وش تسوين بمهرك تعالي اقول لك

مرحبا عروساتنا
أولا مبروك عليكم
و الله يوفقكم و يجمع بينكم و رجالكم بخير
إذا جاك المهر على طول طيران على السوق وكل شيء قدامك تاخذينه
و الله من الطفاقه ههه
امزح عليكم
اول شيء يا الغاليات لا زم تقسمين المهر عشان ما يطغى شيء على شيء
و قبل كل شيء و عشان ربي يبارك لك فيه و يوفقك تصدقي باي مبلغ حتى لو كان بسيط (( وما نقصت صدقة من مال بل نزيد .. بل تزيد ))) وهذا كلام الرسول صلى الله عليه و سلم
و يالله ابدي باسم الله
الأشياء اللي تحتاجينها .... اختكم متزوجه يعني من خبره ههه
قبل ما أبدأ بذكرك بملابسك اللي تستخدمينه الآن وش فيها ؟؟؟
ادامهم ناس جدد و رجلك أصلا ما قد شاف ملابسك فعادي استخدميها
خصوصا الجينز
بعد إذا عندك أطقم ملابس مرتبه أكيد عنك اجل قاعده ببيت أهلك من غير اواعي ههه
و الاكسسوارات و الشباشب
أقصد يا عروسات استفيدي من كل شيء
ملابس للبيت
و تنقسم إلى :
1- ملابس نوم

• تحتاجين قميص لأول ليله وهذا لازم يصير طويل و مستر عشان ما يقول رجلك وشيء ذي من أوله ههه

عن نفسي اخذت جلابيه ناعمه مره اعجبت أبو الشباب يقول صايره ثقل

• قميص أو اثنين طوال لزوم اليالي الأولى
• 4 أو 5 قمصان نوم قصيره بس خلي واحد للركبه مثلا عشان يكون بالتدريج يعني مو اليوم لابسه طويل و مستحيه و بكره .... مشخلع خليك ثقل

و نوعي بين الستان والقطن ترى القطن مره مريح وشكله حلو بعد

• بيجامه أو ثنتين كافي خلي وحده برمودا و الثانيه شورت أو حتى طويل عادي

2 - ملابس قوم <<<<<< حلوه ملابس قوم أقصد ملابس جلسه يعني بناطيل وهلم جره

• خوذي لك بنطلون جينز طويل و احرصي يكون ضيق حطي معاه كم بدي الجينز يمشي مع كل شيء
• البرمودا تراه مره حلو خوذي جينز ازرق و واحد ثاني بيج و ركبي كذا بدي و بدلي بين البديات مثل ما قلت لك الجينز يمشي مع كل شيء

بالطريقه هذي بطلع لك أكثر من لبس مرتب و هي نفس الأشياء ههه ترى الرجال ما يدققون كثير

• التنورات القصيره نفس فكرة البرمودا
• ممكن تاخذين شورت بيكون حلو بس مو الأول الأيام

3 - شباشب
افضل شيء تاخذين لون حيادي او اللون الغالب على لبسك عشان يمشي مع أغلب الأشياء و مثل ما قلت لك الرجال ما يدققون بالعكس كذا بشوفك عاقله و مو كل فلوسك بالسوق و بيحترمك أكثر
بتحتاجين شبشب قماش لقمصان النوم خليه أبيض إذا ألوان قمصانك فاتحه حتى الغامقه الأسود و الأحمر و البني بعد يمشي معها الشبشب الأبيض
و شبشبين لملابس القوم
4 - ملابس داخليه
اربع أطقم كافيه حاولي تركبينها على القمصان
إضافه لسونتيان للخروج بيلك واحد شاد و زين
و واحد ثاني شفاف لملابس السهره (( بيريحك إذا كانت السيور و الخلف كله شفاف )))
إضافه لكلوتات عاديه اللي تلبسينها كل يوم
بس يبيلك قطن مرتب و ممكن تاخذين ألوان حسب ملابسك حقات البيت
ملابس خروج
و تنقسم إلى :
1 - رسميه
تحتاجين تقريا 3 أطقم مرتبه للزيارات الأولى لأهل زوجلا زم تصيرين شيك لأن الصوره هذي هي اللي بتنطبع بأذهانهم عنك ((( الإنطباع الأول ))
2 - سبور
يكفيك 4 مرتبه و لا تنسين ملابسك اللي تستخدمينها الحين
ملابس سهره
ما تنقسم لشيء ههه

