نصائح أفكار وصفات لا يطوفكم يا فراشات

1. وتقدمينه بالعافيه.


2. ثانيا : الكيك

بصراحه أنا حبيت أقدم لكم وصفات وأفكار لبقايا أكل :
انا شخصيا دايما اتبع هالطريقه .. يمكن البعض يقول بخيله ..لكن لا والله بس لان نعمة الله حرام تروح للزباله والاكل زين وما فيه شي ... المهم ما اطول عليكم
بعد العزيمه أو بعد ما عملت طبخه وظل في اكل ما احد اكله وحسافه تقطين نعمة الله ... شنو تسوين فيها ؟؟؟؟
أو اذا عندك خبز / توست او صمون باقي وما انتهت مدته بس ما يبون الأهل ياكلونه شلوون تتصرفين فيه ؟؟؟؟
أو عندك بقايا كيك أو بسكويت ..... شلون تتصرفين معاه ؟؟؟؟
الحل عندي
بشرط .... ما يكون اي شي منتهي الصلاحية
أولا نبدا بالصمون / التوست / الخبز
الطريقة الأولى :

• عمل مكعبات وخلطه مع السلطه ... والطريقة:

2 فص ثوم مدقوق ناعم - زعتر البيتزا أو المرامية - زيت زيتون
تحطين الزيت على النار وتحطين عليه الثوم والزعتر وتخلينه الا ان يحمى شوي
تضيفين عليه قطع الخبز او التوست او الصمون وتقلبينه الى أن يشقر لونه
تفردينه في صينية .. وبعد ما يبرد تحطينه في علبه بلاستيك محكمة الاغلاق
وتحتفظين فيه بالفريزر او الثلاجه لحين عمل السلطة.
يمكن نظيفه لكل أنواع السلطة بدون استثناء ( السلطة العادية / سلطة سيزر / السلطة اليونانية / ... )
الطريقة الثانية :

• عمل البقسماط

بكل سهولة تجففين الصمون / الخبز او التوست بالفرن
تخلي يبرد وهو مكشوف - بعدها بماكينة تطحنينه
تحتفظين فيه بعلبه لحين الاستخدام بالثلاجه او الفريزر
الطريقة الثالثة:
يستخدم التوست او الصمون لعمل أم علي أو الكنافة الكذابة ( يعني عندك صمون او توست من زمان بالفريزر تقدرين تستخدمينه) .
الطريقة الرابعه:
تستخدمين الخبز الجاف كارضية لصحون المشاوي .. يعني تجيبين الخبز الجاف وتحطينه بالفرن الى ان يحمر
بعدها بصحن التقديم تصفين الخبز على الأرضية وتعصرين عليه شوية ليمون وزيت وتصفين المواشي

وتقدمينه بالعافيه.

ثانيا : الكيك

( يعني اذا سويتي كيكه( كيكة كاكاو/ جزر/ مكسرات او غيره واكلوها الاهل بالعافيه ... مثل ما ناتي عارفه باليوم الثاني راح يبقى منها شوي ما اكلوه وماراح ياكلونه لانهم شبعوا منها)طبعا لازم يكون كيك خالي من التزيين والكريمة - للعلم ممكن تخزين الكيك بالفريزر لمدة شهر ...... وهناك طريقتين للاستفاده:
الطريقة الأولى:
تفرمين الكيك بالماكينة
تخلطين معاه مكسرات او فواكه مجففه ( حسب الذوق)
تصبين عليه صلصة كراميل / كاكاو / او فراولة ( موجوده بالسوبرماركت)
وتبدين تخلطينه بايدك ( بشرط تلبسين دس نايلون)
وانتي تخلطين تصبين شوي شوي الى ان تتكون عندك عجينة تشلكينها على كيفك
بعدها تحطينها بالثلاجه لمدة ساعه
تكورينها وتغطينها بجوز الهند / كاكاو مكسر / أو اي شيء آخر انتي وذوقك
تحطينها بالثلاجه مدة ساعه ... وتقدمينها
ملاحظة: يفضل أن تؤكل بنفس اليوم
الطريقة الثانية:
تستخدمين بقايا الكيك كأرضية للحلويات ( مثل الجيزكيك البارد / التوفل / وغيره)
وتقدرين تطبقين نفس الأفكار على البسكويت ... الساده طبعا
ثالثا: الدجاج
اذا سويتي الغدا او العشا دجاج سواء مع الرز او مشوي او حتى مقلي ... وبقى عندك دجاج مأكول طرفه مثلا
أو شي تسوينه تشيلين الدجاج بصحن نظيف وتحطينها بالفريزر الى ان تستخدمينها. وهناك طرق وايد منها:
الطريقة الأولى: عمل مسحب دجاج
تجيبين الدجاجه النظيفه - تقطعينها وتفرمينها بالماكينه
تضيفين عليها المايونيز / شوية ليمون / ثوم مدقوق / بقدونس مفروم
تحشين فيها الخبز او الصمون أو حتى الفطاير
الطريقة الثانية: عمل أصابع / كفتة الدجاج
تقدعين الدجاج وتفرمينه - تكسرين عليه بيضه او ثنتين حسب كمية الدجاج
تضيفين الليمون / البهارات / البقدونس / علبة كريمة او كمية بشاميل
تخلطينهم وتسوين منه اصابع
تغطينها بالبقسماط وتقلينه او تحطينه بالفرن
الطريقة الثالثة: عمل مكعبات دجاج
تقطعين الدجاج مكعبات وتخلطين معاها بهارات طيبه مثل الدارسين / الزعتر او المرامية وتخلينها بالفريزر
بعدها تقدرين تضيفينها للسلطة لان بالحالة هذي يكون الدجاج تشرب طعم البهارات.
رابعا: الفواكه
( قبل لا تخرب الفاكهه لانها تظل بالثلاجه مدة طويلة حاولي تستغلينها بشغلات مفيده لكل ولعايلتك)
الطريقة الأولى: الكوكتيل
تقصين جميع الفواكة اللي عندك وتشيلين منها القشر ، تحطينها بالخلاط وتضيفين عليها شوية ليمون وسكر وماء وتخلطين وتقدمينها بالعافيه ...
الطريقة الثانية : للأطفال
تخلطين الفاكهه مع حليب سائل وشوية سكر وتعطينه للصغار يشربونه .. وايد مغذي لهم
الطريقة الثالثة: المربى
التفاح مثلا او أي نوع فواكه عندك سوي منه مربى .. صدقيني راح يحبونه وياكلونه
خامسا: اللحوم البارده
أحيانا الواحد يشتري لحم مرتديلا او هوت بكمة كبيرة وبمجرد ما تفتحين العلبه خلاص من باكر اللحم راح يخرب أكيد ... هذي طريقه تخليك تستفيدين اكثر من اللحوم البارده.
الطريقة: عمل حشوات للفطاير ( الحشوة الطلياني)
تقطعين لحم المرتديلا شرائح طولية صغيرة - تخلطين معاه فلفل رومي مقطع بنفس حجمه وتحطينه على النار مع شوية زيت وتحركينه حتى يتحمر شويه. وتستخدمينه لحشو الفطاير او عمل شاورما كذابه للاهل
اذا عجبتكم الأفكار .. مستعده اعطيكم اكثر
.