نبي نتعلم الكلام الحلو والذرابه والاسلوب تعالوا الكل يشارك

جبتيها عالجرح يامزيونتنا
انا مشكلتي الناس اللي ماعندهم أسلوب !!! محاصريني بكل مكان ولاأقدر عليهم بأسلوبهم لأنه أساساً ماعندهم أسلوب
بس أقولهم <------ وكلهم من الحريم !!!
مشكورة
من ذوقج
مو غريبة عليج <------ قوية
الله يعطيج على قد نيتج <------ يكرهون هالكلمه
................
اذكر قبل الزواج اذا كنت في مناسبه يقولولي نفنوفج حلو والا شكلج حلو ومكياجج
عاد انا الحلوه شقول اقول: شكراً <<< جنه معطينها علج
وعاد اذكر مره قبل الزواج شافتني وحده اقول حق وحده ثانيه عجبها مكياجي قالتلي المكياج طالع عليج حلو قلت لها شكراً
عاد يتني وقالتلي شنو شكراً قولي مشكوره ياعمري عيونج الحلوه
عاد كل ماقل احد عن شي فيني حلو اقولهم حلة دنياج والا عيونج الحلوه
----------------------
ومرت فيني مواقف العكس مثلا تقولي وحده اسم بنتج مو حلو وماله معنى عاد انا سكت وقلت فيني نفسي بعدين شلون كنت المفروض ارد عليها وعاد ما لقيت لي كلمه مناسبه
المهم ومره من المرات كنت كاشخه حدي مشتطه والكل عاجبه لبسي وشكلي الا وحده يتني جان تقول وي شكلج مو حلو كلش بدون سبب عاد انا انجعمت وانصدمت
وسالت وحده عندها اسلوب وذربه قالتلي جان رديتي عليها وقلتي لها من ذوقج
عاد مره ثانيه صار معاي هالموقف مع وحده ثانيه وتطنز بدون سبب قلت لها مشكوره من ذوقج تفاجأة المراه وانجعمت ماردت بولا كلمه واشوي والا تسولف وتتحسف علي قالته بطريقه غير مباشره
ها اشرايكم
.................
مزيونة دايما متميزة بالمواضيع الحلوة والملفتة
صار هالموقف باختي كانت اختي غايبة اسبوع عن الدوام وبهالاسبوع توظفت وحده يديدة عندهم بالقسم واقعدت على مكتب اختي...
عاد اختي دشت وانصدمت ان ما عندها مكان عاد سلمت مع ابتسامه وقالت لها حياج الله بقسمنا حبيبتي وعلى فكرة هذا اللي انتي قاعده عليه مكتبي بس عادي خلج قاعده انا وانتي واحد ...
عاد البنت استحت وقامت من مكتبها والحين تحترم اختي وايد وتحبها ...
اشرايج بالموقف
واذا تذكرت شي بعد بقولج
........
يعني انا اذا أحد مدح لبسي أو شكلي يعتمد
اذا أحبها وايد أقول لها حياتي تحلا أيامج
واذا احبها شويه مشكوره من ذوقج يا قلبي
واذا ما أحبها كلش أقول لها شكرا أو عيونج الحلوه
واذا ذموا ما حصل موقف ذم فعليا بس لما يقولون لي متنتي حسافه على جسمج هم يعتمد على غلاتها وعاده هالكلمه تطلع من الدعل اللي ما ينحبون
فتلقين على حسب العمر اذا من طقتي ومتزوجه اقول لها المهم انه عاجب
واذا من طقتي ومو متزوجه أقول لها عادي 30 سنه موديل ايطالي و30 سنه موديل دراريع وهم حلو والا شرايج؟
واذا مره كبيره أقول لها صج باستغراب معاه ابتسامه (تعني موشغلج)أقول لها عاد سبحان الله تصدقين خالتي انتي أول وحده تعلق كلهم يقولون لي زوغه
واذا أحد مدح شي انا مسويته طبق (وهذي حاله نادره اني أسوي طبق )أو تركيبه ألوان أو شغله عاديه او قصه او صبغه شعر أقول لها بعض ما عندكم يا قلبي اذا أحبها
واذا انتقدت أقول لها كلج ذوق حبيبتي المره اليايه بستشيرج مع الابتسامه المشار اليها أعلاه
وعندج ناس وايد تعلق تعليقات سخيفه بالدوام مثلا أقول لهم من صجكم والا تتغشمرون هني تلقائيا تلقينهم يقلبون الموجه
ومشكوره يا حبيبتي مزيونه وشقرا على الموضوع الحلو والفريد
دائما متألقة تبارك الرحمن
..................
