ياآرب تخليه وتبقيه لعينن ترجيه روعه من جد

الجزء الثاني.....
بعد مرور 25 سنة على الاحداث...
اليوم عيد ميلاد فواز ونواف ... الكل فرحان ومبسوط ...
وكعادة منيرة في كل مناسبة عندها تعزم أهل سارة الله يرحمها ... طبعا على أساس أنها بتعزم أم وجدة أولادها بالرضاع ...
الحفلة كانت حلوة وبسيطة ... الموجودين كلهم محارم لنواف وفواز:
- خواته ( لينا 20 سنة .... ليان 17 سنة ... لما 10 سنوات ) وماعندهم إلا اخو واحد ( فيصل 12 سنة )
- أم محمد ( هذه أم سارة ) وطبعا جدتهم من الرضاع
- بنات نورة .. يعني خواتهم من الرضاع ( شهد 25 سنة .. رغد 23 سنة ... جود 20 سنة ... وعد 15 سنة )
- عماتهم ( فوزية – حصة – مريم ) .. على فكرة العمات خوات عبدالعزيز وعبدالرحمن من الأب فقط ...
وطبعا من غير بناتهم...
- رؤى ... هذه الوحيدة اللي مو محرم للأولاد ... تصير بنت خالتهم ... لما صار عمرها سنتين أمها اكتشفت انها مريضة بالسرطان ... وعانت من المرض لمدة 13 سنة وبعدها توفت ورؤى عمرها 15 سنة ... طبعا امها ماجابت غيرها بحكم مرضها ... عاشت مع ابوها اللي رافض فكرة الزواج قبل ما تتزوج رؤى ...
ورؤى هذه 24 ساعة في بيت خالتها منيرة ... هي من عمر لينا وصديقتها الروح بالروح ... وحتى عبدالعزيز يعتبرها مثل بنته ... بس مشكلتها الوحيدة مع نواف وفواز ... ما يطيقونها ولا هي تطيقهم ... وطول الوقت حاطين حيلهم في بعض ...( رؤى تفتش عن عيال خالتها وزوج خالتها ... يعني بس تغطي شعرها اما وجهها مكشوف )
نرجع للحفلة...
الحفلة كانت حلوة ومليانة صراخ وهبال العيال اللي ما كأنهم صاروا رجال طول بعرض ...
قاعدين كلهم في جلسة وحدة ... ام محمد قاعدة على كنبة تكفي لشخص واحد ونواف وفواز على يمينها ويسارها على يد الكنبة ...
والكل موجود ماعدا لينا وليان ورؤى يجهزون طاولة الأكل ويضبطون الشمع فوق الكيك ...
في المطبخ...
لينا: رؤى الله يخليك خذي الشمع من الكيسة اللي هناك وحطيها على الكيكة ...
رؤى: اف ... وماحصلتي لي الا هالشغلة ... انا لو يحصل لي كنت ضبطت الشموع على راسهم عشان نولعهم وتولع فيهم ونفتك منهم ومن شرهم ...
ليان: حرام عليك يارؤى ... تراهم اخواني وعيال خالتك في نفس الوقت .. لاتنسين
رؤى: لا حبيبتي انا ما عندي الا ولد خالة واحد ... حبيبي فيصل ... والا الباقي تكملة عدد وازعاج عالفاضي
لينا: تعرفين يا ليان ايش وجه الشبه بين نواف وفواز ورؤى؟؟؟؟
رؤى ردت بعصبية قبل لاتفتح ليان فمها بكلمة: الله لايقوله ... انا يكون بيني وبين هالعلل شبه ؟؟؟
لينا وهي تضحك: أي ياحلوة فيه وجه شبه .... حبكم لفيصل ولما ... ثلاثتكم تموتون فيهم ولا ترضون عليهم
رؤى: اصلا هذا الشي الوحيد الزين اللي هم يسوونه ... خلهم يسوون خير في دنياهم
ليان: ههه
الله يقطع شرك يا رؤى ... لو نتكلم في الموضوع ماحنا بخالصين ...
يالله شيلي الكيكة اللي معاك وروحي حطيها على الطاولة... بنلحقك ...
رؤى: اف
طلعت رؤى من المطبخ وهي شايلة الكيك واتجهت للطاولة ...
ومحد كان منتبه لها مع السوالف... فجأة رفع راسه نواف وشافها ...
قال بصوت عالي: شوف شوف شوف يافواز .... بعض الناس كبروا وصاروا حريم سنعات ... يشيلون ويحطون في المطبخ والبيت
فواز: أي والله ... الظاهر كبروا!!!
تقدمت رؤى من الجلسة: والله على الأقل أحسن من رجال طول بعرض الشيب بيملي شعرهم ولسه قاعدين في حضن جدتهم ... ولا هم راضين يعرفون انهم كبروا ...
لا والمشكلة انهم اطباء ... ابي اعرف مين الخبل اللي يتعالج عندكم...
نواف: تعرف يافواز ايش خاطري فيه؟؟؟
فواز: افا يا ذا العلم ... اخوي خاطره بشي ؟؟؟ قول وانا اخوك لا تخلي بخاطرك شي؟؟؟
نواف: خاطري اعرف ام السعف والليف لسه كشتها قايمة عل راسها ولا تعدلت
فواز: وانت من صجك مخلي هالشي بخاطرك... ما يبيلها شي هذه .. اصلا شعرها ليف ماركة اصلية ... مستحيل يتعدل ... ماينفع معه لا شامبو ولا بلسم ولا زيت ...
العمات الثلاثة بصوت واحد وعالي : ههه
العمة حصة: وانت الصادق يا ولد اخوي
هنا رؤى دمعت عينها وركضت وخلت لهم المجلس بكبره وطلعت فوق
منيرة بنظرة غضب للاولاد اللي يضحكون ولا همهم شي: فواز ونواف اعتقد يكفي
سكتوا الاولاد وهم ماسكين ضحكتهم بالغصب...
قامت منيرة بعصبية للمطبخ...
لينا: خير يمه وشفيك معصبة
منيرة: اخوانك لا يحترمون ولا يقدرون ... الظاهر اني ماعرفت اربيهم
ليان من وراها: وانتي الصادقة يمه ... حرام عليهم ... ليش يسون فيها كذا
لينا: ايش صاير ... فهموني!!!!
قالت لها ليان كل اللي صار...
لينا: يا قلبي يارؤى ... تلاقينها ميتة من الصياح فوق ...
ليان: خربوا عليها الجمعة ... صدق مايستحون ...
منبرة: انا بطلع وبشوفها
طلعت منيرة فوق لغرفة لينا ... دقت الباب ... ودخلت ... ومثل ما توقعت .. رؤى قاعدة وتبكي ...
منيرة: يمه .. لاتزعلين... هم ما يقصدون ... هم يمزحون معاك...
رؤى: ما توصل لكذا ياخالتي ... لا وقدام الناس .. وقدام مين؟؟؟ قدام عماتهم ... اللي ما يحبوني ولا يواطنوني وطول وقتهم ينغزوني بالكلام ... جتهم من الله ...
منيرة: يابنتي .. انتي مو واثقة من نفسك؟؟؟ ماشاء الله عليك جمال ودلال .. وكل وحدة تتمنى انه يكون عندها بنت مثلك ... او تكونين زوجة لولدها ...
رؤى: شلون تبين يكون عندي ثقة في نفسي وانا ماعندي ام تدافع عني؟؟؟
بالذمة ياخالتي !!! لو كانت امي الله يرحمها عايشة كانوا قدروا يقولون عني هالكلام ... او يستهزءون فيني ؟؟؟
منيرة: افا يابنتي ... وانا وين رحت؟؟؟ الظاهر ماتعتبريني امك؟؟؟
رؤى: لا ياخالتي لاتزعلين مني ... الله العالم بمعزتك عندي ... واني جيت اليوم عشان خاطرك ... ولا انا مابي احضر حفلة هالقرود اللي تحت !!!
منيرة: ههه
رؤى: بس مهما يكون ياخالتي هذولي اولادك ... واكيد انك راح توقفين معاهم ... والمفروض اني ما اتكلم عنهم كذا...
منيرة: لا ياحبيبتي .. انا مع الحق ... انا ما اوقف معاهم على الباطل...
رؤى: صج يا خالتي ... بتوقفين معاي وتأدبين هالعلل ؟؟؟؟
منيرة: اكيد
( وفي نفسها تقول انا واقفة طول عمري مع ولد ضرتي وانا اضحك ومبسوطة ... ما راح اوقف معك يابنت اختي )
طيب يالله يابنتي ننزل تحت
رؤى: لا يا خالتي ... مالي وجه اقابل الناس ... خلاص انتي انزلي
منيرة: ما راح انزل الا ورجلي على رجلك ... واذا مانزلت الناس بتاكل وجهي ... يرضيك ؟؟؟
رؤى: طبعا لا ياخالتي مايرضيني
وبابتسامة حلوة: بنزل عشانك بس ياخالتي ولا هذولي.............
في المطبخ لينا وليان قاعدين وحاطين يدهم على خدهم ...
ليان: لا انا مو قاهرني الا عمات الغفلة ... انتي بس ما سمعتي ضحكتهم شلون ؟؟؟
تقولين كانهم منتظرين إشارة ؟؟؟
لينا: اصلا مدري ليش امي عازمتهم ... يجون بس ينكدون الحفلة ويطلعون
ليان: تعرفين امك عاد ... تقول مايصير اعزم نورة وامها وما اعزم عماتكم ...
لينا: ايش جاب لجاب... هذولي ناس عسل ... مع انهم مايقربون لنا
ليان: أي والله ... شلون رضعوا فواز ونواف وهم مايقربون لنا
لينا: علمي علمك ياختي
نواف من وراهم: علمي ولا ادبي؟؟؟؟
ليان: ولك وجه تنكت ؟؟؟
نواف: ليش ايش سويت.؟؟؟؟
لينا: كل هذا ومو عارف ايش هببت انت واخوك؟؟؟
نواف: والله انتوا اللي مكبرين السالفة ... عادي نمزح...
ليان: بس مو قدام الناس... ياما مزحتوا معاها بمزح اثقل من كذا وماتكلمنا ... لانه نكون بروحنا وعادي .. بس قدام الناس؟؟؟؟؟
نواف: باربي على رؤى ........ دلع
وطلع وتركهم
دقايق الا ومنيرة تنزل من الدرج ووراها رؤى
فواز: وصلت ست الحسن
منيرة بنظرة: فواز ...
سكت فواز واحترم نفسه ... لانه عارف نظرة أمه
منيرة: يالله ياجماعة نطفي الشموع....
وطفوا الشموع وعين منيرة مافارقت اولادها ... وفي قلبها غصة ...
راحت للشباك وتركت لدموعها انها تنزل... وطبعا مع الزحمة ما في احد افتقدها ...
الا شخص واحد ... لان شعوره مثل شعورها...
وما حست منيرة الا بيد تنحط على كتفها ... مسحت دموعها بسرعة ...
: لا تمسحين دموعك يايمه ... انا حاسة باللي بقلبك ..
منيرة: يا خالتي ماني عارفة ايش اسوي ... كل ماكبروا كل ما كبر الالم اللي بصدري
ابي اعرف مين ولدي ... الله العالم اني اعزهم اثنينهم ... ولا بفرق بينهم ... بس ابي اعرف .. ابي اعرف ... بنجن ... بنجن ياخالتي ... بنجن
ام محمد: الله يلوم اللي يلومك بابنتي ... انا وهو حفيدي مو ولدي واحس بداخلي غصة
طيب يابنتي ماعمرك حسيتي بان واحد منهم اقرب لك وانه ولدك؟؟؟؟
انتي ام وقلب الام ... يعني ...
