Your Style at your University

ازهار الكادي

07-10-2022 - 07:53 am

مستجدة وحابة تعرفين ايش الستايل اللي يناسبك..!
أو مليتي من استايلك القديم وحابة تجددين..!!
طيب خلينا نشوف اهم واغلب الاستايلات اللي ممكن تكون مجموعة طلات لك في الكولج
بس أول شي راح تجيبين معاك ورقة وقلم..لأننا راح نساعد البنات المستجدات
واللي ماتعرف ايش ممكن اشياء تشتريها قبل الكولج وماتتحسف
ترا الدعوة فيها كرف..!
لا تستغربين..لأني كنت مثلك احب التغيير وفجأة صرت بزي..ومقدر اطلع كثير بحكم الدراسة ووقتها
بس اذا طلعت السوق اخذلي كم قطعة تنكرف..!
صدقيني كل البنات من الملل..يصير مالهم خلق..فلا ترهقين نفسك ولا اهلك
الجامعة ابسط مما كنت انا اتخيلها ايام المراهقه خ
جهزتوا الورقة والقلم..!
يلا نبدا..!
أول شي لازم تعرفون ايش نظام جامعتك لو تمنع اشياء معينة عشان ماتتوهقين باللبس المخالف...!
أنا كنت سنة تحضيرية وكنا جامعتين..الاميرة نورة مع بنات سعود
فكانت الانظمة نوعا ما اهون بكثير مو عشان سواد عيون بنات نورة خخ - مثل ما اتوقع -
عشان بنات سعود ..والطاقم التدريسي الاجنبي..!!
والله يستر هالسنة شكلهم بيقلبون علينا..!!!
المهم
اكتبي اللحين ايش الاشياء الضرورية واللازمة ..!! واللي ماتحسينه مهم بالنسبة لك مو شرط تتقيدين باللسته

التنورة السوداء

طبعا اغلب بنات الجامعة..يلبسون التنورة السادة..! اللي مافيها ولا خربطة..!
قولوا ليش..؟؟

تناسب اغلب القمصان والبلايز..اي اغلب الستايلات..!
النوع اللي نختاره بارد وخفيف ويخلي الهوا يهفهف..!
تعطي مظهر عملي اكثر وشبابي - بنظري -

وفيه كثير بنات اعرفهم لما جا الترم الثاني اشوفهم خلوها سادة..! مدري ليه توهم يغيرونها
والصراحة صارت طلتهم احلى..!
امم يمكن احد يخالفني الراي...!؟
عندك المجد وطيبة يبيعون تنانير حلوة وب 20 و 25
وكمان كوتون ب 99 على خبري..!
وصف محل المجد اللي يبيع تنانير سادة - مو دعاية مجرد مساعدة -
بوابة 4 ثالث محل ع اليمين..،
فيه عنده 3 انواع..ميدي..وعادية .. واستريتش
الاستريتش شريتها وخليتها في البيت ماحبيتها مررة
والعادية اخذت اربع وناسبوني..
الميدي ماعجبتني لانو فيها قصة..!
محل طيبة مااعرف وصفه والله..! البنات مايقصروا ان شاء الله
سري
والله مدري هو سر ولا يقاله اكشن خخ
لما تلبسون التنورة بتحسون انكم لحجيات جداا..وعادي جدا
انا اخذها للخياط واخليه يقصرها لفوق الكعب..كذا تمام؟
ويخليها ستريت اهم شي..لانها تجي واسعه زي كذا ^ بس ع خفيف..!
بس لازم هالحركة

قميص ابيض

مدري ليه البنات المستجدات نشوفهم لابسينه اول يوم..!؟
مع اني انا كنت لابسه لون غير الابيض ..
بس احسه ضروري يكون فيه خزانة كل وحدة فينا..!
زارا عنده تشكيلات جميلة جدا..بس العيب تشوفينه ع نص بنات الجامعة
و قاب ينزلون دايما..القمصان اللي موديلاتها معروفة..
واذا كنتي مما يهمك البراند الكبيرة..!
ممكنت تاخذين من بربري..أو باولو سميث..أو رالف لورين..أ الخ
وهالله هالله بالكرف

