أأأههه من زوجي وامه وخالته وعمته و

1. هيا بالله عليكم اش عندها وبعدين تقول تعبانه


2. حتى لو سهران اتسلي دوريلك شي تستفيدي منه مو قرقة حريم


3. الرجال عيبه لو مايصلي او سكير هادا اللي ماتصبر عليه


4. ياعالم ام زوجك اتخيليها امك عمرك ماراح تفرقي بينهم بالمعامله


5. تتحشر بكل شي معليش طبع الكبار يحبوا يساعدوا يحبوا يتدخلوا

زوجي مره عصبي ويبالي اوريه العين الحمرا وارد عليه زي مايخاصمني اصارخ في وشه وزي مايسبني اسبه
وماذيني مره وكل يوم سهر وطلعات اوف منه مزعج ويهاوش على كل صغيره وكبيره مايصبر
زوجي حق حريم واكتشفته مع الشغاله ومع جارتنا وياربي منه مانطلع طلعه الا عيونه زي الرادار
اما امه مصيبه تقعدلي على الدخله والطلعه وتقول اكلي الاولاد انتبهي لهم هيا اشلها واشلي والا يوم تبغانا نوديها مستشفى هيا شوفوا كمان نتمشى تبغا تروح معانا اش الهم دا قاعده على قلبي مو طايقتها
اخته عقربه متهنيه مع زوجها وفوق كدا مو سايبتنا لوحدنا بس تبغا تجينا وتزورنا ناقصينها احنا والا شوفي زوجها مدلعه وهيا مو باين في وشها يستاهل وحده ست رقبتها
عمته وي وي ملسنه مره ماتسيب احد الا تتلاسن عليه وتدق بالكلام اش الحورمه دي كيف زوجها طايقها
خالته سوسه في الوش تضحك وتمزح ومن ورانا تقعد تحش ماراح ادخلها بيتي علشان كدا بناتها عوانس تستاهل والا زوجها موريها النجوم في عز الضهر هادي تستحق الدبح تستاهل
اخ من الخدامه وجع ماتقوم بدري واقولها سوي تعاند تقول تعبانه تعبانه من ايش ان شاء الله
تقوم تسعه وتكنس البيت وتغسل الحمامات بس وتغسل صحون الضهر وبراد الشاي وتقعد شويه مع البزوره وترفع غرفهم لو قربعوها وبعدين المغرب يجونا ضيوف او نسوي حلى وتقعد بالمطبخ ترتب واخر الليل ترتب العشا

هيا بالله عليكم اش عندها وبعدين تقول تعبانه

اقولها انزلي جيبي من البقاله ونزلي القمامه وكنسي الدرج والحوش تتافف وجع في شكلها لو ببلدها مو شايفه نص النعمه يتمردوا علينا لولا الحاجه ماجبتها بلاء لابد منه اش القرف دا مو طايقتها مره شوفي شكلها المعفنه لاوتطالع لزوجي من تحت لتحت قسم بالله لاافقع عيونها
بالله صدقتوا الكلام دا كله
كم بالله عليكم مر عليكم شي من كدا او اخس كمان هادي عينات قريتها وسمعتها ممن حولي اتفاجا بالكلام دا
ليه احنا فين عايشين في شفافيتنا في قلوبنا الطيبه النظيفه في تعلقنا بحبال الله
نجي لكل نقطه وحده وحده
زوجك مو هو ابو اولادك وهادا الانسان اللي يوم كنتي ببيت اهلك تقولي يارب ارزقني زوج يارب اتزوج ويارب ويارب ويوم تجي النعمه نقوم نسوي كدا

