يمه اخطبي لي منيره بنت خالتي

1. بسم الله الرحمن الرحيم


2. صويلح / تذكر فلم التايتانيك اللي شفناه قبل فتره ؟؟


3. محمد / وش جاب طاريه ؟

بسم الله الرحمن الرحيم

موضوعي هذا يتكلم عن شاب مكافح مادهوره الا السعوده والواسطه ،،، شخصيتنا اليوم هو صويلح واللي قال عن نفسه في يوم من الايام (( اكيد تعرفون موضوع في مثل هذا اليوم اللي يجي في قناة دبي ،،، مقدم الموضوع يقول في بدايته على عتبات الزمن احداث فتحت لأصحابها بوابة التاريخ ،،، بالنسبه لي انا يوم جت تنفتح لي بوابة التاريخ الاحداث ضيعت المفتاح )) .
كان القمر قرصاً فضياً يتلألأ ،، يسكبُ ضوءه الحالم على الأرض ، فيضفي على كل شيء لمسة ساحره ، تزيده بهاء وجمال ، وفجأة خرب هالوضع الرومانسي بعد رجفه من ابوصويلح لولده صويلح كانت الاقوى من نوعها ، واردفها ابوصويلح بقوله / مالقيت ترقد الا في المجلس ،، قم انت ووجهك خالتك ورجلها بيتعشون عندنا قم خل اهلك ينظفون المجلس ،، وبعدين تراي أحذرك لا تنام في المجلس ثانيه ،، اجل نايم من الصبح الى الليل ؟ يعني عكس هالعالم انت ووجهك ؟؟ ،، التفت صويلح على ابوه وقال / وش تبيني اسوي ؟؟؟ مكيف غرفتي خربان من 4 سنين ولا عطيتني اصلحه ،، قال له ابوه / استح على وجهك ،، الحين رجال(ن) كبر ابليس (( كنه شايف ابليس )) ومتخرج من سنين ومافيك عيب وتطلب من ابوك فلوس ؟؟ الحين وراك انت ماتشتغل وتكد على نفسك ؟؟ ،، التفت صويلح على ابوه وهو متضايق وقال / تراك اشغلتني ياابوي من 4 سنين وهذي كلمتك لي ،، طيب مالقيت شغل وش تبيني اسوي ؟؟ صحيح اني مافيه شهاده ماخذيتها ومافيه دوره ماخذيتها ومافيه دائره حكوميه وشركه ماراجعتها كلهم يقولون ماعندنا وظايف ،، يعني بالعربي يقولون هات شهادة واسطه ونوظفك ،،، قال له ابوه / اقول دبّر عمرك واتركك من الخرابيط ،، والا انا اعلمك واكبرك وانت تصيع ؟ ،، التفت صويلح على ابوه التفاته فيها الكثير من البلاهه وقاله / وش اكبرك ذي ؟؟ اللي يكبرني ربي مهوب انت ،، بس شكلك ياابوي تتابع مسلسلات مصريه كثيره ،،، وبعد هالكلمه ارسله له ابوه شوته ثانيه زحزحته من فراشه اللي في المجلس واردف الشوته بقوله / اقول قم شل فراشك ولا يكثر ،، رجل خالتك بيجي الحين خلنا ننظف المجلس قبل يجي ،، قال صويلح / على طاري رجل خالتي ليه ماتكلمه رسمي ياابوي وتخطب لي منيره بنت خالتي ؟؟ ،،،، قال ابوه / اقول انطم بس الحين ماقدرت تصلح مكيف غرفتك من 4 سنين تبي تتزوج بعد ؟؟ ،، قال صويلح / يااخي شوفوا لي حل (( اما يااخي والله يمون )) ،،، انا متحطم نفسياً وماعندي وظيفه وابي اتزوج منيره وابي اصلح مكيفي وش اسوي يعني ،، اهاجر ؟؟ (( يسمع بالحلول ههه )) ،،، قال ابوه / اقول انطم ،، الوظايف واجد وهذا محيسن ولد الجيران توي شايف ابوه بعد ماطلعنا من المسجد يقول انه توظف بألفين ريال ،، قال صويلح / حتى لو توظفت بألفين وشلون ادبر اموري ؟؟ ،،، إذا قلنا الف قسط سياره اداوم فيها وخمس ميه اصلح مكيف غرفتي وخمسيه بين مصروفي وفاتورة جوالي وش يبقى اجمعه للعرس ؟؟ ،، قال ابوه / طيب هذي الشهر الاول ،، والشهر الثاني وش بتسوي براتبك ؟؟ ،، قال صويلح / الشهر الثاني الف قسط السياره وخمسيه بين فاتورة الجوال والمصروف وخمسيه بصلح مكيف غرفتي ،، قال ابوه / وانت كل شهربتصلح مكيف هالغرفه ؟؟؟ ،، قال صويلح / لا بد ان نضع حلول لأسواء الاحتمالات ،،، انت الحين اخطب لي منيره من ابوها انا بروح اغسل وجهي وارجع القاك خاطبها ولا تنسى يبوي ان حنا بعصر السرعه ،،، قال ابوه / ايه انت رح اغسل وجهك وارجع بتلقاني خاطبها لك ويمكن تلقى عيالك معها بعد ،، التفت صويلح على ابوه وطالعه بعين (( اجل بخشم )) وقال له / لا يستخف دمك ياابوي كانك ماتبي تخطبها لي علمني وريحني وخلني اعيش طول عمري معذب ،،، قال ابوه / اجلس معذب يا قيس الطراديه ،،، والحين انقلع قبل يجي الرجال ،، وشوته من المجلس غير مأسوف عليه .
