أرجو من الله ثم منكم أن تساعدوني بآرائكم

السلام عليكم ورحمة الله تعالى وبركاته أحبتي اضع بين اديكم قصتي هده وأتمنى منكم أن تعطوني القليل من وقتكم ونصائحكم وجزاكم الله أفضل الجزاء
عمري 25سنة حياتي كانت هادئه ...كنت متفوقه في دراستي وعلى قدر من الجمال والحمدلله ..وكثار كانو يجو يخطبوني بس البابا كان يرفض وانا نفسي ما كنت مهتمة للموضوع فاستمرت حياتي واشتغلت وراتبي كان ياخدو البابا وهو بيعطيني اللي بدي استمر الوضع شي اربع سنين وكان يرفقني بكل تحركاتي تقريبا وكلما يتقدم حدا كان يلاقي اسباب للرفض فصرت أحس انو اتملكني وما عاد بدو حدا يشاركه فيي..في يوم رحت زياره انا والماما عند ناس منعرفهن وقابلت شخص عندا هو واهله وقتا كثير حبوني وبدن يخطبوني لهالشخص بس انا ماحبيتو ..حسيتو ما بيناسبني اولا كبير عني بالعمر وشكلوكثير عادي بس اصرو ياخدو رقم البيت ويكون تواصل..المهم مرت الايام وصار يتصل وطلب نحكي ع المسنجر وابابا سأل عنو وعرفت انو انسان بيشتغل منيح ولا بيشرب ولا بيدخن واخلاقو منيحه..لما كنت احكيه عالمسنجر عجبتني شخصيتو..كونت فكره انو انسان مسؤول وبدو يكون أسرة وهو صاحب القرار بحياتوبعدا صار يصر انو نتلاقى انا وياه برا مشان نتعرف ع بعض اكثر وانا كنت ارفض وقلو لازم بالاول يجي للبيت ويحكي البابا بس هو رفض وقال اني ما بسمع كلمته فقرر انو علاقتنا تصير بس صداقه ..فانقطعت الاتصالات وكل واحد راح لحالو...ومن وقتا شلت فكرة الارتباط من راسي..بعد سنة رجع وبيتمنى بس احكي معو وصار يحكي انو ندمان وما فيه يعيش بدوني ومن هالحكي..فقلت بعطيه فرصة ثانيه وبهالوقت كنت بعاني من ضغط البابا بكل شي بحياتي المهم اتقدملي وكان هو وعيلتو كثير مبسوطين بس البابا كان مو كثير موافق بس بالاخير وافق بعد ما اتدخلت كل العيله ..طلعنا مره نشتري لوازم البيت فصار يشتري بلا حساب وكان كثير مبسوط وكانت معنا امو في اليوم الثاني ماعاد بدو نكمل المشتريات وتغير شوي وكل ما اسالو بيقلي بس تعبان المهم مرت الايام واجا يوم الاتفاق ع المهر فقال للبابا شو طلباتكن البابا قال اللي بدك احنا المهم هو بعدين وتعيش بتني بسلام بس هو ما عطى شي يليق فيي ومع هيك قالنا الخير لبعدين بس كان شرطنا الوحيد نسكن لحالنا وهاد كمان اقتراحن كمان المهم عملنا العرس بس امو ما عادت فرحانه مثل اول واختو كمان عمرهافوق 40ومومتجوزه بعد الجواز بيكون شهر عسل بس كل ما اطلب منو نسافر بيقول بعدين والاجازة كانت قربت تخلص لضل اسبوع سافرنا بس لقينا اخوه ومراتو ناطريناوانا كان بدي بهالفتره نكون لحالنا وطول السفر ما كان يحسبلي حساب ولا يسألني ازا بدي شي ..رجعنا للبيت وكان رمضان فقال لازم هالشهر نقضيه مع عيلتنا قلت اوك بس الوضع ما عجبني ومع هيك كنت متحملة يعني طريقة عيشتن واكلن مو متل بيتنا وامو كانت مريضة وقتا وكنت حضرلها الاكل واهتم ببيتي وبساعدن لما خلص دوامي ومع هيك ما كانو يعاملوني منيح حكيهن معي قليل مع اني لسا عروس وحاسة حالي غريبه وسطن ..