مدري شسوي

بسم الله الرحمن الرحيم
أنا بدخل بالموضوع على طول وأبي منكم تقولون لي وضعي طبيعي ولا لأ
لأني بصراحه وصلت لمرحله ماعاد أدري وش أسوي ؟؟
أنا متزوجه من فتره أقل من سنه قبل الزواج يعني فترة الملكه كلمت زوجي شهرين ونص تقريباً
عشت قصة حب أسطوريه معه بنينا أحلام ورسمنا حياة أنا بقرارة نفسي أعرف إنها ماراح تتحقق كلها
المهم إنه حبني أبوي كان شديد شوي ويرفض إنه يجي عندي أو نطلع مع بعض يعني مكالمات وبس طبعاً زوجي شايفني النظره الشرعيه
وسأله أبوي شفتها زين وقال أيه وغير كذا أمه شافتني وقبل لاتجي تشوفني وصفتني أمي لها توصيف دقيق وقالت قولي له وأيام الملكه كنت أرسل له صوري
دايم المهم تزوجت وعشت أحلى حياة ودلع وحب كنت أخذ حبوب منع الحمل وبعد شهرين زواج منعني إني أخذها يقول أخاف تأثر عليك وتركتها حملت بعد ثلاث شهور من زواجي
وبدت قصتي شوي شوي بداء يتغير ويسحب نفسه ماكنت حاسه وماعطيت الموضوع أهتمام لأني كنت أتوحم لحد ماأكتشفت إنه يكلم بنات بديت أتحسس من تصرفاته وبعد فتره صار بيني
وبينه مشكله قلت له ودني لأهلي لحد ماأولد رفض وراضاني وتكلم معي ورضيت وبعدها بأسبوع ماكويت ملابسه الداخليه زين كانت معفطه شوي أنا أتوحم وفوق هذا هو عارف إني
ماعرف أشتغل زين المهم هزأني وقال روحي لأهلك لحد ماتولدين رحت لأهلي وقعدت أسبوع ويدق ويقول البيت مو حلو وأنتي مو فيه وأرجع بشرط إنه ماعاد يصرخ علي
ويطلب كل شي بذوق وبدون مايرفع صوته المهم دايم نتهاوش وأزعل ويزعل بديت أطنش وأخليه عشان أتحاشى المشاكل أنبسط وصرت أحس نفسي شي مكمل لحياته بس رجعت أتعامل
معه بحب ورومنسيه ماقدرت أخر شي لقيت بالمحفوظات حقت الكمبيوتر بحث عن زواج مسيار وبنات بنفس المدينه اللي يسافر لها دايم عشان شغله
قلت له ليه قال مو أنا جهازي بالأستراحه قلت بس ماحد يروح للمكان هذا غيرك فتح سالفة التجسس وإني أفتشه وقلبها على راسي وبعدين
قال إنه مايحبني ومن أول ليله دخل علي فيها وأنا طالعه من قلبه ويقول إنه ماخلاني عشان سمعتي وش بيقولون الناس لو طلقني من أول ليله وكان يحسبني أجمل
مما أنا عليه قلت أنت شايفني قال لا كنتي حاطه ميك آب كثير وهو يكذب ماحطيت قلت والصور أيام الملكه قال تحطين ميك آب وأنا كنت أصور وأنا توني طالعه متروشه شعري يكون رطب
هو كان يطلب كذا وكنت أرسل ويقعد يتطنز فيني أنا صدق متغيره مع الحمل عندي زيادة مويات منفختني ومسمره كثير وفيني كلف حمل ووجهي مره منفخ قلت له من الحمل يقول لا
من أخذتك وأنتي كذا أنا أنخدعت فيك أنتي مافيك أنوثه قومي وريني الأنوثه أبي أشوفها قلت ليش خليتني أحمل يقول يمكن الطفل يخليني أحبك يمكن أحبك مع العشره الثلاث شهور قبل الحمل
كنت أرسل له مسج أنا زعلانه ويرجع يراضيني بشهر العسل كنا ونحنى طالعين نتمشى بالشارع إذا طاحت عيني عليه قالي أحبك هو كان متزوج قبلي تزوج بنت خالته وطلقها لأنه ماحبها
قعدت معه أقل من شهرين واللي فهمته إنه ماكان يطيق ينام معها ولا يجلس معها من أول ليله دخل عليها وأخذها مجبور عليها أنا كتبت قصتي مختصره جداً لكم عشان أبي أعرف هل
تصرفاته عشان الحمل والتعب أنا قربت أولد ومن بداية حملي وأنا أعاني يعني ثمنيه شهور معاناة ولا هو فعلاً ماحبني وش أختي تقول لو ماحبك ماخلاك بنت خالته ماخلاها يخليك أنتي
بس هو يدور تبرير لتصرفاته وبعد ولادتك بيتغير أنا ماأدري شسوي تعبت.؟؟