ما ابغى اتحرم من ولدي الوحيد

زوجي انسان طيب و كويس وبجد عمري ماراح القى شخص طيب مثلة لكن في ظروف حولة مستحيل تتغير ولا حتى بعد مليون سنة وانا مو قادرة اتعايش او اتكيف مع الوضع حاولت بكل طريقة اني أتأقلم مع الوضع بس ماقدرت
لا تسألوني اش هيا الظروف هاذي لأني مو حابة افشي اسراري لأحد ايا كان وحابة اني احتفظ بها لنفسي
بس كل الي اقدر اقولة ان الظروف الي محيطة في زوجي كانت قاسية عليا كثير وسببت حساسيات كبيرة جدا بيني وبين زوجي
وبناء على هذي الظروف القاسية تغيرت جدا جدا جدا وللأسوء وكل مالي وانا في انحدار
يعني كنت قبل الزواج انسانة اجتماعية جدا و أشهر من نار على علم
وكنت مرحة فوق ماتتصورون وكنت ذكية ومحبوبة جدا من الناس كان الكل يحترمني ويقدرني وكان لي مكانة كبيرة عند الكل
كنت طموحة لأبعد حد
كنت بريئه وتفكيري دائما يمشي على حسن الظن بالناس وبلي حولي
كنت جميلة
لكن بعد الزواج (( مع العلم ان زوجي مالة اي سبب في الي بيحصل لي مثل ماقلت لكم السبب هو الظروف الي حولة هي السبب ))
تغير كل شي فيني سرت دائما مكتئبة وقاطعت كل اقربائي و جماعتي واغلب صديقاتي
سرت مهملة بدراستي لأبعد حد سرت انسانة مذلولة سرت احس ان كرامتي انزعت مني و بقوة
احس اني انسانة مهانة مذلولة مكسورة (( بسبب مشكلة قديمة )) احس مالي احترام ولا تقدير مهما احاول ابني بيت واسرة القى ان الاساس غلط وماينفع ابني علية
وقررت الطلاق
وهذا قراري النهائي برغم حبي الشديد لزوجي واحس انه هوا برظو يحبني
المشكلة الحين وين
ان اهلي يقولون اذا فكرتي في يوم انك تطلقين منه تخلين الولد عندة وتجين ويقولون انهم مو مستعديت لتحمل مسؤليتة
وانا لو يذبحوني ويقطعوني وربي لأنجن لو ولدي يفارقني بجد يابنات مادري وش راح يصير فيني راح اصاب بالجنون لو فارقتة ولو يوم واحد
ياناس احيانا اطلع مشوار بسيط برا البيت ارجع واحس ان قلبي بيتقطع علية ومشتاقة له مرة
هاتوا لي الحل
ابغا حاجتين الطلاق وان الولد يبقى معاية
لا تجي وحدة وتقول لي لاتطلقين واجلسي مع زوجك وولدك ومادري ايش
انا لو ظليت مع زوجي اكون وحدة ماعندي ذرة كرامة ولا دم مع انها مشكلة قديمة وانتهت بس مجروحة منها مرة مرة مرة
كل شي نسيتة الا ان كرامتي تروح مني مستحيل
فكيف احصل على الطلاق وبرضو ان ولدي يبقى معي للأبد