مثل ماتقول اختي .. (( ناس تحشمهم وناس تحشم نفسك عنهم ))
نادر مارد على الناس اللي يضايقوني ..
مدري افكر بأن ليش اخلي اسلوبي رخيص مثلهم !!
واذا تمادو عطتهم اقنور وخلصنا !! >> انهي علاقتي فيهم ..
اي انرد لموضوعنا .. الكلام الحلو .. .. في كلمه
دوم على لساني .. تينن (( بعدي )) يعني مثلا لا جيت اسلم .. اقول
اشحالج يابعدي شخبارج .. و (( بعد حيي )) .. ونادر ماقول حبيبتي
احسها متكلفه مدري ليش .. هاي بالسلام .. وعساكم وكل من يعز عليكم بخير
الناس يحبون تسألينهم عن اللي يحبونهم .. وبعد ام
واذا خلاص بنمشي ولا بيمشون الناس من عندنا
ماقولهم باي بباي .. سي يو ..تشاو .. لالالالالالا مستحيل
هاي حركات يهاالووه وعبطط بس للمسن .. عن االطواله بس
اقول .. ودعة الله .. سمح الله دروبكم .. عين اللي ماتنام تحفظكم
الله يحفظكم وين مارحتو او (( كنتو )) ..
اذا مشغولين :: الله يشغلكم بالخير ..
لاحد ناداني .. :: نعم ... يالبيه .. عونك .. اذا الوالده
نعم طال عمرج .. آمريني جعلني افداج بعيني وماها
واذا احد طلبني شي .. وكنت قادره عليه
ابشر بعزك .. يرخصلك الغالي .. ماطلبت شي .. انت تامر على كلي
واكيد على حسب المزاج ... والنفسيه .. واللي اكون قاعده وياهم
....
منقول..من الموضوع الأصلي..

ها اليومين البنات طايحين بكلام مادري من وين جيناه وانا من ضمنهم من كيسك وابو كلب ولقطي وجهك من هذا الكلام لمن تزوجت عانيت اتغير لمن تغيرت لاني ماقدر اقول لزوجي ها لاكلام وشوي شوي تعودت
ويا كثر الكلام الحلو
لو وحده احرجتني انا اضحك مارد ههه

يعني مثلا انا اذا احد قالي جنطتج حلوه او مكياجج او غيره اقوله عيونج الحلوه ..
واذا احد مدحني او شي اقولها تسلمين ياعمري ..
ودايما احب اسلم عالبنات الي اعرفهم حتى لو ماعرف اسمهم عالاقل ابتسامه يعني انا اعرفج
ووايد بعد بس مو ذاكره حلو ان البنت تكون ذربه مو دفاشه
................
مشكوره حبوبه علي الموضوع
انا ديما ابدي الكلام بسلام عليكم
و بعدين اقول لو سمحتي , فضلج , اذا تسمحين , يعطيكم العافيه ....
و دائما في نهايه ميرسي , شكرا .... الله يخليكم
دائما اقول ..... ديرو بالكم من الطريج مثلا .... لانها تعطي احساس بالحب
.........
(ياحليل الكويتيات )
.........
اذا احد قالك بعد ما تطلغين من النفاس مثلا طالعه من الشر ان شاء الله شتردين عليه وشكرا
تقولين الشر ما يجيج ....او تسلمين لي يا بعد عمري
.............
مشاركه بالموضوع الحلو صار معاى موقف يضحك ===مره كنت مسويه عمليه بواسير عزكم اله ورحت بيت اهلى وقعت فتره ودقت على مرة حماى تعتذر انها تاخرت وماجت تحمدلى على السلامه المصيبه انا شرديت عليها افشله (بقول مانى شرهانه عليكم قلت ماعليكم شرهه) استحيت من عمرى وتبلعمت وسكت بس حزتها ودى الارض تنشق وتبلعنى.. ههه
............
واي انا قبل شنو كنت طبانه ماعرف اتكلم ولا ارد ولا اجامل ولا لا لا شي
بعدها اشوف والاحظ واتعلم والحمدالله صرت قدعه
اذا احد مدح شغله انا لابستها او شي ارد بعد عمري عيونج الحلوه ولا بعد قلبي مايغلا عليج
واذا ماعجبهم وعلقوا ابتسم بعفويه واقول والله ؟ عاد غريبه الكل يقولي حلو يالله ماعليه الناس اذواق
والحمدالله مامر علي احد يقط نغزات بس اتوقع لو بقطون نغزات ارد بضحكه م مادري لول ماجربت وان شاء الله ماجرب
...........
