يعني شلون الوحده بدون زوج راح تموت

السلام عليكم
كيفكم ياصبايا
وحشتوني من زمان عن المنتدى
قبل مااقولكم عن موضوعي انا قبل كل شي مؤمنه بقضاء الله وقدره
وراضيه صح اول كنت اتسخط واجزع واقول ليش ماتزوجت وش ناقصني بس الحين
خلاص بديت ارضى وقلت كل شي يجي من الله زين سواء
تزوجت او ماتزوجت
والحين بدخل بالسالوفه
قبل كم يوم كنت معزومه بزواج وكنت محتاره اروح ولا ماراوح
الموهيم صحيت المغرب لقيت امي تلبس ولما شفتها تحمست قلت يابنت
قومي البسي وروحي ووسعي صدرك
رحت وولبست وتكشخت ورحت مع امي
كان فيه قريباتي وجلسنا معاهم على نفس الطاوله وكانت فيه زوجة وحده من
اقاربنا عاد انا جالسه مبسوطه واسولف واضحك بعدين جات الزفه وانزفت العروس
بعدها اشوف هالحرمه الي هي زوجة وحده من قرايبنا تطالع فيني نظره غريبه وانا طالعتها
بعدين جلست اسولف مع اختي شوي وبعدين طاحت عيني بعينها مره ثانيه ولقيتها برضو تطالع فيني
يعني طولت وهي تطالعني
نظرة شفقه او شي مثل هيك قلت خير وش فيها تناظرني كذا
شوي الا تقولي يارب بعد كم شهر اشوفك عروس منزفه بعدها عرفت انها شفقانه علي وكاسره خاطرها!!!
هي الحرمه مااظلمها طيوبه وحبوبه مو قصدها شي ولا قصدها تحرجني لاني انا شخصيا
احبها واعرف انها طيبه بس الي ابي اعرفه ليش الناس يناظرون للبنت الي تأخر زواجها بهالنظره
نظرة الشفقه والحزن وكأن البنت ناقصها شي او كانها عايشه بالشارع
يعني كيف بدون هالزوج راح تموت وتنتهي حياتها ؟ !!!
يعني الي تاكدت منه ان مجتمعنا لاغين كيان البنت ووجودها بدون رجل وان هي ماتسوى شي
بدون الرجال
ليش طيب ؟ !!!
صحيح الزواج سنة الحياة ومهم بالنسبه للبنت وبالنسبه للرجل بعد بس
ماراح تموت البنت وتنتهي اذا تاخر زواجها او اذا ماتزوجت
يعني احنا المسلمين ياليتنا نتطور بتفكيرنا شوي ونفكر مثل الدول الثانيه الي بعضها مو مسلم
ونشوف كيف هم ينظرون للبنت الي ماتزوجت خير شر
مايقارنونها ابدا بالبنت الي تزوجت وهي تحت العشرين ؟
اخ بس مااقول غير الله يصبرني ويصبر كل بنت تأخر زواجها على هالناس
معليش طولت عليكم بس كنت ابي افضفض لكم