كثير اللي بقوا راسي روايه راقيه بحب راقي

يسلمو ع القصة
كميليها
تحياتي
::دلوعة زمانها::

بلإنتظار موفقه

الجزء الأول
1-في بيت متعب الراهي
متعب داخل البيت توه جاي من المؤسسه
متعب : أم تركي أم تركي وين راحت عساه خير إن شاء الله
خليني أشوفها فوق يمكن للحين نايمه
أم تركي أم تركي 00000
ساميه مدبرة المنزل جايه وهي تعدل نقابها لأنه نظام بيت أبو متعب محترم ماتفتح غطاها وفيه رجال موجودين : طال عمرك ممكن أكلمك بشغله
متعب : إيه تفضلي أسمعك
ساميه: عمتي أم تركي
متعب بخوف : وش فيها تكلمي صايبها شي
ساميه بإرتباك حست إنها كبرت السالفه وفهمها غلط : لا طال عمرك بس صار لها مده تقعد بغرفة الشيخ عبدالله وتبكي بس تناظر صوره وتبكي بحرقه
متعب بعد ماهدا شوي وإسترجع ( لاحول ولاقوة إلا بالله العلي العظيم) : ساميه أنا أشكرك على خوفك عليها والله يجزيك خير مشاعرك هذي في إعتباري لا تخافين
ساميه بسرعه وبصوت واثق : طال عمرك أفضالكم علي وعلى هلي كثيره وهذا أقل شي ممكن أسويه لعمتي نجود
متعب: جزاك الله خير أنا صاعد لها اللحين
متعب يدق الباب برقه : غلاي غلاي ممكن أدخل
نجود حاضنه صور عبدالله وتبكي
متعب عوره قلبه عليها: نجود يابعد كل من لي ذكري ربك الولد مافيه شي حي والحمد لله ياأم تركي إن شاء الله كلها إسبوعين ويخلص الدوره وتقدرين تكلمينه وتتطمنين عليه
نجود وصوتها مبحوح من البكا : يامتعب ولدي صار له شهر مايكلمني كله من سبة هالدوره أنا ماأبيه يدخل عسكريه بس أنت فضحتنا إلا يدخل
متعب وهو يضحك : نجود وراك خرفتي العمر مشكله الولد ماله غير 20 يوم تقريبا وأنتي تقولين شهر ههه
نجود وهي معصبه : وجعاه توجع إبليسك هذا اللي بيجلطني أي عمر أنت هيه تراي لسى صغيره يما منك وبعدين وش فرق الشهر عن ال20 يوم هاه بس تحب تفلسف أنت اللي أخذته مني ماعلي منك ترجعه لي بكيفك وقامت تبكي
متعب: نجود وراك ترى عبدالله عنيد وهو غلا قلبي وماقدرت أرفض له طلب وهو وده بالعسكريه حرام أحرمه منها وهي حلمه أقول تعوذي من إبليس وقومي توضي وصلي ركعتين إدعي الله يوفقه ويعينه
ترن ترن ترن تليفون البيت
رفع السماعه متعب : ألو من معي
0000 : هلا بهالصوت هلا بالشيخ هلا بالغالي
متعب : هلالالالالالالا وغلا بك من وين تكلم يالعنيد ههه
00000: أفا عليك يالشيخ أنا شيخ الرياض لي طرقي الخاصه ههه
متعب : أما شيخ الرياض صدق بشطانتك هذي حيلي كل الناس بجيبك
شيخ الرياض (عبدالله) : ههه بجيبي لأني حبوب تربيتك يبا ههه
نجود :ولدي عبدالله صدق يامتعب هو اللي كلمك عطني السماعه بسرعه
متعب: بشويش خليني أكلم ولدي وراك ماشبعت منه
نجود: حلا هو عشان تشبع أقول بس إخلص علي أبقى ولدي لا يقطع الخط
متعب: أوف خذي وخلصيني
نجود:هلا بشيخ الرياض هلا بوليدي هلا بغلاي كله
متعب : أوف كل هذا لعبيد
نجود: مالك خص ولدي وغايب عني ومشتاقه له فيها شي
متعب : لا مافيها شي براحتك ههه
عبدالله: ههه شفتي يما أنا محسود بحبك
نجود : يما ياوليدي سلامتك من الحسد بسم الله على قلبك
عبدالله: تسلمين يالغاليه