منيرة: أكيد ياخالتي احس ... بس أحيانا أحس انه فواز وأحيانا نواف ... وعلى طول اطرد الافكار من راسي ... مابي اظلم واحد منهم ويطلع ولدي ... وانا ماعندي دليل غبر احاسيسي...
ومع الاسف ضابطة مع عبدالعزيز ... الشكل ولا واحد يشبهني او يشبهكم ... واحد نسخة ابوه والثاني نسخة عمه تركي ... تاركين اهل امهم وطالعين على ابوهم ... يشبهون عمهم اللي مو خليص وتاركينا احنا يا امهاتهم ...
ام محمد: الله يكتب اللي فيه الخير يابنتي ... يالله نرجع لهم قبل لايحسون فينا
منيرة: ولا بيحسون ... اذا نواف وفواز موجودين ... انسي انه في احد يحس بشي
ام محمد: الله يخليهم ويحفظهم
عند الباب ... فواز ونواف واقفين يودعون امهم منيرة وجدتهم وخواتهم ...
فواز: يالله يا شهد ... متى يشرف حبيب خاله ؟؟؟
شهد: يوه ... بدري يا فواز ... توني في الشهر الرابع
نواف: الله يقومك بالسلامة يارب
الكل: امين
فواز: وانتي رغودة؟؟؟
رغد: لا ... انا سلمان يقول بدري
نواف وهو يقلد صوته: بدري ... اذا اعرس عليك رجلك قولي بدري بعدين
رغد: بسم الله علي ... ماتعرف تقول شي عدل
الكل: ههه
وطلعوا وبقت ام محمد واقفة
ام محمد: شوفوا انت وياه ... ما كلمتكم قدام الناس لاني مابي أحرجكم ...سكوتي مو معناته انه اللي سويتوه صح!!!
فواز: جدتي نمزح
ام محمد: اولا هذا مو مزح ... هذه سخافة ...
ثانيا اذا انتوا متعودين على هالحركات بكيفكم ... بس مو قدام الناس
احرجتوا البنت ... وحتى لما ارجعت احس انها تبتسم بالغصب
نواف: ان دل على شي فهو على ثقل دمها
ام محمد بعصبية: وبعدين ... البنت يتيمة ... يعني المفروض انكم مثل اخوانها
فواز: خلاص يا جدة ولاتزعلين ... حقك علينا ... ما بنعيدها
ام محمد: يالله مع السلامة ... ولا تقطعون ... مروا علي ...
فواز ونواف: بحفظ الله
رجعوا نواف وفواز داخل وعماتهم لسه موجودين ...
تأففوا بداخلهم وقعدوا...
العمة فوزية: احين انتوا قايلين لنا ان الحفلة بس لمحارم فواز ونواف ... ورؤى ايش جايبها بينكم ... اعتقد ان بناتنا اولى...
رؤى: وهي منزلة عيونها بالارض
منيرة: رؤى بنتي يا فوزية ... وهي دايما عندنا ...
ليان: واصلا الحفلة ماتحلى الا بوجودها بعد عمري ... وقامت طبعت بوسة على خدها
سكتت فوزية وهي ميتة قهر
رؤى في نفسها: الله لايحرمني منكم يابنات خالتي
العمة مريم: ندري ان الوقت متاخر ... بس ودنا نشوف عبدالعزيز ... كلش مايبين
منيرة: البيت بيتكم ... مابينا هالكلام
شوي الا وسمعوا صوت واحد ينادي من الباب ...
البنات بصوت واحد: عمي تركي حياك
طبعا بعد ما غطت منيرة شعرها ...
تركي: السلام عليكم
( تركي اخو عبدالعزيز وعبدالرحمن من الاب يعني شقيق العمات) لما توفت امه كان عمره 12سنة وخواته رفضوا ياخذونه عندهم بحجة ازواجهم مايرضون ... وخذاه عبدالعزيز عنده ورباه مع عياله ... بعد ما اتفق مع اخوه عبدالرحمن ... ولما تخرج من الجامعة اخذ له شقة بروحه عشان مرت اخوه تاخذ راحتها في بيتها ... مع انه مايناديها الا امي منيرة .... ورفضت منيرة انه يطلع بس هو اصر... وعمره 32 سنة ولسه مو متزوج )
الكل: وعليكم السلام
لينا: حيا الله عمي تركي ... دقيقة اجيب لك قطعة كيك
تركي: لا ياحبيبة عمك ... ابي من كل شي كليتوه مو بس الكيك
فواز: لا ياحبيبة اخوك ... ماتجيبين ولاشي ...
تركي: وليش ان شاء الله
فواز: اول شي نشوف الهدية بعدين
تركي: ول عليك ... ماتنسى
نواف: وهذا شي ينسى
تركي: شوفوا الهدايا محطوطة عند الباب
وعلى طول البنات والاولاد ركض على الباب
تركي: الحمد لله والشكر على نعمة العقل بس ... شلونك يارؤى ؟؟؟ ليش زعلانة؟؟؟؟
رؤى: وهي مستحية: الحمد لله بخير ... ماني بزعلانة
تركي: بس شكلك متضايقة !!! مين ضايقك ؟؟؟ قولي بس وانا اوريك فيه!!!
رؤى: محد .............وقاطعتها حصة قبل ماتكمل كلامها
حصة: وانت متى ناوي تتزوج ؟؟؟ عاجبك وضعك كذا ؟؟؟
تركي: الحمد لله ... ايش فيني ؟؟؟ عايش مبسوط ومرتاح ... مو احسن من اني اتزوج واجيب مهابيل زي اللي عند اخوي عبدالعزيز ( ويقول في نفسه او اجيب علل زي اللي عند خواتي )
فوزية: اصلا الكلام معك ضايع ... لاتتعبي نفسك ياحصة
كلها دقايق وسمعوا صراخ عند باب البيت ...
باب ا
تركي: بسم الله الرحمن الرحيم ... مو قلت لكم مهابيل
دخل عبدالعزيز وحوالينه عياله: السلام عليكم
الكل قام يسلم عليه ويحب راسه
العمة مريم: حيا الله بالدكتور عبدالعزيز
عبدالعزيز: الله يحيك ... بس انا كم مرة قلت مابي احد يناديني بالدكتور في البيت !!!!!!!!!!
شلونك يارؤى ؟؟؟
رؤى: الحمد لله بخير ياعمي ...
عبدالعزيز: بسرعة اعترفوا مين مزعل حبيبتي رؤى؟؟؟
نواف يساسر فواز: كملت
فواز: ههه
طالعهم ابوهم بنظرة: خلاص عرفت مين مزعلها مايحتاج ...
انتوامتى بتكبرون وتعقلون ...
رؤى: لا ياعمي ... محد مزعلني ... بس انا اليوم تعبانة شوي
عبدالعزيز: سلامتك يابنتي
كملوا الجلسة وعبدالعزيز كل شوي يناظر في منيرة وهو حاسس بنظراتها الحزينة
ويقول في نفسه ( حاسس فيك يامنيرة .. بس بعد هذا ولدي ومصلحته تهمني )
في الليل بغرفة عبدالعزيز ومنيرة...
عبدالعزيز بعصبية: وبعدين معاك يامنيرة .. ماتتعبين ... كل سنة وفي نفس اليوم تسالين نفس السؤال ... واجاوبك بنفس الجواب ... لا يعني لا
اثنينهم اولادك
منيرة: بس ياعبدالعزيز الاولاد كبروا ومو محتاجيني احين عشان تخاف .. وانا 25 سنة وانا ساكتة ... خلاص ابي اعرف مين ولدي ... فد شفتني افرق بينهم ؟؟؟
عبدالعزيز: لانك ماتعرفين مين ولدك ؟؟؟ لو عرفتي كان فرقتي!!!
منيرة: بس ................
عبدالعزيز: الظاهر ناوية تهدمين بيتك على كبر يامنيرة ... انا قلت كلامي وماني راجع فيه ... انتهينا
طلعت منيرة من الغرفة وهي معصبة وراحت لغرفة الاولاد ...
دخلت وهم حايسين بفتح الهدايا ... وقالبين الغرفة فوق تحت ...
منيرة بعصبية: اسمع انت وياه ... سكت عنكم كثير ... وقلت بكرة يكبرون ويعرفون ... بس لحد هنا وخلاص ... طفح الكيل ... انتوا عمركم ماراح تحسون ... وشلون بتحسون وانتوا كل شي عندكم ولا ناقصكم شي
فواز: يمه ايش صاير عشان كل هذا ؟؟؟؟
منيرة: لا تقول لي يمه ... انا مو امكم!!!
نواف: يمه صلي على النبي وفهمينا ....
منيرة: عليه الصلاة والسلام ... بس بعد انا اليوم لازم احط حد للمهزلة هذه...
انا كم مرة منبهتكم انكم تحترمون رؤى قدام الناس؟؟؟ ولا تنادونها بام السعف والليف ؟؟؟ ها ؟؟؟ ماتردون ؟؟؟
فواز: خلاص يمه عرفنا غلطتنا وماراح نعيدها
نواف: انت ملاحظ يافواز كم مرة قلنا هالجملة اليوم؟؟؟
فواز: أي ولله ..
منيرة: وانت الصادق كم مرة قلتوها في حياتكم ... بس انا خلاص ... غسلت يدي منكم
نواف وفواز: خلاص يمه اسفين
طلعت منيرة من الغرفة وصكت الباب بالقوة
فواز: ايش فيها امي اليوم شايشة؟؟؟
نواف: ايش دراني ... تسالني وانا قاعد معك؟؟؟
فواز: مدري احسها مو طبيعية
نواف: كله من ام السعف والليف
فواز: لا احس ان السالفة مو سالفة رؤى وبس .... لا السالفة اكبر من كذا
نواف: الخبر اليوم بفلوس بكرة ببلاش
في غرفة لينا...
ليان: الحفلة مرة كانت حلوة ... بس الله يهداهم خربوا على رؤى وكدروا خاطرها ...
لينا: أي والله ... عاد مسكينة على الموقف تلاقينها اسبوع ضايق خلقها
ليان: الله يكون في عونها ... تكسر الخاطر بالمرة
لينا: بس الصراحة الحفلة ناقصها بيت عمي عبدالرحمن ... يعني ماحصلوا بيت خوالهم يعزمونهم الا اليوم ... الحفلة من غير ربى ماتسوى
ليان: من غير ربى ولا من غير بعض الناس؟؟؟
لينا وهي مستحية: يالله عاد ... الحفلة بناتية ... شلون بيدخل؟؟؟
ليان: يعني ماتعرفين حركات خالد ؟؟؟ لازم بيدخل يسلم على عمته منيرة!!!
لينا: بس عاد
ليان: ههه ... لا والمشكلة ان حركاته كلها مكشوفة ...