طلع صويلح من المجلس شايل فراشه على ظهره وكان ناوي يحط سرير في المجلس بس انه استخار ،، غسل وجهه ونطل فراشه في غرفته اللي بدون مكيف وراح يصبح على امه مع انهم بالليل وطرح عليها نفس الفكره وهي انها تخطب له منيره بنت خالته بزعمه ان امه بترحمه مهوب مثل ابوه اللي قصفه مسكين ،، فكانت ردة فعل الام اشد من ابوه ورددت عليه الاسطوانه اليوميه وهي ان المكيف خربان من 4 سنين وغير ذلك من النقاط السابق ذكرها ،،،، انسحب صويلح من بيتهم كله وكان ناوي ينتحر وذلك بوضع نفسه تحت قضبان سكة الحديد ويجي القطار ويصدمه ويموت ويرتاح ولكنه تذكر ان مافي الديره كلها الاقطار واحد بين الرياض والشرقيه ومايشتغل بعد ،، عشان كذا كنسل فكرة الانتحار .
طلع صويلح من بيتهم وراح لشلته ماباقي الا هم يشكي لهم الحال ،،، وفعلاً من جلس وهو يسألونه وش فيك يا صويلح وقالهم سالفة المكيف ومنيره بنت خالته والقطار وماباقي شي ماقاله (( ياحليله مايخالف )) ... نقز من بين اخوياه واحد منهم وقاله / شف ياصويلح إذا بتاخذ بنصيحتي فكلام اهلك صحيح ،، يااخي وشلون تبي تتزوج وانت ماعندك ريالين تطلع ثوبك من المغسله ؟؟ ,,, قال صويلح / اذا تزوجت منيره باخذ منها ريالين واطلع ثوبي (( من جد قفل ههه )) .. قال له خويه / يااخوي افهمني ،، انت لازم تشتغل اي شغله لو تشوف لك شغله مؤقته حتى تدبر امورك ،،، وكانك مالقيت وظيفه ليه ماتشتغل حر تبيع وتشتري ؟؟ ... قال صويلح / وشلون افتح محل وانا مالقيت ريالين اطلع ثوبي من المغسله ؟ ،، قال خويه / ايه والله صح هذي وشلون فاتت علي ؟؟ (( سبحان الله اخويا متوافقين مع بعض فكرياً )) ...واردف خويه قائلاً / لكن ولا يهمك مافيه مشكله بدون حل ،، حنا بندور احد يسلفنا ونسدد له إذا كبرت تجارتك ان شاء الله ،،، رد صويلح على صديقه وقال له / اقول والله انك تسمع بالحلول ،، الحين شف لي اي وظيفه اتزوج منيره واصلح مكيف غرفتي وبعدها افكر اصير تاجر والا لا ،،، قال له خويه / وش تبي تشتغل يعني ؟؟ مافيه شي الا بواسطه ،،، قال صويلح / ان شاء الله اسوق ليموزين بس اشتغل ،، قال خويه / اما ليموزين ،، الحين مايركب الليموزين الا البنات وانت سعودي يعني سوقك طايح يعني وش تبي بالليموزين ؟؟ وصدقني لو تشتري تكسي اصفر وتشغل اغنية طلال مداح مقادير مثل راعين التكاسي اول محد ركب معك لأن السوق للهندي والباكستاني الحين (( ينعن ام التحطيم ههه )) ،، ومن ناحية راس المال انا بدبر لك احد يسلفك بس تسدد له اول بأول لا تجيب العيد ،،، واتفقوا فعلاً ان محمد اللي هو صديق صويلح يدبر له احد يسلفه ...
وبعد كم يوم كانت كل الامور ماشيه مثل مايبي صويلح ،، دبر له محمد واحد سلفه 70 الف بمية الف بس مايخالف اهم شي الاخلاق ،، وبدت الافكار تلعب براس صويلح وش يشتغل وكيف يبدا حياته ؟؟ ،،، وصار بس يطالع نفسه احسن واحد وماينام ببيتهم عشانه مليونير واهله ماعندهم الا الفقر (( 70 الف ومليونير اجل لو عندك دخل الاتصالات حق يومين ؟؟ )) ،،،، واستاجر غرفه في فندق البطحا تيمناً برجال الاعمال وبدا محمد يطرح عليه انواع المشاريع وكل مشروع مدري وش يبي ...
مره يقول له افتح بقاله وحط توصيل طلبات ...
ومره يقول له افتح مشغل نسائي بس انتبه انت لا تداوم فيه عيب
ومره يقول افتح محل قطع غيار ولا تبيع الا قطع غيار الليموزين لأن الحوادث لهم بس ...
ومره يقول افتح مستوصف وخلك دكتور ...
لكن صويلح حس ان كل هالافكار مستهلكه ويبي شي جديد ،،،، والتفت على محمد التفاته تدل على ذكاء وعقلانيه ودجه في ذات الوقت وقال له / وش رايك في مشروع ماخطر على بال احد ؟؟
محمد / وش مشروعك ؟؟