بولو

اذا جامعتك تسمح بالنص كم ممكن تاخذين لك منه..و احيانا كمان تلقين اكمام طويلة
تلقينهم عند زارا ..وسنتر بوينت الوان كثيرة بس اللي شفتهم نص كم
مدري اذا لسا موجودات..!؟
ومعروف انو هالستايل منتشر جدا في لاكوست ورالف لورين..واخونا بربري

تي شيرت

في الفترة الأخيرة صرنا ننافس محلات الرجال..بما ان الموضة كانت الوسيع
والصراحة احلى شي لما تاخذين من قسم الرجال تضمنين انها مابتكون منتشرة..وغير الرسومات اللي عليها رهيبة
بما اني نحيفة فاخذ سمول من قسمهم ويطلع رايق..بس اهم شي اصفطي الكم حبتين..!
لطلة رآيقة
واللي تحب الضيق.. مالها الا القسم النسائي اكيد ..
عندك في قسم الرجال.. محلات توب شوب..وريفير ايلاند..وسنتر بوينت وماكسفورت
الوانها حلوة واسعارها احلى
اما البنات..فبيرشكا..وسترادفيروس ..ونيولوك الخخ

البلوفر

مدري اذا صح التسمية..!
حاجة مهمة ويفك ازمات..خوذيلك للصيف والشتاء
فيه نوعية باردة وتصلح في الصيف..نزلوا منها سنتر بوينت الوان رايقة..وكانت ب 60 وايام التخفيض ب 30
والبنات ماقصروا قشوهم..لأنها بجد تطلع مرة كول
لما تلبسين تحتها تي شيرت فنكي..أو سادة قصته دائرية مابين الا الرقبة..وتلبسينه فوقه
مع اساور ملونه وربط وهيك شغلات مرة رآآيق
بس بليز مو تقشون كل الالوان مدري ماحبيت اني اخذ كذا لون
احس واحد او اثنين بالكثير يكفي..! مع اني اعشق هالستايل
وع فكرة يفك ازماتك مع الامن ولكاعتهم خخ

شوز

من ناحية الشوزات فالسوق مليان..اذا كنتي تحبي السبور
فتذكري انو لما تلبسيها اللبس يكون متماشي مع الستايل تبعك
لبس انيق جدا..انسب شي فلات او صندل
بس الله يعينك ع الوصخ من تمتير الجامعة..خصوصا لو لبستي صندل
بس لازم مع الفلات تلبسين شرابات المخصصة لها
لانو مع الوقت بتطلع ريحة مو كويسة
وفيه في الصيديلة زي الشي تحطينه جوا الشوز ويحافظ نوعا ما ع الشوز انه مايخترب من كثر اللبس من جوا
يعني مايتخفس ويريح القدم..! مدري فهمتوا علي او لا..!
فيه طريقة عشان ما تطلع ريحة شينة..أول شي نظفي رجلك وغسليها بالصابون بعدين نشفيها وحطي بودرة اطفال
راح يقل تعرق الرجل..
ولو طلعت ريحة مو كويسة من الشوز..جيبي ليبتون وحطي جواتها وعرضيها لأشعة الشمس..وراح تروح الريحة
المحلات والبرانداز كثير..!