موضووعج حلو ميه ميه والله
شوفي حبيبتي بالنسبه لي .....انا لساني حلو ودايما اقول اذا احد سوي لي خدمه مشكوره حبيبتي او يعطيك العافيه وماتقصر
وعلي قولة المثل ....حل لسانك الكل خلانك
بس اخ في بنات ماينفع معاهم هالاسلوب ....طبعا ادقرهم بس من غير قلة ادب عشان يحترمون نفسهم ليمتي انا بقعد اتحمل واسمع حجي يغثث
لا والله وقفت جم وحده معاي بالكليه عند حدها ....وقلت لها شوفي انا صار لي شهر واسمع منج كلمة اووف وطاعوو هذي شلابسه وشوفوا صبغ اضافرها ...
انا لبسي جذي عاجبج عاجبج مو عاجبج ماتشوفين شر وحبيت اقولج كلمه
اللي بيته من زجاج لا يحذف الناس بالصخر .....
والله تعييب علي لبسي وانا لبسي الحمدالله مافيه شي وماركات واهي لبسها كوكتيل يعني تلبس تنوره حمره وبلوزه ورديه والجنطه بنفسجيه ...صج صج ماكو ذووق
استغفر الله
ماحب اعيب عليها بس اهي حدتني مالت عليها
قرقت وايد
اسفه عالإطاله
..........
عشق: اليوم وحده بالدوام قالت لي ابشري بعزج
ضحكت وقلت لها مادري شنو يردون ههه <<< بس انا وحده قالتلي عساج عالقوه توهقت شيقولون ؟؟؟؟؟؟خ
...............
ما شاء الله عليج مزيونة وشقرة .. مواضيعج عسل مثلج
انا اذا دقوا علي بنات القوائم اللي بالكلية .. يبون مني اصوّت حق قائمتهم او يقولون اليوم عندنا معرض كذا او تعالي ندوة بيحاضر فيها فلان الفلاني
وآنا الصراحة ..... مالي خلق هالسوالف وحنّتهم اللي ما تخلص
وأنا من طبعي ماحب أدقر احد .. اسمعها شنو تقول لي الآخر وأشكرها واقول لها بعد عمري والله ماقصرتي حبيبتي يعطيج العافية مشكورة انج دقيتي علي وبلّغتيني جزاج الله خير .. ومن هالحجي
بعدين اقدر اعتذر عقب الكلام هذا .. لأنها ماتقدر ترد علي بشي عقب اللي قلته لها
ها شرايكم؟
.........
أناالحمدالله ... أسلوبي حلو ... ...
يعني مرات ويهي يعبر .. لاني بشوشه
واذا أحد من رفيجاتي وميانه مدحني أقولها لأ لأ مأدرش على الكلام ده أستحي
أما اذا وحده عادي .. مشكوره تسلمين .. عيونج الحلوه .. يعني ومن هذا القبيل ..
وانا أول ما كنت أعرف أرد خصوصا في ناس في مجتعنا .. قثيثين ..
ثقال على القلب .. شايفين رووحهم شي ويبحون يتطنززون على فلانه وعلنتانه .. وياليت شايفين روحهم على شي سنع ..
والله يقطون قطات ... ماكو حيا على الجميع عموما .. واذا سمعت كلمه او شي أسكت مثلا لبسج مو حلوو أو شكلج بالعرس ولا مكياجج مو حلوو مع ان والله يا بنات لما ارووح حق ناس ثانيين او رفيجاتي يمدوحني مثلا بدلتج حلوه أو مكياجج حلو وين سويتيه واهما والله لو يشووفون شي حلو ما يتكلمون بس يا يخزون بعيوونهم المبققه أو يقطون كلمتين على الماشي
بس صرت الحين معاهم جدا رسميه .. واذا انتي رسميه يعني حتى سوالف ما تسولفين معاهم .. ما يقدرون يتجرأوون ويتطنزون وانتي أساسا معطيتهم طاف ولا جنهم موجودين ..
وصارلي موقف مرره .. مع وحده من أهلي ...