اخذت لينا المخدة وحذفتها على ليان ووجها احمر
( نتعرف شوي على عيال عبدالرحمن
خالد ... 27 سنة ... طبيب اسنان ... ما كان يبي الطب ... بس ابوه اجبره قال خلاص خلوها على الاقل طب اسنان ... مافيني طوالة الطب ... وهو خاطب لينا بنت عمه
ربى ... 23 سنة ... متخرجة من قسم المختبرات بجامعة الملك فيصل وتداوم في مستشفى ابوها وعمها
ماجد ...15 سنة
ناصر .. 13 سنة
وزوجته اسمها عايشة ... انسانة طيبة لأبعد الحدود وتحب منيرة وكانهم خوات )
ثاني يوم في المستشفى ...
دخل عبدالرحمن مكتب اخوه عبدالعزيز ... وشافه قاعد ومهموم ...
عبدالرحمن: علامك ياخوي؟؟؟ من الصبح واحس انك مهموم ومو طبيعي؟؟؟
عبدالعزيز: كالعادة في عيد ميلاد الاولاد منيرة تفتح السالفة نفسها
عبدالرحمن: لاحول ولا قوة الا بالله ... معها حق يا خوي ... المرة قلبها متقطع تبي تعرف ولدها
عبدالعزيز: يا سلام ... وانا قلبي مو متقطع؟؟؟
عبدالرحمن: وانت ليش قلبك متقطع؟؟؟ انت عارف كل واحد ولد مين!!! واصلا انت مابتفرق معاك اثنينهم اولادك
عبدالعزيز: ومين قالك انهم نفس الشي؟؟؟ تبي تحط ولد سارة جنب عيال منيرة؟؟؟ طبعا ولد سارة غير... وهذا اللي حارقني ... اني ما اقدر اميزه بشي ... لاني ان ميزت بتعرف منيرة على طول ... قلبي محترق ... اشوفه وودي احضنه وودي اعبر عن حبي له ... بس ما اقدر ياخوي ... ما اقدر
لما كان صغير كنت اهمس في اذنه ... بس لما كبر ما اقدر ياخوي ... ما اقدر
عبدالرحمن: هذا وهم اثنينهم عيالك وتقول كذا ... زعلان لان الله راحمك انك ماتقدر تفرق بينهم ... راحمك من الذنوب اللي كنت بتجمعها لو تقدر تعبر عن شعورك على قولتك ... شلون منيرة المسكينة ... اللي تحس انها تعطي ولد ضرتها نفس ماتعطي ولدها...
عبدالعزيز: خلاص ياخوي ... تكفى ... خلاص
عبدالرحمن: طيب اذا كلكم تعبانين ليش ماتقول الحقيقة ياخوي؟؟؟
عبدالعزيز: مستحيل ... مابي احطم ولد سارة واحرق قلبه ... ولا ابي تفرق بينهم منيرة على الكبر ...
عبدالرحمن: ياخي ايش هالكلام ... شتفرق بينهم ... رجاجيل طول بعرض ... مو بضارهم شي
عبدالعزيز: لا ياخوي بينضرون ... انت ناسي ولا افكرك؟؟؟
عبدالرحمن: لا ياخوي لاتقلب المواجع ... انا ما صدقت انا نسينا
عبدالعزيز: اذا انت نسيت ياخوي فانا مانسيت ... مستحيل انسى من حرق قلب سارة ...
عبدالرحمن: الله يرحمها يارب
عبدالعزيز وهو مخنوق: الله يرحمها
في بيت احمد ابو رؤى ...
احمد: رؤى .. رؤى ... وينها هذي .... معقولة نايمة للوقت هذا ... صحيح اليوم الخميس ... بس رؤى ماتنام هالكثر ... سال الخدامة وقالت له انها ما نزلت من الصبح ... غريبة ... لاتكون مريضة او شي
صعد لها غرفتها فوق...
في غرفة رؤى ...
رؤى قاعدة وتقلب في جوالها ... هي من عادتها دايما تكتب يوميا عبارة عن اليوم اللي تمر فيه في تقويم الجوال ... يعني نفس المذكرات ... بس تعبر عنها بجمل بسيطة ... واذا ما حصلت شي تكتبه تكتب عن مزاجها في ذاك اليوم ... فاتحة التقويم على يوم الاربعاء ... وكتبت فيه ... يوم عيد ميلاد فواز ونواف ... فقدتك يمه لو كنتي امي عايشة ماكانوا سووا فيني كذا ... قفلت الجوال ودموعها على خدها
دق احمد الباب على بنته ... رؤى .. رؤى
رؤى سمعت صوت ابوها ونقزت تفتح له الباب بعد ما مسحت دموعها: هلا بابا حياك ...
احمد: سلامات حبيبتي ... تعبانة؟؟؟
رؤى: لا مافيني شي ... من قال؟؟؟
احمد: يعني ... استغربت انك لسه مانزلتي ... خفت عليك
رؤى: لا يا بابا مافيني شي ... .بس متضايقة شوي ... وطلعت حرتي في غرفتي انظف فيها
احمد: الخدامات موجودات وليش تتعبين نفسك؟؟؟
رؤى: تعرف يبه ... ما احب احد يمسك اغراضي
احمد: طالعة على امك الله يرحمها
رؤى: الله يرحمها
احمد: علامك يا رؤى؟؟؟
رؤى وهي شوي وتصيح: متضايقة شوي
احمد: ما عاش الضيق ... امري ... تدللي
رؤى: يعني اذا تقدر يا بابا ... يعني اذا تقدر ... اذا ماعليك كلافة ...
احمد: وبعدين ... قولي ايش تبين؟؟؟
رؤى: ودي اسافر يومين ... حتى لو لدبي
احمد: بس احنا في وسط الدوامات ... ماعندك اجازة..
رؤى: خلاص بابا ... انسى اني قلت لك شي
احمد: يا ربي عليك ... انا ابي اعرف الى متى بتمين كذا ... انا استفسر ... على طول زعلتي
رؤى: لا ما زعلت ... بس اذا ما تقدر مو لازم
احمد: يعني هالايام ماعندك امتحانات ؟؟؟؟
رؤى: لا
احمد: خلاص بكلم عمك عبدالعزيز يكتب لك اجازة اسبوع ونسافر
رؤى بفرح: اسبوع ... لا يا بابا مابي اكلف عليك ... يومين تكفي
احمد: انا قلت اسبوع يعني اسبوع ... ويالله نزلي اشرفي على الغدا قبل لا اغير رايي
رؤى نطت على ابوها وباسته بوسة قوية: الله لا يحرمني منك يارب
وركضت تنزل تحط الغدا
احمد: ولا منك يا نور دنيتي
بيت عبدالعزيز...
منيرة: حيا الله من جانا
عايشة: الله يحييك يامنيرة ... شخباركم ؟؟؟
منيرة: والله الحمد لله
ربى: وشلون حفلتكم؟؟؟
منيرة: حلوة ... مو ناقصها الا وجودكم
ربى: والله كان ودي ... بس بعد تعرفين الظروف... الا وين البنات؟؟؟
منيرة: في غرفهم فوق
ربى: عن اذنك ياخالتي ... بطلع اشوفهم
وهي طالعة على الدرج تواجهت مع فواز
فواز: اهلين بربى ... تو مانور البيت
ربى: منور بوجودك يا فواز ... شلونك
فواز: بخير ... وينه خالد ؟؟؟ معاكم ؟؟؟
ربى: ايه تحت
نواف من فوق: وانت من صدقك خالد يطوف هالزيارات
ربى وفواز: ههه
دخلوا فواز ونواف الصالة ولقوا مرت عمهم موجودة
نواف: حيا الله من جانا
عايشة: الله يحييكم ياعيالي ... كل سنة وانتوا طيبين ... قربوا هذي هداياكم هنا
نواف وفواز: شكرا يا عمة ما تقصرين
عايشة: هذا اقل من الواجب
فواز وهو يناظر خالد من طرف عينه: يالاخو ... وين وصلت
خالد: معاكم .. وين رحت يعني
نواف: سلامتك ... بس اشوفك سرحان
فواز: وانت الصادق عينه على الدرج
نواف: لا تخاف موصي

شوي الا وتدخل عليهم عمتهم حصة ومعها بنتها رشا اللي طاقة اللثمة ... يعني انها ماتكشف وجهها قدام الاولاد
فواز يساسر نواف: والله هذه اللي يازين الجلسة من غيرها هي وبنتها
نواف: ههه
فواز: وما يرفع لي ضغطي الا هاللثمة مع العينين المكحلة والفل ميك اب ... لو كاشفة احسن
نواف: اصلا اتوقع انها لو تكشف من غير مكياج مثل رؤى وربى ماتنشاف
فواز: أي وانت الصادق
قام خالد وقرب منهم وهو يساسرهم: والله باين انكم تحشون ... استحوا على وجيهكم وسلموا على عمتكم..
نواف: عمى بعينها يارب
فواز وخالد: ههه
قرب فواز وسلم على عمته ووراه نواف
العمة حصة: بدري كان شربتوا القهوة بعدين سلمتوا
فواز: لا ياعمة محشومة ... بس كنا تتناقش في حالة مريض وماودنا نقطع الكلام
العمة: ليش قرآن ماتبون تقطعونه؟؟؟؟
فواز: لا ياعمة يعني بننسى الموضوع بعدين
العمة: اها .. رشا سلمي على اولاد عمك
رشا بغنج: السلام عليكم ... كيف حالك يافواز؟؟؟
فواز: الحمد لله
رشا: دوم ياربي... وانت يانواف؟؟؟
نواف وهو يقلد صوتها: بخير
فواز وخالد: ههه
عصبت العمة واسكتت لما سمعت جوال نواف يدق
نواف: هلا والله بصاحبة احلى الو في الدنيا
ام محمد: أي اخذني بكلمتين انت و اخوك!!!
نواف: افا ياجدة ... زعلانة؟؟؟
ام محمد: طبعا ... من يوم الحفلة ماشفتكم ولا مريتوا علي
نواف: جدتي انا ابي امر بس هذا فواز يقول لي وين نروح عند هالعجيز
فواز وهو يصرخ: يكذب ياجدة لاتصدقينه واخذ التلفون من جدته
فواز: والله يكذب ياجدتي ... انا اقدر استغنى عنك...
ام محمد: هذا اللي فالحين فيه ... الكلام الحلو بس
فواز: ياجدتي انا اللي زعلان مو انتي!!!
