أول مشاركة شحاذة من بنات الرياض والشرقية أو جده

لحن الحياة

24-02-2022 - 11:41 pm

السلام عليكم جميعا....
أنا صراحة عجبني موقعكم جدا جدا .. فعلا راقي ...
هذا أولا ...
ثانيا عندي طلب أتمنى ماتفشلوني ....
عندنا زواج أخت زوجي قريب مره وفخم مره وبفندق وحركات ...
المهم إن أختكم متورطة ذوقي صعب مره ولا عندي وقت أدور وأفحط بالأسواق اللي تعرف منكم محل راقي وحلو وأسعاره معقولة أروح ألقط لي منه فستان وأمشي .. ولا موديل جربتوا خيطتوه ونجح مع التفاصيل من وين القماش وين خيطتيه وبكم ( طرار ويتشرط) إيه نسيت أقول ترى ماألبس عاري .... حدي شال مع إني أحس إنه صار موضه قديمه ومستهلك....
تأكدوا إني أبرفع يديني للسماء وأدعي للي تساعدني ...
بانتظار ردودكم عزيزاتي ... تراي مأملة فيكم خير بإذن الله .. لاتفشلوني تكفون
أختكم
لحن الحياة

التعليقات (9)

البدرة

25-02-2022 - 02:29 am

هلا اختي
والله ما ادري انا شنو في السعودية وبالرياض خاصة
بس مرة كنا رايحين بعد عشان كان عندنا عرس اخوي
رحنا سوق يسمونه( سوق الحريم)
في قطع يهبلون وبسعر معقول بالنسبة ليهم
والله بصراحة مت عليهم واخذت لي منهم طلعوا كضبوطين وحلوين
لدرجة الي في العرس كل وحدة تقول لي من وين القطع
وهذا الي اقدر اساعدج فيه
ومسامحة يالغالية

الوضوح الغامض

25-02-2022 - 03:30 am

كم ميزانيتك للفستان ؟
تبين محل في جده او الرياض او الشرقيه ؟
جاوبيني وراح اقولك على حل راح يرضيك مره

دمعة احباب

25-02-2022 - 04:31 am

هلا خيو
ام فى مكان اسمه الفاتنة بالدمام مرة حلو واسعاره حلوة

لحن الحياة

25-02-2022 - 05:32 am

أختي البدرة ياحبي لك مشكورة والله أنا زيك توي دريت منك أن فيه بالرياض سوق اسمه سوق الحريم مع إني من سكان الرياض ! كان تتذكرين من وين ؟ ردي لي الله لايهينك....

لحن الحياة

25-02-2022 - 06:33 am

حبيبتي الوضوح الغامض ميزانيتي مايتعدى 2500 إلى 3000 بالكثير ماأحب اشتري غالي لأني مو راعية مناسبات
وماأحب أكرر اللبس
وبالنسبة للمكان أنا بالرياض بس عادي ممكن أسافر للشرقية او حتى جدة بس مدري وين أوجه لو سافرت لهم....
أكون لك شاكرة وداعية إذا أفدتيني....
اعذريني لو أزعجتك بس فعلا مضطره ومالي خلق دوران

لحن الحياة

25-02-2022 - 07:34 am

مشكورة أختي الفاتنة بس وين مكان محل الفاتنة بالضبط الله يدلك على كل خير .....

الوضوح الغامض

25-02-2022 - 08:35 am

فيه في طريق العليا العام محل او محلين على الأقل واحد اسمه ( الكواكب ) مقابل اسواق الأندلس عنده فساتين سهره مره حلوه وفيه واحد ثاني بعد على نفس الشارع بس ما اذكر اسمه فساتينه حلوه وعندك بعد محل في العليا مول متخصص في ملابس السهره واسعاره حلوه وفيه مقابل اسواق العويس بجنب مملكة الأسره محل اسمه فستاني وان شاء الله اكون افدتك وإذا حصلت على معلومات زياده راح اقولك

AL_MALEKAH

25-02-2022 - 09:36 am

هلا إختي لحن الحياة إنشاء الله إن تدعين لي....
فيه محلين بالرياض في أسواق الموسى ((( البرت))) ((((ليونفر ))) مقابلين بعضهم عندهم فساتين روعه
بس أول ماتدخلين روحي عند صاحب المحل وخليه يطلع لك من إلي عنده بالداخل لأن الزينه ماتعرض
إلا للزباين الخاصين.....
وفيه بالثلاثين أكيد تعرفينه مشغل زهرة اللوتس مصمم فلبيني خطير
موشرط تاخذي الفستان زي ماهو ممكن الصدر من واحد والقصات من ثاني زي كذا
وإنشاء الله أفيدك حبيبتي......

لوعة الحرمان

25-02-2022 - 10:37 am

صادقه اختي الملكه عن زهرة اللوتس خياط جنان
وفيه خياطه حلوه بالروضه واسعارها حلوه بالرياض

ممكن تدلوني على تصميم حلو لفستاني←
شوفوا فستاني→