كانوا حاطين صورتي في الجريده مع الخريجات والله الكل دق عل باركلي .. والكل قالي صورتج تينن وطالعه شحلاتج ... من قريب ومن بعيد .. يعني حتى خواتج اللي ما يجاملوونج امدحووج .. ودق وحده من أهلي وتقول .. مبرووك مبروكبس يا ليت صورتج حلوه تلوع الجبد عين أكبر من عين مادري شنو
واي اشتبين مالت عليج
<< على حظي كان شوي في حبر على الصوره على حظي وقرادتي بس انجنرال حلوه
جان أقوولها ها اا ... أي... شنو .. خو انصدمت انتي داقه تباركين ولا تتطنزين ..
جان أرد عليها ذاك الرد الا أول مرره يبرد جبدي ..
جان اقول
صج مو حلووه واي يا فلانه عاد كل من مدح شكلي ... انا والله مستغربه الكل يقوول صورتج حلوه الا انتي جان تقوول لا لا حلووه اهيا بس انصحج لا تحتفظين فيهاا تصيرلج ذكرى سوده ههه
قتلهاا واي بالعكس صورتي تطلع بالجريد ولا متخرجه ومتفوقه لا والله بخشه وبرواي زوجي واعيالي واعيال اعيالي عشاان يعرفوون الذكاء من وين وراثينه
وترد تسوولف عن بدله عندهاا مادري شنوو وانها ما خلصت وموباقي شي على الاستقبال واه كل بدل خواتها خللصوا الا اهيا
جان أقولها ويه يا فلانه وين يخلصون بدلتج انتي لو 5 خيايطه ما تخلص ( اهيا شوي متيينه )
جان تضحك وتقول ههه اي اي يالله عن اذنج وباي
والله يا بنات اني ما احب اقوول حجي جذي .. بس والله مرات تضطريين خصوصا اذا في ناس لا حياا ولا مستحا
شرايكم ردي ... اوفر ولا شنو ..؟؟؟؟؟؟؟؟؟؟
.............
جاري النقل..

ابتسامه: حلو انك تضحكين..
مشكورة على المرور

منال: ان شاء الله البنات يردون عليك.. : )
..........

موضوع رائع ..
تسلمين مزيونة ..
أنا أذكر موقف قنبلة صار لخالتي .. كانت معزومة على عرس المهم راحت سلمت على أم المعرس وتعطيها كلمة لو شنو ماتترقع
بتقولها عساهم يتوفقون ، جان تقول عساهم يتوفون << كارثة
ياحرام خل يفرحون بزواجهم ،، بتموتهم بليلة العرس ههه ..
خالتي ماتت من الاحراج ..
=-=-=-=-=
المشكلة اشلون نعدل الكلمة المحرجة إذا قطيناها ؟؟
تعابير الاحراج اهي اللي تأثر على الوضع
الله لايحطنا بمواقف محرجة ..
---------------
مزيونه وموضوعج مزيون مثلج
انا لمن اقول حق احد تسلمين ياقلبي او تسلم ياقلبي او لمن احد يناديني واقول هلا ياقلبي زوجي يقولي هذي كلمة شياب قبل لول عاد صج ؟ يله حبوبه قوليلي صج كلمة شياب ولالا؟
-------------
شوفي مزيونه وشقره ... اذا ناس احبهم ولا ما احبهم اذا مدحوني عاد اييج الحجي السنع مشكوره حبيبتي ما تقصرين تسلمين من ذوقج حياتي عيونج الحلوه حلت دنياج ومن هالكلام
بس اذا ذموني وخاصة ان كنت واثقه ان شكلي مافيني شي وناس مادحيني قبل لا يذموني عاد ذيك الساعه اقولهم: ليش مو حلو ؟ عاد انا عاجبني ؟ لالالا حلفي صج ما عجباج (على دلع) وي عاد توها فلانه وفلانه قايليلي حلو علي .... وعادي عندي اتسطر اشرح ليش اخترت الشي الفلاني وشلون انا واثقه انه حلو وعلى الموضه ولا مناسب علي وعلى شكلي .... هني صج يسكتون لول مالهم خلق يناقشون زياده
