xXطريقة تنظيم و ترتيب الملابس في الخزانة و ماتشملهاXx

1. شحالكم يا فراشات


2. و الحين ننتقل إلى ترتيب قمصان النوم ..


3. و بعد ما خلصنا من قمصان النوم..

شحالكم يا فراشات

اكيد كلكم اتعانون من مشكلة عدم ترتيب خزانة الملابس الخاصة فيج..و دوم تتخربط الملابس..و ماتعرفين كيف اترتبينهم بشكل سليم..
عسب جذي انا سويت لكم هالموضوع اللي من خلاله راح تتعلمين كيف اتنظمين ملابسج من قمصان نوم .. العبي و الشيل و ملابس الخروج او البدلات و الأحذية و الآندروير بشكل مرتب ونظيف ..وهالموضوع كتبته بنفسي عشان افيد اخواتي الفراشات..و المعاريس و كل وحدة محتاجة لهل النظام..
و ما ابي منكم الا الدعاء لي بالتوفيج فحياتي..من خلال ردودكم و تشجيعكم الطيب لي !!!
عزيزتي...فالبداية لازم اتفظين الخزانة من اول و يديد..عشان نبدي الترتيب مع بعض..و اتحطين كل الثياب على السرير أو مكان قريب من الخزانة..
ثانيا.. لاتنسين الدخون و العطور اللي بتعطرين فيها ثيابج..سواء الداخليه او ملابس النوم ..
و بعد كل هذا.. .. نبتدي أول شي في ترتيب الآندر وير .. أو .الملابس الداخليه..
طبعا الملابس الداخليه لها عنايه خاصه و اهي انج تغسلينها بنفسج بإيدج مب بالغساله .. ترى باجر بتين و بتقولين انا شاريه ماركه و اختربت عني بسرعه...لا يا حبيبتي ترى الآندر وير له تعليمات خاصه فيه بالغسيل لازم تتبعينها..و اذا ما اتبعتيها .. فاعلمي انها ماراح ادوم معاج..
طبعا لاتنسين تغسلينها بماي معطر..مثل كومفرت..و عقب ادخنينها..و اتعطرينها..و اترتبينها على حسب الألوان من الفاتحه للغامقه..و أفضل انج اتحطينها في الأدراج الخاصه بالخزانه..لانها انسب مكان لها..و بعطيج مثال أو صورة لها..

و الحين ننتقل إلى ترتيب قمصان النوم ..

طبعا تروحين و تاخذين كل قمصان النوم اللي الوانها متقاربه و المتدرجه باللون مع بعض من الفاتح للغامج..
خذي كل قمصان النوم المكونه من قطعه واحدة الطويله و القصيره و علقيها..لانها تعطي جمال للخزانه..اما الملابس المتكونه من قطعتين..فإذا قدرتي انج اتعلقينها كان بها..و اذا ماقدرتي حطيها بدرج كبير بشكل مرتب و منظم..و أفضل ان تكون منفصله عن الآندر وير..يعتمد إذا عندكم مكان أو لأ..
بالنسبة للملابس المكونة من قطعه واحدة..مثل ماقلت اترتبينها من القصير للطويل...و اتخلين لها باب خاص في الخزانه..و احرصي على ان القمصان قد قمت بكيها ..
و بعد كيها تقومين بتعطيرها و تبخيرها...و تعليقها بالشكل اللي خبرتكم عليه..

و بعد ما خلصنا من قمصان النوم..

ننتقل للجلابيات..أو البدلات الخاصه بالخروج و يمها على طول العبي و الشيل .....ايضا اتعلقينها في باب خاص بروحه..و يكون أكبر واحد في الخزانه..أو يشمل بقية ابواب الخزانه..و طبعا لاتنسين اتخلين باب لزوجج المسكين..مب تاكلين حقه و مشاركته لج فالخزانه,, ههه..
بخريها و رتبيها..بالشكل اللي انتي تحبين..
و بالنسبة لفساتين السهره ... فأنا أفضل لو عندج ستور صغير اتخزنين فيه فساتينج كلها..عشان تترك مساحة في الخزانه..
طبعا .. انتي كل 3 شهور...شيكي على الخزانه..اكيد في ثياب ما تبينهم...و حطيهم في بكس و عطيهم للفقارى..و دور الهيئات الخيريه..و لج اجر عليهم..
و أخيراً...بالنسبة للإكسسوارات .. حطيها في بكس...او علبة خاصة بالاكسسوارات..و رتبي فيها ساعاتج و اكسسواراتج..و حطيهم في الرفوف اللي تكون موجوده في الخزانه..
و بالنسبة للأحذية ..اشتريلج خزانة خاصه فيهم..يبيعون في هوم سنتر...اشكال حلوه..و مرتبه..
أو فصلي انتي خزانه...و من ضمنها يكون شي جرار للأحذيه..و انا رسمت صورة..للأحذيه.. و خلفها الملابس و الأحذيه ممكن انج اتجرينها من ناحية اليمين...أو من ناحية اليسار... و شكل هالخزانه..يوفر لج مكان في الغرفه..و ماياخذ مساحه...يعني اثنين في واحد...
و بوريكم تصميمي..و اتمنى يعجبكم..للي تحب اتفصل خزانه..عمليه..
اتمنى يكون وصفي لكيفية ترتيبكم للخزانه افادكم..و اللي عندها سؤال ترى حاظرين...
و لاتنسوني بردودكم..
وداعة الله و حفظه..