واتحملت كل هاد يعني جوع ومعامله مو منيحه ..ليوم وحكيتلي اختو حكي مش منيح ما قدرت قلها شي بس نزلت ع غرفتي وضليت ابكي لحتى اجا هو وخبرتو فصار يطلب مني اطلع افطر معن انا رفضت لبكره نزلت امو وصارت تحكيلي احنا جبناكي لبيتنا وانتي بدك تفرقينا انا انصدمت من حكيها وبعدين قالت يلا تفطري معنا فطلعت وما حكيت كلمه لحتى خلص رمضان واجا العيد وعيدت معن واجو اهلي عايدوهن وبعدا كل واحد صار عايش ببيتو بس طول الوقت تشتكي فيي لاهلي وتقلن هي ما بتجي لعنا مع اني ما كان يمر اسبوع الابكون عندن لانو وظيفتي بتاخد نص وقتي وكمان شغل البيت كلو فوق راسي اما زوجي فكل ما قلو بدنا شي للبيت بيحكيلي مو هلأ مع اني بطلب الضروريات بس وانا ما كان فيي اشتري شي لانو عليي دين وومو من اول يوم اشتريلو كل شي ومع هيك صبرت وكنت جيب كثير اشيا من بيتنا .مرت الايام وفي يوم اجات عندي الماما فالتقت امو بالباب وسلمت عليها بس امو صارت تسب ع امي سمعت الحكي ففتحت الباب وفوتن ع البيت فصارت تحكي انو بدنا نخطفن منها ابنها انو ابنها لسا تحت حضانتها مع انو عمرو فوق 40 وقتا انا اجاني انهيار عصبي لحتى اجا ابنها وخبرنا القصه فصار يتأسف وراح لعندا ثاني اليوم حكالي يلا صالحيها وبوسي راسها انا قلتلو هي اللي غلطت فيي وفي امي فقال لازم تتصالحو قلتلو اوك بس مو هلأ وطلبت منو نسكن بعيد عن بيتن بعد يومين اجا وبيكررلي نفس الحكي وقتا ما قدرت اتحمل وحكيلتو انو خلاص ما عاد فيي ولازم ننفصل ولميت ثيابي وحطيتن بسيارتي وطلعت لامي فرديتني الماما عندو وسألتوعن السبب فقالها خديها معك لحتى ترتاح مر اسبوع وانا بقلو نرجع لانو البابا بلش يشك وما بدي قلو لانو الوضع رح يتأزم اكثر بس هو ما رضي يرجعني لحتى في يوم رحت لعندو وقلتو شو قررت بيقلي لسا ما قررت شي يومتا من كثر الحكي اللي براسي عملت حادث واجاتني الضربة براسي وراحت سيارتي اخدوني للمشفى بحاله كثير صعبه وعملولي غرز براسي فحكي الدكتور انو ممكن تصير معي ازمة طول الوقت كنت بصرخ وما بعرف شو حوليي لحتى اجات هيي ولقيتني بهيك حاله وانا بصرخ وقول اخرجو ما بدي حدا يشوفني هي فكرة انو بقصدها هي وراحت خبرت ابنها واولادها..رجعت لبيتنا ومن وقتا ما عم يسأل عني ولا بيشوف شو بدي والبابا والماما متحملين كل شي فلما سألتو ليش هيك فبيقلي اني طردتي امي فقلتلو انا ما كنت بوعيي بس ما كان يصدقني وبتصل فيه ما يرد عليي وراحت خبرت اولادها اني طردتها من بيتها بس انا والله ما طردتها وخبرتن اني ضربتها وانا والله ما ضربتها المهم صارت تتهمني بالباطل ولا حد يصدقني ومع هيك راحت عمتي والماما يستسمحوها بس ما رضيت واهانتهن وهو موقفو كثير سلبي اتجاهي وعرفت انو ما عندو شخصية وانا ما عدت بدي ارجعلو بس المشكله البابا ما بيعرف شي عت هالموضوع وازا خبرناه رح يلومنا وما بعرف شو ممكن يساوي انا محتارة ومو عارفه حالي شو اعمل اوقات بتمنى لو كنتت متت بالحادث بس الحمدلله على كل حال
اتمنى ما اكون طولت عليكم والله يخليكن ويوفقكن بحياتكن ساعدوني بنصائحكن دمتم بود