئئئئئئئ..مدري وش اسمه بس غالبا بالهدايا اشوفه
>>نوف داخله جو بالسالفه ومتحمسه عل الاخر.. ايه كملي وش شفتي بعد
عهود: وش تقولين انتي...نظري سته على سته ... الحمدلله والشكر...
نوف:عهود والله مني رايقه لمزحك الثقيل تكفين كملي
عهود: اصلا ولا انا رايقه لاني صدق متحمسه بالسالفه
وتكمل.. المهم حاولت افتح التجراف مو راضي ينفتح مثل الحبال عليه مدري شلون صايره..وعشان كذا مايفتح..وما ابي افتحها بعدين يعرف..حاولت افتحه شوي بس اشوف مكتوب فيه شئ..من هنا من يمين ومن شمال..لو كلمه..بس مره ما طلع معاي شئ.. لقيت سديهات واحد مكتوب عليه منوعات وواحد برامج الويندوز وخرابيط الحاسب والباقيات مو مكتوب عليها ولا شئ..بس واحد لقيته باخر الدرج مكتوب عليه(خاص جدا) ياربي مره اللقافه ذابحتني ودي اعرف وش فيه ولاجبت اللاب توب اشوف..واخاف يفقده لو اخذته..وتدرين العيال بهالاغراض مافي احرص منهم..المهم تركته مكانه وقلبي يتقطع حسرة والما ولقافه عشان اعرف وش محتواه... وبعد ين وش تتوقعين لقيت
نوف: وش لقيتي
عهود: توقعي
نوف: مما بالي شئ...ومن الحماس قالت: اليوم عقلي عاطل عن التفكير
عهود: اجل ماينفع اكمل لك السالفه اليوم..اذا عقلك مو موجود...
نوف: تكفين ما اقدر والله من اللقافه ما اقدر انام
عهود: مره مايمديني..جربي ليله بدون نوم..عشان تتفكرين في نعمة النوم..
نوف: بلا بياخه عهود كملي..
عهود: رحمتك والله..بس بكره او بالجامعه ازين اعلمك..لاني كنت ناويه ما اعلمك موليا..بس هونت..
نوف: والله انك بايخه.. من جد يبي من يكفخك.. بس هيّن خليها تجي سوالف مثل كذا انواع النذالة بتشوفينها...
وبعدين كملت بحسرة وطنازة على نفسها: المشكله اني خبله اعلمك بكل السالفه بعدين اتذكر
عهود:ههه... يالله عنوني امي فوق راسي اكلمك بعدين او بالجامعه المحاظره الثانيه ماعندنا شئ اقولك وش لقيت..بس ذكريني..مع السلامه
نوف: مع السلامه..
عهود ما كلمتها امها ولاشئ بس تشوف نظرات امها اللي تقطع القلب ... وامها تعرفها زين ماترجع وتعيد الكلام وبنفسها وودها تتكلم..بس نظراتها تكفي.. من يوم ماشافتها تروح وتجي على الصاله وتناظر عليها انتهت من المكالمه والا لا..عشان كذا انهت المكالمه بسرعه لانها خافت مره على امها..وحالتها ماتسر لاصديق ولا عدو..هذا قلب الام مابيدها شئ..الله يهديك يا خالد تعال وريح امي...
*****************
عائلة ابو سلمان...
خوال عائلة ابو خالد..
حنان: اكبر وحده بعائلة ابو سلمان.. عمرها 26 سنة ممرضه..بعد الثانوي دخلت كلية التمريض سنتين وكانت متفوقه ولقت تعيين بسرعه..تحب عملها مرّه.. وتشتغل في مستشفى حكومي...ملتزمه مره اكثر وحده من عائلتهم ملتزمه..
سلمان: اكبر ولد عمره 25سنة ..آخر سنه بالجامعه..المفروض انه منتهي من الدراسه بس اهماله رسب سنتين..
احمد: المفروض يكون بثاني جامعه بس اللحين بثالث ثانوي.. السنة الثانيه اللي يعيدها.. عمره 20سنة.. بايع الدنيا ومايهمه شئ اهم شئ وناسته حتى انه اهمل بعض حقوق اهله ..ومتأذين اهله من طناشته الزايده عن اللزوم...
ليلى:بثاني ثانوي..عمرها17 سنة صديقة خلود الروح بالروح..كل اسرارهم عند بعض.. وصديقات كل وحده متعرفه على الثانيه.. وداخلين كلهم قسم ادبي يقولون اسهل ولازم مثل بعض.. بس كل وحد بمدرسه لان كل وحده داخله المدرسه القريبه من بيتها.. يحبون يقعدون الحالهم كثير وبس يسولفون مع بعض ومايخلون بخاطرهم بشئ الا قالوه لبعض..واغراضهم حت المدرسه مثل بعض يشترونها وكل وحده اذا لقت شئ زين اشترت للثانيه..
رانيه:بثاني متوسط هاديه مره وماتسولف كثير..غالبا تكون مستمعه الا اذا احد سألها تجاوب.. واللي بعمرها مبسوطين لانهم لقوا احد يسمع لهم.. عمرها14سنة..
