أبغاه يطلقني وأنا لسا ماتزوجت موضوعي مايحتمل التأخير شورو علي تكفون أنا خلاص تايهه

1. قلت له خلاص بنهاية الاسبوع اقولك قال اوكي خلاص..


2. أهلي ماقالوا لي شيء بخصوص الخطوبه ولاكلموني فيها إلا اخوي وبس


3. غير كذا احسه مو مهتم بنفسه :(

,’ السلام عليكم ورحمة الله وبركاته ,’
صباح / مسآإآء الرضآ والسعاده على قلوبكم يآرب ..
بنات أنا في هم وحيره وضيقه مايعلم بهآ إلا الله ..
بنات تكفون تكفون ساعدوني وربي الوقت يمشي وأنا لازم أحدد مصيري وأتخذ قراري ..
أنا كانت ملكتي في نهاية شهر 4 اللي فات يعني تقريبا صار لي 7 شهور متملكه ..
بس ماكنت اعرف اي شيء عن خطيبي ( هو ولد عمي )
ومن وانا صغيره كان يقولون فلانه يبغاها فلان , يعني تقدرون تقولون انها سالفة حجز له ..
المهم بعد ماخلصت الثانوي جلست سنه ماتيسر لي دخول الجامعه وجلست بالبيت
في هالفتره ولد عمي ( اللي هو يبغاني له ) يبغا يتزوج ف كلم أخوي ( كلم أخوي لان وقتها كان أبوي مريض ) , أخوي صار يماطل فيهم بحكم انه ابوي مريض واحنا مو فاضين لهالأمور
صاروا كل شوي يتصلون على اخوي يقولون هااه وش رأي أهلك ردو لنا خبر ترا احنا مستعجلين
اخوي جا وقالي السالفه كلها وقالي وش رايك ؟؟
مع العلم اني كنت عارفه انه يبغاني من زمان يعني تقريبا قبل مايتقدم لي رسمي بسنتين .
انا يوم قالي اخوي قلت له انت وش رايك فيه قالي وظيفته ( وظيفته حلوه )وقالي اشياء بسيطه عنه , بعدين قالي متى بتردين لي خبر تراهم مزعجيني ومستعجلين

قلت له خلاص بنهاية الاسبوع اقولك قال اوكي خلاص..

أهلي ماقالوا لي شيء بخصوص الخطوبه ولاكلموني فيها إلا اخوي وبس

امي مدري وش رايها ( امي كانت بالبدايه رافضه انها تزوج بناتها ل أهل ابوي بسبب تعاملهم السيء مع أبوي بفترة مرضه زياراتهم له من وين ل وين .....إلخ ) بالأخير يوم قلت ل اخوي مدري وش رايها قالي انا اقولها تكلمك , كلمتني امي وقالت هذي حياتك وانتي استخيري ... ومن هالحكي .
المهم انه انا استخرت مرتين وبعدها جاني العذر الشرعي وماقدرت اكمل استخاره صرت ادعي وكذا وحسيت اني لسا باقي متردده ماادري كيف كان شعوري تجاهه ..
بالمقابل أنا ماأعرف عنه ولاشيء ولاشيء كلمني اخوي وقالي هااه وش اقولهم انا سكت وقلت له مدري قال اجل اقولهم موافقه انا سكت لاني مدري حسيت اني متردده
قال خلاص بقولهم موافقه وقفلت الخط على انه بيقول لهم اني موافقه ..
انا حسيت نفسي تايهه مدري الي سويته صح أو غلط ..
بعدها بيومين قالوا بنملك ونسوي عزيمه بسيطه بإستراحه ونجتمع فيها ( يعني اهلي واهله ومرت اخوي وكذا يعني ناس قريبين مره )
صارت الملكه وهو ماشافني ولاأنا شفته هو يوم قاله اخوي ترا من حقك تشوفها
قال مايحتاج بنت عمي ومأدري ايش ..>>>> هنا الغلط لأني انا ماشفته
جا يوم الملكه طبعا ماطولت كلها كم يوم بس وهو مايعرف شيء اسمه ملكه ماكانو يبغون يسوون شبكه وكذا وهو مااستعد ماجاب معاه شيء ابدا
احنا جبنا القتوه والعصير وكل أغراض الملكه , بعدين اللي اعرفه انه الملكه تكون ع العروسه مو العريس !! هم قالبين الموضوع ملخبطين ..
يوم دخل انا مااكذب عليكم انصدمت فيه >>يعني فيه اشياء ماعجبتني
وبنفس الوقت أتوقع اني انغريت بكلام البنات (اخته وبنات عمي الثانيات ) يمدحونه وماأدري ايش وانا استعجلت ووافقت ..
هو بنفس ليلة الملكه طلب يكلمني ( قال ل أخته وهي قالت لي ) انا رفضت يعني لاني احس انه بدري وراح يمل وزي كذا ..
قبل يمكن شهر أو أقل ارسلت له مسج عادي بعدها ارسل وارسل مسجات ومن بكرا قالي برساله قال انه يبغا زواجنا يكون بشهر 3 أو 5 .. انا انصدمت لانه بدري وماكنت ابدا متوقعه انه يكون بهالسرعه ..
ارسلت له مسج وبينت له انه بدري وكذا ..
بعدها ارسل وقال ابغا اكلمك وافهمك ليش انا ابغاه بدري قلت انا اوكي >> يعني سمحت له انه يكلمني بالجوال ..
كلمني وقال لي انه يبغا يستقر ويتزوج ..... إلخ .
المهم بالموضوع واللي ابغا استشيركم فيه
هو اني أبدا ماأرتحت له يعني ماأكذب عليكم وعشان اكون صريحه معاكم بيداية مكالماته لي كان إنطباعي واحساسي عادي بالأخير صرت أكرهه مدري ليش !!!
وربي يابنات صرت بدال مايزيد حبي له وتعلقي فيه صرت أكرهه أو تقدرون تقولون أسلوبه صاره يكرهني فيه ..
انا انغريت بكلام البنات اللي قالوا لي عنه لانه ابدا مو نفس اللي كنت متوقعته نهائيا ..
هو مدلعني على الآآآآآخر كل شيء أبغاه بيسويه ويقول انه شهر العسل راح يكون بماليزيا وتخيلو بعد الملكه بيوم جاب لي هدايا واعتذر لانه ماكان يعرف كيف طبيعة الملكات وماكان يعرف عنها شيء ..
انا أحسه ماعنده شخصيه ممكن بسهوله يتغير رايه لانه انا احاول اقنعه بالزفه وهو رافضها لانه خايف علي بالأخير قالي انتي شكلك لو بغيتي شيء بتقدرين تقنعيني بسهوله ..!!!
غير كذا هو وش أقولكم يعني بالعربي ( بدوي بقراطيسه ) صحيح كلنا بدو لكن هو مدري شفيه !!؟ مع انه قد سافر كثير عشان شغله يعني راح وجا من المفترض انه يكون متطور شوي ..