بس المشكله ما اعرف ارد اذا وحده احرجتني او دقرتني بس اقعد ابستم او اضحك جني هبله ابي اضيع الصقله ماعرف ارد بهالمواقف
---------------
--------------------------------------------------------------------------------
مزيونه موضوعج عجيب استفدت وايد منج ومن البنات
عاد انا على طول الابتسامه ما تفارق ويهي مع البنات ، سواء اللي اعرفهم او ما اعرفهم
ومثل ما قالوا البنات ، ترى الذرابه والسنع مو بس بالكلام ، يدخل بالحركات والصووت والابتسامه نفسها
يعني مثلا ، من الذرابه انج لما تكونين بمستوصف او صافه طابور وشفتي مره كبييرة بالسن انج تعطينها دورج (اذا ما كنتي مستعيله)
ومن الذرابه انج اذا دخلتي مطعم مع رفيجاتج ما تقعدين بأول كرسي وتخلينهم يخطرونج ، لأ دشي وقعدي بالكرسي الاخير حتى لو مو عاجبج بس من باب الذرابه
أو اذا كنت معزومه عند وحده من صديقاتج، خلج سنعه وذربه وظيفيهم من باب المساعده لصديقتج
هذي شوية حركاات ، نقطه من بحر الذرابه
اما الكلام الحلو والاسلوب عاد هذا يبيله ممارسه لول انا صج تعبت على ما تعلمت شوي
من طبع الكويتيين بشكل عام انهم يستحون يعبرون عن مشاعرهم ، حتى لأقرب الناس لهم
يعني تستحي البنت تقول لرفيجتها ، فلانه احبج ! او تروحين لأمج او أبوج او أختج او أخوج وتعبرين لهم عن حبج ، وايد نستصعب هالحركه بمجتمعنا ، مادري ليش
انا جربتها في البدايه مع رفيجاتي ، ولاحظت انهم يستانسون وايد لما اقول لهم اني احبهم احساس غيير وشعور بالوناسه ، خصوصا لما تكون الكلمه طالعه من قلبج
بعدها جربيها على امج وابوج واخوانج ، تتغير العلاقة بينكم 180 درجة ، شي عجيب غريب ، مفعولها سحري هالكلمه سبحان الله تربط القلووب وحتى لو كنتي متزاعله مع وحده من خواتج ، الزعل ما يسوى بيزه عند هالكلمه
---------
جاري النقل

الردود /
يعطيكم العافية
الله يسامحج
مشكورة ماقصرتي
فيج الخير
عيونج الحلوة
تسلمين
ملبوس العافية
عليج بالعافية
الله يعطيج على قد نيتج
الله يرزقج بالذرية الصالحه
عسى الله يعوضج خير
مبروك
------------------
صار موقف ويااختى بستقبال حريم عاد اول مرة
المهم صبت قهوة حق الحريم جان تحاول تحرجهاا حماتهاا
قالت لهاا بصوت عالي يا....اسمها.... مو من اليسار يصبون القهوة_
اهى ابتدت من اليسار غلط ماقلنا شي بس عاد مو تحرجهاا جدام الحريم _وبصوت عالي_ يعنى مرت اخوى رفلا
المهمم جان ترد عليهاا بهدوؤء
يافلانة لاتدققيق ع الامور البسيطة جان تجعمهاا
___________
اي و الله الموضوع وايد حلو و انا تعلمت منه كلمات انفعوني وايد
بس ابي اعرف شنو اللي لازم انقوله لما انسوف مع احد احنا مو شايفينه من زمان
اللي اعرفهم ( مطول الغيبة ياب الغنايم) و اشهالغيبة و فقدناج .....
