ooo فكرة الأقنعة التنكريه بيوم عرسج لايفوتج ooo

دلوعة_الإمارات

21-07-2022 - 11:16 am

و الموسيقى اللي تدخلين عليها لازم تكون مناسبه بعد..و فيها شوية اكشن..

السلام عليكم يا فراشات شحالكم..عساكم بخير..
حبيت اليوم اعرض لكم فكره يديده...لعرايسنا المقبلين على الزواج ليوم عرسهم.. ..
و هي فكرة الأقنعه التنكريه ...و بقولج كيف اتنسقينها بعرسج..
طبعاً من الإسم راح يتطلب عليج تواجد الاقنعه التنكريه..إليكم الخطوات اللي بتستخدمون فيها الاقنعه..
و مب أي قناع..في أقنعه حلوه يبيعونا في محلات الأثاث تييج لونها فضيه و راقيه..مثل هوم سنتر..أو the One
المهم..شو الترتيبات اللازمة لعمل الفكره..؟
أولاً : باقتج لازم تكون مرفقه بقناع صغير اللي يكون نص مش كامل...و عليه ريشه بيضه و طويله..
ثانياً : لازم يكون لج انتي بعد قناع .. على حسب فستانج إذا ابيض يلزم فضي و إذا ذهبي .. يلزمج ذهبي و يكون القناع (( نص ))..
ثالثاً : و انتي طالعه للناس اطلعي من الكوشه نفسها..لأنها حركه حلوه..و تكونين لابسه القناع...لين ماتوصلين لإخر الممر بعلى الكوشه..و عقبها شيلي القناع..و عاد الناس بكون فيهم فضول..يشوفون مكياجج..

و الموسيقى اللي تدخلين عليها لازم تكون مناسبه بعد..و فيها شوية اكشن..

رابعاً: عقب ماتشيلين القناع انزلي من على الدرج...و امشي بين الناس..مب بالنص...قومي و امشي بينهم..بس يعتمد على الفستان إذا خفيف عليج سوي هالحركه ..و انتي ماره بين الناس..مدي ايدج و سلمي عليهم.. عاد بستانسون..انهم سلمو على العروس..
خامساً : و بعد هاللفه كلها ارجعي للكوشه...
سادساً : خوات العروس لازم يكون لهم قناع على الوان فساتينهم...و يرقصون على اغنيه..مناسبه بعد ماتقعد العروس و اتخلص زفتها..
سابعاً : نرجع للتوزيعات..حبذا لو كان على كل طاوله توزيعات فيها اقنعه..و مشغولات يدويه ثانيه حلوه..
ثامناً : حبذا لو الكوشه يكون فيها خيال شوي...شرات القلعه أو ديكور معين مناسب..
تاسعاً : تقدرين اتوزعين مليكان على بوابة الدخول للناس و على المسرح...و لابسين لبس غجري..و هم لابسين اقنعه تنكريه..و تقدرين تتنازلين عن الفكره لو ماتبينها..
عاشراً : الأضواء لازم اتكون خافته..و يكون على العروس و ضوء فلاش مسلط قوي..و يكون هالضوء شغال عليها .. لأن يعطيها جاذبية غير..و في حركات حلوه الحين قامو الناس ايبونها..مثل شلال عند ممر دخول الناس...على الأطراف...و في العرس اللي انا حظرته..شفت انهم يايبين شلال كاكاو..و حاطين يمه فراوله و اللي يدخل عادي ياخذ فراوله و يغمصها بالكاكاو و ياكل..كانت حركه روعه..
اتمنى عيبتكم الفكره انتظر ردودكم يا بنات..
و انتظروني في بقية الافكار الحلوه الثانيه..

التعليقات (9)

^ سكرره ^

21-07-2022 - 02:28 pm

مرحبا حبيبتي ................ فكرتك خيال روعه ... تصدقين انا مااحضر زواجات كثير بس تمنيت فيه عرس يسوي هالحركه علشان اشوفه لانه من وصفك وانااقراه واتخيله حسيته شي
شلال كاكاو مره وحده ماقلتي نافوره ..ههه .. الله يهني الكل بحياته

دلوعة_الإمارات

21-07-2022 - 03:29 pm

مشكوره اختي سكره على ردج الجميل..بالرغم من ان عدد المشاهدات فاقت الردود ؟؟ كنت اتمنى رسالة شكر أو تشجيع..
انتو جذي ماراح اتخلوني اعطيكم افكار ثانيه ... (( تحملو من زعلها ))
انتظر بقية الردود..

اسلوب المرأه

21-07-2022 - 04:30 pm

واي حلوه بس سبحان الله حنا يالخليجين تطلع العروس ثقيله حيل من كثر خوفه في الزفه واتوقع انا اولهم

دلوعة_الإمارات

21-07-2022 - 05:31 pm

مشكوره حبووبه اسلوب المرأه على الرد...و ماعليج ... مب كل خليجيه شرات الثانيه..في منهم يحبون الناعم..و منهم يحبون الحركات و الابداعات..و الخيال و الأسلوب التقني الحديث...
حتى يا بنات عندنا في الامارات..مركز للتصوير التقني...يطلع خيال العروس تمشي بوسط الحفله..و كل الناس تظن ان العروس قاعده تمشي..بس هي اصلا ماتمشي..
و حركه ثانيه..يخلون يصوروون العروسه و هي راكبه بساط الريح مال علاء الدين و اطير بين الناس و فوقهم بأشعة الليزر..
بس طبعا كل هذا مكلف وايد....بس وايد حلوو و فنان..

moon007

21-07-2022 - 06:32 pm

فكرة روعة

دلوعة_الإمارات

21-07-2022 - 07:33 pm

مشكوره على المرور موون..

طيف الاشواق

21-07-2022 - 08:34 pm

مشكورة ألبي على الفكرة .. بس في مشكلة دائما عند العروس انها مستحيه
فتخرب كل شي وفكرتك تتطلب جراءه من العروس.. . ومشكورة مرة ثانية ..

لؤلؤة البحار 2006

21-07-2022 - 09:35 pm

فكرتك أكثر من رائعه وتناسب أكتر العروس في الخطوبه أوالحنه علشان الفستان يكون خفيف ويسمحلها بحرية الحركه وصراحه لو إتنفذت زي وصفك تبقى هايله ....

دلوعة_الإمارات

21-07-2022 - 10:36 pm

هلالا فراشات...مشكورين على ردودكم..
طيف الأشواق..............أكيد لازم اتكون العروس جريئة..و لما بتلس القناع اتحس كأنها ممثله..ههه..
لؤلؤة البحار............الفكرة اتنفذت بعرس من الأعراس في الامارات...و كانت روعه..حتى كانو مسوين عرض بالبوير بوينت في شاشة البرجكتر عن صور العروس و هي صغيرة و مع خواتها و أمها...و كان فستان العروس خفيف و حلو وايد و تقدر تمشي فيه..مب مليان شك و خرابيط كثيره..
يعني مب شرط اتخسرين في الملكه و الخطوبه خليها للعرس أحلا...و اتكونين مميزه..
و هذي مجموعه من الأقنعه...اضل الفضي او الذهي للعروس .. و الملون لخوات العروس اتمنى يعجبكم..
و هذي لخوات العروس...اهداء مني لكم ههه..بس عاد مب طول الوقت تلبسونها بس على اول اغنيه كحركه..
و مشكورين مره ثانيه....انتظر بقية الردود..

للكويتيات تكفون منو يعرف رقم الطقاقه زمرده ضروري←
قريبتي زواجه قرب وتبي مساعدتكم→