خرج احمد من غرفته وراح لغرفة سلمان دق الباب ويسمع صوت سلمان من الغرفه يقول:مين؟
احمد: انا احمد
سلمان:بشر امك..وش تبي؟
احمد:اقول افتح الباب
سلمان:الباب مفتوح
احمد: يمال المنيب قايل وفتح الباب..ولقى سلمان يحوس باحد ادراجه قرب عنده وقال:تبي مساعده حاضرين احنا
سلمان:ابعد راسك هناك..لو تترك اللقافه هذي افضل مساعده... وسكر درجه وراح قعد جمبه على السرير...
احمد:اخوي الكبير وتمون...
سلمان:خير وش ورى هالادب
احمد..بلا مقدمات ولا لف ودوران قال: ابغ فلوس
سلمان:والله اني شاك يا رجال خاف ربك امس معطيك300 ريال
احمد:والله امس العشا علي .. وعبيت بنزين.. وشريت لي طاقيه وتيشرت
سلمان: ماشاء الله مسلسل هندي قلبتها..الكشخه الزايده بطلها .التيشيرتات مليانه بدولابك.. والعشا ماله لزمه انت بطل فزعات وتمسك فلوسك
احمد:يعني..
سلمان:وش قصدك
احمد:بتعطيني والا لا
سلمان:لا
احمد:طيب هالرجه والزحمه اللي سويتها اللحين ليش من الاول قول وخلصنا
سلمان: ابيك تمسك قروشك يا الخبل
احمد ولا كلف نفسه يلتفت له خرج من الغرفه وترك الباب مفتوح عشان ينقهر سلمان ...احمد ولا اهتم بكلام سلمان ولا اثر فيه وعشانه اخذ المصروف الشهري من ابوه يعني لو يموت مايعطيه ابوه الا اذا كان محتاج مره..بس دايم ياخذ من اخوه سلمان واخواته دين وغالبا مايرجع الدين...راح لغرفة اخته حنان.. دق الباب بشويش..
حنان:ادخل..
احمد: السلام عليكم..بابتسامه عريضه...
حنان:وعليكم السلام.. ردت الابتسامه بهدوء... سكرت الكتاب اللي كانت تقراه ونزلت نظراتها اللي كانت عليها...
وناظرت احمد..اللي قال بسرعه..ما في ادخل تفضل
حنان: تفضل..
جلس احمد بالكرسي اللي مقابل حنان وقال ببرود وبلا اهمية او خجل
احمد: بدون مقدمات محتاج فلوس
حنان ابتسمت لاحمد وردت:كم تبي؟
احمد:تعجبيني انتي مو هالبخيل سلمانوه...
حنان:ردت بهدوء:والله انت اللي مسرف..اذا لاقدر الله مابقى لك سلمان والا انا شلون تتعود على المصروف..
احمد:تفائلوا بالخير تجدوه
حنان: لا والله صدق اتكلم ماشاء الله المصروف بالنسبه لك زايد شوي تقدر تدير مصروفك... اما اذا اتعودت على الصرف..ماتقدر تدير فلوسك لو دخلت الجا معه او بعدين اذا توظفت..
احمد: طيب ان شاء الله بس اللحين ابغ فلوس ومستعجل...
حنان:الله يهديك
احمد:آمين
حنان: كم تبغى
احمد:انتي كريمه وانا استاهل
حنان:تكفيك خمسين
احمد:وش تسوي ذي ولا بنزين
حنان:ميه
احمد:ولاميه
حنان: كم؟
احمد:يعني خمسميه..ثلاثميه..حق ثلاث ايام
حنان:ول عليك هذا والوجبات الاساسيه بالبيت ومصاريف الدراسه من ابوي.. عموما انا باعطيك ثلاثميه غيره مافي وخليها لاخر الشهر ترى مافي احد بيعطيك...
احمد:خلاص ان شاء الله بس بسرعه بالله...
حنان:طيب واعطته الفلوس وخرج بسرعه من عندها... بس خرج احمد غير عرف ان اخته صادقه وشديده معاه وامه ماتعطيه لان ابوه قال لامه لاتعطينه ولا شئ الا باذني..وسلمان تهاوش معاه..يعني لازم يهتم ومايصرف يمين وشمال...
احمد ما يهتم بالمصاريف ومن وين وكثير يتسلف من سلمان وحنان واحيان يضطر ويكلم ابوه.. مايهتم بالحياة وبحقوق الاهل..اهم شئ وناسته مع العيال وبس ومرات يسهر لاخر الليل واحيانا اليوم كله ماينشاف..وابوه يكلمه بس مو شديد عليه يكلمه بشويش وبهدوء الين كبر وتعود على هذا الوضع وتعودو اهله عليه..اللي مطايح مقهوره منه صدق وحاسه بالمشكله العميقه اللي طايح فيها احمد هي ليلى بس مي عارفه شلون تكلم امها وابوها ..وحاسه ان حالته زادت الا متى وهو على هالحال متى يعقل..متى يحس بالمسؤلية.. احيانا ترمي عليه كلام ويتهاوشون هي واياه... ويقولها صوتك ما ابي اسمعه..اللقافه بطليها.. وعرفت ان مافيه امل من الكلام معاه.. وهو ولاعبرها ولا اهتم بكلامها ومازال على طيشه وعدم اهتمامه....