ام محمد: ياكثر ماتزعل ... ايش عندك؟؟؟
فواز:ليش متصلة على نواف ومو متصلة فيني ؟؟؟
ام محمد: مدري ... جت كذا
فواز: هذا إن دل على شي دل على انك تحبين نوافو اكثر مني
ام محمد: حرام عليك ياولدي ... غلاتكم وحدة
فواز: مو اول مرة ياجدة .. اصلا من احنا صغار وانا ملاحظ انك تفضلين نواف علي
ام محمد: ياويلي عليك يايمه.. متى فرقت؟؟؟
نواف ياخذ تلفونه: ياربي حسد
اقري على نفسك ياجدة وانا بعد بقرا على نفسي من الناس الحاقدة
ام محمد: الله يقطع شركم يا عيال عبدالعزيز
نواف: يالله ياجدتي تامرينا بشي؟؟؟
ام محمد: سلامتكم ... لا تقطعون يمه
نواف: ان شاء الله
سكرت ام محمد السماعة وهي تضحك
نورة: الله يحفظهم يارب
ام محمد: امين
نورة: تصدقين يمه مع اني كنت رافضة اني ارضع عيال ضرة سارة بالبداية ورضعتهم عشان خاطرك ... بس احين احمد ربي اني سمعت كلامك ... وخصوصا ان ربي مارزقني باولاد ... يعني صاروا اخوان لبناتي
ام محمد وهي تمسح دموعها: الله يجزاه خير عبدالعزيز ... هذه فكرته
( وفي نفسها الحمد لله انه افتكرني ولا خلاني مثل باقي الناس ما اعرف ان ولد بنتي سارة عايش ... بس لو تكمل معروفك يا عبدالعزيز وتقول لي مين ولد سارة؟؟؟ )
نواف بعد ماسكر السماعة ساسر فواز: يالله جتنا من الله ... قوم نروح لجدتي
فواز: أي والله ... خلنا نفتك من خشة عمتك وبنتها
خالد: ابي اعرف بايش تساسرون
نواف: سلامتك ... نفكر نروح لجدتي نزورها مسكينة
خالد وهو يساسره: ايه انتوا روحوا وابلشوني انا
نواف: ههه
العمة حصة بلقافتها المعتادة: على ايش الضحك والمساسر ... ما تدرون انه مايجوز؟؟
نواف: هذا يا عمة لو كان شخصين في المجلس ... مو شعب قاعد قدامك
عايشة مرت عمهم تحاول تلطف الجو: قول ما شاء الله يا ولدي ... لا تنظلنا
فواز: ايه قول ماشاء الله ياخوي ... حرام يتحرولون وهم لسه شباب
نواف وخالد: ههه
رشا بدلع: اقول فواز
فواز وهو رافع حاجب: هلا
رشا: عندي يوم كنت غايبة فيه عن الجامعة ... وكان عندي امتحان ... والدكتورة مارضت تعيده لي ... عصبت عليها وقلت لها بتعيدينه غصبا عنك !!!!!
فواز: وشلون غصبا عنها؟؟؟
رشا: ههه
نواف وهو يساسر خالد: وجع
رشا: كل البنات سالوني نفس السؤال ... قلت لهم ولد خالي دكتور في المستشفى ... ويقدر يجيب لي عذر طبي ... ساعتها غصبا عن خشمها وخشم اللي جابوها بتعيده !!!!
فواز: لا والله مو غصب بتعيده
رشا: ليش!!؟؟؟
فواز: لانه انا الصراحة متخصص في طب الاطفال ... من وين بجيب العذر؟؟؟
رشا وهي تلف على نواف: خلاص محلولة ... ولد خالي الثاني مابيقصر
نواف: ما اقدر عالثقة ؟؟؟
رشا: اكيد واثقة ... معقولة عيال خالي بيردوني؟؟؟؟
نواف: وليش لا؟؟؟ بسالك انتي ليش كنتي غايبة ذاك اليوم؟؟؟
رشا: كذا ... اليوم اللي قبله ما كان لي مزاج اذاكر ... قلت أغيب وهي بتعيده ... ما ادري انها بتدقق كذا
نواف: خلاص ذنبك على جنبك ... مين قالك تتدلعين؟؟؟
رشا: لا نواف بليز لا تردني
فواز لخالد: يا شين السرج عالبقر ... ما يناسب ابد
رشا: بليز نواف ... أنا قلت لكل البنات إني بكسر خشم الدكتورة وبخليها تعيد الامتحان ... لاتفشلني قدام البنات
نواف: اولا محد قالك تتفلسفين قدام البنات ... ثانيا اذا انتي وقحة وتتكلمين مع الدكتورة كذا انا مو مستعد اني اساعدك على وقاحتك كذا
يالله فواز ... مشينا
هنا العمة والبنت طرطعوا ... ووصل حدهم من الغيظ ... بس مايبون يفشلون نفسهم اكثر من كذا
منيرة: على وين يمه؟؟؟
فواز: بنروح لجدتي نزورها ... تامرينا على شي؟؟؟
العمة حصة بقهر: وانتوا لسه تسمونها جدتي؟؟؟ خلاص السالفة مصخت!!!
نواف: وايش تبينا نناديها؟؟؟
العمة حصة: يعني .. خلاص اقطعوا علاقتهم فيها ... احنا سكتنا بالاول عشان خاطر سارة الله يرحمها... بس احين ماله داعي ... احفادها كثروا ... موناقصها انتوا؟؟؟
فواز: مين سارة؟؟؟
العمة حصة: ليش انتوا ماتعرفون؟؟؟
منيرة: خلاص حبايبي ... روحوا تلاقون جدتكم تنتظركم ...
فواز: لحظة يمه ... ابي افهم
منبرة: مالك بسوالف الحريم ؟؟؟ توكل على الله
نواف: يمه اثرتي فضولي ... انا ابي اعرف احين
العمة حصة وكانها حصلت لها فرصة تتكلم: انتوا ماتعرفون انه ام محمد تصير ام سارة مرت ابوكم الاولية؟؟؟
خالد بدهشة: ليش عمي عبدالعزيز متزوج قبل عمتي منيرة؟؟؟
حصة: كان متزوج اللي ماتتسمى سارة ... تصير بنت ام محمد ... والظاهر الله لا يبلانا كانت مريضة ... ماتجيب عيال
منيرة: من غير شماتة ياحصة ... عندنا عيال ... ويالله يا شباب ... اشوف جازت لكم سوالف الحريم ... يالله اطلعوا
فواز: ماني بطالع لين اسمع السالفة كاملة!!!
حصة: ايه ... وقعدت سارة ما تجيب عيال لمدة 3 سنوات ... وبعدها ابوك تزوج امكم منيرة ... عاد هذيك من القهر والحسرة حملت ...
فواز ونواف: حملت
خالد: طيب وين ولدها ؟؟؟
حصة: ولدت قبل لا تولدكم امكم بيوم ... وماتت هي وولدها ... ربي كان عارف انه مالها بالخلفة
هنا عايشة تكلمت: حصة ... ايش هالكلام؟؟؟ لاتتشمتين!!!
حصة: لا اتشمت ولا شي ... بس هذا الصج ... وبعدين ابوكم وداكم لاختها نورة ترضعكم عشان يجبر بخاطر ام محمد ... بس اعتقد احين خلاص ... ماله داعي الروحة والرجعة عليها
نواف وهو معصب: فواز قوم مشينا ... جدتي ( وركز على الكلمة ) تنتظرنا
وطلعوا فواز ونواف برى البيت
منيرة: الله يهداك يا حصة ... تعرفين ان عبدالعزيز ما يبي العيال يعرفون بالسالفة
حصة: الى متى ؟؟؟
منيرة: وانتي ايش حارق رزقك؟؟؟
حصة: والله اولادك يقهرون !!! بارين في هالعجوز اكثر منا ياعماتهم؟؟؟
منيرة: جدتهم ياحصة
حصة: جدتهم الله يرحمها
منيرة: يحرم من الرضاع ما يحرم من النسب يا حصة
حصة بقهر: والله انتوا الكلام ضايع معاكم ... خلني اروح بيتي احسن
عايشة في نفسها: احسن

شكلها روعه كملي ياقلبي

فوق عند البنات بغرفة ليان...
ربى: بنات بقولكم شي ... بس مستحية!!!
لينا: خير ؟؟؟
ليان وهي تقاطع ربى: طالما انها مستحية ... معناته في خاتم خطوبة ... صح؟؟؟
ربى هزت راسها وهي مستحية
لينا وليان بصرخة وحدة: واو
وقاموا ونقزوا عليها وباركوا لها
لينا: ومين سعيد الحظ؟؟؟؟
ليان: لحظة لحظة ... مو بس مين؟؟؟ ابي اعرف التفاصيل كلها بسرعة!!!
ربى: يصير صديق اخوي خالد ... طبيب اسنان بعد
ليان: طيب شسمه؟؟؟
ربى وهي بتموت من الحيا: سلطان
ليان: يا عيني ياعيني
البنات: ههه
وهم يضحكون فجأة انفتح الباب ودخلت عليهم لما
ليان: لما ... وجع ان شاء الله ... كم مرة قلت لك تطقين الباب قبل لاتدخلين؟؟؟
لما: عندي لكم خبر بمليون ريال ... ما في وقت اطق الباب
لينا: خير لمو ... ايش عندك؟؟؟؟
وقالت لما السالفة كلها للبنات وهم فاتحين عيونهم من الصدمة والدهشة
( هذا وانتوا ما عرفتوا شي وانتوا مندهشين ... شلون لو عرفتوا انا واحد من اخوانكم ولد سارة )
لينا: يا حرام كسرت خاطري سارة...
ليان: السالفة مو داخلة مزاجي ... ننزل نسال امي احسن
البنات: يالله
نزلوا تحت وما لقوا احد
لينا: وينهم
لما: ايه صح ... نسيت اقولكم عمتي عايشة راحت بيتها ... وتقولك ياربى متى ماتبين ترجعين دقي على خالد او السواق يمرك ... وامي دخلت حجرتها وقفلت على نفسها الباب
ليان وهي تضرب لما على راسها: صح النوم ... كان قلتي من اول ؟؟؟
في بيت ام محمد
ام محمد وهي تمسح دموعها: ايش تبون تعرفون ياعيال؟؟؟
نواف: ليش كنتوا ساكتين طول هالسنين ؟؟؟ ليش ما قلتوا لنا؟؟؟
ام محمد: ايش الفايدة؟؟؟ هذا انتوا عرفتوا ايش صار؟؟؟
فواز: ولو يا جدة ... لازم نعرف
ام محمد: هذه كانت رغبة ابوكم ... روحوا واسألوه ليش ماقالكم؟؟؟
دخل عبدالعزيز البيت وهو مرهق وتعبان ... اليوم الدوام كان طويل ومتعب ...
دخل مالقى احد في الصالة ... صعد فوق على طول
دخل غرفته وشاف منيرة قاعدة ودموعها على خدها
عبدالعزيز في نفسه: ياربي بتفتح لي سيرة ولدها اللي مو راضية تقتنع اني مستحيل بقولها
عبدالعزيز: السلام عليكم
منيرة وهي تمسح دموعها: وعليكم السلام ... اجهز لك العشا
عبدالعزيز: يا ليت والله ... اليوم هلكت في المستشفى
منيرة: سلامتك ... دقايق ويكون العشا جاهز
وهي طالعة قالت في نفسها: لازم اقوله وأهيئ نفسيته لأسئلة العيال اللي مابتخلص ...
منيرة: عبدالعزيز
عبدالعزيز: سمي
.
.
.
.
عصب عبدالعزيز وحس الغضب يطلع من عيونه ... هذه انسانة مريضة ...
وشلون تقول للعيال ... لا وبالطريقة هذه ... تشوه في سمعة سارة
منيرة في نفسها: هذا اللي همك في الموضوع كله ... سارة
منيرة: حاولت اوقفها يا عبدالعزيز ... بس ماقدرت ... هي بدت تتكلم والعيال فتحوا اذانهم
عبدالعزيز: يصير خير
منيرة: بروح احضر لك العشا
عبدالعزيز: مابي شي ... سديتي نفسي
منيرة: على راحتك
وفي نفسها تقول مدري متى بترحمني ياعبدالعزيز ... تحملني غلطات الناس واسكت ... ومو عاجبتك بعد ... متى بيحن قلبك علي؟؟؟؟
ثاني يوم الغدا ما رجع عبدالعزيز للبيت ...
