يوميات فهد ولد ام سعوود الحلقه الثالثه يتبع

( فهد وباص نقل طالبات الجامعه)
في اخر الايام كثر اقبال الطالبات والمعلمات على باصات نقل الطالبات والمعلمات وبالتالي زادوا اسعارهم على هالاقبال والاحتياج لها
عبير: يمه الباص طلب مني زياده بالفلوس من خمس ميه الى الف ريال بالشهر
ام سعود : الف ريال حشى والله لو انه شقه مفروشه بالطايف كان ارخص
عبير: يمه ترى مالي غيره تكفين دبري لي الف ريال كل شهر انا مكافاتي من الجامعه يادوب تكفيني
ابو سعود: هالسواقين انهبلوا الف ريال على كل بنت بالباص والله بنكو من وراها
ام سعود : الفلوس تمطر علينا اقول اهجدي اخوك فهد يوديك ويجيبك من زمان قايلين لك روحي وتعالي مع اخوك بس ما تفهمين
عبير : والله لو اروح للجامعه مشي ولا اروح مع فهد اولا مطيور لا همه ساهر ولا ماجدالمهندس ثانيا يستقعدلي طول الطريق
ام سعود: هذا اذا وافق خليني اشوفه وان رفض فكك الله فهد يافهد
فهد : جاي يمه
ام سعود : جاي يمه ولا اشوفك الا عقب ساعه عجل ابيك
فهد: سمي يمه روح للخباز ماني رايح جيب من منيره اغراض ماني جايب
شي ثاني امريني تدللي
ام سعود : خليت شي انت وتقول امري وتدللي المهم سواق اختك طالب الف ريال وقلت له تتركه وانت اللي توديها وتجيبها
فهد : انا بطلب عليها الفين ريال الف توصيل والالف الثانيه على سوالفها بالسياره السخيفه وتحملي لها
ام سعود: قرش منت شايف يافهيد وبتوديها من ورى خشمك
فهد: طيب اوديها بس وش المقابل
ام سعود: المقابل تاكل هوا
فهد: لا يمه تسلمين توني متغدي خلاص من بكره الساعه خمس الصبح مسنتره عند سيارتي
عبير: بدري مره
فهد: قلت خمس يعني خمس قبل الزحمه تمسكنا والله لو ان شاء الله محاضراتك ثنعش الظهر الساعه ست انت في الجامعه
عبير : الشكوى لله طيب
عبير: الوو هلا مها كيفك
مها: تمام بس حايسه ادور ارقام هالباصات
عبير: ايه والله ورطنا هالباص
مها : لقيتي احد
عبير: لا والله مالقيت بس اخوي فهد بيوديني وبيجيبني وشرايك تخاوينا احسن لك من هالباصات هذا اذا لقيتي
مها : مدري بشاور اهلي اذا وافقوا بروح معك
عبير: اوك بس على فكره خمس جاهزه هو قالي بعده مافيه
مها: يابنت الحلال لو بعد الصلاه مباشره ماعندي مانع المهم احد يوديني ويجيبني
عبير: على خير بينا اتصال
مها : راح ارد لك خبر الليله
عبير: اوك مع السلامه
مها : مع السلامه
عبير: فهد مها تقول بخاويكم لانها مالقت باص يوديها
فهد: اوف لهالدرجه الباصات مسوين ازمه لكم
عبير: فوق ماتتصور تقريبا نص بنات الجامعه على هالباصات
فهد: وليه الجامعه مو موفره لكم
عبير: الجامعه موفره للمناطق القريبه من الجامعه لكن المناطق البعيده مثل منطقتنا مايجون
فهد: والله شكلي بطق لي باص وانقل فيه طالبات جامعتك
عبير: عشان اعلن بالجامعه ان هالسواق لاتركبون معه
فهد: اعوذ بالله تقطعين رزقي ليه
عبير: الرزق من الله وانت عندك وظيفتك
فهد: طيب وش رايك تقولين لخوياتك انهم يجون معنا الصبح اوصلهم ولي خلصتوا ارجعكم من دون مقابل
عبير: غريبه من دون مقابل
فهد : ايه عيب اخذ من صديقات اختي
عبير: بكره بقول للبنات اللي قريبين منا
فهد : خلاص وانا اوصلكم برسم الخدمه
مها: الله يعطيك العافيه انت واخوك صراحه اهلي مفتشلين منه يقولون على الاقل نعطيه حق البانزين
عبير: وش دعوه لا بانزين ولا غيره الطريق واحد
مها : حرام الولد متعني عشانا وماخذ كم وحده من البنات
خلود: اقول عبير كم وحده معك انت واخوك
عبير: انا ومها وسعاد ومشاعل