************************
اليوم خميس في شقة خالد... قام من النوم وهو وده يرجع ينام مره ثانيه... الاسبوع الي مضى كله يقضي وقته بالنوم ومل من النوم بس هو اللي يبعده عن الحاله اللي هو فيها... صار يتقلب بالسرير يمد لحافه ويغطي اطراف اصابعه اللي كانت باينه وما زال يتقلب بسريره وتذكر انه ما صلى الفجر قام من السرير وهو متعب مره من كثرة النوم ومن كثر انسداحه على السرير... قام هو يتسنّد باطراف السرير وبشويش يقوم .. اول ما قام ظهره اوجعه مره مسك اخر الظهر وعلى اخر الفقرات ضغط بقوه عليها وبدا ياخذ هوا ويكتم نفسه شوي ويرفع جسمه ويوقف باطراف الاصابع بعدين يخرج الهوا ويغمض عيونه بقوه يحس بالالم يخف شوي وهو يتالم مره من اخر ظهره..وتجيه آلآم بظهره بقوه ويحس مثل النغزات الحاده كأنه سكاكين تجي على اخر فقره وورى بعض وبقوه وهو نادر يجيه مثل هالحاله ...فقد توازنه وقعد بطرف السرير وهو متألم حيل من هالنغزات واهاته مكتومه ويتألم بصمت اللي باين انه يتألم هو انه يغمض عيونه بقوه... وانسدح على السرير وصار يشد على نفسه ويحاول ان ظهره يشده معاه بس زاد الالم مرّه وما تحمل هالشد... قام من السرير وهو يالله يالله يرفع نفسه يحس روحه ثقيل مره.. وقف وحاول يخلي ظهره مستقيم..وشوي شوي تحامل على نفسه وعدل ظهره وخلاه مستقيم وبعدين يميل على جنب اليسار شوي شوي وكل مايزيد بالميلة يزيد الالم الف مره عن قبله ويرجع يميل على جهة اليمين ونفس الالم بس اخف مو مثل جهة اليسار.. بدا يحس بالراحه شوي او خف الألم تحامل على نفسه وراح توضى وصلى الفجر... ورجع قعد على المقاعد الارضية اللي بالصالة اسند راسه على ورى وهو مليان هموم وغموم... اما عينه حمره ووضحت التجاعيد اللي فوق وتحت العين وجسمه ضعف عن اول بكثير ما ياكل باليوم الا قليل بس عشان يقدر يروح الدوام... ويحس بصداع نصفي فضيع ووجهه صاير اسمر من قل الاكل...وصاير يشرب ترمسين قهوه عشان يخف الصداع.. تنهد تنهيده كبيره وقويه يبي يخرج من

((الجزء الخامس))
تصلت على صديقتها شيماء.. وهي متحمسه مره مع المباره..وحاسه انها بتطير من الفرحه وفيه نوع من الخوف..احلى يوم عندها اليوم اللي فيه مباره..
لولوه: السلام عليكم
شهد:وعليكم السلام
لولوه عرفت صوت شهد لانها دايم مسنتره عند التلفون ويسمونها سنترال البيت..وقالت:شخبارك شهد؟
شهد:الحمدلله.. شعلومك؟
لولوه:والله الصراحه اخباري اسألي عنها بعد المباره
شهد:ههه... اجل مثل شيماء محتاسه اليوم كله ومسويه رجه عشان المباره
لولوه: ايه ترى اليوم عل الكاس مو أي مباره..ام وين شيماء...
شهد: ثواني اناديها اوكي...
لولوه: اوكي...
شهد اكبر من شيماء بااولى جامعه راحت لغرفة شيماء اللي مي فاضية قاعده تزين شرايط بغرفتها ابيض وازرق..متيمه بالهلال هالبنت.. دقت شهد على غرفة..شيماء..
شيماءبصوت عالي وبدون نفس قالت: مين؟
شهد: افتحي الباب انا شهد
شيماء:مني فاضيه كم مره اقول لك
شهد: اوكي باقول للولو منتي فاضيه....
شيماء من سمعت اسم لولو نقزت وفتحت الباب بسرعه وابعدت شهد من طريقها وراحت للمجلس وردت على لولو ونفسها يجي ويروح من الركض
شيماء : الو ..ها ها ها..تلهث بقوه من الجري
لولو: هلا والله .. بشويش من وين جايه لايكون من السطوح..
شيماء: لا والله من غرفتي جايه بس جايه جري
لولو: ههه... بسرعه بعد السلام عليكم وشو شعورك مع اقتراب موعد المباره؟
شيماء:وعليكم السلام..لالالالالالالالالا(شنو شعوري)لالالالالالالا....شئ خيالي ما اقدر اوصفه..احس اني خايفه وفرحانه(ولولو تسمع بانصات)يوه وش اقولك اليوم ما قدرت اتغدى يوم قالي بدر لو خسر الهلال وش بتسوين.. صد نفسي عن الاكل..والله احس اني خبله.. بس وش اسوي غصبن عني والله مو بكيفي...وتدرين الوالده انواع التهزيئ..لاني خايفه ومرتبكه وما كملت غدا وقريت كل الجرايد..الرياضيه وكل الرياضه والجرايد الثانيه قسم الرياضه بعد قريته..متوتره لابعد درجه.. ياربي لو تشوفين شكلي انواع الهستره.. قالبه غرفتي ابيض وازرق.. كلها شرايط وقاعده تساعدني الشغاله...وامشي بالبيت واقول( الليله ليلتك يا هلال) المهم احكي لي عن شعورك...