حتى لو سهران اتسلي دوريلك شي تستفيدي منه مو قرقة حريم

الرجال عيبه لو مايصلي او سكير هادا اللي ماتصبر عليه

الضرب تصبر راح ربي يجازيها بس عاد مو مره هو كمان يتمادى لالالا في حدو سهران مو مشكله والله يابنات في حريم ياما اشتكوا من رجالهم يوم راحوا بين ايادي الرحمن لطموا وحده كانت تلطم يوم زوجها يقضي لانه تبارك الرحمن يقضي بكميات كبيره يوم مات مالقت مين يجبلها شي
طيب اش عيب زوجك عصبي احتويه اسكتي يوم يبربر يرجع يسكت يرجع يستحي من سكوتك ويتاسف
مااتاسف مو مشكله مانقص منك شي تقولي صاحبتي زوجها يتاسف لها مو اصابعنا زي بعض لاتسمعوا لكلام الصاحبات نصيحه مايودينا ورا الا كلامهم واصحك تقارني بين حياتك وحياتها لكل انسان طباع
زوجك اتربى في مكان غير اللي اتربى فيه زوجها وكمان لكل انسان منطقة عمل يمكن عمله مريح عمل زوجك فيه ضغط
تقولي ليه يحط حرت عمله فينا طب هو لمين يتعب ويشتغل وينحرق في الشمس وربي خرجت كم مره بالظهر سرت مريضه زوجي يضحك عليا يقول زبده اقول الله يعينكم وبعدها سرت احرص البيت يكون بارد لما يجي ونكون هادئين
لكل انسان وظيفه اني بتتعبي هو بيتعب تقولي هو مايتحمل لانه ربنا خلق الحريم صبورات
اخواتي زوجك زوجك ضلك بالحياه بالله كل وحده تفكر بس لمجرد التفكير لما تجي تنام وتحط راسها على المخده بالله لو مات لاقدر الله انا اش اسوي اهلي يشيلوني اوكي طيب والمصروف والحمايه الا ماتجي مشاكل من اخ من اخت و وياما سمعنا
تقولي زوجي خاين اقولك اصبري لانه الله وعد وقال وبشر الصابرين وكم من زوجه كانت سبب في هداية زوجها
تقولي لبست اتشيكت احتويته مو باين في وشه اقولك اصبري راح يفتكرها يوم واله
حبيباتي نصيحه مني لكم اسمعوها وطبقوها
نجي لام الزوج ليه مو طايقته تدخل في اولادك خليها لانها تعبترهم زي اولادها لو ماتحبهم ماتنصحك لو ماتحبهم ماتقولي سوي وافعلي ماشاء الله يعني متعلمه وهيا اللي ربت بالكوم ماتعرف تسوي شي

ياعالم ام زوجك اتخيليها امك عمرك ماراح تفرقي بينهم بالمعامله

امك لو طولت لسانها عليكي راح تردي طبعا لا اجل سوي كدا مع ام زوجك هاديها بالهدايا البسيطه والله افتكر ام زوجي سويتلها هديه من صنع يدي وكتبت عليها اسمائنا انا واولاد يومها بكيت بكى وحسيت الفرحه في عيونها وبس تبوس الاولاد سبحان الله اولادي يوم يتنوموا بالمستشفى تبكي عليهم بطريقه غريبه يوم تودعهم وتسافر تبكي الله يخليها لنا
ام الزوجه بالمقعد الامامي ايوا ليه لا هيا مو كل يوم راح تجي معاكم اشفيها لو راحت اتمشت معاكم راح تاكل زياده راح تركب على راسي بدي اقعد بجو رومانسي مع زوجي ماحبكت هاداك اليوم
ام زوجي تبغا تبات عندي اخليها بغرفتي اش المشكله مو انسانه ولاننسى اولا واخيرا هيا ام الانسان اللي انا مرتبطه معاه ابو اولادي هيا جدة اولادي وهيا الخير والبركه