والعيال عارفين انه يتهرب من أسئلتهم ... لانه امهم مارضت تقول لهم شي ... وقالت اسألوا ابوكم
وعالعشا دخل البيت وعلى غرفته على طول ... لحقته منيرة
منيرة: ما ودك تتعشى؟؟؟
عبدالعزيز: لا ... مالي نفس
منبرة: عبدالعزيز ... العيال بدوا يشكون ... انت كذا تلفت انتباهم للموضوع
عبدالعزيز: ايش تبيني اقولهم؟؟؟
منيرة: اجلس وفهمهم السالفة اللي مفهمها للناس وينتهي الموضوع ... لأنهم كذا ماراح يسكتون ... بس اذا فهمتهم بيسكتون ويمكن بعد فترة ينسون!!!!
عبدالعزيز: من رايك؟؟؟
منيرة وهي تحط يدها على كتفه: توكل على الله وانزل ... السفرة من غيرك ما تسوى
نزلوا للعشا ولقوا العيال كلهم متجمعين على الطاولة ينتظرون ابوهم وامهم ... وكلهم في جعبتهم اسئلة كثيرة ينتظرون الإجابة عليها ...
واول ماجلس ابوهم على الطاولة وهم هات يا اسئلة ... نشفوا ريقه مسكين ...
وفي نص العش عصب عبدالعزيز: خلاص
زهقتوني ... كل هذه اسئلة ... عرفتوا اللي تبونه ... ايش تبون بعد ؟؟؟
لما: اخر سؤال يا بابا ؟؟؟ ايش سميتوا اخوي اللي مات؟؟؟
عبدالعزيز: سميناه عبدالرحمن
لما: واو على عمي
ليان: طيب بابا ايش ....
عبدالعزيز: شوفوا ... وكلكم موجودين ... ما بي اسمع سيرة الموضوع هذا مرة ثانية ... واللي بفتح فمه ياويله
وبعصبية: مفهوم
كلهم: مفهوم
عبدالعزيز وهو قايم من السفرة: حتى ماتخلون الواحد يتهنى باللقمة اللي ياكلها
ناظروا كلهم في بعض وهم متعجبين من عصبية ابوهم اللي ماعرفوا يفسرون سببها
( دمعت عين منيرة وقالت في نفسها ... كنت اتمنى انك بأسئلة العيال يزل لسانك واعرف اجابة أهم سؤال بحياتي ... بس للأسف ... تعرف تطلع منها ياعبدالعزيز كالعادة)
____________________________________
بعد يومين...
دخلت لينا البيت وهي راجعة من الجامعة ومعها رؤى بنت خالتها
( نسيت اقولكم ان الثنتين يدرسون بكلية العلوم الطبية التطبيقية بجامعة الملك فيصل ... علاج طبيعي ... سنة ثانية )
دخلوا البنات وعلى طول حضنت رؤى خالتها ...
منيرة: وخري عني بس ... انا زعلانة ...
رؤى: افا ياخالتي ... ما عاش من زعلك !!!
منيرة: كذا تقطعين ... كم يوم وانتي ماتزورينا
رؤى: تعرفين يا خالتي الجامعة وحوستها ... وزيادة عليه عزيمة عمي ... لازم اكون معاهم
منيرة: الله يرضى عليك يابنيتي ... واصلة مع كل الناس
رؤى: انتوا ناسي ياخالتي ... اذا ما وصلتكم اوصل مين
عبدالعزيز: تسلم ايد ربتك يابنتي
يالله حطوا لنا الغدا ... واحسبوا حساب تركي ... على وصول
على الغدا ...
ليان: سمعتي اخر خبر يارؤى
رؤى: خير ان شاء الله
ليان: ربى انخطبت
رفع نواف راسه وعلى طول نزلها
رؤى: ايه ... فالت لي لينا اليوم ... مبروك يا عمي خطوبة ربى
عبدالعزيز: الله يبارك فيك يابنيتي ... عقبالك
فواز: ومبن الخبل اللي بياخذك ؟؟؟ لا تصدقين عمرك؟؟
نزلت رؤى راسها ... وعلى طول فسرتها لانها ما عندها أم
عبدالعزيز: فواز ... يا زينك ساكت
فواز: شكرا يبه
عبدالعزيز بنظرة سكتته ... نواف
نواف: سم يبه ... اذا بتهزئ انا ماتكلمت لسه ... يعني ناوي اتكلم ... بس سبقتني بالتهزيء يبه
الكل: ههه ومعاهم رؤى ضحكت على هبال ولد خالتها
ليان: ماما ... انا ابي اعرف انتي على ايش متنسية في هالاثنين؟؟؟
منيرة بخبث: اسالوا ابوكم ؟؟؟ هو أدرى ؟؟؟؟
عبدالعزيز بنظرة لمنيرة يقولها لها فاهم حركاتك لاتحاولين : ...............
فيصل ببراءة: انا اعرف امي كانت متنسية على ايش في ليان؟؟؟
الكل: على ايش؟؟؟
فيصل: على أم خماس تحب الهذرة والسوالف
الكل: ههه
ليان: سخيف
تركي: والله انت مو داري وين الله حاطك
فيصل: ليش ياعمي؟؟؟
فواز: ما عليك منهم ... انت العسل في هالبيت
لما وهي مادة بوزها: وانا؟؟؟؟
فواز: انت نور البيت كله
عبدالعزيز: احين ممكن تخلوني اتكلم ؟؟؟
نواف: سم يبه ... آمر ... تدلل ...
عبدالعزبز: اكتب إجازة لرؤى لمدة اسبوع ... ابوها مكلمني من يومين ... بس انا تخصصي مخ واعصاب اطفال ... ايش راح اكتب في التقرير ... انت انسب شي ... عظام .. اكتب طاحت تكسرت أي شي
نواف: لا يبه انا مايصير
عبدالعزيز: وليش ان شاء الله
نواف: رؤى يناسبها تخصص فواز ... طب اطفال
فواز: ههه وانت الصادق
رؤى: انعم الله عليكم ...
منيرة: كملي غداك يابنتي وما عليك من كلامهم
رؤى: الحمد لله شبعت
تركي: طيب قعدي وافتحي نفسنا على الأكل ... حتى لو شبعانة
رؤى: شكرا عمي تركي ... وقعدت وهي مغصوبة
منيرة: ايش عندك يمه تبين الإجازة ؟؟؟
رؤى: ابوي يبي يسافر يومين ... وبروح معاه
نواف: احين حددي ... يومين ولا اسبوع ؟؟؟ ايش اكتب بالتقرير ؟؟؟ تعرفين عاد انا دكتور دقيق في كتابة التقارير ... ما اكتب تقارير بطالة
فواز: اقول .. لايكثر بس ... اسكت لا اطلع فضايحك
رؤى: حيلكم بينكم يارب
الكل: ههه
ماعدا لينا اللي تفكر ببنت خالتها وتقول في نفسها انا عارفة ليش بتسافرين يارؤى ... مدري متى بتطلعين من هالعقدة اللي محاوطتك ...
فيصل: رؤى سمعتي آخر خبر؟؟؟
رؤى وهي تضحك: كل اللي ماجيتكم فيه يومين ... كل هذه اخبار؟؟؟
فيصل: طلع عندنا اخو كبر نواف وفواز!!!
عبدالعزيزوهو يرمي الملعقة: الحمد لله
قام وترك لهم السفرة
تركي وهو يضرب فيصل على راسه: انت ماتعرف تسكت ... خل ابوك يخلص غداه وقول اللي تبي
فواز: وانت الصادق ياعمي ... مدري على مين طالع ؟؟؟
نواف: مايبيلها ... اكيد ليان ... الظاهر امي من مشجعين ام خماس
ليان: سخيف
رؤى: طيب قولوا لي السالفة ... شوقتوني
وقالوا لها كل السالفة
ليان: عاد تخيلي يارؤى ان عبدالرحمن عاش؟؟؟ كان صار عندنا علة ثالثة؟؟؟
رؤى: ليته عايش ... على الاقل اقدر اطلع حرة اخوانه فيه
نواف: وليش حاطة في خاطرك .؟؟؟؟
رؤى: لا انا ساكتة عشان خاطر خالتي ... بس هو مابيكون ولد خالتي... بقول له وأسب فيه على كيفي
غصت منيرة في لقمتها وقامت من السفرة
الكل طالع في بعض وهم موفاهمين شي
فوق في غرفة لينا
رؤى: ايش فيك يا لينا ؟؟؟ احسك مو طبيعية ؟؟؟
لينا: يعني ماتعرفين ليش؟؟؟
رؤى ببراءة: لا
لينا: ليش بتسافرين ؟؟؟
رؤى: ابوي بيس .....
لينا: هالكلام تقولينه لامي او ابوك او أي احد غيري ... مو لي انا !!!!
رؤى: صدقيني يا لينا .... السفرة جت فجأة كذا ... يعني مو مخطط لها
لينا: وليش هالأسبوع بالذات ؟؟؟؟
نزلت رؤى راسها وسكتت ...
لينا: ليش سكتي ؟؟؟ ما تتكلمين ؟؟؟
رؤى: ........................
لينا: انا عارفة انك تبين تسافرين لأنك ما تبين تحضرين حفلة المتفوقين في الجامعة
امتلت عين رؤى بالدموع ....
مسكت لينا يد رؤى: رؤى .. حبيبتي ... قلبي ... متى بتفهمين ان فقدانك لأمك مو نهاية العالم ؟؟؟ الى متى وانتي حاسة انك ضايعة بدون امك ... أنا ما اقول انك مو فاقدتها ... هذا اكيد ... بس بعد لازم تتخطين الأزمة
رؤى وهي تبكي: انتي مو حاسة فيني يا لينا ... كل البنات يوم الثلاثاء بيجون امهاتهم وهم فرحانين بثمرة تربيتهم ... يشوفون بناتهم متفوقات وهم فخورين فيهم ... الا أنا ... الا انا ... الا انا يا لينا.... تدرين بايش أفكر ... اني اهمل دراستي الكورس الجاي وانزل معدلي ... وافتك من حفلات المتفوقين هذه
لينا وهي تضم رؤى وتمسح على شعرها: خلاص يارؤى كافي ... قطعتي قلبي حرام عليك
رؤى: لينا تكفين ... مابي خالتي تعرف
لينا: مشكلتي اني طيبة وبسكت
رؤى: عارفة انك تحترمين رغبتي ... مو مثل ليانو الدبة ... كل شي تخره لخالتي
لينا: ههه
حرام عليك ... هي تموت فيك ... وتعلم امي من باب الخوف عليك
رؤى: عارفة وربي عارفة ... يالله خلينا نطل على فيصل ولما ... اكثر ناس بيوحشوني هالاسبوع
لينا وهي تضربها على راسها: صار لك ساعة ملوعة كبدي بمأساة حياتك وآخر شي هالاباليس بيوحشونك وانا لا
رؤى: ههه
( فرحت لينا في داخلها انها قدرت تغير مود رؤى شوي )
يا ترى هل يبقى سر عبدالعزيز مدفون؟؟؟
الجزء الثالث...
سافرت رؤى مع ابوها مثل ما خططت ولا حضرت حفلة المتفوقين ...
وزعلت خالتها منيرة كثير لما عرفت بالحفلة ... وعورها قلبها أكثر يوم الحفلة لما نادوا اسم رؤى وهي ما كانت موجودة ... ودعت في صدرها الله يرزقك يا رؤى باللي ينسيك ويعوضك فقدان امك ...
بعد يومين في بيت عبدالعزيز ...