واقي الشمس

اهم شي احسه مهم..لأن الشمس قوية..وتحتاجين تحافظين ع بشرتك ولونها
خوذي شي للوجه..واليدين والرجلين
الأنواع كثيرة
بالنسبة لي اللي ناسبني..كلينك - الشنطة
الشنط ع حسب انتي وش تبين..!
وع حسب كتبك وقرابيعك..!
فيه الغالي وفيه الرخيص
ماتحبين تغيرين وتبين تكرفين مالك الا الغالي..!
طبعا الماركات الجيدة واللي تتحمل الكرف متفاوته بالاسعار
فيه مثلا قيس وليز كليبورن الخ اسعارهم جيدة وتتحمل الكرف
وفيه دكني وكوتش والفيرو اعلى منهم حبتين وكمان حلوة
وفيه ال في و بربري وغوتشي و و الخ
المحلات العادية واللي تبيع تصاميم حلوة واحيانا تشبه تصاميم الماركات الكبيرة
بارفوا..
اكسسواريز..والدو..ومحلات الملابس كزارا وبرمود و وغيرها الخ

النظارة الشمسية أو الصن قلاسيز

ع حسب اذا جامعتك مفتوحة فتحتاجينها ضروري لأن اشعة الشمس مرة قوية
واذا لا فبلاش
اهم شي خوذوها من محل متخصص بالنظارات
والبراندز ياكثرهم فيه من 200 وطالع - الساعة
اهم شيي لاتحسبين انك زي المدرسة تنتظرين الجرس..لا
فلازم تكونين لابسة ساعة..او حتى الجوال صار يغني
وممكن بالجوال تحطين منبه..و سولفي ع راحتك خخ

الشعر

لا تتكلفين واجد لأنك بتملين وبيتعب شعرك
بمان شعري ويفي ناعم خخ
بعد مااطلع من الحمام..احط نقة بديل زيت..بس نقطة..اوكي
وامسح يدي بعدين اوزعه ع الشعر..وانشفه
وهنا يبدا الشغل احيانا اخليه شينون بسيط نازل..او افكه مع حركة بسيطة
او استشوره...يعني مزاجات..!
بس االاغلب ع طبيعته : )

الميك أب

خلي طلتك تكون خفيفة..وبنفس الوقت وجه مريح لك ولغيرك
استخدمي الواقي - فيه منها بلون-..أو معاه حطي أولاي بالتوت البري
وكحل لو حابة..ورتبي حواجبك..مع بلاشر وروج رآيق..واذا حبيتي ماسكارا
والافضل تكون مو ضد الموية عشان ماتسبب تساقط رموشك

الاكسسورات

حلو تلبسين حلق نعوم وصغير..وانتهينا
واذا انتي راعية تعليقات..بس اهم شي خليها سمبل..ولا تسوين زحمة وتلبسين
كل قراشيع بيتكم خخ

العطر

عشان تكملين طلتك..ماراح اتكلم عن النظافة الشخصية..لأنو لو تحطي عطر وانتي ماتحممتي الصباح
او ماتتحممين يوميا..فالريحة بتنقلب ضدك..
عطر خفيف ورآيق للصباح ولأجواء الصيف..بالشتاء ممكن تثقلين الريحة بس مو لدرجة تلوع كبودنا
عندكم فلانتينو الجديد حبيته مرة..ولاكوست رآيق..وفيمي لBoss مرة رايق للشتاء
وكمآن فيه عطورات عند دي بودي شوب اقتصادية وريحتها واو
ام كثير خيارات عندك
برب

التعليقات (9)