>>ولولو داخله جو مع هالشعور وتسمع بانصات للشعور..
لولو: يوه..اول شئ تلفزيون سلطان مره كبير وهو اللي فيه الحماس اخذت سبير لمفتاح غرفته قاصته للحالات الضروريه لاني داريه انه اذا خرج يقفل الغرفه وراه..المهم اني اشتريت بطاطس ليز حار..وبيبسي..وامي هاوشتني لانها منتجات امريكيه..بس مالقيت الا هي..وانا ما اعرف اتفرج الا ومعاي بطاطس عشان يخف التوتر وادخل جو بالمباراه... بس تدرين اللي يقهر وشو؟
شيماء:وشو؟
لولو: اليوم خميس ويوم الي يجون فيه اختي ومرة اخوي..ودي اقترح عليهم يحطونها يوم الجمعه..انواع الطفش مافي شئ جديد..استغفر الله صح يوم فضيل بس مافيه أي شئ
شيماء:أي والله بس انا اقرى روايات يوم الجمعه
لولو: شلون روايات عبير وماشابهها
شيماء: لالالا عبير مره وحده.. لا اختي شروق قالت لي مي زينه ولاتقربين منها
لولو: عشانها وصخه صح
شيماء: غير انها وصخه هذا مفروغ منها.. تقول وحده من صديقاتي كانت مدمنه روايات عبيروكانوا ينصحونها البنات بس هي تقول عادي ما تأثر ومدري وشو؟ المهم يوم انها تزوجت ..كانت تسولف لاختي تقول عجزت اتاقلم مع زوجي..اذا جا موقف او شئ اتذكر بالروايه كيف هو يعامل زوجته وانا شلون...وردة فعله مو مثل ردة فعل ذاك.. والله غصبن عني مو بكيفي كل ما حاولت ابتعد ما اقدر... من جد شئ يخوف..عاد عقب ما قالت لي هالكلام بطلت تفكير اصلا فيها
لولو: يوه...لا اجل معك ما اقرى ولا شئ منها وبابطل تفكير حتى انا.....بس وش تقرين احس بملل اذا قريت
شيماء: اول شئ اختاري شئ حلو مو أي كتاب.. بعدين انا منوع اللي تبين.. اقرى لاجاثا كريستي.. ومصطفى لطفي المنفلوطي.. وقماشه العليان...وكتب علم النفس اختي شهد وشروق مدمنين عليها مره..يقولون تغيرت عادات سلبيه كثيره فينا..وانا الى الان ما قريت منها...
لولو: تصدقين والله حمستيني اجل يوم السبت تجيبي لي أي كتاب منهم..اذا قدرتي طبعا..ورضيت لك الانسه شهد او شروق...
شيماء:هيّن لوما رضت الصرقه بهالحاله جايزه...
لولو: اسمعي صوت الجماهير بدا عرض المباره...مع السلامه
شيماء: مع السلامه
وركضوا شيماء ولولو على التلفزيون المباره ما بدت بس من يوم مايجيبوا الصوره هم عند التلفزيون مسنترين....
بدت صافرة بداية المباره..واللي يبدا هو فريق الاتحاد.. وسماح وابوها وامها واخوانها واخواتها كلهم اتحاديين وماتابعين المباره بحماس.. والكل على اعصابهم مسابقه على نهائي..مو أي مباره.. بدا اللعب وبدا الحماس باللعب..وجت هجمه خطيره للهلال محمد الشلهوب عدى من الوسط واعطى الكوره لسامي الجابر على خفيف ومن جهة سامي سدد بسرعه بس حارس الاتحادي صدها..الجمهور صرخ بهالوقت وانطلقت صرخه من بيت لولو وشيماء.. ليش ضاعت ياربي..وتعالت صرخات وصيحات.. واشتدت المباره والحماس من الطرفين للحصول على الكاس.. والشوارع كلها فاضيه بكل انحاء المملكه..العيال ماليين المقاهي والكازينوهات.. والبقية المتبقية ببيوتهم.. وتجي هجمات خطيره للاتحاد من الجناحين الايسر والايمن بس هم لاعبين الاتحاد يضيعوها..ودفاع الهلال مو مركزين على هجمات الاتحاد... انتهى الشوط الاول على التعادل السلبي للفريقين(صفر_صفر) وبدا التحليل الرياضي يبينون اخطاء الفرقيقن ونقاط الضعف وكل لاعب وآداءه.. بدا الشوط الثاني.. وبدا الحماس بكل مشجع.. وكل واحد على اعصابه لاعبين ومشجعين وجماهير بالمباره والمدربين ولاعبين الاحتياط..كل واحد ناشف يبي يعرف وش النتيجه.. دخل بالدقيقه 75 نواف التمياط والجماهير انواع التصفير والتصفيق والتشجيع.. ويدخل يلعب وبالمقابل دخل حمزه ادريس وتشجيع من الاتحاد وتصفيق وتصفير.. وكالعاده غنوا الاغنيه المعتاده(اوه يا حمزه..اوه يا حمزه) واشتدت المباره وصارت اخطاء اللاعبين كثيره بسبب التوتر.. جت هجمه خطيره للاتحاد من ركلة زاوية وبراس اسامه المولد اللي ماشاء الله راسه غالبا ما يخطا.. وهداف.. طبعا صوت المذيع.. قول....قول قول ..وش هالخطاره يا اسامه..هدف ولا اروع في شباك الهلالين... هدف في الدقيقه 80.. وبدا التوتر وتضيع الكور وبدت الكروت الصفرا كالعاده من شدة التوتر.. اما بيت سماح صار رجه وصجه من الحماس والتصفيروانواع الفله عندهم وارسلت رساله على جوال ام لولو اللي طبعا كان مع لولو.. وكانت الرساله(( مهزومين لا تتابعين المباره)).. انقهرت لولو مره وانشدت اعصابها عل الاخر ...اما شيماء قامت تصيح ما تقدر تكتم دموعها.. شهد تقول شيماء تراها مباره . وتحاول تصبرها بس مافي امل..دموعها تزيد اكثر من كل مره..