دخل عبدالعزيز الصالة: السلام عليكم
منيرة: وعليكم السلام
عبدالعزيز: وين العيال ؟؟؟ مالهم حس؟؟
منيرة: فواز ونواف مطلعين خواتهم من الصبح ولا رجعوا
عبدالعزيز: زين يسوون ... الحمد لله بدوا يعقلون ويحنون على خواتهم شوي
منيرة: حرام عليك ... والله انهم يحبونهم
عبدالعزيز: بعد ... لازم يعطونهم وجه شوي ... هم بنات مالهم الا اخوانهم
منيرة: الله يخليهم لبعض ... ولا يحرمنا منك يارب
عبدالعزيز: امين
وفي نفسه يقول عسى عيني ما تبكيك ياولدي... ( طبعا احنا عارفين انه ولد سارة )
دقايق الا يسمعون صراخ وازعاج عند الباب ...
الكل: السلام عليكم
عبدالعزيز ومنيرة: وعليكم السلام
فواز: اوبس اوبس اوبس ... شكلنا دخلنا في وقت غلط
نواف: شكله ... خلنا نرجع نكمل طلعتنا احسن لنا
لما: ليش ... ايش صاير؟؟؟
منيرة: شفتوا شلون ؟؟؟ من كثر ماتخربطون بالحكي صرتوا ماتعرفون متى تتكلمون ومتى تسكتون!!!!!!
فواز ونواف: ههه
فواز: يمه عادي ... كلنا ندري انك تحبين ابوي
نواف: وابوي يحبك ... بس لو الله يفكنا من الدكتورة المزيونة!!!
عبدالعزيز يناظر في ولده بنص عين وهو يبتسم
منيرة: لا وتوزع ابتسامات ... شكل الموضوع جايز لك؟؟؟
عبدالعزيز: ان الله جميل يحب الجمال
فواز: عاد يبه اذا تبي المزايين هالدكتورة مو ذاك الزود؟؟؟
نواف: أي والله يبه ... عندي لك كم وحدة ... إنما ايه ؟؟
عبدالعزيز وهو يضحك: شفتي يا منيرة عيالك ؟؟؟
منيرة: والله اذا هذا الابو ماينشره عليهم هم ... قاعد ومبسوط على السوالف ... خلني اقوم احط الغدا احسن لي
لينا وليان: اخذينا معاك
عبدالعزيز وهو يلتفت لاولاده: خلكم من الخرابيط وقولوا لي؟؟
فواز: آمر يبه
عبدالعزيز: انتوا ايش مهببين في المستشفى؟؟؟
فواز: خير يبه ؟؟؟ ما سوينا شي؟؟
عبدالعزيز: ابد .. ماسويتوا شي؟؟؟ نواف اليوم مو موعد مناوبتك؟؟؟
نواف: والله يبه بكيفهم ... انا قايل لهم مايحطوني مناوبة الا مع فواز ... بس هم مايسمعون الكلام
عبدالعزيز: تقوم تسفهم ... الرجال يضرب اخماس باسداس في المستشفى ... كسر خاطري ... مداوم شفتين ورا بعض ... وانت تفتر في الاسواق
نواف: مو بضايع حقه يبه ... زاد يوم في رصيد اجازاته
عبدالعزبز: شين وقواة عين يا نواف ؟؟؟؟
نواف: انا ما كنت ناوي اسحب عليه ... بس الصبح لما سمعت البنات يحنون على فواز واتفقوا عالطلعة اشتهيت اطلع معهم
عبدالعزيز: الحكي ضايع معك ... نحول على فواز
فواز: يبه انا اليوم اجازة ... وماعندي مناوبة ... ماسويت شي!!!
عبدالعزيز: ايش كان يبي الدكتور عادل يومين يدورك؟؟؟
فواز: سلامتك يبه ... يكتب لي دوا الربو
عبدالعزيز: ليش رجعت لك الحالات؟؟؟
فواز: يعني مو شي يذكر ... من احس اني بديت اختنق ... استعمل البخاخ ... واتحسن على طول
عبدالعزيز: أي وانا ابوك خل دواك دايما في جيبك ... لاتنساه!!!
فواز: تامر
لما وفيصل وهم جايين ركض ومع بعض: يالله غدا
فيصل: انا قلت اول
لما: لا انا اول
نواف: بضرب روسكم في بعض خلصونا
وراحوا كلهم يتغدون ...
وعلى الغدا ... خبر عبدالعزيز عياله ان يوم الاثنين ملكة ربى ينت عمهم ولازم كلهم يكونون موجودين ... وأمر البنات يروحون لبنت عمهم يشوفون ايش ناقصها ...
عبدالعزيز:منيرة ... لا تنسين تقولين لرؤى ... عبدالرحمن حرص على حضورها
منيرة: تامر
يوم الاثنين ... يوم ملكة ربى
رجعت رؤى من الجامعة على البيت ... وخذت اغراضها للحفلة ... وخذت الهدايا اللي شرتهم من دبي لبيت خالتها ... طبعا ما نست هدية ربى ...
احمد: رايحة بيت خالتك عالغدا
رؤى: بعد اذنك بابا
احمد: اذنك معك ... اصلا انا عمتك بتجي تتغدى معي
رؤى: سلم لي عليها كثير ... كان نفسي اشوفها ... بس انا وعدت خالتي منيرة ... ومواعدة البنات نروح لربى من بدري
احمد: الله معك ... خذي هالفلوس خليها معك
رؤى: خيرك سابق يبه ... عندي ماتقصر
احمد: خذي يابنتي ... انا مالي غيرك ... اصرفي على كيفك ولا تقصرين على عمرك بشي ..
باست رؤى راس ابوها: شكرا يا أحلى ابو في الدنيا
وطلعت متجهة لبيت خالتها
دخلت رؤى بيت خالتها وهي شايلة الأكياس ... مسكينة تروح وترجع وهي تدخل الأغراض ... وجمعتهم كلها عند الباب ...
دقايق ودخلوا فواز ونواف ... السلام عليكم
رؤى: وعليكم السلام
نواف: الحمد لله على السلامة
رؤى: الله يسلمك
فواز: شوف يا نواف ... كل هالهدايا وهي رايحة دبي ... كانها مو شايفة خير ... اذا راحت اوربا ايش بتسوي؟؟؟
نواف: وانت الصادق... اتوقع طيارة خاصة بس لشحن الاغراض
سفهتهم رؤى وصعدت فوق عند البنات ...
فواز: شوف ... اسفهتنا !!!!
نواف: دلع
فواز: خاطري اكفخها
نواف: تدري صار لنا اسبوع مارفعنا ضغطها ... ايش رايك بمقلب محترم؟؟؟
فواز: ودي الصراحة ... عندك فكرة ؟؟؟
نواف: اسمع ....
فوق في غرفة لينا...
لينا ترتب ملابسها واغراضها لحفلة ربى ... ورؤى تحوس في جوالها ... وليان تسولف على راسهم كالعادة ...
ليان: انا ابي اعرف انتي ايش تسوين بالجوال كل هالوقت؟؟؟
رؤى: اكتب اهم احداث الاسبوع ... في دبي ماكان عندي وقت
ليان: طيب ليش ماتسوين لك دفتر مذكرات ؟؟؟
رؤى: من زينها من احداث عشان اكتبها في دفتر
ليان: طيب ليش تكتبينها بالجوال؟؟؟
رؤى: انا اكتب عبارة او عبارتين بالكثير تعبر عن مزاجي في اليوم ... ومتى مافضيت اقعد واقراهم ... واضحك مع المفرح ... واصيح مع المحزن
ليان: تحبين عوار القلب ... طيب واذا غيرتي جوالك؟؟؟
رؤى: عادي ... افتح صفحات جديدة في حياتي وانسى اللي فات
ليان: تفكير غريب الصراحة
لينا: خلكم من المناقشات اللي مالها داعي وقولوا لي أي فستان البس؟؟؟
رؤى: وليش هالحوسة ... أي فستان لبستي زين ... كل فساتينك حلوة
لينا: لا ابي الأحلى!!!!
ليان: حبيبتي ... مو بشايفك لا تكشخين بزيادة ... خلي الكشخة ليوم ملكتك
لينا: سخيفة ... ماني برادة عليك ... قولي لي رؤى ايش البس؟؟؟
رؤى: البسي هذا ... يالله انا زهقت من الجلسة هنا ... بروح اشوف فيصل ولما وينهم ... وحشوني !!!
ليان: بروح اخذ طلة على اغراضي والحقك
لينا: وانا اخلص ووراكم على طول
نزلت رؤى ولقت لما تطالع تلفزيون
رؤى: لما حبيبتي
لما: ......................
رؤى: لما
لما: ...................
رؤى: اوف ... كل هذا اندماج؟؟؟ خلني اطلع ادور فيصل احسن لي...
طلعت رؤى بالحديقة تدور على فيصل وما لقته
ياربي وين راح هذا ... الجو روعة خلني اتمشى شوي على مايجون البنات ... وقعدت تتمشى في الحديقة ... شوي وتسمع نواف يناديها من باب المجلس الخارجي ... راحت صوبه ... شكله كان مخترع ولونه مخطوف..
رؤى: خير نواف ... صاير شي؟؟؟
نواف: رؤى جيتي بوقتك ... فواز جته الحالة وما معه الدوا ... يا ليت تركضين تجيبينه من الغرفة ... اخاف اتركه بروحه
رؤى: وين احصله؟؟؟
نواف: اكيد بغرفته ... مدري وين حاطه ... اركضي لسه واقفة تطالعين فيني
ركضت رؤى لغرفة الأولاد ودخلت بسرعة واول مادخلت شافت الدوا على الطاولة خذته وركض على المجلس الخارجي وهي تدعي في نفسها ان الله يستر ...
وصلت المجلس الخارجي ودخلت على طول
رؤى: نواف هذا الدوا ... لفت ما لقت احد ... دخلت المجلس اكثر ... ما في احد .. ياربي وينهم ؟؟؟ معقولة زادت عليه الحالة ووداه المستشفى ؟؟؟؟
شوي الا تسمع صوت باب المجلس ينقفل من برا ...
التفتت بسرعة الا وتشوف قطوة ( بسة ) واقفة عند الباب ... وباب المجلس مقفول ... وهي موتها وهالكائن ... تخاف منه حدها ... صرخت صرخة ... والقطوة كانت اكثر خوف منها ... محبوسة وقدامها وحدة تصارخ ... قامت تتخبط يمين ويسار وتصفق بالجدران ... ومع كل حركة منها تصرخ رؤى بأقوى ماعندها ...
لينا وهي نازلة الدرج شافت لما منسدحة في الصالة تتفرج على المسلسل ...
لينا: لما وين رؤى ؟؟؟
لما: ....................
لينا: لم ا ؟؟؟
ليان: لاتتعبين نفسك وتسألين ... صار لي ساعة أسأل ولا ردت علي ... ولا لقيت رؤى ... وفيصل في المطبخ يقول ما شافها ...
لينا: غريبة ... وين راحت ؟؟؟
ليان: خلينا نشوفها يمكن طلعت للحديقة !!!
لينا: يالله ...
طلعوا الحديقة وشافوا فواز ونواف واقفين عند باب المجلس الخارجي ويضحكون ... ليان: نواف ... فواز ... ماشفتوا رؤى؟؟؟
نواف يساسر فواز: نقولهم ولا نضيعهم ؟؟؟
فواز: لا حرام صار لها 10 دقايق داخل يكفي
نواف: من رايك ؟؟؟
فواز: مايبيلها ... خلاص احنا نمزح مانبي نذبح البنت !!!