ازهار الكادي

07-10-2022 - 10:14 am

باك
اول يوم
خلصنا من لبسك واستايلك وبكرا راح يكون أول يوم تروحين فيه للجامعة
وطبعا انتي ماتعرفين احد هناك
اول شي جهزي اغراضك من الليل عشان ماتنسين شي او تتوهقين بالوقت
خليك ريلاكس..ونامي واهم شي اشبعي نوم عشان تكون النفسية حلوة<--اكره شي اذا جيتي بتعدلين نومك
قمتي الصباح وتحممتي وسويتي شعرك وخلصتي من كل شي..افطري وروقي
اكيد وانتي في السيارة طول الوقت شايلة هم كيف بتعرفين احد هناك..!ومكان اول مرة تدخلينه
ابتسمي وابتسمي ثم ابتسمي هذا اهم شيي..بس مو تصيرين مثل الهبلة
خليك متواضعة وخلي انطباع الناس يكون عنك كويس
اول ماتدخلين راح تشوفين كل الناس مثلك مايعرفون احد..وكلهم مثلك يبون يتعرفون يعني الهم اللي كنتي
شايلته ماله داعي..اي شي ماتعرفينه اسألي..لاتستحين منها تقدري تكسبين بنات وبنفس الوقت تعرفين اللي تبينه
اتذكر اول يوم في الجامعة..طبعا ماكنت في التحضيرية يعني ماكنت مع صاحباتي وهم لسا ماداوموا عشان المبنى
فجت معاي وحدة من صاحباتي ..وماكان فيه لا جدول منزل ولا شي..وجلسنا نتمشى ووسعنا صدرونا خ
وسحبت ع الجامعة اسبوع مع ان قسمي مداومين من الاثنين وبدوا محاضرات
جا السبت الثاني ومررة كنت شايلة هم..ودخلت القاعة بعد ماافتر راسي وانا ادورها..وجلست وماكان جمبي احد..شوي دخلت بنت بعدي
وابتسمت وابتسمتلها وجلست جمبي وجلسنا نسولف..شوي ونكلم اللي قدامنا..بعد البريك..ونشوف وحدة مرة شكلها مو حابة الوضع
وخجولة..ونكلمها وطلعت البنت مرة عسولة .. وتقولي شكلكم رحمتوني..
وكونا شلة من 5 بنات من اول يوم ..داومت معاهم 3 ايام وبعدها تيسرت اموري وحولت
بس كل ماتذكر البنات وربي اقول لو مايجي من هالجامعة الا هالبنات..وللحين ع تواص معاهم
اشتقتلهم الدوبات
اللي بختصره من هالسالفة انو ابداا لاتشيلين هم الجامعة وبنات جدد وماني عارفة ايش..سبحان الله الامور تتيسر بس وكليها ع ربك
وعيشي يومك وانبسطي
- بس..!
اهم شيي لا تعطين البنت جوهها الا لما تعرفينها واذا ماعجبتك عادي اسحبي عليها..لسا المجال عندك وتعرفي على اللي من اخلاقك..
بتشوفين البويات منتشرات وسبحان الله..
احنا كانت عندنا 1 فجأة صاروا 2، 3، 4، و ..وو
وكلهم شلة وحدة..اللهم عافهم ولا تبلانا
اهم شي لاتعطونهم وجه نصيحة سمعتك من سمعتها..
كان معاي بوية بكلاسي.فجأة بعد مارجعنا من اجازة الحج..صارت تجلس جمبي
ومعها صديقتها..وهنا..صارت تبثرني وهذا كيف وهذا كيف..لو ادري انها بتفهم او بتحط بالها ممكن..وبالنهاية لا هي اللي تفهم
او تحاول..ولا اللي تخليني انتبه اووف
وكان عندنا مرة كويز..وتجي الاخت وتنقش الورقة حقتي كلها..وانا من الرعب عطيتها الورقة بكبرها قلتلها غيري شوي عشان ماتشك التيتشر
لأنو جوابي فيه اغلاط..قالت ايه ايه..واشوف الا الاخت ماغيرت وابلع ريقي
ونشبت وصارت كل يوم تجي جمبي ولا صار كويز تنقش الورقة..صاحباتي اللي معاي رحموني وخلوني بالنص وكل كلاس
تصير وحدة بجمها خ
لدرجة مرة من جد ماقدرت اتحمل تعدت حدودها الاخت من باب الميانة يعني.!