شهد: مايصير يا شيماء
شيماء:...............
شهد:شيماء شوفي شوفي هالهجمه...
رفعت راسها شيماء.. على هجمه خطيره للهلال من نواف التمياط يشوتها للشلهوب اللي كان بمنطقة ال18 وركلة قوية منه وتدخل بشباك الاتحاد على الدقيقه85.. قامت تنقز وتصرخ من الفرح وتمسح دموعها اللي مازالت باقيه..
لولو.. نقزت فوق سرير سلطان ونقزت على الارض وتصرخ هداف...وتصفر.. ياهو ..العن ابو الاهداف.. روح يا الشلهوب الله يسعدك.. وجماهير الهلال صرخت وصار المذيع يالله ينسمع من الصيحة ..الجماهير الهلالية اللي هي اكثر من جماهير الاتحاد لان المباره بالرياض... لولو على طول ارسلت رساله لسماح: ((نامي يا عمري نامي.. اليوم ازرق ناظري للسما...))
سماح انقهرت من لولو ..واهلها كلهم متذمرين من هالمباره...
اشتد اللعب اكثر واكثر وماباقي على المباره الا خمس دقايق..ومايعرفون كم الوقت بدل الضياع.. انطرد بهالمباره من الاتحاد رضا تكر بسبب لعبه الخشن.. و4كروت صفراء للاتحاد..والهلال كرت احمر لباولو ديسلفا اللاعب البرازيلي و3كروت صفراء.. جت هجمه خطيره للاتحاد واللي يلعب محمد نور من الجناح الايمن يشوتها لحمزة ادريس اللي كان عليه رقابه عاليه من الدفاع الهلالي وابعدها فهد المفرج بركلة للوسط للشلهوب.. الشلهوب قام يحاور لاعبين الوسط تعدى من الاول والثاني والثالث يوم عدا منه على جهة اليسار لمرمى الاتحاد يسقط عليه المدافع رضا تكر ويكسره بحركة المقص الحكم طلع كرت احمر لرضا تكر واعترض الجمهور واللاعبين لكن الحكم اصدر الحكم محد يقدر يعترض جا حمزه ادريس ومسك اللاعبين وهداهم وما خلاهم يعصبوا وقال لرضا تكر يوقف قدام الحكم عشان يعطيه الكرت وفعلا وقف واعطاه وخرج برا الملعب وعلى اخر دقيقه من المباراه .. مكان كسر اللاعب محمد الشلهوب اللي طبعا خرج من الملعب وماقدر يكمل المباراه ..لعب الخطأ اللي ارتكبه رضا تكر اللاعب البرازيلي المحترف في صفوف الهلال ..كماتشو.. صفر الحكم ولعب كماتشوا وركز على الزاوية التسعين طبعا الحارس عرف المكان..ولف على الزاوية بس ضربة كماتشوا كانت اسرع واقوى بحكم خبرته بهالضربات.. واعلنوا الهدف.. صراخ وحماس... لولو قامت تنقز وتصرخ فاز...سجل... واو.... وصارت دقايق الوقت الضايع تشوفها وهي واقفه ... دخل سلطان عليها وهي واقفه وشاف شكلها وغرفته اللي صارت شقة عزابية..البطاطس بجهة والبيبسي بجهة والفص فص بجهة... جا عندها
قال:ماشاء الله فاتحه الغرفه...
لولو ولا ردت عليه متحمسه مع المباراه ولا ردت عليه واقتربت من التلفزيون اكثر وهي واقفه...
وقالها: حجيه انتا في مخ كويس وجا قدام التفزيون ووقف ولا هو راضي يبعد..
لولو: وخر عن التلفزيون...
سلطان قام يعاندها ويوقف قدام التلفزيون...ويقول: الحمدلله انا ولد وماتابعت المباراه.. وانتي غلبتي على فارس ولد جارنا...
لولو: بس دقيقه يارب انتهي على خير... يارب... ماترد على سلطان الي قام يغايضها... وجت هجمه خطيرة للاتحاد.. صارت لولو ماسكه المخده وواقفه..وتقول: الدعيع تكفى لا اوصيك اخر دقيقه لاتفشلنا..خليك قدها...
