مشاركة في مسابقة حياتي إنجاز العمل التطوعي

السلام عليكم و رحمة الله و بركاته ..
كيف الحال يا أمة اقرأ ..
ما اعرف للمقدمات و هذي مشاركتي في مسابقة حياتي انجاز ..
الانجاز الي راح اتكلم عنه .. هو عمل سامي جدا و عظيم ..
صحيح التجربة اللي خضتها كانت ما تتجاوز الثلاث ساعات ..
لكن كان لها أثر حلو و مؤثر في نفسي و إن شاء الله غيري ..
لما صارت كارثة جدة - الله لا يعيدها - كثير أسر احتاجت لمساعدات .. و الحمدلله ربي سخر ناس عشان تعينهم و تساعدهم ..
الفرصة جاتني عن طريق زميلة أختي جزاها الله خير .. اتصلت عليها و قالت لها محتاجين متطوعات اليوم للمساعدة في تعبئة المواد الغذائية لمتضرري سيول جدة ..
أختي كلمتني و عجبتني الفكرة مرة ..
مع انه في نفس اليوم صار شي نكد عليا و كنت مترددة في اني أجي بس قلت لا .. فرصة زي كدا تجيني و أفوتها مستحيل ..
تجهزت انا و أخواتي و مرونا و رحنا لمؤسسة الوقف التنموي بجدة >> أتوقع الاسم كدا معليه ناسية ..
سوينا إجراءات روتينية و بدأنا بالعمل ..
كان دورنا عبارة عن تعبئة الرز من الخيشة و نحطها في أكياس صغيرة .. بدأنا في العمل بكل جد و اجتهاد ..
الجو كان جميل جدا سواء في الطقس أو النفسية ^^
كان الكل متحمس و نشيط و حاب يعطي كل الي عنده عشان يقدم شي بسيط للمساعدة ..
حسيت اني قاعدة أسوي شي كبير جدا لإغاثة ملهوف ..
بعد ما خلصنا تعبئة الرز .. جانا خبر يقول انه في احتمال تنزل أمطار و طلبوا إخلاء المكان !! ..
نقلنا الكراتين الي كانت معبية لمخزن بالداخل بسرعة ..
بعد كذا أذن المغرب و صلينا و كنا منتظرين اننا نروح لانه طلبوا الإخلاء ..
شوية يجينا خبر يقول انه مافيه أي شيء و يمديكم تكملوا كل شيء ..
قلنا الحمدلله و فرحنا لكن للأسف كانت السيارة برا و اضطرينا نروح و ما كملنا معاهم ..
بس التجربة القصيرة جدا هذي كانت وقعها كبير على نفسي .. يعني أنا ما سويت شي إلا تعبئة رز و ما كان العمل صعب و مجهد ..
و تعاوننا مع بعض - بالرغم من اننا ما نعرف بعض - كان له الدور في سرعة نقل المواد الغذائية للمخزن لانه كنا مكونين سلسلة ..
عجبني التعاون اللي كان بيننا احنا المتطوعات .. يعني احنا أول مرة نشوف بعض لكن كأننا نعرف بعض .. كنا نتكلم سوا وكان العمل جماعي و ممتع ..
اللي جمعنا الهدف السامي لوجه الله ..
و الأثر كان مرة حلو على نفسي .. و فيه نفع لغيري كمان ..
أنصح كل وحدة تجيها فرصة أو حتى هي تقدر تسوي أي شيء فيه مساعدة و خير ما تتردد ..
هذي تجربتي البسيطة أتمنى ينال موضوعي على إعجابكم .. و آسفة ما أدرجت صور مافكرت اني أصور وقتها ..
بالنسبة للإنجازات الي كانت في 2010
راجعت تقريبا 3 أو 4 أجزاء من حفظي للقرآن الكريم ..
مذاكرة الدروس لأخويا اللي في الابتدائي و مازلت ..
مسؤولية أعمال المنزل من طبخ و تنظيف و ترتيب و ..
العناية بنفسي شعري و جسمي بس لسا ما خلصت ..
صيام يوم الاثنين و الأيام البيض و بإذن الله أستمر ..
في رمضان ختمت القرآن الكريم مرتين و كمان كنت في صلاة التراويح في المسجد أحاول قد ما أقدر انه تكون الصفوف مرتبة و بإذن الله همتي تكون أعلى رمضان القادم ..
الإنجازات في هذا العام إن شاء الله ..
رح أستكمل حفظي للقرآن الكريم بإذن الله .. بالالتحاق بالتحفيظ ..
رح أستمر في قراءة الكتب عشان أزيد معرفتي ..
أكمل دراستي أو ألتحق بأي دورة بس أهم شي أتعلم حاجة جديدة ..
أنمي مهارتي في الخط العربي و الرسم و الجرافيكس ..
أمشي في اليوم نص ساعة أو أكثر عشان تناسق الجسم هع
أتمنى يكون موضوعي كامل بالشروط .. و أتمنى ينال على إعجابكم ..