صويلح / تذكر فلم التايتانيك اللي شفناه قبل فتره ؟؟

محمد / وش جاب طاريه ؟

صويلح / يقولون ان قصة هالسفينه حقيقيه وانا عزمت اطلعها واصلحها واجيبها لجده وافتحها مطعم ،،، وتعال شف الزباين بعدها بحكم ان المطعم مكان تاريخي مثل التايتانيك ،،، وببيع البروستد ب 25 (( تايتانيك وبروستد )) وببيع المعسل بخمسه وللبنات ب 30 ،،، وببيع الشاورما ب15 والعالم بتشتري اكيد بس اهم شي يركبون السفينه اللي عاشت اعظم قصة حب وادج قصة حب في نفس الوقت ،، وان شفت السوق ماشي صح وهذا المتوقع سحبتها وجبتها للرياض ،،، وش رايك ؟؟
طالعه محمد بنظره مدري وش تبي وقاله / صدق انك تسمع بالمشاريع ،، الحين كل هذا بسبعين الف ؟؟
قال صويلح / يارجال السفينه بتكمل مية سنه في البحر يعني تلقاها رخيصه الحين ،،، وبجيب راعي ونش من الدائري واخليها يسحبها من المحيط الاطلنطي لأبحر الجنوبيه (( يسمع بالجغرافيا )) ،، ولا تخاف السبعين الف بردها لراعيها خلال اسبوع خصوصاً ان معسل البنات بيمشي سوقه (( على نياته الولد ههه )) ،،، وفعلاً اثبت محمد انه صديق مخلص لصويلح وانه في نفس الوقت دلخ مثل صويلح وراحوا واستاجروا على اقرب سفينه متجهه للاطلنطي مع انهم مايدرون التايتانيك غرقانه في الاطلنطي ولا في غيره بس اعجبهم الاسم وحجزوا له وراحوا .
وهم في عرض البحر استمر النقاش في ووش بيحطون ومن بيعزمون لافتتاح المشروع ومن بيكسر قارورة الراوخ على السفينه عند التدشين وغيرها من الامور !!
وفي ليلة لم تكن بالحسبان استيقظ صويلح مذعوراً وبدأ بالبكاء والنحيب فاستيقظ جميع من في القمره واصلاً مافي القمره الا خويه السبيكه محمد وساله وش فيك ،، ولكن صالح استمر في البكاء وماقدر يمسك نفسه ،،،، وبعد فتره ليست بالقصيره استطاع محمد السيطره على الوضع وسأل صويلح بعد ان توقف عن البكاء وش فيك ؟
قال صويلح / الحين مانوينا نجيب التايتانيك ونفتحها مطعم في جده ؟
محمد / ايه اتفقنا على كذا ،، وش المشكله ؟؟
صويلح / المشكله انها عقب هالسنين يبي لها ورشه وتصليح وتلقيطات (( كامري مهيب تايتانيك )) .
محمد / طيب نصلحها وش المشكله ؟؟
صويلح / هذي اكبر مشكله واجهتني في حياتي ....
7
7
7
7
7
7
7
7
7
7
7
7
7
7
7
مااعرف احد في المرور يجيب لي ورقة اصلاح
الفايده من الموضوع /
لا تطلع التايتانيك من البحر الا كانك تعرف احد في المرور .
هههآإآإآإآإآإي
مع تحيتي العطره لكم