ويسجل الاتحاد هدف على اخر دقيقه ولولو وشيماء يصرخوا لا..حرام على اخر دقيقه ياربي اللحين اشواط اضافيه ولبنتيات...بس طلع الهدف تسلل والغى الحكم الهدف...صارت تنقز يا سلام عليك.. ذا الحكم والا بلاش.. وصفر الحكم معلنا عن نهاية المباراة ونهاية دوري خام الحرمين الشريفين الملك فهد بن عبدالعزيز... وصراخ لولو وصارت تدور ودقت على سماح تبي تغايضها لقت الجوال مقفل.. ارسلت رساله.. ((قلنا لك نامي.. الليله زرقه هاهاهاي))... وارسلت لباقي صديقاتها مباركه بمناسبة الفوز.. واتصالات بس بعد ما اعطوا الكاس لفريق الهلال والميديلات الذهبية.. وميته من الفرح...
سلطان: روحي كلمي صديقتك
لولو: اكيد شيماء... وبسرعه راحت ترد عليها وتحليل عن المباراه..وشفتي الشلهوب شكله تعبان.. اما نواف ياختي عليه يجنن..وتغزل وهبال وصرقعه ويفكروا بيوم السبت وش يسون.. واتفقوا على شئ..خطير...
يوم السبت الموعد اوكي
اوكي....
لولوه صح تتابع مباريات بس مستحيل تسمع اغاني تقول احس بشئ يخوف مره واخاف ان ربي يسخط علي..بس تسمعها من البنات وتردد الاغاني معاهم.. ولاتحب لاعب معين وتجمع صوره ومن هالخرابيط ابدا ماتقرب منها تخاف من هالاشياء حدها بس انها تشوف المباراه والتحليل الرياضي ... وشيماء مثلها..بس باقي البنات عادي عندهم....
راحت للمقلط وسلمت عليهم وردوا السلام وكان موجود امها ولطيفه ونهى...
نهى: ها لولو من فاز
ابتسمت لولو وفرحت ان احد معطيها وجه ويتكلم معاها بخصوص المبارايات..
لولو: اكيد الهلال فيه غيره بالسما عالي...
نهى: ماشاء الله مبروك
لولو:الله يبارك فيك... تعجبيني يا نهى انتي اللي فاهمتني...
لطيفه: الله من الملح..اقول لاتنجين علينا تعالي تعشي...
لولو: مالي نفس..
نهى: المفروض تخلصين العشا اليوم من الفرح
لولو:ههه من قالك اصلا توني اكله ليز كبير كامل ابعد التوتر عني..
ام محمد: ماشاء الله بعد تقولين تعالي يالله تعشي غصبا عنك
لولو: والله مالي نفس بس عشان ام محمد بآكل...
ودخل محمد بهالوقت وابتسم لنهى.. اللي ملكت روحه.. اللي يفقدها على طول.. رجعت له الابتسامه بحياء...
جا محمد وحب راس امه وقالها:شخبارك يمه؟
ام محمد:الحمدلله وينك يا وليدي تعال اتعشى..تعال جمبي اقعد وكل..انتبهت ام محمد للابتسامه المتبادله واشتعلت بقلبها نار الغيره....
ونهى اللي تمنت انه يقعد جمبها وياكل بس ماتقدر تتكلم ... اتعشوا ويوم خلصوا جا محمد وقال لنهى يالله البسي عباتك بنمشي
ام محمد:تو الناس ياوليدي
محمد:تاخرنا يمه.. تامرين شئ
ام محمد:سلامتك يا ولدي
محمد :الله يسلمك والتفت لنهى وقال يالله انا بالسياره...
نهى:ان شاء الله
وراحوا محمد ونهى لبيتهم..وقعدت لطيفه ببيت امها ويجي زوجها بعد صلاة الجمعه وياخذها.. ولولو هي الي استانست مره رغدوه بنت اختها والفوز اجتمعوا مع بعض..مستانسه عل الاخر....
*********************
تتمشى بحوش بيتهم اللي يشرح الصدر.. ثيّل(عشب اخضر صغير) على اطراف جدار الحوش بس المساحه كبيره شوي..في مكان بطرف الحوش فيه ثيل مره كثير.. اكثر منطقة موجود فيها الثيل عشان الواحد اللي يحب يقعد فيها ..ويستمتع بالطبيعه.. فيه جلسات ارضيه والجانب الثاني جلسات على الكراسي.. لفت الحوش حقهم خمس مرات تدور وتجي وفكرها مشغول مره مع مشكلتها.. تحس نفسها مكتومه..مضيق النفس عليها..ودها تستشير احد عنده خبره بس ماتعرف مين..ماتحب تضايق امها لانها تشوف ان امها كبيره بالسن والمفروض نريحها مو نزيدها هموم وغموم... قرت رسايل جوالها مرتين كلها.. قلبت بالارقام واحد واحد.. وصلت عند رقم تحس هو المنقذ الوحيد.. هو الحل الاخير.. تحمست مره لتنفيذ الفكره..ترتبت العمليه اللي بتسويها بكل بساطه..ماحست بصعوبة الحل ابد..كل هالمده وانا افكر واتعب وراسي وتعب وملل من التفكير وبكل بساطه هالحل هذ هو...مو معقولة.. دق جوالها وهي كانت تتأمل الرقم وبالها راح بعيد وتخرعت وكان بيطيح الجوال...وردت وهي تضحك..
الجوهره:هلا وغلا...