هنا خلاص استوب ..تبتسم برا الكلاس جوا ماني معطتها وجه وهذا اللي المفروض من زمان يصير
يابناتي يارعاكم الله انتبهوا من هذي الفئة فالصاحب ساحب والخير يخص والشر يعم
ياشيخة لو تصادقين الجدار بس ابعدي عنهم..!
من هنا وهناك.. وقرقرتي ماخلصت
اللوكر..،
عشان قشك وحوستك افضل تستأجرين انتي وصاحباتك لوكر او اثنين
للعباية واللذي منهو..خ زمزمية قهوة معمول مغلف نسكافيه خ
ال Open day
احلى شي لما يقولون عندكم يوم مفتوح..مرة وناسة
لا تفوتين هاليوم بتاتا..انا استغرب من البنات اللي يسحبون يعني هم مسوينه لمين..!
مو لنا؟؟
طيب انبسطوا غيروا جو..عيشوا يوم ممتع بالجامعة اللي تنقرفون من دوامها
اذا عندكم افكار..اعمال اشتركوا واعرضوها..واذا انتي تحبين الطباعة او الرسم ع التيشيرت
والاشياء هذي اعرضي اعمالك وبيعي..!
الواجبات
في الجامعة لما تقولك التيتشر او الدكتورة انو فيه واجب وبكرا مثلا تسلمينه
لا تسحبين عليه..ترا مو مثل المدرسة تقولك يافلانه ليش ماجبيته ..خلص تجمعهم
واللي ماجاب بسلامته ..وراح تشوفين هالواجبات تنفعك ب + بعدين خ
البحوث نظمي ونظمي شغلك..لا تصيرين اتكالية لما تكوني في قروب لا تسمحين لا لك ولا لغيرك انو يكون الشغل
ع وحدة اكثر من غيرها او يكون عليها لوحدها..!!
اكثر شي ينرفزني بالقروبات هالسالفة..خصوصا انو من اول محاضرة ممكن تقول الدكتورة انقسمو لقروبات عشان مشاريع المادة
طبعا انتي ماتعرفينهم ولاهم..
فيمالك من حرق الاعصاب لو كنتي حريصة ع الشغل..وخوذي ايميل هذي ويالله متى تدخل ومني عارفة ايش
يعني شي مايعجبك..او تحسينه غلط..قولي لهم ولا تسكتين..! وحاولوا كل شخص يكون له نفس المجهود
اخيرا
الجامعة شي جميل جدا..لاتخافون منها يمكن يجي يوم تشتاقين للمدرسة بس صدقيني الجامعة غير
والكلام اللي فوق مجرد اجتهاد شخصي ممكن مايناسب البعض..! وممكن لا..!
فااختلاف الآراء لا يفسد للود قضية
ولولا اذواق الناس لبارت السلع
عموما..كل هدفي اساعد الضعيفات المستجدات اللي كانوا مثلي العام
وياليت انتوا تساعدوهم باللي عندكم..!
يمكن فكرة الموضوع قديمة..بس حبيت اجددها دام باقي كم يوم ع الكولج
الموضوع منقول حبيت تستفيدون منه وحابة اضيف شي
رتبي اغراضك واوراقك اول باول مثلا حطي لكل مادة فايل ترتبين فيها اوراقك عشان ماتتلخبطين
خصوصا ان الجامعة طول الترم اختبارات مو زي الثانوي وابدي بداية حلوة لان نتيجتك الاولى تاثر على مستواك بعد كذا
واهم شي لاتنسين اذكار الصباح كل يوم

بنوته جداويه

07-10-2022 - 11:15 am

روعه موضوعك
استفدت منه كثير
بما اني اخر سنه جامعه ان شاء الله
وحابه اغير لوكي جذريا

J O R Y

07-10-2022 - 12:16 pm

انا الحين ثالث ثانوي ومن الحين خايفه من الجامعه
يمما يمما وربي خخايفه
يسلمو على الموضوع الزيز

strawberry44

07-10-2022 - 01:17 pm

يسلمو حبيبتي
تقبلي مروري ...

ازهار الكادي

07-10-2022 - 02:18 pm

بنوته جداويه
اهلين حبيبتي الله يوفقك ان شاء الله وتتخرجين بامتياز