غير كذا احسه مو مهتم بنفسه :(

والأدهى والأمر ان شكله يابنات مو عاجبني ومو بس أنا اللي قلته فيه غيري قالوه ..
وانا بالطول أطول منه بشوي وهو نحيف وانا جسمي ريان يعني مو نحيف زيه ..وربي يابنات شكله مو عاجبني بس يمكن اللي خلاني اوافق واستمر لاني انغريت بالسفريات واحبه لي .. يابنات وربي انه يعشقني ويقول وربي على قد ماسافرت ماأشوف مثلك بدنياي ..
وفيه اشياء كثيره ماتحضرني الحين ..لاني وربي تايهه تايهه وربي ماادري وش اسوي !!
بنات انا ابغاه يطلقني ويفسخ خطوبتي قبل ماأتوهق معاه بعدين ..
انا قبل امس استخرت وحسيت اني منجد كرهته وباقي لسا متردده لاني اخاف اتركه ويجيني واحد أسوأ منه مع ان الاشياء اللي مو عاجبتني فيه اشياء مهمه ..
والله يابنات انه احيانا اقفل جوالي عشان اذا اتصل ماأرد عليه ماابغا اكلمه صار حتى نفس العبارات اللي اقولها هو يقولها لي يعني عبارات الحب والاشياء هذي يقلدني فيها
انا ماابغا واحد زي كذا ابغا واحد له شخصيته وله رايه مايتنازل عنه .. مو كل شيء اوكي اوكي..
قبل يومين قفلت جوالي يوم وليله وكله عشان ماارد عليه اذا اتصل ويوم فتحت الجوال لقيت مكالماته له ورسايل وآخر رساله كاتب فمان الله ونتلاقا بشهر 5 (يقصد يوم الزواج) واتمنى لك الخير >> انا وقتها قلت اكيد زعل مني لاني قفلت جوالي طول هالفتره
ويوم كلمته لقيته عادي ولا كأن شيء صار يعني لهالدرجه توصل !!
هو يحبني ويموت علي وربي كلمة العشق قليله عليه وغير كذا اللي ابغا يصير واللي اتمناه بيسويه لي ..
بس مدري ليش انا اكرهه وماابغاه حسيت اني استعجلت حسيت اني توهقت معاه ..
بعدين احس ان الأشياء اللي قاعده تصير الحين قاعده تصير لصالحي يعني مثلاً
الشقه اللي كان بيستاجرها صاحبها ما رد له خبر وترك الشقه
غرفة النوم اللي بياخذها لما راح لهم مالقاها وأجل الشراء لبعدين
المهم جابه لنا قبل اسبوع تقريبا والمهر زي ماهو ماصرفت منه ولا عندي اي همه او استعداد اني عروس ولازم اجهز ..
بنات انا كل مااتذكر اني بعيش معاه ببيت واحد اتضايق وابكي ..
انا اكرهه وربي اكرهه كنت اتصنع له الحب مااحس انه فيه شيء طالع من قلبي له ..
الملكه أحلى ايام العمر انا ماشفت هالشيء بالعكس عكسها تماماً ..
في الردود الجايه يمكن اتذكر اشياء ماقلتها هنا اقولها لكم فيها لاني والله العظيم تايهه ومتردده ونفسيتي زفت وربي
انا حطيت موضوعي هنا عشان المتزوجات اللي عندهم خبره بهالشيء يقولو لي رايهم ..
تكفون تكفون ساعدوني ساعدوني اللي يفرج همومكم وكربكم لاتتركوني والله اهلي مايعرفون بهالشيء وانا قلت استشيركم أول ..
عارفه اني طولت عليكم اعذروني لكن وربي من اللي انا فيه قلت لازم افهمكم الموضوع من بدايته
وماابغا اتأخر بقراري لازم أستعجل قبل مايستأجر ويجهز للزواج وتتعقد الأمور ..
ياارب فرج همي ويسر لي اللي فيه الخير ياكريم ..
ملاحظه :
أنا عمري 21 سنه .. وهو عمره تقريباً 28سنه ..