نجود: يما عبدالله تغطى زين لا يصيبك برد وإكل زين ولا تتهور يما عشاني
عبدالله : تامرين يما يابعد قلبي
نجود: يسلم قلبك يما
متعب: خلاص أعطيني إياه
نجود تبكي : مع السلامه ياوليدي والله الله بالأذكار لا يطقونك بعين
متعب : ههه أقول شيخ الرياض محتاج لشي فلوس لبس أي شي قل يبا لاتستحي
عبدالله: تسلم يالغالي أبقى سلامتك خيرك سابق طال عمرك بس عاد لا تجنن الوالده تراها غاليه علينا لاتخليني أتهور وأطلقها منك وأزوجها واحد ثاني
متعب بعصبيه: أقول عبيد إنثبر بس ياقليل الحيا
عبدالله: ههه إن شاء الله إنثبرنا مايعرف يتفاهم هالأبو مره ههه يبا مع السلامه يالغالي ولا تنسى تبرع عني وإدعي لي عشان الله يرحمني ويوفقني
متعب : إن شاء الله يبا مع السلامه يالشيخ
عبدالله: مع السلامه يالغالي
نجود: يابعد قلبي هالولد متى يتخرج وأفرح فيه
متعب : بإذن الله قريب ياأم تركي
خلينا نروح نتغدى تراي جوعان من الصباح
نجود: إن شاء الله دقايق والغداء جاهز
وقبل ماتطلع من الغرفه بشوي
قالت: أبو تركي
متعب: لبيه
نجود: آسفه إذا ضيقت صدرك اليوم
متعب: لا ياغلاي وش دعوى لازم نشيل بعض بالصعايب
نجود: تسلم يالغالي
متعب إبتسم لها: الله يسلمك
لي عوده مع رقي أذواقكم

يسلمو ع القصة
كميليها
تحياتي
::دلوعة زمانها:: يسلم غاليك يالذوق
تشرفني متابعتك

*جوانا*
تشرفني متابعتك يالذوق

تابع الجزء الأول
2- في بيت فهد الخالد
جود: يما يما غلا قلبي
ميمي مدبرة المنزل: هلا بدلوعة الرياض هلا وغلا
جود : هلا ميمي تغديتوا وإلا بعد و وشو غداكم ووين أمي وأبوي معنا اليوم وإلا لا والعله جيهانوه موجوده اليوم وإلا لا
ميمي: بشويش بشويش كل هذي أسأله رحميني شوي وبعدين حرام تغتابين جيهان ياجود
جود: إيه والله إستغفر الله بس مره ماأحبها الله يفكني منها قريب
ميمي: الله يصلحها
جود: ميمي وين أمي فيه
ميمي: بغرفة الطعام بس تراك متأخره على الموعد 10 دقايق ممكن تنحرمين من الغداء
جود: هههاي أنا دلوعة الرياض لي طرقي الخاصه وواسطاتي خ
جود أفسخت عبايتها ولابدلت ملابسها وطوالي على غرفة الطعام
جود : السلالالالالالالالام عليكم
المها ( أم جود): وعليكم السلام والرحمه
جود: سحبت كرسيها وقعدت تاكل بسرعه
المها : يما جود سمي قبل لاتاكلين
جود: إن شاء الله يما
جيهان زوجة الوليد : أشوف الأخت جود اليوم متأخره عن الغداء ولا أحد قال لها شي كل هذي واسطات
جود: تكح كح أعوذ بالله من شر حاسد إذا حاسد
جيهان: وعلى وشو أحسدك ياحسره من زينك عاد
جود: خلق الله التام وقمر وأهبل وش حلاتي ياعمري أنا
نوفا زوجة سعود: ذكروا الله يابنات خلاص إنتهينا كل وحده قمر وأحلى من الثانيه
جود: نوفا ماتشوفينها أذتني من دخلت وهي ماسكه فيني
جيهان : لا ياحبيبتي ماقلت إلا الحق
المها: خلاص وبعدين يعني أقوم أحسن وإلا تسكتون
جود: لاخلاص يما سكت إذا قمتي يما مايصير أحد معي يما غير 000
المها معصبه : جود وبعدين
جود: خلاص سكت
جيهان: خالتي شوفيها ماتقدر إني تاركه زوجي الغالي الوليد لحاله يتغدى بدوني عشان نوفا موجوده معنا وتتغطى عنه
جود: ههه تلاقينه مستانس
