يابنات انتبهووا انتبهوا انتبهوا

1. عشان كذا يابنات::

السلام عليكم ورحمة الله وبركاته
يابنات بقولكم قصة صارت لي اتمنى انكم كلكم تنتبهوا تطيحون في اللي طحت فيه
يابنات انا كنت تابعه لموقع مختلط فيه اولاد وبنات
المهم صاحب الموقع صار بينه وبين ناس بالموقع مشاكل وصاروا بس يدورون الزله عليه
ويسحبون ناس من موقعه
واللي يقول لا ماراح اترك الموقع يعتبرونه عدوهم
وهذا اللي صار لي
ماطلعت من الموقع
وبالفعل صرت عدوه لهم لانهم يبون الموقع يفضى نهائي عشان يكايدون صاحب الموقع
انا مدري شالسالفه اللي بينهم وما اعرفهم اصلا
وحالي حال اي عضو بالموقع
المهم يابنات انا بديت احس ان جهازي فيه اشياء غريبه تصير له
البرامج ماتشتغل معاي برنامج تصوير سطح المكتب وبرنامج محول الصوتيات وكذا برنامج
وبنفس الوقت مقدر احذف البرامج تخيلوا
وقمت اشوف ملفات غريبه بجهازي
احذف الملف يطلع مكانه ملف ثاني
مو راضي يروح
بعدين فجأه وانا بالمسن واتصفح عادي الايميلات اللي تجيني..
شوي الا صفحة الهوتميل ماتفتح معاي
يطلب كلمة السر
اكتبها مو راضي يقبل .. يقول غلط
اعيدها مليون مره مو راضي
قلت بسوي ارسال كلمة المرور لايميلي البديل
بس قلت اشوف ايميلي البديل وادخله قبل ارسل له شي
واحاول ادخله مايدخلني
كلمة المرور غلط
انا ضرب مخي
ايميلين مايدخلوني وشفيهم
قلت جهازي ضرب
عطيت وحده ثقه ايملاتي والباسووردات قلت تجرب من جهازها
نفس الشي مايدخل
شوي يابنات الا ملفات جهازي كلها طايره
وانا معلقه بالمسن لو طلعت ماعاد برجع ابدا
جهازي صار فاضي ولا ملف تخليوا
وشوي الا انا طايره من المسنجر ودخل واحد من جهاز اخر على الايميل
على طول اتصلت على صديقتي قلت لها جهازي مخترق
قالت لي اللي دخل ايميلك كاتب انه يهددك بصورك وبيرسلها لاهلك
انا مالي صور بالجهاز من زمان حاذفتها حذف نهائي
بس شككوني في نفسي الله لا يسامحهم
المهم ذاك اليوم وانا على اعصابي بس احاول اتذكر وشفيها ملفاتي
شوي الا صديقتي تتصل فيني تقول انها شافت صورة يقولون انها صورتي
ووصفتني وربي كأنها توصفني قدامها
انا تعبت نفسيتي وصرت ما اكل ولا اشرب
بس ابي اعرف ليه يسوون فيني كذا وانا مالي علاقه فيهم نهائي وش دخلني بمشاكل ادارة موقعهم
المهم ياجماعه قعدت كذا كم يوم
وقلت بترك النت مرره
وخبرت امي واخواني
امي تدري اني من مبطي مانزلت لي شي يخصني بالجهاز
وحكيت لها كل السالفه
امي تقول اترك النت مرره
قلت لها بترك الموقع واغير عناويني واترك النت مؤقت بس ..لاني مقدر انقطع عن بعض المنتديات زي الفراشه وكذا
المهم انا بهالفتره غيرت كل شي يخصني
كلمات المرور بالمتنديات والايميل سويت لي جديد..
اتصلت فيني البنت بعد كم يوم وقالت ترا الصوره عندي اللي يقولون انهم يهددونك فيها اذا تبين تتاكدين هي لك او لا؟؟
المهم انا دخلت المسنجر الجديد وارسلت لي الصوره
الحمد لله ماطلعت صورتي
وربي ارتحت راحه مو طبيعيه
قالوا بيركبون عليها صور وينشرونها ومن هالكلام
بس ماهمني دامها مو لي
فرمتت جهازي وذاك الموقع ماصرت ادخله نهائئي
الله غني عن مشاكله
وتوته توته وانتهت الحتوته
من اللي صار لي يابنات ابي انبهكم على شغلات عشان لاتطيحون باللي طحت فيه
انا الحمد لله ربي ستر ان مالي شي بجهازي
بس بعض البنات تاكلها مضبوط
ويكون لها صور بالجهاز وتروح وطي

عشان كذا يابنات::

1= انتبهي انك تحطين لك صوره بجهازك اللي تدخلين به على النت ولاتستهينين وتقولين حذفتها ترى فيها برامج ترجع الصور المحذوفه
2= اول ماتفتحين المسنجر يطلع لك خانه الايميل والباسوورد. ومكتوب تحت تذكر بياناتي وتذكر كلمة المرور( انتبهي تحفظين معلوماتك) لاتحطين علامة صح عندها ترى انا ما اخترقوا ايميلي الا لأني حافظه المعلومات بالمسن
3= انتبهي تضيفين اي احدمو ثقه بالمسنجر سواء بنات او شباب لازم تتأكدين منهم هم قد المقام ولا مايستاهلون لأن بعضهم يقلب عليك الطاوله يمجرد انك مالبيتي طلبه اذا كان شاب واذا كانت بنت انتبهي يكون واحد مرسلها لك ... لاتقولون ابالغ ورب المصحف يابنات اعرف وحده بنفس الموقع كان لها صديقه الروح بالروح بالموقع ..لأنها تحب اللي زعل على الموقع تخيلوا باعت صديقتها وعطته تسجيلاتها اللي بينهم بس لانها تحبه باعت صديقتها .. عشان كذا لاتاخذون كلامي انه مبالغ تراه واقع..
4= حاولي انك تسوين مسنجرين واحد لممهمين وواحد للصداقات العاديه والافضل اصلا انك ماتضيفين الا الناس القمم المحترمين الثقه وانك اصلا ماتضيفين احد الا بعد معرفة هالشخص سنين.
5= انتبهي تتعاملين باشيائك الرسميه بالنت نفسه اللي تدخلين به المنتديات وتسولف به يعني اذا لك معامله رسميه وبتنجزينها لا تدخلين من نفس جهازك اللي تدخلين به المنتديات والمسنجر الحرص واجب يعني تخيلي لو معلوماتك طارت وش تسووين؟ مصيرنا كلنا نقدم على وظايف ومن هالكلام اللي يحتاج تسجلين ايميل وسجل مدني واسمك الكامل ومثل كذا فحاولي انك ماتدخلين من نفس جهازك هذا .
6= لاتستقبلين اي ملف من شخص مو ثقه او تشكين فيه مجرد شك بسيط :: انا ماقدروا يدخلون جهازي الا بملف زرعوه عندي تدرون شلون؟ عن طريق ملف اغنيه عاديه.. تخيلوا اغنيه عاديه ارسلوها لي وسمعتها ومادريت بالمصيبه اللي معاها
::
انتمى اتمنى يابنات انكم تحرصون على نفسكم وماتصير الوحده عالنيه
ترى الوحوش اللي بالنت كثير لاتقولي والله مالي دخل
والله بمجرد انك في المكان نفسه راح يجيك ضرر
والله يابنات من خوفي عليكم قلت لك سالفتي ما ابي احد يطيح في اللي طحت فيه
ترى مو كل مره تسلم الجره
تحياتي لكم ويارب يستر علينا وعليكم يابنات