تعالوا هي هنا في المجلس
لينا: ايش تسوي ؟؟؟
نواف: ما ندري ... ادخلوا وشوفوا؟؟
فتحت لينا الباب وشافت القطوة في وجهها صرخت صرخة من قمة راسها ... والقطوة من الخوف ما صدقت شافت لها مخرج وعلى طول طلعت ...
لينا: شالسالفة ؟؟؟
فواز ونواف: ههه
ليان: معروفة يالينا ما يحتاج تسألين ... اكيد مخرعينها المسكينة
وركضوا لينا وليان لداخل المجلس ... ووراهم نواف وفواز ... وشافوا رؤى قاعدة في زاوية في المجلس ومتكورة على نفسها وتصيح بهستيريا ... وشكلها يقطع القلب ... ضامة رجلينها بيدينها ... ودموعها على خدها شلال ...
هنا تسمروا فواز ونواف بأول المجلس ... وخافوا عليها ...
لينا وهي تضمها: رؤى ... حبيبتي ... لا تخافين ... احنا هنا
رؤى رفعت راسها وبهمس: معك جوالك ؟؟؟
لينا: هذا هو ... ادق عليك ما تردين !!!
خذت رؤى الجوال منها بقوة ودقت على سواقها: تعال بسرعة وقفلت السماعة بوجهه ورمت الجوال
رؤى: لينا ... جيبي عبايتي وشنطتي وما بي احد يدري
لينا: بس ......
رؤى بعصبية: من غير بس .... بسرعة جيبيها وانتي ساكتة
لينا: طيب ... وركضت داخل
ضمتها ليان وهي تهديها
دقايق الا وجوال رؤى يرن بيد لينا وهي داخلة ... خذته منها بسرعة وقفلت بوجه السواق ... لبست عبايتها بسرعة ....
وهي طالعة شافت فواز ونواف واقفين وهم مصدومين ... ما اتوقعوا انها تخاف للدرجة هذه ..
رؤى: اكره كم
الله ياخذكم ... الله ياخذكم ... الله ياخذكم
وطلعت من بيت خالتها وهي تركض بعد ما غطت وجهها
ليان: ارتحتوا ... انبسطتوا ؟؟؟
فواز: مابي اسمع منك ولا كلمة
ليان: لا بتسمعون ... مو على كيفكم ... سكتنا لكم وكل مالكم تتمادون ... بس هالمرة ما راح اسكت ... وبدخل احين واعلم امي وابوي
لينا: ليان
بس ليان ما وقفت وركضت للصالة
لينا: ليش سويوتوا كذا؟؟؟
نواف: لينا ... احنا نمزح ... ماتوقعنا انها تخاف للدرجة هذه ؟؟؟
لينا: اليهود مايسون كذا
وتركتهم وط

والله شكلها ماعجبتكم بس شسوي بكملها
الجزء الخامس ...
في المستشفى...
فتحت عينها واستوعبت انها في المستشفى ... بلعت ريقها وحست ان حلقها ناشف ... لفت وجهها شافته قاعد يناظر فيها وهو مبتسم ... حاولت تعدل جلستها ...
فواز: ارتاحي وخليك على وضعك
حطت يدها على حجابها وتأكدت ان شعرها مو باين
فواز بابتسامة: يعني لو في شي باين ... بقعد واناظر فيك ؟؟؟؟
رؤى وهي لافة وجهها الجهة الثانية: كل شي اتوقعه منك ومن اخوك
فواز: افا ... للدرجة هذه حاقدة علينا ؟؟؟
رؤى: ولك عين تسأل ؟؟
فواز: ما توقعتك كذا يا بنت الخالة
رؤى: تعرف ايش اعظم بلاء ابتلاني فيه ربي؟؟؟؟
فواز: ........................
رؤى: انك انت ونواف عيال خالتي ... ليتكم ما كنتوا عيال خالتي ... اكرهههكم ... اكرهههكم
فواز وهو منصدم:..................................
رؤى: اطلع برا ... مابي اشوف وجهك لا انت ولا اخوك
فواز وكانه تذكر افكاره الشيطانة: والله مستشفى ابوي وتطرديني ؟؟؟\
رؤى: نعم
فواز: ايه ... مستشفى ابوي ولي الحق ادخل أي غرفة من غير اذن
رؤى: فواز ... اطلع دام النفس عليك طيبة
فواز: واذا ما طلعت ؟؟؟
رؤى: بت
قطع عليهم صوت الباب ...
احمد بلهفة: صحيتي !!!
رؤى: هلا بابا
احمد: الحمد لله على سلامتك حبيبتي
رؤى: الله يسلمك
احمد: خرعتيني عليك ... قلبي شوي ويوقف
رؤى: سلامة قلبك ..
دق الباب ودخل عبدالعزيز ...
عبدالعزيز: هلا بست البنات واحلاهم واجملهم واطيبهم واعقلهم و...
احمد: قول لا اله الا الله ... بتحسد بنتي
رؤى في نفسها: على ايش يحسدوني يا بابا ... على الهم اللي عايشة فيه ... بس ما اقول الا الحمد لله على كل حال ... وضعي احسن من غيري مليون مرة
عبدالعزيز: افا ... انا احسد بنتي ... الظاهر ما تعرف غلاة رؤى عندي ... يالله شدي حيلك بس يخلص المغذي على بيتنا على طول
رؤى: لا عمي شكرا ... انا تعبانة وابي ارتاح
عبدالعزيز: لانك تعبانة لازم تروحين بيتنا ... تبين خالتك تذبحني ؟؟؟ تنومني اليوم بالشارع
الكل: ههه
رؤى: عمي خلها مرة ثانية ... واذا على خالتي بتصل فيها وبعتذر منها
عبدالعزيز: الظاهر انك زعلانة يارؤى مو تعبانة؟؟؟
رؤى: ......................
عبدالعزيز: شوفي ... اللي صار امس ابد ما عجبني ... واعتقد انك سمعتي باللي صار ... اذا حاسة اني لسه ما اخذت حقك ... انا حاضر باللي تامرين فيه ... لو تبيني اطردهم من البيت طردتهم
فواز وهو فاتح عيونه: يبه
عبدالعزيز: اسكت انت ولا كلمة ... انت واخوك اخر من يتكلم
رؤى: جزاك الله خير يا عمي ... ما يحتاج الموضوع لكل هذا ... انا بس وقتها شلت في خاطري بس بعدين نسيت
عبدالعزيز: سلمت ايد ربتك يا بنتي ... طول عمرك طيبة وقلبك كبير ... بس لاتلعبين علي بهالكلمتين ... من هنا على بيتنا على طول ... وانا اللي بوصلك ... ايش تبين بعد؟؟؟
رؤى: الله لا يحرمني منك ياعمي
احمد: ياسلام ... وانا عادي تنحرمين مني!!!!
رؤى: الله لا يجيب هاليوم ... يا عل عيني ماتبكيك
احمد: الله يحفظك ويخليك
عبدالعزيز: يالله المغذي خلص ... بنطلع وانتي جهزي نفسك
رؤى: بس يا عمي الجامعة
عبدالعزيز: بكتب لك اجازة لا تحاتين
رؤى: لا يا عمي مابي اغيب ... مابي المحاضرات تطوفني .. اذا نمت وارتحت بصير احسن
عبدالعزيز: خلاص روحي بيتكم مع ابوك وحطي اغراضك وعلى بيتنا ... تروحين وترجعين مع لينا ماعندنا مشاكل ... بس اهم شي تقعدين تحت عين خالتك اسبوع لين ترجع صحتك
رؤى: الله يعيني يا عمي ... بنبط من الاكل
احمد: مع اني يصعب علي فراقك ... بس خليها تستلمك ... دامك ما تسمعين كلامي
الكل: ههه
طلعت رؤى من المستشفى وراحت بيتها ووعدت عمها انها في الليل تكون عندهم
بيت عبدالعزيز ...
عالساعة 9 دخلوا عبدالعزيز واولاده البيت ... والكل موجود في الصالة ...
عبدالعزيز: السلام عليكم
الكل وقف وراح يسلم على ابوه
نواف: يا هو كرفنا اليوم كرف ... ابي الفراش بس
عبدالعزيز: اصلا انت لو طول اليوم على الفراش بعد بتقول ابي الفراش
الكل: ههه
عبدالعزيز: كلمتوا رؤى ؟؟
ليان: ايه ... قالت نص ساعة وهي هنا
نواف: الله يعينا
عبدالعزيز بنظرة: شوف يا نواف ... ان فتحت فمك بكلمة لا تلوم الا نفسك فاهم؟؟؟
نواف: فاهم يبه فاهم ... لا تحاتي
عبدالعزيز: وانت يافواز
فواز: ما تكلمت ؟؟؟
عبدالعزيز: ولا ابيك تتكلم ... البنت بتقعد عندنا اسبوع ان ضيقتوا عليها بكلمة وحدة يا ويلكم
ليان: لا تحاتي بابا ... بنقلك الاخبار اول باول
نواف وهو يشد شعرها: انتي خلك في مذاكرتك احسن
ليان: أي أي أي ... اترك شعري يالمتوحش
منيرة: عبدالعزيز ابيك بغرفتنا شوي ... ممكن؟؟؟
عبدالعزيز: طبعا ... ما يبيلها سؤال انتي تامرين
نواف: يا عيني يا عيني ... والله مو مخربنا الا امي وابوي ...
وقعد يغني ... يا عيني عالحب
كمل فواز: وسيرة الحب
نواف: وفوزية الدريع
لينا: ايش دخلها بالموضوع؟؟؟
نواف: قال سيرة الحب ... مو هذا اسم برنامجها؟؟؟
عبدالعزيز: من كثر ما تبي تتكلم ما تعرف ايش تقول ... تدخل المواضيع في بعض ... قومي معاي يا منيرة
فواز: على طاري المذاكرة ... لينا شخبار درجاتك ؟؟؟ هالسنة ثانوية عامة
ليان: من غير ما تسال... طبعا فل مارك ... ان شاء الله اول مقعد في كلية الطب لي انا ليان عبدالعزيز ال.......
نواف: مالت عليك بس ... ايش لك بالطب؟؟؟ صدعة وعوار راس
لينا: ليش تحطم البنت ... اذا فيها شدة ليش لا
نواف: انا ما قلت شي ... بس الصراحة مشوار
فواز: أي والله .. انا من راي نواف ... ادخلي كلية العلوم الطبية احسن لك ... واذا خلصتي وحسيتي ان فيك طاقة ... اخذي الماجستير والدكتوراة
ليان: بس انا حابة الطب
نواف: اللي يريحك بس مو تقولين اخواني ما نصحوني
ليان: لا تخافون ... ماني بقايلة
في غرفة عبدالعزيز ...
منيرة: ايش قلت افاتحها اليوم بالموضوع ؟؟؟
عبدالعزيز ببرود: طبعا لا
منيرة: ليش؟؟؟
عبدالعزيز: ببساطة لاني مو موافق
منيرة: ليش ايش ناقصها رؤى؟؟؟
عبدالعزيز: مو ناقصها شي ... ولا في احسن منها ... بس ما بي عيالي ينجبرون في زواجاتهم
منيرة: ومن قال اني جبرته؟؟؟
عبدالعزيز: اللي اشوفه انهم ما يطيقون بعض ... فما راح اصدق ان نواف ببساطة يجي ويقولك ابي اتزوج رؤى !!!