تتحشر بكل شي معليش طبع الكبار يحبوا يساعدوا يحبوا يتدخلوا

ههه اقولكم على موقف ستي الله يخليها لنا كم تنصحنا على اللبس وعلى الصلاه وتشوف وجيهنا تتلخبط وتقول ماعاد انصحكم انتوا تزعلوا تاني زياره لنا في بيتها تعيد النصيحه ههه رهيبه ربي يسعدها مايقدروا يشوفوا غلط ويسكتوا او يكتموا معلومه عارفينهم قلوبهم طيبه وشفافه طالعوا لهم بدا المنظور وراح تعرفوا بقيمتهم
اخت زوجي متهنيه طيب الله يزيدها صدقوني لولا لساننا كان كنا بخير يعني بلاش نقعد لدي ونشوف دي وهادي تستاهل وهادي ماتستاهل ومتهنيه قولي الله يزيدها ويعطينا
صفوا قلوبكم لو هيا اخت زوجك مو كويسه مصيرها تنعدل لو بعد عشرين سنه
تبغا تتمشى معاكم اش فيها اللمه حلوه اضحكي جيبي هرج يضحك مزح نكت أي شي بلالالاش حش في خلق ربنا
اعتبري اولادها اولادك راح تنبسط جربوا ماراح تخسروا شي
سمعتك كلمه مو طيبه احتسبيها الصبر حلو والله حلو ربي يحلي ايامكم
العمه سحاره طيب شفتي شي منها او سمعتي من الناس بس وعلى دا الاساس قولتي كلامك دا
ياجماعة الرحمن كانت وحده في العيله لانها قويه على زوجها يقولوا سحاره وكل اولادها الخمسه حظهم زفت ومطلقين و ومشاكل بالله عليكم بالعقل نحسبها لو سحاره ماكان عدلت حظ اولادها
طيب عمته سحاره حاولي تحصني نفسك حاولي تاكلي سبع تمرات على الريق حاولي تتحاشيها وبلاشي من انك تتكلمي عنها او تنشري خبرها الله يستر على الجميع
وحده من عمات زوجي الله يهديها كل ماتشوفني تدق بالكلام وربي في الاول ماكنت ادري تتكلم عن ايه وبعدين فهموني واطنش عادي توجع ازورها احد يموت اعزيها أي عزيمه احضرلها وهيا كل يوم تزيد في حقدها عليا ليه ماادري من الله
وكل عيد يوم تشوفني لازم ترزعني كلمتين في جنوبي ابتسم واسكت و احسها من جوتها تولع بس اش اسوي اتضارب اقوله اقطع عمتك لا مو من مصلحتي هادي صلة رحم خليها بكيفها ربنا موجود واللي كاتبه خير ليا راح يسير بحول الله
أي انسانه تحاول تدق بالكلام تلغوص بالهرج ابتعدي عنها صدقيني ماراح تستفيدي شي والخسران زي مايقولوا تقطيع للمصران
خالته سوسه وعلى قولتهم في الوش تضحك ومن ورانا تحش والله خير ونعمه تعطيني حسناتها وتاخد سيئاتي خليها
نقص مننا شي زاد شي لو اتكلمت عني طالما انا عارفه نفسي وواثقه منها مااهتز تتكلم من هنا لبكره وفي مثل لو طعنت من الخلف فلازم تعرف انك بالمقدمه
يعني لو مو القهر ماكان احد اتكلم عني لو انا مو انسانه ملفته وناجحه ومحبوبه ماكان اتكلمت عني بغيظ
الشغالات اه من الشكاوي اللي اسمعها من المخدومات للخدم ليه ياناس ليه يابشر ليه ياعالم
مو زينا والا حيوانات والا طواحين
وحده وقسم بالله تبدء الغسيل بعد الظهر تنتهي الساعه اربعه الفجر اقولها يابنت الناس ليه تقول ماادري كم مره الابيض كم مره الملون طيب والحماره دي تقول عادي تنام اربعه وتصحى تسعه
وي وليه تقول خلاص يكفي تكمل شغل البيت وبعدين تنام الظهر لالالا لااله الا الله
من اكثر الناس اللي فرحوا يوم السفارات حقت كل دوله حطت شروط لمكاتب الاستقدام حلال فينا لانه هنا اللي يسير استعباد مو شغل
قبل خمس سنوات اول ماحملت بولدي جبت دادا لاني كنت تبعانه واغلب الشغل عليها مسكينه وفي اشياء اتغاضى عنها وبعد ماولدت وسافرت واشتغلت يالله قعدت ابكي احط نفسي مكانها بالله مااحد فكر لو انا مكان دي كيف لما اهل البيت يصحوني سومياتي قومي غسلي وسخ فلان وسخ بالمبامبرز سومياتي قومي فلان استفرغ مسحي
سومياتي قومي بابا يبا شاي
سومياتي قومي انزلي تحت بابا جاب مقاضي وماادري ليه مايجيبها بنفسه يده مشلوله
بالله دحين تقولوا هما شعب نمرود ومنهم العاصي طيب ماعجبتك مشيها مو نسوي معتقل وهاتك ياكرف
في بيت اهلي الله يخليهم ليا يارب شغالتين بس لما اروح اساعدهم اشيل السفره اعبي بالمطبخ والله يقولوا مدام خلاص اجلسي اقول حرام عيله ماشاء الله من كم فرد ويخدموا من صبح الله اشفيها لو ساعدناهم
شغاله كانت عندنا والله كل طيب شافته مننا وسافرت يوم رجعت تشتغل ببيت تاني ماقدرت بس تدق علينا تبغا تجي عندنا وبعدين مسكينه مرضت وسافرت الله يخليكم ادعوالها وسمت ولدها على اسم اخويا والعامل سمى بنته على اسمي وولده على اسم بابا الله يسعدهم
المعامله ياناس هيا اساس الدين
فكروا شويه دايم اقول بالله لو لاقدر الله ربي اراد اكون شغاله ببيت احد انظف حماماتهم والقرف واغسل صحونهم والزفره
واتحاشى تحرشات شبابهم وابوهم ونظراته والعمه ولسانها الطويل وشغلها اللي ماينتهي وبنتهم والسفاهه
الحمدلله والشكر يارب كل دادا تسافر تكون مبسوطه وترجع تلكمنا يوم دخلت اسوي عمليتي قاعده الدادا حقتي تبكي عليا الله يسعدها
سلفتي وهادي قصه تاني كل وحده تقعد لسلفتها بالمرصاد ليه ماادري
والسلسله تطول وعارفه اني دوشتكم بس كلام في نفسي من زمان نفسي نعدل من نفسنا نفسي الحال يتعدل ونفسي ونفسي ويارب يكتب الخير
ياريتي نناقش الموضوع وكل واحد يحط بصمته فيه وياريت لو في حكايه من هنا او هناك تفيدونا يمكن لعل وعسى نستفيد بموضوع كتبته هاشمية من الظهر وكملته بالليل <<<< ازعاج
موضوعي مو مرتب او مزبرق مشوا حالكم
من تنقل الموضوع امانه تتحملها ليوم الدين تذكر المصدر والاسم لاني تعبانه فيه منقول ل