خلود: طيب ممكن توصلوني معكم لان الباص غثني بالزياده واهلي رافضين يزيدونه وماعندهم مانع لي رحت مع اخوك
عبير: خلاص بشوفه شيقول
خلود: بس شوفي كل شي بحقه
عبير: لاتحرجوني
مها: مافيها احراج على الاقل مية ريال كل وحده
خلود: صار وش رايكم بنات
مشاعل وسعاد: موافقين
عبير: فهد خلود تسكن قريب منا وبتجي معنا واتفقوا كل وحده تعطيك ميه ريال
فهد: حياها الله بس ليه الميه وشدعوه
عبير: شنو اللي وش دعوه مو هذا الرزق اللي تبيه
فهد: عين الحسود فيها عود بس انا فكرت وقررت
عبير: وشنو قرارك
فهد: راح اجيب سواق باسمي واحط له باص نظيف وتروحون معه بس بسعر حلو
عبير: انا قلت خدماتك وراها شي مو لوجه الله
فهد: مو انتوا تبون سواق خلاص بجيب لكم واحد
عبير: يعني يوم علقتنا فيك ورطتنا
فهد: وليه الورطه انا وراي دوام وكفايه مسكتكم شهر روحه وجيه
ومااترككم الا وانا جايب لكم السواق
عبير: 500 ريال مافي غيرها
فهد: خلاص خمس ميه خمس ميه امري لله والسواق انا بدفع راتبه ولاتخربونه علي
عبير: شلون نخربه
فهد: سالفة البخشيش لا تعودونه انا اعطيه وبس
عبير: وين بتسكنه
فهد: اكله عليه والسكن بحطه باستراحة الشباب يستفيدون منه وقت سهراتهم
النهار مشاوير الجامعه وفي الليل قهوجي للشباب
عبير: الله يعينه بينكرف كرف حمار
فهد: المهم قولي للبنات على الشهر الجاي بجيبه
عبير: ان شاء الله
ام سعود عند جاراتها
ام سعود: اسم الله على ولدي فهد فطين شاف الناس طارت بهالباصات النقل وجاب له سواق باسمه وحط له باص يودي البنات ويجيبهم
ام عبدالرحمن : والله هالباصات ماوراها الا المشاكل
ام ناصر: ايه سمعتوا باص بنات القصيم شصار فيهم
ام عبدالرحمن : ولا بنات جده شصار فيهم بعد
ام سعود: لا اللي جايبه فهد مضمون
ام عبدالرحمن : الواحد يجيك من برا نظيف ومايخربه الا اللي مسيبين في الشوارع
ام ناصر: اانتبهي لولدك يام سعود لايجيب له هالسواق المشاكل
ام سعود: فهد شخبار سواقك
فهد: الحمدالله ماشي حاله
ام سعود: حط بالك عليه تراهم راعيين مشاكل
فهد: لا تراه ضعيف مايدري وين الله قاطه بس يهز براسه
ام سعود: والله عقب كلام جاراتي ماارتحت من هالشغله
فهد: اصابع يدينك مو سوا يمه
مها : الوو عبير السواق ماجاني
عبير: غريبه هذي حزته وينه
مها: ولا جا لا لخلود ولا لمشاعل
عبير: اصبري بكلمه
مها: مقفل جواله
عبير : بكلم فهد يمكن عارف عنه شي
فهد: الو محمد وينك ليه ماوديت البنات
محمد: انا مافي ودي بنات
فهد: وليه ياعم محمد وش عندك
محمد: انا يبي شغل بروه
فهد: شغل بروح كيف
محمد: انا يبي رجع باص انت ويبي يششتري سياره كبير يودي بنات بالف ريال كل صديق انا يودي بنات جامعه الف ريال
فهد: مافيه انت باسمي تعال لا اجيك بالعقال اللحين
محمد: مافي يجي يالله روه انت وصل بنات
فهد: عبير السواق راح
عبير: وين راح
فهد: يبي يشتغل لحاله
ام سعود: انا ماقلت لك وراهم المصايب هذولا
عبير: فهد لحق على عمرك واسحب كفالتك منه وبلغ السفاره يسفرونه هذا بجيب البلاوي
فهد: اي سفاره والله ماحد نافعني بروح احجز له وركبه الطياره انا بنفسي
ام سعود: لا ياامي بيعه انت نسيت انك متدين على الباص
فهد: لا يمه هذا مو راعي معزب يمسكه هذا يبي يلعب بروحه
خلاص بسحب كفالتي له وبسفره على حسابي خل يفكني من شره واذا بيرجع للسعوديه يرجع بكيفه بس مالي شغل فيه
عبير: وانا مين يوديني اللحين
فهد: بدفع لك الالف كل شهر للسواق القديم
ام سعود: ومتى تتخرجين ونفتك من ودني ورجعني
عبير: قريب يمه قريب
تم بحمد الله
واعذروني لي طولت عليكم انشغلت بالدراسه