نصائح النسوان اول ايام الزواج

1. طبعا الحريم اللي حولي بدو بنصايحهم الثمينه من قبل الزواج


2. قالولي لازم تصيرين زي بنات الفيديو كليب

دخلت السينما من اوسع ابوابها اول ايام الزواج
ماتوقع عادل امام يفوت هالموهبه الفذه من غير مايمثل معها فيلم العمر خ
اه ياحريم اخذت نصايح غيري لحد ماصرت حرمه اخرى بهباله

طبعا الحريم اللي حولي بدو بنصايحهم الثمينه من قبل الزواج

قالولي لازم تصيرين زي بنات الفيديو كليب

محسوبتكم ماكذبت خبر اهلكت نفسها اصحى من قبل الفجر وماتهنى بنومي لان اول العرس سهر زي مانتو عارفين واركض اتحمم واجيب العده واندس بغرفه واشغل الرشاش قصدي الاستشوار وهاتك ياكرد بالشوشه الطايره وعدسات وماكياج كامل بعدين اكوي ملابس كثيره للتبديل خلال اليوم
كنت بموت من التعب مهلكه عمري وهوسبندي مادرى عني شخيره غطى على صوت الرشاش لحد ماتعبت مانام ولا ارتاح
وذات فجر الا وزوجي يصحى على الرشاش ودخل علي الغرفه لقى شوشتي مقسمه بكليبسات نصها طاير بعيونه ونصها محترق من الاستشوار تروع وقال وش مصحيك الحين روحي نامي ولمي هالشوشه بشرشف يحول
كانت عيوني حمر من السهر وعليها سواد لو احط عليه اسمنت ماراح واذا طلعت معه مشوار اغفي بالسياره مكيف السياره بارد والاخت ماتاخذ كفايتها بالنوم ماتهنيت دايم مجهده ونومي قليل هبله
ثاني نصيحه كانت تصنع الركه قصدي الرقه وعلى اتفه شي تنزلين الدمعه قالك رومانسيه
واجيكم احاول واحاول تعبت
مره هوسبندي مرض عادي انفلونزا وسويت نفسي حزينه وركيكه والورده الذابله واتعصر يمين يسار ابي الدموع تنزل عجزت
بعدين قالي وش فيك كذا قلت وش فيني ؟ احسبه لاحظ الحزن الركيك ! قال لا بس تعفطين وجهك كنك شامه شي
صدق افشل مايصلحلي ياشين التصنع
ثالث نصيحه كانت لاتضحكين ولاتمرحين ترى يطيح قدرك صيري مدري كيف
عجزت انا متعوده للوناسه والمزح ومسويه نفسي ثقيله وماامزح واحاول اني ماعلق صراحه جاهدت جهاد فظيع بهالنقطه واحس سوالفي غبيه ومو مرتبه بس قالي ماتعرفين ترتبين كلامك
ليه لاني احاول ارتبه زي ماقالولي فيطلع كلام اهبل ومحتاج يكتبون ترجمه تحته
هذا غير الفلسفه واني اسوي نفسي فاهمه بكل شي وافتي فيه وادلو بدلوي المكسور ولا عمري قلت ماعرف وبالنهايه تجيني فشيله مكعبه مضروبه ب 10
رابع نصيحه اذا رحتي مع زوجك السوق سيده ركضه على المحلات الغاليه والماركات خليه يحس انك شي خ
وانا اطامر لها المحلات واشتري واخبص وبقلبي اقول مايسوى من زين شكله يقالي
بس بأحد المحلات طلعت على حقيقتي لقيت فستان سواريه عادي يجيب الهم شكله زي الشلحه <<<< خ قديمه منين جت شلحه
وقالي بالفين قلت لو وسطه حرمه ماصار سعره كذا خ وناظرني زوجي نظره اشوا انها تعرف مو كل شي ينشرى هالخبله
خامس نصيحه حقت الحريم صيري مطيعه في كل شي قولي أي صح ومحسوبتكم بهباله أي صح لو قالها بتزوج قالت أي صح لحد مامره من المرات قال بنروح سوريا نتمشى قلت لا مابيها <<< فيلم مرعب