المها تطالع جود بعصبيه وتكلم جيهان: يابنتي وش هالكلام زوجك مع الرجال يتغدا مهوب لحاله وأنتي عارفه جمعت الأربعاء الحال كذا النسوان لحال والرجال لحال وكل يوم عادي كل واحد وزوجته
وبعدين دلوعة الرياض تمزح معك يابنتي
جيهان: عشانك بس ياخالتي بسكت
جود: نوفا يازوجة أخوي الغاليه
نوفا تضحك: وش بغيتي يالمتمصلحه
جود: أنتي عارفه إن وجهي القمر راح يغيب عنكم شهر عشان الإختبارات
جيهان بصوت واطي: أريح
جود: المهم وبما أنك أكيد راح تفقديني يالغاليه أبقى منك طلب صغير
نوفا وهي تضحك : ههه يالواثقه وش بقيتي
جود وهي تسبل عيونها وتسوي عمرها بريئه : أبيك توسطين لي عند الأخ سعود
نوفا: الله أكبر عليك جود أنا أتوسط لك هماك دلوعة الرياض
واللي تبينه تلاقينه
المها وجود ونوفا يضحكون وجيهان ودها تذبح جود
جود: ياعمري مرت أخوي كاشفتني ههه لا بس قلت أوفر مواهبي لطلب بكره
نوفا والمها: وبعد فيه بكره طلب
جيهان فتحت عيونها بإستغراب
جود: أكيد فيه طلب ياعالم وش فيكم تراي بدخل معركة الإختبارات حرام عليكم
المها: أقول ياجود لا تكثرين طلبات إذا صار حبيبك عسل لا تاكله كله
جود ونوفا :ههه
جود: يما هذاي آخر العنقود وتسون فيني كذا أجل لو إني الكبيره وش سويتو فيني
عذاب يادنيا عذاب
نوفا: إخلصي علينا وش بقيتي
جود: ودي أروح الفيصليه أدوج ولكن تعرفين قوانين الأخ سعود
نوفا: ممنوع الروحه للسوق مع السواق لحالك معروفه ههه
المها: إيه معروفه هذي قوانين البيت كله
جود: أدري ياغلاي أدري مهوب أنا عايشه بعسكريه وأنا مدري إن شاء الله ماأتزوج عسكري
المهاونوفا :ههه
جيهان : لا ياحبيتي وش تفكرين تطلعين وتدخلين على كيفك حنا لنا قيمنا ياماما
جود: يما وش هالعالم الملقوفه ( وإذا خاطبهم الجاهلون قالوا سلاما)
المها: عيب جوده
نوفا تبي تقطع المشكله قبل ماتصير: جوده إن شاء الله ولا يهمك أجي معك وأجيب سعود معي أبشري بعد وش تبين كم دلوعة الرياض عندنا
جود: تسلمين يابعد قلبي أدري إن دلوعة الرياض وحده وبس
المها ونوفا ههه
جيهان :كثرت الدلع تخرب ترى
جود: مع السلامه بروح أنام وغلاي ماما لاتنسين تجلسيني لصلاة العصر وعشان أسلم على بابا وخالي متعب أكيد بيجي العصر بإذن الله
المها ونوفا: بحفظ الله غلاي
جود: بحفظ الله ياغوالي
لي عوده مع رقي أذواقكم

بنات أتمنى أشوف تشجيع منكن ولو بكلمة شكر عشان أكمل يالغوالي

تابع الجزء الأول
3- في بيت فهد الخالد بالعصر
فهد يتوظى لصلاة العصر
المها: يابو سعود بعد الصلاه بيجي أخوي بو تركي
فهد: إيه إن شاء الله بيمرني ونروح نصلي سوا ثم نجي نتقهوى عندك
المها: على خير إن شاء الله
فهد طلع يصلي وتقابل هو مع متعب وراحوا سوا للمسجد
وطبعا راح معهم كل الشباب تركي وسعود وفيصل والوليد لأنه لازم الكل يصلي بالمسجد متعودين هم على كذا
بعد صلاة العصر راحوا الرجال لبيت بو سعود
بو سعود (فهد) : يالله حيهم هذي الساعة المباركه اللي جيتوا عندي يالغوالي إقلطوا حياكم
بو تركي ( متعب): الله يحيك يابو سعود موجب يالغالي موجب
المها: يالله حي أخوي متعب وعياله هلا والله وغلا توما نور البيت