مشاري: هلا بك..السلام عليك
الجوهره:وعليكم السلام..
مشاري: وش اخبارك؟
الجوهره قعدت على احد الكراسي وهي تقوله:الحمدلله..اخبارك انت؟
مشاري:بخير نسأل عنكم
الجوهره:تسأل عننا شئ طيب انك تسال..وتكلمه بصوت تمثل انها معصبه وتقول:وش هالجحده..مره من زمان عنك..لاتسال لاتتصل ولا حتى رساله احس انك عايش...
مشاري: معليش والله من حقك..انا والله قصرت مره مع الكل..انتي سددي لي الفاتوره وانا اتصل عليك يوميا.. ..
الجوهره:ههه..لا يقالك العذر فواتير..
مشاري: يالله عاد انتي كريمه وانا استاهل...ماتحبين العفو
الجوهره:ام.... اصلا اتصالك ذا هو العفو..
مشاري: اشوى..طيب جوري انتي اللحين مشغوله...
الجوهره: لا..تامرني شئ
مشاري:لاجوري ابي الصدق
الجوهره:والله فاضيه وقاعده بالحوش اتمشى...
مشاري:طيب تعالي وافتحي باب البيت
الجوهره: احلف عاد..عند الباب انت..
مشاري: ايه عند الباب
الجوهره:..يالله ثواني وافتح الباب ..فمان الله..
مشاري:فمان الكريم...
وفتحت له الباب اول ما دخل طلع راسه وقالها: بوم... سلام الله عليكم
الجوهره: عليكم السلام...
وسلموا على بعض ..ويسألون عن الاحوال...
مشاري: يعني ما ادخل..مافيه تفضل..على الباب نتكلم
الجوهره:والله معليش من الفرحه كم عنك يا رجال....
مشاري:ههه.. الله يسلمك..
الجوهره..تفضل بس تبي بالحوش والا داخل....
مشاري: بعد ايش تفضل..قصدي الحوش اشرح للصدر من البيت..بس ابدخل اسلم على الوالده وناخذها معانا بره...
الجوهره..يالله.. وقاموا يسولفون مع بعض إلين دخلوا البيت....
مشاري فيه شئ من الغموض..لكنه طيب لدرجه مي معقوله ..مايحب المشاكل ولا الزعل.. هادي..وحبيب.. يحب يقعد مع البنات ويسولف معاهم..يحس بروح الدعابة معهم مو مثل العيال اللي هوشه وطقاق ..ويحس ان البنات ارتقوا بكل شئ حتى يوم يتكلم مع البنات ويتكلم مع العيال خصوصا اذا فتح احد المحاور او المواضيع يلاحظ الفرق الكبير بينهم.. من ناحية الثقافه وطريقة الكلام...
مشاري اسمر عيونه واسعه شوي.. شعره قليل شوي مو ناعم بس ابتسامته هي اللي معطيته الوسامه.. بسيط بكل شئ..مايلبس الا اثواب ولانه نحيف مره ..نحفه اللي خلاه يجزم ويصر انه مايلبس جنزات او ترنقات... مشاري يصير اخو الجوهره من الرضاعه..اكبر منها بسنه.. كانوا هم وجيرانهم مره مع بعض واكثر من الاخوان يوم كانوا بالديره..ويوم جابت ام الجوهره الولد اللي قبل الجوهره توفى ورضعت ولد جارتها بعد موافقه من ابو الجوهره ..لان ام مشاري جاها ضعف مره يوم ولدت مشاري ونزل معدل دمها الى 4 .وتعبت مره.. فرضعته... وماشاء الله مازالوا متواصلين ..كلهم نقلوا للمدينه بس مازالوا متواصلين خصوصا مشاري..
دخل مشاري والجوهره ولقوا ام الجوهره قاعده تخيط ثوبها.. جا مشاري وحب على راسها وجت بتقوم ام فيصل بس هو مارضى وسلم عليها وهي قاعده.. راحت الجوهره تزين القهوه.. ركبت الماء على النار..واخذت جوالها واتصلت على فيصل
الجوهره: السلام عليكم..
فيصل:عليكم السلام..
الجوهره: اقول فيصل ترى مشاري عندنا تعال بسرعه ..
فيصل:خلاص شوي وأجي..
الجوهره:لاتتاخر..اخاف يروح ومايتعشى عندنا..
فيصل:ان شاء الله شوي وجاي..
الجوهره:فمان الله..
فيصل:مع السلامه..
وراحت الجوهره عندهم بالصاله وقالت يالله يمه..يالله مشاري..قو للحوش..
ام فيصل:ايه ازين برا...
مشاري: يالله ..قوه..
وطلعوا بالحوش وقعدوا على الجلسات الارضية..مالها داعي يتقهون وبكراسي..
ام فيصل: وش اخبار دراستك مشاري..مير مره انقطعت عنا..مانشوفك..
الجوهره:ايه عليك فيه يمه..هاوشيه عشان مره ثانيه مايقطع...
مشاري: الله يستر منك يا السوسه ... والله يا يمه اني الفتره الماضيه استلمت شغل وصاير مع الشغل والدراسه مشغول مره وطلبات البيت.. ومشاويرالاهل.. مافي الا انا.. وهذانا ماشايين بالدنيا...
ام فيصل: الله يعينك..واخبار امك..