• فستان الزواج : حددي ميزانيه خاصه حسب مكان الزواج طبعا إذا بالبيت غير عن فندق و لا تكثرين الميزانيه تراه يوم واحد و تتحسفين عليه

فستاني كل سألني عنه (( زواجي بالبيت )) و كان مره جنان كلفني 3000 ريال و بعته ب 1500

• فستان الملكه : أحلى شيء بالملكه انها تقتصر عليك انتي و إياه و إن اصروا اهله على الحضور ما فيه مانع

يكون الحفل فيه أهلك و أهله بس
و ترى دولابك مليان فساتين انتي ما تحتاجين غير شيء ناعم يظهر انوثتك و يجعل زوجك يترنح من جمالك <<<<<<<<<< ههه صار موضوع تعبير
فساتين العزايم :
بذكرك ان الناس معد تعزم الحين بس خلي عندك 2 كافي يمكن أحد يغلط و يعزمك ههه الكل يتهجهج عن العزايم الحين
و يمكن تحملين و لا تستفيدين منها و السوق مفتوح ما يسكر لا بغيتي كل شيء فيه
الجزم و الشنط
خوذي ثلاث أطقم شنطه مع جزمتها واختاري ألوان حياديه تمشي مع أغلب لبسك يعني بيج و أسود و أبيض
و اكرفيهم لين يقولون آآآآآآآآمين
هذا إذا كل ملابسك تمشي معها و إذا تحبين التغيير بكيفك بس لا تكثرين
لأنه إذا حملتي غلط تلبسين كعب عالي
مجوهرات
انصحك لا تشترين شيء لأنك بتنتلين هدايا استخدميها و حلليها
اكسسوارات
أكيد عندك مليانه مشاء الله و نفس الشيء خوذي ألوان حياديه تمشي مع أغلب الأشياء
عطور :
يكفيك واحد أو اثنين ما له داعي أبد تصفين كم علبه على التسريحه
و برضه هذي تجي هدايا احيانا
مستلزمات التروش <<<< ههه أخذ الدش يعني
روب حمام مع الفوط
تحتاجين طقم واحد
مجموعة معطره مكونه من
كريم جسم
بودره
سبري جسم
شامبو جسم
عطر خفيف تابع للمجموعه
إذا بتسافرين خارج السعوديه و دول الخليج و الدول العربيه
هذه الدول عادي العبايه السوداء ماعندك مشكله
أما باقي الدول فأنصحك بعبايه ملونه و حجاب قطن لفيه و نقاب أو لثام
عبايه وحده كافيه و خوذي معك عبايتك السوداء سبير
و إذا انتي ما تحبين تلبسين كذا مع انه اريح بكثير و استر و ترى ربك بكل مكان مو بس بديرتنا
خوذي لك كم لبس ساتر و خافي ربك
و لا تنسين الكتب تراها مهمه مره
أهم من كل اللي تو هي الثقافه الحياة الزوجيه تحتاج وحده فاهمه وش قاعد يصير حوله و كيف تفهمين زوجك
و حتى بالنسبه للعلاقه الخاصه و الأحكام الفقهيه و الأمراض اللي ممكن تصير لك و تدبير البيت .... إلخ كل هذي لازم يكون عندك اطلاع عنها
زوري المكتبه بتلاقين اللي تبغين
و عندك بعد اشرطة جاسم المطوع رائعه جدا
الماكياج :
تلاقين اشياء حلوه ورخيصه وابعدي عن الماركات مافيها الا الغلا
و لا تنسين ان كل هذا سنه و خلاص يا تحملين و لا تستفيدين شيء أو تقدم
عشان كذا انصحك انك تخلين مبلغ على جنب سبحان الله تحتاجين شيء بعدين ما تدرين عن الدنيا وش تسوي
ها المبلغ حطيه باستثمار أو أي شيء ممكن تستفيدين منه
يعني لا تخلين كل المبلغ اللي يجيك يطير للسوق
و خل القرش الأبيض لليوم الأسود
و إذا ما تبين استثمار خليه باحسابك لا تمسه الأيدي <<<<<<< حلوه لا تمسه الأيدي ههه
مع دعائي لكن بالتوفيق
أي سؤال أنا حاضره