بو تركي: هلا بك يالرضيعه هلا وغلا بأم سعود
المها: وش أخبارك ياخوي وش أخبار نجود
بو تركي: الحمد لله ياخيه كلنا بخير بفضل الله وش أخباركم أنتم
المها : الحمد لله بخير وعافيه ياخوي
بو تركي: الدنيا تشغل ياخيه لكن الله يعافي جمعت الأربعاء اللي نشوفكم فيها
المها: صادق ياخوي
بو سعود: الله لا يفرقنا يابو تركي
بو تركي : آمين الله كريم ياخوي
تركي : ياعمه
المها: لبيه ياولدي
تركي: ياعمه إعذريني بس حبيت أسلم عليك وإلا أنا مشغول مره بالمؤسسه
المها: ياولدي العمر يخلص والشغل مايخلص
تركي : داري ياعمه ولكن وش نسوي صفقه مهمه بالحيل ياعمه
المها: الله يوفقك فيها ياولدي ويسمح دربك
تركي: إيه يابعد قلبي ياعمه هذا اللي أبقاه منك دعاويك الحلوه ي
المها: أبشر ياولدي توكل على الله وبتفوز بإذن الله
تركي : إن شاء الله ياعمه في أمان الله
الجميع : في أمان الله
المها:إلا يابو تركي وش أخبار عبدالله عساه مرتاح
بو تركي: الحمد لله ياخيه اليوم دق على أمه وإلا كانت مسويتها مناحه الله يهديها
بو سعود: ههه نجود وأعرفها لازم تسوي فليم هندي
المها: حرام عليكم قلوبكم أنتم قاسيه ماتحس
بو سعود: ولازم نبكي عشان تعرفين إنها تحس
بوتركي : وش دعوى أنا أحب ولدي بس ماله داعي أبكي وهو الحمد لله بخير
المها: لاتحاولون أنتم قاسين قلبي عليك ياخيتي يانجود الله يرده لك بالسلامه
الجميع : آآآآآآآآآمين يارب العالمين
فيصل ساكت ولا شاركهم الحديث وسرحان باله
بو سعود : فيصل 000000فيصل ياولدي
فيصل : سم ياخال
بوسعود: وش بلاك ياولدي متضايق
فيصل: سلامة قلبك ياخال بس مشاغل الدنيا وهموم الشغل
بوسعود: ياولدي توكل على الله إن شاء الله خير
فيصل : آآآآآآآآه ياخال بس آآآآآآه
المها: وش فيك ياولدي بسم الله عليك من الآه
فيصل دمعت عيونه
بو تركي: بسم الله عليك ياولدي وش فيك
الجميع خافوا على فيصل وهو بس يسترجع (لاحول ولاقوة إلا بالله العلي العظيم) ويبكي بوقار وهدوء
المها: خذ ياولدي كاس مويه وهدي نفسك ياغلاي بسم الله عليك ماتشوف شر ياولدي
فيصل آخذ المويه وشربها وذكر الله وطلع من المجلس بعد ماحس إنه خلاص بينهار
والجميع مصدوم وش بلاه فيصل وليه بكا
المها: يما ولد أخوي وش فيه وش بلاه
الوليد: يما لاتخافين ماوراه إلا العافيه أنا بروح عنده يما لاتخافين
المها: تبكي خوف على فيصل
بو تركي وبو سعود متفاجئين بس كاتمين خوفهم عن الجميع
طلع وراه الوليد ولحقه بالسياره عشان يعرف وش بلاه
ياترى وش فيه فيصل ووش اللي مبكيه وهل راح يلحقه الوليد وإلا لا؟؟
ووش هي ردت نجود الخالد أم تركي إذا درت باللي صار لفيصل ؟؟
كل هذا وأكثر راح نشوفه بإذن الله إذا تابعنا الجزء القادم
متابعه شيقه لرقيكم

الجزء الثاني
1- سر فيصل
فيصل طلع بالسياره وكان يمشي بسرعه جنونيه بدون وعي كان هايم على وجهه وبس مايدري وينه رايح ولا وينه جاي
والوليد كان وراه وخايف عليه ويردد : يالله سترك وش بلاه هذا مجنون
الوليد يدق على فيصل وفيصل مايرد: رد يافيصل تكفى ياصاحبي تكفى رد عشان خاطري
وفجأه صوت إصطدام قوي جدا