مشاري:بخير تسلم عليكم..
ام فيصل: الله يسلمها..هي الى الان تشكي رجلها
مشاري:الى الان بس الحمدلله اخف من اول..وكانت تبي تجي بس ماتقدر تمشي زين من رجلها..وقلت لها يوصل سلامك ان شاء الله
ام فيصل :الله يجزاكم خير..اشوى انها ما جات.. دامها تعبانه ازين لها الراحه
مشاري:وحركات الديره مانستها جايبتن تنكة كليجه
ام فيصل:حليلها ..الله يجزاها خير من زمان عن الكليجه
الجوهره:ههه,,,تتطنز على حركات الديره
مشاري:الا والله انها معجبتني واتمنى نرجع مثل اول
ام فيصل: أي والله عادتنا زمان ازين من اللحين.. جارنا اللي جمبنا مانعرف عنه ولاشئ ولو يشب ببيته نار مانعرف..
الجوهره: يمه حنا ماقصرنا نجيهم بس هم مايجونا وسوينا اللي علينا..هم اللي مايبون
ام فيصل: كل شئ تغير مو على الجار...
مشاري:تذكرين يمه سالم اللي موذي الديره
ام فيصل: ايه اذكره مدري الى الان بالديره والا راحوا
مشاري:لا ماراحوا بس عقل ماشاء الله عليه وصار مطوع الديره ومسك المسجد وماشاء الله عليه الله هداه ...
ام فيصل:ماشاء الله وش هالاخبار الزينه
مشاري:لا وبعد عرسه الاربعاء الجاي
ام فيصل:لا اله الا الله.. والله العيال كبروا..على طاري العرس ما دريت يا مشاري وش صار على الجوهره...
الجوهره انقبض قلبه.. تكفين امي لاتتكلمين..ايه امي على عيني وراسي بس ولو انا بنت واستحي.. يمه تكفين..كانت تكلم روحها وتتمنى ان مايصير اللي بالها لكن امها ماتبقي بقلبها شئ...
مشاري:خير يمه..وقام يشد على اعصاب الجوهره
وقال: جوري هاليومين مي عاجبتني اكيد مسويه شئ كذا والا كذا
الجوهره: وانت شدراك اصلا هاليومين منت عندنا والا الطير الاخضر
مشاري: بالضبط الطير الاخضر هو اللي قالي...والتفت على ام فيصل
وقال: سمي يمه بس كنت ابي جوري تعصب شوي...
ام فيصل: الجوهره بارده ماينفع معه شئ..المهم الجوهره....
يوم قالت الجوهره ..وهي تزداد نبضات قلبه ياربي يمه والله مايصير كل شئ تقولينه وكأنه سالفه عاديه..تكفين يمه....بس امها كملت كلامها...
ام فيصل: الجوهره انخطبت
مشاري:ماشاء الله ...على البركه...منهو عريس الغفله
الجوهره:كلن يرى الناس بعين طبعه
مشاري:احلى العروس زعلانه بس ماقلتي لي يمه منو العريس
ام فيصل:ولد عمها
مشاري:ايهم؟
ام فيصل:منصور
مشاري:خلاص حددتوا موعد العرس والخرابيط وتوابعها
ام فيصل: الى الان ما وافقت ولا عطتهم كلمه...
مشاري: افا البنت لولد عمها..ليش تشارونها.خلاص مافيها كلام...
الجوهره:معصبه صدق وموصله حدها مرات ماتناظر فيهم وولاكانها معاهم بس ينرفزها مشاري وتتكلم غصب
قالت: على كيفك انت... عادات الجاهليه نسيناها.... وردت لوضعها اللي انتبه له مشاري..
كملت ام فيصل كلامها بلا انتباه ولا اهتمام لل الجوهره.. بس هي مدري وش فيها ما ردت على الناس..والله ان منصور ما هنا ازين منه.. اخلاق ودين ومتعلم ووظيفه زينه وبعد ولد عمها..وش ازين من كذا
مشاري يبي يغيض الجوهره ويخليها تفقد اعصابها:أي والله اجتمع الزين على الازين...
الجوهره ماقدرت تتحمل اشتبت بعروقها النار ..احترقت على الاخر..بس مسكت اعصابها وقالت: بس ما راح يلاقي ازين مني لو يلف الدنيا كلها...
مشاري:يا عيني على الثقه..بس مصير البنت لولد عمها..شئتِ ام ابيتِ
الجوهره:والله محد يقدر يغصبني انا بنت صالح مو حيا الله...
مشاري:خ..وانا ولد حصه..هاهاهاي....
انحرقت الجوهره من داخل ودها تكفخ مشاري او ترمي عليه أي شئ بس اهم شئ تفرغ القهر فيه..عرف وش اللي يضايقني والحين بيمسكها عليّ...
ودخل فيصل بهالاثناء.. جاي ببرموده جنز وبلوزه سوداء..والقبوع قالبه يمشي بعربجه رافع كتوفه ونافخ صدره.. ..يوم دخل فيصل على طول اشرت لمشاري انه مايفتح السيرة عاد هو بدا يستهبل ويسوي روحه مايسمع ويقول لها اقوله ها... اقترب من جلستهم وسلم على مشاري..تواجه هو ومشاري وسلموا على بعض. هي الجوهره انقهرت وما ارتاحت الين