ميني برغر وخبز برغر بر بطريقة ليونه صحي 100

السلام عليكم
كيفكم يارشيقات؟
اكيد كثير منكم طفشوا من الاكل التقليدي بالدايت
واكيد معظمكم يبي يسوي شوية تغيير بالاكل لو من فترة لفترة
وانا كمان مثلكم فقررت ابدأ اسوي اكلات كل خميس او جمعه تكون هالاكله غير عن الاكل المعتاد واهم شي تكون صحية
ولي فترة اجرب اكلات واخذها من كتب الطبخ بس بدل مااحط كامل الدسم مثلا احط خالي الدسم وبدل دقيق ابيض احط اسمر وبدل الزيت احط زيت زيتون واقلل وهكذا يعني اراعي القواعد الاساسية للتخفيف
واليوم جربت اكله جديده وفعلا طلعت لذوذوه اخذتها من كتاب النخبة مع شوية تغيرات حسب مايناسب ريجيمي
الاكلة هي البيبي برغر مع خبز بر انا خابزته بنفسي
والسبب اني لي فترة مشتهي البرغر واهلي دايما يجيبوها من مطاعم بس طبعا مليانه دهون وانا ارفض كليا اني اكلها
قلت يابنت ليه تخليها بنفسك يلا سوي لك برجر صحي
ادري طولتها وهي قصيرة فعشان كذا يلا ببدأ لكم بالطريقة
اولا طريقة الخبز ( خبز للميني برقر ):
المقادير:
2 كاس دقيق بر
4 ملاعق حليب جاف << خالي الدسم
ذرة ملح
ا بيالة زيت زيتون <يعني فنجال شاهي
ا ملعقة خميرة فورية
ملعقة سكر دايت
ماء للعجن
الطريقة:
تخلط المقادير الجافه اولا ثم تفرك بالزيت حتى يتجانس معها
ثم يضاف الماء تدريجيا لتتكون عجينة متماسكة تميل لليونه
وتترك من نصف إلى ثلاث اربع ساعه ولاتزيد عن الساعه حتى لا تفشل
تقطع العجينة إلى كرات صغيرة وتكور باليد جيدا ثم تصف في صينية ثم تدهن بالبيض
ويذر عليها سمسم وحبة سوداء (حسب الرغبة)
ثم تخبز في الفرن وتحشى بعد النضج بأن تقطع من الوسط كالبرقر
بالنسبة لي بما انها اول تجربه وبما انه لي بس بدون اهلي فسويت ربع المقادير فقط
ثانيا طريقة الميني برجر:
المقادير:
1 صحن دجاج مفروم
1 بصلة مفرومة + فص ثوم (حسب الرغبة الثوم )
ربع كاس بقدونس مفروم
بيضة
بقسماط << انا سويته بنفسي جبت اطراف التوست الاسمر المنشفة ودقيتها وصارت لي بقسماط ها وتحطيها حسب الاحتياج كل ماكثرتية طلعت اقسى البرقر فانتبهي
ملح - فلفل - بهارات
الطريقة:
تعجن مقادير اللحمة حت تصبح عجينة متماسكة بأن تخلط مقاديرها سويا
مع مراعاة أن البقسماط يضاف أخيرا وذلك حسب الحاجة
تقرص أقراص بحجم الخبز وتوضع في صينية مدهونة بزيت زيتون في الفرن وتحمر من اسفل ثم تقلب للتحمر من الجهة الأخرى
تدهن الخبزة بالطحينة وتحشى بقرص الدجاج وتوضع عليها الخس والجبن الشرائح ( تقطع الجبنة لأربع قطع )
بالنسبة لي سويت نص المقادير ومااكلتها كلها لوحدي طبعا حسبت اهلي معي
وكمان سويت من نفس اللحمه هذي كباب على شكل اصابع وطلع لذوذ
بالنسبة للطحينة:
حطيت 1 ملعقة طحينة - 2 م لبن زبادي خالي الدسم - شوية ملح وخل اسود بس
وبس الحين بخليكم مع الصور
اول صورة قبل ماادخلها الفرن وبالنسبة للعجينة يفضل تكون ارق من كذا انا نحفتها بعدين عشان تستوي من جوا
هنا صورة الخبز بعد ماطلع من الفرن طازه
وهنا صورة البرقر والكباب بعد ماخرج من الفرن
هنا صورة لكل غداي ( الميني برغر وكباب - طحينه - شرائح بندورة وخيار )
وهذي صورتين عن قرب للوجبة الرئيسيه ها
اخيرا اتمنى اشوف ردود تشجع عشان انزل لكم باقي طبخاتي
وترى الاكلات تنفع لكل الاهل يعني اللي بتسوي تسوي لزوجها وعيالها حلو كتغيير
انا اسوي لاهلي كل خميس اكله صحية منها افيدهم ومنها اعودهم شوي شوي على الاكل الصحي
في امان الله