فيصل من قوة الصدمه إنقلبت سيارته عدة قلبات وإستقرت على الرصيف
الوليد نزل بسرعه من السياره وراح عشان ينقذ فيصل ولكنه ماقدر يطلعه من السياره
وقام يصارخ على المتفرجين دقوا على الإسعاف بسرعه وراكم تناظروني كذا تحركوا
والناس مذهوله من قوة الحادث
وصل الإسعاف والمسعفين يحاولون يطلعون فيصل من تحت ركام سيارته
الوليد وهو يبكي راح بجنب السايق اللي حد فيصل وقلب سيارته وإمسكه من عند رقبته وقال له: تدري لو يصير بولد خالي شي لأدفنك وأنت حي أنت فاهم
رد عليه السايق : أنا ماسويت له شي هو اللي كان مسرع
الوليد ناظره بعصبيه: الوعد قدام اللحين مانيب فاضي لك
السايق حس إنه تورط مع ناس مهوب قدهم ولكن اللي صار صار ماله غير يدعي الله بأن فيصل يقوم بالسلامه ويطلع هو من هالورطه
الإسعاف شال فيصل من تحت الركام بصعوبه وحالته كانت خطيره وركب الوليد معهم بسيارة الإسعاف وشاف فيصل وبكا على حاله
الوليد: يارب إرحمه برحمتك يارب نجيه يارب لاتخلينا نفقده يارب إرحم حاله وحالنا
في بيت فهد الخالد
المها: يما عليك ياولد أخوي مدري وش صايبك
سعود: يايما إذكري ربك إن شاء الله مافيه إلا العافيه
المها تبكي: قلبي حاسني ياسعود إنه ولد خالك فيه شي
بو تركي (متعب) ناظرها بعصبيه وطلع من البيت
بو سعود( فهد): قولي لا إله إلا الله
الولد مافيه إلا العافيه لاتفاولين عليه وطلع يلحق بو تركي
بو سعود : متعب 000 متعب ياخوي
بو تركي: لبيه يافهد
بو سعود: وراك يالغالي ضايق صدرك إن شاء الله مافيه غير العافيه
بو تركي : إن شاء الله بس أنا ملاحظ عليه إنه دايم مهموم ولا أدري وش بلاه واليوم زاد خوفي عليه
بو سعود: الله كريم ياخوي ترى فيصل جراح وشغله صعب وتصير له شغلات بالمستشفى تأثر على أعصابه إدعه له بالتيسير
بو تركي: الله كريم يالغالي الله كريم
بو سعود : تعال خلنا نغير جو نطلع ونتمشى
بو تركي: مالي نفس يعني وين بروح مافيه غير هالمجمعات
بو سعود: إلا فيه مكاننا القديم في بر الثمامه
بو تركي: ههه وأنت ماتجوز عن هالمكان خلاص كبرنا على البر والكشته
بو سعود: ههه أي كبرنا قل لحالك كبرت أنا توي شباب
بو تركي : إحلف عاد ههه
بو سعود: أقول لاتكثر هرج خلينا نروح قبل لا يضايقنا الوقت
بو تركي : يالله قوم بس مانطول عشاني خايف على فيصل
بو سعود: ماراح نطول بإذن الله بس إخلص علي وفيصل إن شاء الله مافيه إلا العافيه
وصل الإسعاف للمستشفى ودخلوا فيصل على العنايه المركزه
والوليد يبكي وإنهار وماقدر يستحمل منظر فيصل وهو بين الأجهزه
وجاء الدكتور حمد 33 سنه صديق فيصل
الدكتور حمد : الوليد مايجوز اللي تسويه خاف ربك إن شاء الله
الدكتور فيصل مافيه إلا العافيه لا تخاف عليه
الوليد: وش قاعد تقول أنت يادكتور ولد خالي مسجى على السرير لاهو حي ولا ميت وأنت قاعد تقول مافيه شي
الدكتور حمد : يالوليد ربك كريم سبحانه يحي العظام وهي رميم أنت رح صل ركعتين وإدعي له أنفع له من وقفتك هذي
الوليد: إن شاء الله جزاك الله خير يا دكتور حمد
وراح الوليد يصلي ويدعي لفيصل
دكتور حمد يقول في نفسه الله يكون بعونك يافيصل الله يشفيك ويفك كربك ياخوي
