اتطلف او اعيش بحظن زوج خاين

1. وفعلا رحت له

السلام عليكم
صباح الخير اخواتي
ماادري من وين ابدأ فصدمتي كبيرة لكن مو غريبة لان الغالبية مرو فيها
الخيانة
بقولكم قصتي وبغير بعض التفاصيل لان لي بهالمنتدى اخوات وصديقات ماودي ينكوون بالنار اللي كوتني
انا بعدت عن زوجي فترة طويله قرابة 4 اشهر
لسفره لأحدى الدول للعمل
وبعد مااستقر هناك شهر وشوي اصريت اجي لاني كنت مشتاقة له وهو يتعذر بظروفة وكل يوم يصرفني ويقولي الاسبوع الجاي
زعلت وطنشت وتدلعت وعصبت وهددت وكله مانفع معاه الين تدخل اخوي الكبير بالموضوع وقال خلاص بجيبها

وفعلا رحت له

طبعا كنت مجروحه منه كثير كثير لانه كان يشوف عذابي بعينه ويقول مقدر بس بالكلام ولارحمني ورحم ضعفي ولاجابني له الا لما فعلا كرهته <<<بتستغربون ليش كرهته بس لأسباب شبيهه لهذي وكل فترة تصير مااقدر افصل اكثر
المهم ماعطيته وجه وعادي مابينت اي شوق واي تفاعل لان من جد احس انه غريب عني ماكنه زوجي اللي بكمل معه 4 سنين زواج
اطالعه واقول معقول هذا زوجي معقول كنت عايشه مع هالشخص
وربي حاله غريبه كني بحلم ماادري كابوس
المهم طلبت جواله لاني بكلم اهلي واطمنهم علي
ومن اخذت جواله وهو يقول شتسوين ووهاتي ماعرفتي تدقين هاتي اعلمك
وواضح انه مرتبك وتغير وجهه واسود
دقيت على اهلي ماردو عشان رقم غريب جيت برسل رساله مارعرفت وارسلتها فاضيه
جيت بدخل على الرسايل المرسلة عشان اعيد الارسال بدون مااكتب الرقم
شفت اسم بنت مخزن
#ويقول لها ممكن اشوفك
#ورسالة ثانيه ماتوقعتك كذا انا كنت ابي اوقف معك واساعدك
<<لف راسي ماكملت الرسالة
ورحت اكلم اهلي بغرفة ثانيه وهو مرتبك
ويوم خلصت جلست بالغرفة ثانيتين بعد ماسكرت جاء طاير للغرفة
قالي وش فيك ليش ماكلمتي عندي وانا عارفة قصده خايف اشوف شي بجوالة
المهم جلست دقيقتين قلت له بروح انام
قال غريبه شفيك فيه شي
قلت لا مخنوقة بروح انام
قال لا وش فيه وليش تغير مزاجك وانقلبتي انا سويت شي
قلت لا
رحت الغرفة
وجاء يحقق معي ويحاول فيني قلت له مااقدر اتكلم خلني
وزعل وطلع
لحقته وقلت اني شفت الرشالة وكذا
قالي خليني افهمك ومن هالكلام
قال هذي معي بالعمل وانها كبيرة واحترمها وارسلت لها ممكن اشوفك عشان نتكلم بالعمل ومدري ايش
قلتلو والرسالة الثانية قالي لالا بس من طيبتها قلت لها كذا اني ماتوقعتك كذا
<<والله انه نصاب ومايعرف يكذب
وقلت له طيب حتى لو مابينكم شي تكلمها وترسل لها رسايل شخصية ليه؟؟
وليش مااعلمتني عنها؟؟
وجلس يحلف ويقسم ويدور بالغرفة يدور مصحف يبي يحلف عليه وانا قلت له لاتحلف يمين كاذب
قال لا انا اخاف الله ورجال محافظ عليك ومن هالكلام
ووعدتك مااخونك وانتي وبنتي الوحيدين بحياتي
قلت طيب خليني اقرا الرساله طبعا رفض قلت اذا واثق من نفسك خليني اقرا وافهم مدام تبيني اصدق
يالله وافق والجوال بيده وقال انا بوريك
طبعا نزل عند رسالة وعنوانها انا مبسوط قلت ايوا وريني هذي
وتوهق وارتبك
ودخل عالرسالة
ومكتوب فيها انا مبسوط اني كنت معك انتي غير وانا اخترتك من بد الناس

• -

<<بالله عليكم وشو اسوي اذبحه!!!!
قلت له ياشيخ خلك صادق قلي شي يخش مخي
قال لا انا قلت لها كذا عشاني اجامل واقولها انس غير زي امي وكذا
<<والله لو اني بزر اصدقك
قلت شف اهون علي تقولي الصدق وانك تعرفها ولاتكذب بوجهي
قل الصدق احسن لك
المهم قام يلف ويدور ويحاول يقنعني ولابينت له ان عندي استعداد اصدقه
قلت سكر ع الموضوع انا ابي افكر واقرر وش اسوي
قال شلون يعني
قلت ابد بس بقرر اصدقك اولا
طبعا
انا طاحت عيني على اسم ثاني مخزن وراسل لها بلإنقلش
وسألت عنها قال ماعليك وغير الموضوع
وقلت له انو والله لو اشم ريحة الخيانة لأرجع لاهلي واخلعك ماراح استنى تطلقني
وقهرني يوم قلت له انت تتوقع اني بصدقك بمنتهى السهولة
تعرفون الرجال لما ينحشر بالزاوية ويتوهق يقول يتكلم بدون تفكير ويقول كلام يدينه ومن ضمنها
قام يخورها وقالي انا عارف عشانك تحبيني وواثقه فيني اكيد بتصدقيني
وش العمل يابنات احس اني بنجن
تصدقون دمعه مانزلت
احس بجمود مو طبيعي
حتى وانا اتكلم معه بمنتهى الهدوء
انا فعلا افكر اني اضف قشي وارجع لاهلي