هل الرقية ما نفعت معاك وتعانين من العنوسة والمشاكل تعالي

لازم تقري الموضوع كامل فيه أشياء ناس ما يعرفونها
هل جربتي تروحي لشيخ يقرا عليك وإلا سويتي رقية بنفسك
ولا استفدت شيء وإلا تحسنتي فترة ورجعت حالتك تسوء؟
هل تعانين من العنوسة مع إن اللي بعمرك وأقل منك جمال تزوجوا؟
الصراحة فيه سبب خطير جدا وكثير من البنات ما يعرفونه
حتى الرقاة أحيانا ما يفكرون فيه
فيه ثلاثة أسباب للمشاكل اللي تصيبك وخاصة العنوسة وعدم التوفيق
سواء بالوظيفة أو التجارة أو الزواج وغيرها
1- قدر الله :
يعني يكون كاتب لك العنوسة كقدر وابتلاء مثل فيه ناس مرضى فيه ناس فقراء وهكذا
وهذا نغيره بالدعاء بإذن الله فالرسول صلى الله عليه وسلم قال :
"لا يرد القدر إلا الدعاء"
والله يحب من يلح بالدعاء وطبعا تعرفون فيه حالات للدعاء وأوقات للاستجابة
وممكن يستجاب دعائك وممكن تؤجل الإجابة وممكن تدخر لك ما تستجاب لكن تأخذي حسنات على هذا
وتذكري إن الصبر جزاؤه الجنة بإذن الله
يعني لا تقولي دعيت والله ما استجاب لي .
2- العين :
يعني تكوني محسودة وهذي العين تفسد عليك أمورك بعدما كنتي سابقا ناجحة بحياتك
وهذي تتخلصي منها بالرقية سواء تسمعينها أو ترقين نفسك أو تروحي لشيخ
لكن إذا أنت محسودة ولا نفع معك الرقية فهذا له أسباب والله أعلم
السبب الأول : إن بيتكم فيه معاصي والمعاصي تمنع تأثير الرقية وتنشر الشياطين بالبيت
وأهمها الموسيقى سواء بالتليفزيون أو الجوال أو ألعاب الأطفال
وكل هذي المعاصي لازم تحذفينها من حياتك
شيلي الدش وحطي المجد أو أي قناة إسلامية
وأبعدي عن المعاصي بلباسك وبعبايتك وبالغيبة والنميمة
والسبب الثاني: إن الشيخ يكون كذاب وليس راقي بل يتعامل بالسحر والجن
لهذا ابحثي عن شيخ موثوق والأفضل ترقي نفسك بالبيت بالاستماع للمسجل
والسبب الثالث : القذارة فالشياطين تحب الرائحة السيئة
فاحرصي على نظافتك بالاستحمام وتنظيف أسنانك وأنفك ونظافة بيتك ورمي أكياس الزبالة
وبخري البيت وعطريه لأن الشياطين تكره الرائحة الطيبة
وابتعدي عن البخور الجاوي لأنه يجذب الشياطين بسم الله.
3- السحر :
وهو سحر التعطيل وهذا يمنع من التوفيق بشيء واحد
مثلا الزواج أو الوظيفة أو التجارة
وأحيانا إذا كان قوي فيعطلك عن أي نجاح يعني ما تتزوجي وتكون فيه مشاكل مع صديقاتك وأمك
وإذا أنت متزوجة ما تصيري تنامي مع زوجك وإذا عاشرك فيكون شيء مزعج ومقرف
ولا يتم إلا فقط لأجل الإنجاب ولكن دون رغبة
طبعا فيه رجال يعاشرون بعنف أو ما يحافظون على نظافتهم
وهذا طبيعي تنفرين منه
لكن بالسحر يكون يعاملك بلطف وحب لكن أنت تنفرين منه
وهو غالبا أقول غالبا وليس دائما يكون من النوع المنثور
يعني مشيتي عليه
وغالبا ينثر أمام باب البيت وما تشوفينه
لذلك جيبي ماء وحطي عليه شوي سدر وملح و خلي أبوك أو أخوك ينظف الدرج اللي عند الباب
والرصيف اللي قدام بيتكم
لا تخلي الشغالة تنظفه لأنها ممكن تكون ساحرة وممكن ما تنظف بإخلاص
ولا تخلي خواتك ولا أنت لأنهن ممكن يكونوا مسحورات تعطيل الزواج
فما تقدروا تمسحوا كل المكان وتتخيلوا إنكن مسحتوه
وإذا كان زوجك هو المسحور فنظفي أنت أو كان أبوك أو كان أخوك يضربكم بدون سبب فنظفوه أنتم
يعني اللي تتوقعوا إنه مسحور لا تطلبوا منه
وإذا فيه عتبة عند بيتكم فارفعوها أو حوض شجر ممكن يكون تحتها سحر معقود
إذا لقيتو سحر فودوه لشيخ يفكه لا تفكوه أنتم فهذا خطير
طبعا تسووا هذا مع الاستماع الدائم لرقية السحر عشان يروح السحر داخلكم
