مشكلتي من سنتين يا ريت تساعدوني في حلها

السلام عليكم فراشات
مساكم ورد
كتبت موضوعي اليوم وكلي أمل انكم تدلوني عالوجهه الصحيحه
انا تزوجت من سنتين بس المشكلة ان زوجي ما يشتغل
سكنت في بيت أهله وكانوا اخوانه بعد متزوجين وساكنين في البيت
وكحال كل بيت لازم تصير فيه مشاكل
كانن حريم خوانه دايما يعايرني لان زوجي ما يشتغل ولا يصرف للمطبخ ولا ريال
وكنت كل لقمه آكلها يحاسبوني عليها وينقزن بالكلام
هذي غير القهر ايام العيد والمناسبات اشوف الناس تتسوق وتشتري كل اللي خاطرها فيه وانا اطالع
كنت صابره وما اقول شي
اقوله اشتغل يقول مقدم بس لين الحين احسه بس يخرط عليه لاني ما اشوفه يتحرك
مرات نحصل فلوس من الاسهم وتطير ساعتها
حملت وربيت والحاله مثل ما هي
الحين عندنا ولد اذا جاع ما بيصبر نفسي اذا شاف شي عجبه بيصيح ما بيحطها في قلبه
من وين ؟؟
من بعد ما ربيت وانا خلاص طفح الكيل
كل ما اتكلم اقوله اشتغل والا ما بتم عندك
غير الكلام اللي ماله داعي اللي اوجهه له
لاني احس انه حرام فيه الاحترام والمعامله الحسنه
يعني واحد ما احترمج ولا قدرج انتي وولدج انتي ما بتحترينه
فكنت اقول كل اللي خاطري فيه اسبه اهزئه ولا همني مع انه حرام
وكل يوم على هالمشاكل والمشادات الكلاميه بيني وبينه
الا ان جاء اليوم اللي قررت اتركه واروح لبيت اهلي
صارلي شهرين في بيت اهلي وهو يدق علي وانا ما ارد عليه
بعدين طرشلي مسج وكتبلي انتي طالق طالق طالق
انا انصدمت قلت والله بدال ما يدور شغل
يالله افتكينا منه بس الولد يحليله شو ذنبه
قلناله طلق في المحكمه
قال لا بردكم يحاول مع ابوي مني منالك
وانا قلت مستحيل اردله الا اذا اشتغل
المهم يا حلوات صارلي عند اهلي سنه ونص واحنا على هالحال
طلق رسمي –ما بطلق
ردي – ما برد
اشتغل بردلك—ان شاء الله قدمت وبيقبلوني قريب
مرت الاشهر واحنا على هالحال
وهو وابوه اللي هو عمي كل يوم يفاتحون ابوي في السالفه وابوي يقول مطلقه البنت وتباه يشتغل وبترد
انتظرنا ما شي فايده
والحين بعد سنه ونص تخيلوه ما اشتغل
بس اللي صار انه جمع رجال القبيله وكلموا ابوي انه يردني له وابوي وافق
وقالهم جيبوا قاضي وردوها
الحين يا بنات مربط الفرس
كيف احترمه وكيف ارضي ربي
والله اني احس اذا رديتله بعامله مثل اول واخس
لان الانسان اللي ما يقدرك ما تقدره
بليز بنات انصحوني شو اسوي
كيف اخلي نفسي احترم زوجي حتى لو ما كان يقدملنا الكثير
الدنيا مو كلها فلوس صح
يا كثر الذنوب اللي بتجيني منه
الله يخليكم ويوفقكم بليز بنات انصحوني هزبوني المهم اتأدب
واخاف ربي من هالناحية