منيرة: لا هو ما قال ... انا قلت لهم سالفتها ونواف قال ابيها
عبدالعزيز بعصبية: يعني اجبرتيهم ... شوفي يامنيرة انا عيالي ما يتزوجون غصب
منيرة: والله ما اجبرته ... هو بروحه قال
عبدالعزيز: اكيد يقول ... داخلة عليهم تقولين لهم ابي واحد منكم يتزوج رؤى ... طبعا بيوافقون ... ما يبون يزعلونك ... بس في داخلهم مو راضين
منيرة: ومن قالك انه بداخله مو موافق ... دخلت بقلبه ؟؟؟
عبدالعزيز بعصبية: اسمعي يا منيرة ... الكلام هذا مابي اعيده مرة ثانية ... نواف ما يتزوج رؤى ... ولا بيتزوج أي وحدة بهالطريقة ... تسكتين عنه وعن اخوه لحد ما هم بانفسهم يجون يقولون اخطبي لنا ... غير هالكلام ما عندي ... مابي الغلطة تتكرر يا منيرة
منيرة: غلطة ... لسه تسميها غلطة ... بعد كل اللي سويته لك ولعيالك تسميها غلطة ... انذبح في اليوم الف مرة وتقول لي غلطة ... اشوف عيالي والقهر مالي قلبي وساكتة وتقول لي غلطة ... اربي ولد ضرتي مثل ما اربي ولدي وتسميها غلطة ... بس الظاهر انا الغلطانة اللي سكت عن حقي طول هالسنين ... ولا انت ما يبين في عينك شي ياعبدالعزيز ... وطلعت من الغرفة وهي ومعصبة ودموعها على خدها
عبدالعزيز: اوف ... انا ايش قلت ... ما اعرف امسك لساني شوي ... اووف
راحت منيرة لغرفة اولادها .. ووقفت عند الباب تمسح دموعها ... ما تبيهم يشوفونها وهي بهالحالة
نواف: انا ابي اعرف ... ما يحلالك الا ملابسي ؟؟؟
فواز: تقدر تقول
نواف: ماعندك بجايم .. لابس بجامتي؟؟؟
فواز وهو يضحك: ابي اتذكرك في كل لحظة ياخوي
نواف: هالكلام وفره لمرتك ... اضحك عليها بكلمتين مو علي انا
فواز: ههه كاشفني
منيرة: السلام عليكم
فواز: هلا والله ... وانا اشوف الغرفة نورت ... امي منورتنا
منيرة من غير ماترد: نواف ... ابوك ما وافق على خطبتك لرؤى ... انسى الموضوع ... وطلعت منيرة من الغرفة
فواز: يوه ايش فيها امي
نواف: زعلانة لان ابوي ما وافق ... بس ليش ؟؟؟ ابوي يموت في رؤى
فواز: الله اعلم ... بس انت مو زعلان ؟؟
نواف: وليش ازعل ؟؟؟ اصلا انا ما بي اتزوج ... امس من قهري عليها وافقت ... ولا انا مو ناوي اتزوج ابد
فواز: احسن لك ... اليوم كسرت خاطري بالحيل ... بس لما صحت فقعت مرارتي بكلامها ... ورديت لها الكلمة بعشر
نواف: صج ... فاتني والله ... قول لي ايش صار بالتفصيل الممل
وقاله فواز ايش صار بالمستشفى من الالف للياء
عند الباب ...
لينا: هلا والله برؤى ... الحمد لله على سلامتك
رؤى: الله يسلمك حبيبتي
ليان جاية ركض وحضنتها على طول: خوفتينا عليك
رؤى: ههه ... خنقتيني وخري عني
ليان: شوفي الدفشة ... ما تعرفين للرومانسية ... الله يعين رجلك عليك
رؤى: ههه
لينا: يطول هو اصلا رؤى احمد ال..... توافق عليه
البنات: ههه
على العشا الكل قاعد وحاس بتوتر بين ابوهم ومنيرة بس ما علقوا وكان العشا هادي بالمرة ... والكل يفكر ايش السبب ... ونواف وفواز مستغربين من رفض ابوهم لرؤى اللي ماله مبرر بالنسبة لهم مع انه يموت فيها ويحبها ...
بعد يومين ...
اتصلت رشا بسمر بالتلفون وهي تغلي وميتة من القهر ....
سمر: الو
رشا: بكل برود تقولين الو ... وانتي ولا دارية باللي يصير
سمر:ليش ايش صاير؟؟
رشا: الكريهة اللي مدري على ايش شايفة نفسها
سمر: مين
رشا: رؤى
سمر: ايش فيها بعد
رشا: تدرين ان لها يومين نايمة في بيت خالي عبدالعزيز ؟؟؟
سمر: ليش ان شاء الله ؟؟؟
رشا: يقولون مريضة ... بس واضحة وضوح الشمس
سمر: ما يبلها كلام ... اكيد تبي تشبك واحد من الاولاد
رشا: ياربي بموت من القهر اذا خذت واحد منهم
سمر: ذبحها على يدي اذا فكرت بس مجرد تفكير بهالشي
رشا: طيب بنحط يدنا على خدنا ونقول بنذبحها ... ترى اذا شبكتهم ما يفيد شي بعدين
سمر: أي والله ... اذا فات الفوت ما ينفع الصوت
رشا: انا مو متصلة فيك تسمعين لي الامثال اللي حافظتهم ... ابي حل
سمر: من وين اجيب لك حل؟؟؟ ايش درانا ايش يسون هم هناك
رشا: نطب عليهم كل يوم
سمر: حتى لو رحتي لهم كل يوم ... ما راح تقعدين اليوم كله ... ما نستفيد شي
رشا: طيب فكري معاي
سمر:هم
رشا: شنو ؟؟؟ تكلمي
سمر: عندي فكرة ... بس ما ادري اذا امهاتنا يرضون اولا ؟؟؟
رشا: انتي قولي ... اذا السالفة فيها عيال خالي بيوافقون مية بالمية
سمر: اسمعي ....
الخميس في بيت عبدالعزيز ...
قاعدين في الصالة والكل مبسوط ومستانس ... والوضع هادي بين رؤى والاولاد ... طبعا بعد تهديد ابوهم واللي صار ... بس مايبطلون حركاتهم ونغزاتهم بالكلام ... بس طبعا بالنسبة لرؤى هذا ولا شي ويعتبر ان الوضع هادي
فيصل: اسمع يبه هالنكتة
عبدالعزيز: نسمع ... نكتك ما تخلص انت ...
فيصل: اثنين محششين واقفين فوق برج العرب
قاطعه فواز باستهبال: اين يقع هالبرج؟؟؟
الكل: فواز
ليان: اوف منك خله يكمل
فواز: ههه طيب طيب
فيصل: اثنين محششين واقفين فوق برج العرب ... واحد منهم قال: لو اطيح كم يبيلي واصقع الارض؟؟ قاله الثاني: تقريبا يبيلك ثلاث ايام ... قال الاول: ...
قاطعه نواف: قصة ذي مو نكتة ... انا خبري النكتة سطر واحد مو عشرة
فيصل: بابا ... شوفهم
عبدالعزيز وهو يضحك: خله يانواف يكمل ولا تقاطعه
فيصل: اثنين محششين واقفين ...
فواز: بتعيدها من اول
فيصل: ايه ... ليش تقطعوني النكتة موحلوة من النص حلاتها مع بعض
نواف: والله انك متفرغ ... كمل ليش تعيد
لينا: هالوقت اللي تناقشونه فيه امداه عادها ... خلوه يتكلم
فيصل: اثنين محششين واقفين فوق برج العرب ... واحد منهم قال: لو اطيح كم يبيلي واصقع الارض؟؟ قاله الثاني: تقريبا يبيلك ثلاث ايام ... قال الاول: ...
فواز: طيب الاول كم عمره والثاني بعد؟؟؟
فيصل: يوه
نواف: استح على وجهك ولا تصرخ على اللي اكبر منك
رؤى: حرام عليكم خلوه يكمل ...
فواز: تكلم الناطق الرسمي
رؤى: فيصل تعال جنبي ... ما عليك منهم ... تعال عندي وقول النكتة وعيدها من اول ... نبي نسمع ... اللي مايبي يسمع بكيفه
هنا صفقوا فواز ونواف: اوه اوه حركات وطلع لنا لسان وصرنا نعرف نرد ونعاند
رؤى: ومنكم نستفيد
فيصل: قبل لاتتهاوشون ابي اقول النكتة
الكل: ههه
عبدالعزيز: يالله يافيصل قول
راح فيصل وقعد جنب رؤى وحطت يدها على كتفه وحضنته: اثنين محششين واقفين فوق برج العرب ... واحد منهم قال: لو اطيح كم يبيلي واصقع الارض؟؟ قاله الثاني: تقريبا يبيلك ثلاث ايام ... قال الاول: ظنك اموت ؟؟؟
قال الثاني: شي طبيعي ... 3 ايام من غير اكل ولا شرب ...
الكل: ههه
شوي الا يسمعون جرس الباب وراحت الخدامة تشوف مين عالباب ...
ثواني ودخلت عليهم رشا مع لثمتها وعيونها حمرة ومليانة دموع وتسحب وراها شنطتها ... الكل التفت عليها وهم مندهشين
رشا اول ما شافت خالها ركضت له ورمت نفسها في حضنه وتبكي
عبدالعزيز: رشا ... ايش صاير
رشا: ..............
عبدالعزيز: وقفي بكا وفهميني ... طيحتي قلبي
رشا: ما اقدر اتكلم هنا يا خالي
عبدالعزيز: طيب ... تعالي المكتب خليني افهم
وراحت معه للمكتب والكل يطالع فيهم وهو مندهش ...
في المكتب ...
عبدالعزيز: يعني تبين تفهميني ان امك بتجبرك على الزواج؟؟؟
رشا: ايه ياخالي ... وقالت لي مو بكيفك ... موافقتك ماتهمني
عبدالعزيز بنفسه: ما جبتيه من بعيد يا حصة
عبدالعزيز: هدي نفسك وارتاحي وما يصير الا الخير ... بكلم امك واتفاهم معها ... وان شاء الله تنامين في بيتك اليوم
رشا في نفسها: هذه المصيبة
رشا: لا ياخالي ... مابي ارجع البيت
عبدالعزيز: شلون يا بنتي ... في بنت تطلع من بيتهم؟؟؟
رشا: اخاف امي تجبرني
عبدالعزيز: لا لاتخافين ... بكلم امك واتفاهم معها
رشا في نفسه: هذا اللي ما يفهم
رشا: حتى لو رضت ابي ارتاح لي يومين من جو البيت ... والمكان اللي احس اني انظلمت فيه
عبدالعزيز: لا ان شاء الله ... ما راح تنظلمين ... بس هدي نفسك
رشا: اذا ما تبيني اسكن عندك يا خالي بروح لبيت خالي عبدالرحمن
عبدالعزيز: ايش هالكلام يا بنتي ... البيت بيتك والعين اوسع لك من المكان
رشا: طيب ليش مو موافق اني اقعد عندكم؟؟؟
عبدالعزيز: خلاص يا بنتي اللي يريحك سويه ... واقعدي على راحتك
رشا بابتسامة خافيتها: شكرا ياخالي ما تقصر
وتقول في نفسها: شكرا يا سمر على هالافكار اللي مادري من وين تجيبينها