في بيت متعب الراهي
نجود مسكت قلبها : ياربي مدري وش فيني اليوم أحس إني مكتومه
شافتها ساميه جت لها مسرعه : عمتي نجود بلاك شي فيك شي أتصل على عمي متعب
نجود: لا ياساميه مابلاي شي الحمد لله بصحه وعافيه بس شوي تعبانه
ساميه: ياعمتي لاتكابرين باين عليك إنك تعبانه مره
نجود: وبعدين معك قلت لك مافيني شي يعني مافيني شي وراك حنانه إنتهينا
ساميه: تامرين عمتي اللي يريحك
نجود راحت تدق على المها والمها ماترد
المها وهي تشوف الجوال: ياربي وش أقول لها اللحين أخاف إن درت تطيح علينا مدري وش أسوي أحسن إني ما أرد
المها تنادي ميمي : ميمي 0000 ميمي
ميمي : سمي طال عمرك
المها: إذا دقت عمتك نجود قولي لها إني تعبانه شوي وبروح أنام
ميمي: إن شاء الله طال عمرك
ودقت على البيت ردت عليها ميمي: ألو بيت الشيخ فهد الخالد
نجود: هلا ميمي وش أخبارك
ميمي: هلا عمتي نجود أنا الحمد لله بخير
نجود: الحمد لله
وين عمتك المها
ميمي: هاه عمتي المها أأأأأأأأأأ
نجود: إيه عمتك المها ليه وش صاير
ميمي : لا سلامتك طال عمرك بس عمتي المها بتروح تنام
نجود: غريبه المها تنام بالعصر وعندها جمعت الرجال اليوم
ميمي: لا الرجال طال عمرك جوا وراحوا وهي حبت تريح شوي
نجود وهي مهيب مصدقتها:إن شاء الله خير إذا صحت خليها تدق علي مع السلامه
ميمي: مع السلامه طال عمرك
نجود تكلم نفسها: يالله سترك وش السالفه قلبي يعورني خليني أروح أصلي وأقرا قرآن كود أهدى ويستريح بالي
في المستشفى
الوليد جاي بعد ماخلص صلاته ودور جواله مالقاه وتذكر إنه نساه بالسياره يوم يسعفون فيصل
وبهاللحظه جاء الدكتور حمد يبتسم : حرما ياحضرة المحامي
الوليد وهو يبتسم إبتسامه بارده: جمعا إن شاء الله
الدكتور حمد: هونها ياخوي وتهون
الوليد: الله كريم
ودي أعرف وش اللي قلب كيان فيصل كذا
الدكتور حمد : ياخوي الله يعينه ويسهل أموره
الوليد: تكفى ياحمد إذا تعرف شي عنه قلي فيصل ولد خالي وصديقي وأخوي فيصل له فضل كبير علي بعد الله سبحانه
رجيتك ياحمد تكلم
الدكتور حمد وخانقته العبره: يالوليد أدري بأخوتكم وحبكم لبعض وصداقتكم الرائعه لكن فيصل من كبر همه كتمه بصدره ليما إنهار مثلما أنت شايف
الوليد: تكفى حمد لاتوتر أعصابي تكلم
الدكتور حمد : يالوليد من قبل شهر تقريبا جت بنت عندنا مسعفينها بعدما كانت محاوله الإنتحار وكانت في حاله سيئه مره وكانت محتاجه لجراحه سريعه بالمخ لأنه كانت ضاربه راسها بآله حاده
جاء فيصل وسوا لها العمليه والحمد لله إنجحت وكانت البنت تهذي تحت البنج أبقى أموت
أبقى أموت أكرهه أكرهه
وبعد ماصحت من البنج صارت تصارخ على فيصل ليه ينقذها وش دخله فيها هي تبقى تموت وقامت تسبه وتصارخ وتشيل إبرة المغذي وتجرح نفسها
فيصل حاول يهديها مافيه فايده تزيد وتصارخ وتسب وتجرح نفسها
فيصل عصب عليها وعطاها كف وقال لها : يابنت الناس خافي ربك أنتي مسلمه والمنتحر مصيره النار وإحمدي ربك اللي نجاك من هالبلوى
قامت تصارخ عليه : أنت مالك دخل أنا ماأبقى الدنيا حضرتك شكلك ولد نعمه ماتعرف قسى الدنيا خلني بهمي لو سمحت أنا عندي بلاوي مهوب مثلك مرتاح ولا عندك هموم
