أفكار للعرس

1. بعدها الكل انتظر لحظة دخولي لكني خيبت ظنهم مرة ثانية (هاهاي)

أولا حبيت أبارك لك المالجات وعلى وشك الزواج.. وأتمنى للمتزوجات حياة سعيدة وهانئة
ثانيا.. راح أذكر لكم أفكار بسيطة سويتها أنا في عرسي.. واللي كان من فترة بسيطة (شهر 2) ..صحيح إنها صغيرة ويمكن ما تفيد بعضكم بس بصراحة الكل انعجب بالعرس( الحمدلله) فأتمنى إني أفيد بعضكم بها وأسمع تعليقات البعض الآخر عليها.. علشان ماأحس إني رزة في المنتدى ومالي وجود.
.. في البداية وضعت ستاند كبير عند باب القاعة وعليه دفتر للتهاني .. وكل ما دخلت وحدة للعرس تكتب لي فيه شئ.. وهالحركة سويناها للحريم ولقسم الرياييل بعد .. وطبعا زخرفت الدفتر والستاند بأشياء تناسب جو الحفلة
وعلى الطاولات وضعت التوزيعات ( وهي أول نوع من التوزيعات) بطريقة مبتكرة.. دخلت البالونات وسويتهم على شكل قاعدة وبعدين حطينا بالونه شوي كبيرة في الوسط ..لونها شفاف وبداخلها وردة حمراء.. ومن بين البالونات طلعنا عصى صغار مربوط فيها من فوق أكياس ملونه( يسمونها خرايط) فيها حلويات ومكسرات
وطبعا كان في العرس عرض لبور بوينت يشتغل من بداية الحفلة.. بالأول كان مجرد ترحيب بالضيوف .. وبعدين عرض قصة صغيرة عن العروسين.. يعني حطينا صور العائلة.. أولا أهل ريلي (صورة+ كلمة تهنئة منه للمعرس ولي) ونفس الشئ بالنسبة لأهلي.. وبعدين في فترة العشاء كانت مجرد كلمات (بالهناء والشفاء) أو (بالعافية ) أو ( صحتين وهنا) وشئ من هذا القبيل.
دخلتي كانت كالتالي: ( أنا طبعا من النوع اللي ما يحب أكرر الشئ.. أو من النوع اللي يمل من الروتين علشان جذي ما حبيت إني أحط كاسيت موسيقى لحظة دخولي مثل باقي البنات.. لأن هالحركة بصراحة وايد سووها..ياإما أغنية أو موسيقى كلاسيك) بس طبعا لأني وايد رومانسة حبيت أدخل الكلاسيك في دخلتي.. فشو صار
أولا.. كنت محطية جهاز للدخان عند باب القاعة وواحد ثاني على الكوشه..وقبل ما أدخل غيرنا التوزيعات الموضوعة على الطاولات بوحدة تناسب دخلتي .. وهي عبارة عن أكواب زجاج كبيرة شوي موضوعة على قاعدة تدور ويخرج منها ألوان وبداخل هذه الأكواب مادة تشبه الثلج ووردة حمراء مغروسه في الداخل .. فلما أطفأنا الإنارة أعطت منظر وايد جميل
وبعدين بدأت الدخلة بشريط مسجل يحكي قصة هذا الزفاف وأنه سيكون يوم عجيب من عجائب الزمان.. سيذكره التاريخ مهما طالت الأزمان... طبعا أنا مب متذكرة كل الكلام بس كان بهاالمجال.. وتقدرون تضيفون أو تكتبون أي شئ تبونه.. وبعد ما الراوي يخلص القصة يقول.. وخرجت ملاك صغير من بين الدخان ( طبعا هني يشتغل الدخان.. فالكل يتوقع إن أنا اللي بدخل) ويظل يوصف هالملاك اللي اتضح بعدين للناس إنها بنت صغيرة لبستها أنا ملابس ملاك أبيض ووضعت لها أجنحة فيها ريش وعصا ذهبية بيدها وطوق ذهبي على راسها.. وطبعا الإنارة عليها فقط.. وظلت تتكلم بحوار بسيط على أساس إنه ترحيب فيني وتبارك لزواجي..

بعدها الكل انتظر لحظة دخولي لكني خيبت ظنهم مرة ثانية (هاهاي)

فدخلت قبلي وحدة تعزف كمان (وهذه كانت المفاجأة) .. ظلت تعزف مقطع وبعدها أنا دخلت (طبعا بعد ما شغلوا الدخان) وظلت تعزف لحد ما وصلت الكوشه.. وبعدين كملت الفرقة العزف.. وكانت الكوشة رهيبة بعد.. ما أعرف أوصفها بس فيها ثلج ومكان للربيع وفيها مثل الأمطار وفقاعات الهواء اللي تخرج بين فترة وثانية .. هذا غير الإضاءات المختلفة عليها.. وحركة الليزر اللي مكتوب فيها إسمي وإسمه.. وبعدين وزعنا توزيعات ثانية للناس على سكل أشياء طبيعية وفيها أدعية ( وإن شاء الله ناخذ أجر عليها)
فكرة ثانية عملناها لدخلة المعرس.. إنه قبل ما يدخل تركنا أطفال صغار (إيولون) يعني يرقصون يواله.. كانوا سته تقريبا .. لابسين نفس اللبس وشايلين سلاح.. الصراحة كانوا رهيبين.. وتركناهم بعد يرقصون في فترات متفرقة من العرس فأعطوا جو حلو..
وبعد في حركة ثانية كانت عبارة عن بالونات كبيرة موضوعة على جانبي الكوشه (في البداية الكل استغرب من وجودها بس بعد ما سوينا الحركة الكل عجبته) ..المهم بعد ما وصل المعرس عندي فجروا البالونات الكبار فخرجت منها بالونات صغار فيها غاز الهيليوم.. فطارت كلها فوق (نفس الحركة اللي سووها في دورة الخليج بأبوظبي)
آخر حركة ( وكانت مفاجأة حلوة بالنسبة لي) إن ريلي أو كما يقال زوجي وقف وبعدين وقفني وعطاني شئ.. شو تتوقعون؟؟؟؟!!!!! وردة كبيرة ( هي عبارة عن باقة بس مشكلين أوراقها على أساس وردة حمراء كبيرة) والله وايد استانست من الحركة.. حسيت إنه رومانسي وايد.. وعطاني هالوردة جدام كل الناس.. الله يحفظه ويخليه لي إن شاء الله.
طولت عليكم .. ما عليه اسمحوا لي .. حبيت بس أفيد بعضكم.. وإن شاء الله عجبتكم أفكار العرس.. انتظر التعليقات (إن وجدت).. ولكم الشكر