طبعا لا توسوسون وتسوون شيء بدون ما تكونوا واثقين من إن السبب هو سحر
هل تعرفي سحر تعطيل الزواج وش يصير ؟
إذا مافيك أي عيوب الكل يشوفك بشكلك الجميل والكل يحب أخلاقك
لكن من يفكر بالزواج منك فجأة يشوفك قبيحة أو يشم منك ريحة مقرفة حتى لو كنتي نظيفة ومتعطرة
لذلك فأي بنت ممكن تكون صديقتك ومعجبة فيك
لكن لما تفكر تخطبك لأخوها تبدا تشوف شكلك قبيح أو ريحتك شينة
وبعد كذا تبتعد عنك بدون ما توضح السبب
ولو جاء خاطب للبيت نفس الحال يشوفك وبعدين يلغي الخطبة
ولو رضى فيك فتجيك حالة ضيق وترفضين الخطبة مهما كانت مزايا الخاطب ترفضينه
وإذا السحر قوي فما يجي خطاب أبدا
طبعا مو شرط إذا راح الخاطب يكون سحر
ممكن يكونوا خواته مدحوك بزيادة وتوقعك جميلة بزيادة ولما يشوفك يلقاك عادية فيتراجع وهذا شيء طبيعي
وممكن يكون يرغب بصفات معينة ولا يلقاها فيك
و مو شرط لما تشمي ريحة شينة بشخص يكون مسحور
ممكن يكون مو نظيف ما يستحم باستمرار وممكن يستخدم عطر ما يعجبك
أو يحب أكل الثوم والبصل وهذي الأشياء تؤثر بالرائحة
هل تعرفي ليش ترجع حالتك تسوء بعد الشفاء التام ؟
بعض البنات تتعالج عند شيخ ويكون ممتاز وتتعافى ولكن بعد فترة ترجع الحالة
السبب الأول : زي أسباب الحسد بسبب وجود المعاصي في البيت
السبب الثاني : يكون الشيخ كذاب ويتعامل بالسحر فيعيد الحالة عشان تعطوه فلوس
وإذا ساحركم بتعطوه فلوس وتنسون هذا
السبب الثالث : تجديد السحر وهذا الخطير وهو يكون معقود بمكان يستخدم باستمرار
وكل ما استخدمتيه ترجع الحالة
أحيانا يكون خلف الزر اللي يشغل اللمبة أو زر المكيف
أو في الدش وكلما استحم الشخص ترجع الحالة
أو فرشة الشعر أو المشط والملعقة والصحن
لذلك إذا أنت متأكدة من وجود السحر فتخلصي من هذه الأشياء واشري جديدة
وجيبي كهربائي يكشف على كل أزرار الكهرب يفكها قدامك وتتأكدي مافيه شيء غريب بالداخل ويرجعها
وسباك يكشف على الدش والشطاف والحنفية
وفتشي أغراضك هل فيه شيء تستعمليه باستمرار ومنذ سنوات
وما ترغبين ترمينه غالبا يكون مجدد للسحر
بعد ما تتخلصي من مجددات السحر ارجعي للعلاج عن طريق الشيخ أو سماع الرقية بالمسجل
مع استعمل التمر العجوة والزيت المقري والسدر وغيرها مما يناسب حالتك
وإن شاء الله تشفين تماما
فيه واحد كان كل ما ركب السيارة تخانق مع زوجته ويثور عليها ويهينها
مع إنه يحبها وخارج السيارة يعاملها باحترام
فاكتشفو وجود السحر بمسجل السيارة وكل ما شغله سوى تجديد للسحر
طبعا لا توسوسون وتسوون شيء بدون ما تكونوا واثقين من إن السبب هو سحر
عشان تعرفي أنت مسحورة وإلا لا فاسمعي الرقية الشرعية وشوفي إيش يحصل لك
وإيش الآيات اللي تؤثر فيك
فهذا اللي يوضح هل أنت محسودة أو مسحورة أو مافيك شيء بل قدر
وكل شيء قدر من الله لكن الله من يسبب الأسباب
الشيء اللي يضعف العين والسحر هو قوة الإيمان وكثرة الطاعات
والصلاة في وقتها وحسن التعامل وخاصة مع من هم أقل منك مثل الأطفال والخدم والطالبات
والصدقة بالمال أو بالكلمة الطيبة أو بالإبتسامة كلها صدقة
والنظافة الشخصية ونظافة المسكن والرائحة الجميلة
وسماع القرآن بتشغيل مسجل أو إذاعة القران أو قناة القرآن بالمجد
والبعد التام عن الموسيقى سواء بالأخبار أو المسلسلات أو نغمة الجوال أو الأغاني أو ألعاب الأطفال
لأن الشياطين تنجذب بالموسيقى
كتبت موضوعي للفائدة بعد ما شفت معاناة أكثر البنات
فلا تنسوني من دعواتكن
واللي تبغى تنشر الموضوع بمنتدى ثاني وإلا بالبريد فيسعدني ذلك
المهم دعواتكن الله يحقق كل ما أتمنى