قاطعها فيصل: مهوب أنتي بس اللي عندك بلاوي كلنا عندنا بلاوي بس مستعينين بالله وحده مهوب مثلك إنهبلنا نبقى نموت ولا بعد بطريقه وحشيه فكري بهلك بناسك بفضيحتهم على يدك
قامت تبكي وتصارخ : أنت ماتفهم أبوي سبب عذابي إفهم لو كان لي زوج ماصار اللي صار وكان أخذ حقي منه هالظالم حسبي الله عليه
فيصل قال لها : ياخيه هدي نفسك إن شاء الله كل شي ينحل
قامت تبكي : يادكتور تصدق إنه فيه أب يطلق حرمته ويحرمها من بنتها ويخلي البنت تكنس وتنظف كل البيت وتغسل الملابس وزوجته قاعده وحاطه رجل على رجل وطالع يضربني وداخل يضربني ويرفسني قدامها وإذا أكلت معهم يدفقون الشوربه الحاره على يدي ويقولون لي أنتي نجسه لا تقعدين معنا على الأكل وتخيل ماآكل شي لمدة أيام ولاأحد يفتكر والثلاجه عليها قفل تخيل يادكتور أنام على أرض المطبخ لحافي عباتي بس تخيل قد الظلم يادكتور
فيصل وهو خانقته العبره: لاحول ولاقوة إلا بالله العلي العظيم
إصبري ياخيه الله كريم الله بيفرجها عليك
وفي لحظة ماكانوا يتكلمون دخل أبوها : وكان يبقى يضربها على راسها وتدخل فيصل ونهره وقال له : صدق ماتستحي بعد فعايلك الشينه جاي تكمل عليها هنا
قال له أبوها بعصبيه: وش دخلك أنت بنتي وأنا حر
قال له فيصل : مهوب كيفك الدنيا فيها قانون وأنتظر سجنك على يدي وأنا فيصل الراهي
أبوها إرتبك وخاف لما سمع عايلة الراهي وخاف من قدرة فيصل على سجنه بحول الله
وطلع بسرعه
البنت أول مره تشوف أبوها يحشم أحد أو يخاف منه وهي مراهقه عمرها 18 سنه فتعلقت بفيصل حست إنه خلاصها من دنيا أبوها الظالم
فيصل إستأذن منها وطلع بشكل عادي لأنه مثلما تعرف يالوليد فيصل شهم وهذي عوايده مع كل محتاج
الوليد هز راسه: وبعدين
الدكتور حمد يكمل : وبس صارت ترسله رسايل وكلام حب وكل يوم تدور لها حجه عشان تقعد أطول بالمستشفى لحد مافيصل ضاق من تصرفاتها وأنت تعرف حب فيصل لزوجته ووفائه لها يالوليد
الوليد : إيه معروفه وبعدين
الدكتور حمد يكمل: فحولها على الدكتوره غاده فالبنت قامت تبكي وتهدد إذا مارجع لها الدكتور فيصل تبقى تنتحر
فيصل فكرها بس فتره وبتعقل لكن فعلا البنت إنتحرت وتوفت الله يعفو عنها ولكنها قبل موتها كتبت رساله لفيصل إنه يوم مايبقى حبها ليه يعلقها فيه وإنها ماراح تسامحه وهو بقلبها اللحين أقسى من أبوها اللي ظلمها طول عمرها وكتبت سبب إنتحارها قسوة قلب فيصل
وهذاك شايف حاله إنقلب من يوم إنتحارها وهو حاس بتأنيب الضمير
الوليد: لاحول ولا قوة إلا بالله العلي العظيم
ياعمري على فيصل حنون وقلبه طيب لكنه أخطى بتصرفه كان راح يضيع حياته وحياة عياله وحياة زوجته العنود الله يهديك يافيصل ويشفيك يالغالي
ياترى فيصل راح يشفى ؟؟
و كيف راح يعلم الوليد العايله بحالة فيصل؟؟
ووش هي ردة فعل نجود الخالد إذا سمعت بإن فيصل بالعنايه المركزه؟؟
كل هذا إن شاء الله راح نعرفه في الجزء القادم
كان هذا الجزء طويلا إلى حدٍ ما ولكن لكل جزء حكايته الخاصه
فأتمنى لكم متابعه شيقه مع رقي أذواقكم