تقولين :-
- وينج من زمان والله لج وحشة
- أشتقت لصوتج وقعداتج
- تحرمينا من شوفتج تراج غالية علينا حيل
-----------------
بنات بسألكم إذا وحده سألتني ليش للحين ماتزوجتي شقول لأنه صج سؤال سخيف ماادري شيبوني أسوي آخذ امي وأبوي وأروح أفتر على خلق الله واخطب عيالهم
<<<<
أنا مو متزوجه مثلج واسمع هذا الكلام اللي يغث
اذا اول مرة اقوله نصيب
واذا كررتها أقولها ليه الاخت خطابه
واللا أقولها أحد شاكي عليج الحال
واللا منو قالج اني ابي اتزوج انا اصلا اللي عايفه الزواج لانه يقيد حريتي
واذا هم كررتها وما استحت وطبعا أغلب اللي يقولولي متزوجات ما أدري ليه يعني يبون يبينون انهم ماباروا
مع اني مو كبيرة عمري 26
أقولها شرايج اخذ زوجج مامدام تحاتين زواجي
بس مع هذا يحصل لي مواقف ما أعرف ارد عدل فتلقيني اتصيد عليها لين ابرد حرتي >> البنت عوبه ههه
واكثر شئ يغثني في الدوام
ان بعض بنات هل الوقت ما يستحون تلقينه تتكلم عن شتسوي مع زوجها >> طبعت يوميات اللي ما تخلص
فاذكر موقف صارلي في الدوام
وحده كانت تبي تتكلم في الموضوع واهي تعرف زين اني هذي المواضيع ما أحبها
فقالتلي بما اني مو متزوجه عيب تسمعين هالكلام ؟؟؟؟ >> زين انا وين اروح هذا مكاني وشغلي
الاخت تبيني اطلع كل ما قالت سالفه بايخه مثل وجهها بس مو على كيفها
فقلت لها ا وانت عيب تسولفين مثل هالكلام في مكان محترم
فقالتي وشوفوا وقاحتها
لا راح اتكلم واذا مو عاجبج دخلي القلم في اذنج وبطيها >> شفتوا قلت الادب
فقلت لها لا ما راح ابطها وانتي الصاجه راح اجيب المقص واقص لج لسانج
واذا انا ما أحب اسمع هذي السوالف مو لاني مو متزوجه لا ياحياتي لاني انا متربيه على الاخلاق
بالنسبه للاخت اللي سألت هذا السؤال
إقتباس:
سؤال لما احد يبخرج او يرشلج عطر شتقولون له
تقوليله طاب طيبك وعاش حبيبك
ومشكورة على الموضوع يالغاليه
وتقبلي مروري

يعطيج العافية على هذا الموضوع
والله انج صادقة في عندنا بنات في الدوام ماعندهم اسلوب واذا مدحتيهم ينغرون بنفسهم ويردون عليج بكلام ودج مايقولونه وفي بنات من كثر ما تجامل يصير الموضوع مليغ وسكوتها احسن من الكلام الي ماله معنا والتواضع دايم احلى في كل المواضيع
انا لما احد يغلط علي اويحرجني بكلمة اقولة يا مال العافية وفادتني وايد بواقف واشوف الي جدامي ينحرج وجذي تردين عليهم وتاخذين حقج بس باسلوب حلو
-----------------
موضوع و الله كشخه
أنا تعلمت من اختي كلمة تسكت الناس وطوايفهم وصارتلي كم من مره و من اقولهم اياها يرتبكون و يحتارون ويطيح و يهم فالأرض .. اللي هي و بختصار " نعم ؟ " طبعا بنظره تعطين الناس و شوي نبره و شوي قوة التأثر و تراها تخليج ما تتلوثين و ياهم ..
والشي الثاني صراحه امي علمتني من طلعت اني اقول " شكرا " و " أن شالله " و صارلي موقف عليها و لين اليوم مب قادره انسا عشان جي قمت اكتب ردودكم و آخذ ملاحظاتكم .. الموقف المفجع انه مره سرنا لبيت بنت عمتي و قمت الشيخه بسوي عمري مضيافه و بنت اصول عشان كنت اصغر القوم و لا اشللكم صينية الحلاوه و امررها على المعازيم ويوم
وصلت لحد بنت عمي الثانيه جان اتقولي " عسانا نرد لج اياها بعرسج " ولا اتخيلوا شو ااقول طبعا مثل ما علمتني امي قلت لها " ان شالله " والحرمه استغربت اكيد قالت فخاطرها جفنا وقاحه و مستعرسات بس مثل جي ما جفنا ..المهم رفعت راسي ولا ألقا وجه امي و اختي العوده جان اتقولي امي .. فلانه بالحيل .. جان اقولها و انا روحي مرتبكه حدي "لا مو ان شالله موقصدي والله صدقيني "" وعاد هني الضحك .. و ويهي طاح بالأرض وماعرفت طيف ادارك الموضوع
شي ثاني دامه لكم خبره اذا انتي سايره تشتكين لربيعاتج و لا انتي يايه معصبه حدج و اتكلمتي وقلتي القصه ولا اللي جدامج قالت لج "" انتي وايد تبالغين "" ؟ كنها تقولج "" مو كنج كذابه " شو تردين عليها ؟؟
ومشكورين
______
كفايه نقل اليوم ...جاء دور الفراشات..

مشكوره على النقله الاكثر من رائعه
تسلم ايدينك ياعسل
والله حنا بحاجه الى مواضيع زي كذا