وخليته يكنسل الحجز ويغير كل المسار
بس هو ظل مستغرب وين الركه لاني قمت اصارخ واطالب بحقوقي المدنيه مع انه كان عادي وهادي
بس ولو الفيلم مرعب حبتين طلعني عن الشخصيه اللي كنت اتقمصها
سادس نصيحه لارحتي عند اهله سؤال وجواب فقط لايكثر القرق
وفعلا ارد على قد السؤال والا اقل ماسولف ولا اتكلم مع بناتهم وكانت تمر الساعات وانا ساكته وهم يتكلمون مع بعض حسيتهم يقولون من أي قسم بالنفسيه جايبها لنا شكل ... خ
سابع نصيحه حريميه والتي قصمت ظهر البعير تفشخري عند هوسبندك وطول الوقت قولي انا وانا وانا
وبديت على هالموال اضرب عليه الصبح والليل بهباله انا كثير خطبوني وانا شباب العيله قطعوا بعضهم عشاني وانا ام فلان ماتت ناقصه عمر عشان ماخذتني لولدها <<<< والحقيقه محد درى عني
بعدين مره قالها بصرخه مدويه خلاص طسي تزوجيهم كلهم على بعض اوف
في من ضمن النصايح لاتمرضين ولاتشكين ترى يعرس عليك وصرت الحرمه الفولاذيه لو يطخوني بمسدس 3 عيارات صابره وفاكه الضحكه مترين
لحد ماصار يحس انه غلط اذا قلت مريضه والا اليوم تعبانه ماني طابخه يكون الرد ليه ها طول عمرك طرزان خ
راقبيه وحاولي تمسكين الزلات من اولها عشان يعملك حساب وانا زهقت الرجال في عيشته من كنت تكلم قبل تعرفني؟ وليه تروح المولات مع خواتك؟ ومدري من هالخرابيط قاعده احاسبه منذ خلقته وش كان يسوي من قبل لايعرف هالخشه اوف شكله متزوج محقق جنائي بالاسكوتلند يارد
تصنعت وتصنعت وتقمصت ادوار كثيره وبطولات لحد ماطلعت عن شخصيتي وصرت مو انا وعلى فكره كانت ابيخ ايام بحياتي وكانت فيها سوء فهم ومشاكل كثير عشان التناقضات ومجموعه الحرمه المخربطه اللي ماتعرف وش تبي!
كنت ممثله وماكان ناقصني الا الكاميرا ياليت المخرج ينزلنا صورتها خ
لحد ماجت اللحظه الموعوده ورحت عند اهلي ولميت خواتي ومسويه حلقه ودرس عن التمثيل واخر ادواري
جت وحده من خواتي قالت وجع ماله داعي بيجي يوم وتنكشفين وبيصير شكلك اهبل اكثر مما هو الان, وشلون تعيشين مع واحد سنين وطول اليوم وانتي بشخصيه ثانيه ومسويتلي ناديه الجندي ماراح يدوخ بالاخير الا انتي!
وكانت هذه الطابوقه اللي جت على راسي وصحتني
وفعلا يابنات ماكذب عليكم لما خلاص اعتذرت عن متابعه افلامي واعتزلت الفن بعد مشوار فني دام لشهور قليله
صارت علاقتي بزوجي احسن بكثير! والله من غير مبالغه!
وصار يسمع سواليفي ويضحك معي عادي واشتري اللي ابي ورجعت اعسكر عند ابو ريالين عادي مدام حلو واقول رايي بصراحه واللي ماعرف اقول ماعرف مو مسويه نفسي نيوتن
ومالها داعي اني اكون كل يوم كني على منصه بعرس عادي, كل شي بسيط واناقه ماتتطلب جهد
حتى اهله وخواته اتكلم معهم واسولف مع البنات ووحده منهم قالتلي توقعناك مانتي اجتماعيه معذوره كنت وقتها نجلاء فتحي خ
فياحريم أي وحده سايقه الهباله وشغاله افلام اقولها ستوب
&&منقول&&