اخواتي هذه قصتي اتمنى تعطوني رائيكم

السلام عليكم اخواتي العزيزات
انا حابه اقول لكم قصتي واعرف ارائكم فيها لان الحيرة قتلتني
\\
انا إمرأة متزوجه من 4 شهور تقريبا بعد فترة خطوبة دامت 5 سنوات
المهم تزوجت شهر 8 الماضي
من اول يوم حياة زوجية مع زوجي وانا في مشاكل لاحصر لها
كل يوم تصير بيننا مشكله وتنهار اعصابي واصرخ واطلب الطلاق منه
اول مره طلبت منه الطلاق كان ثالث يوم في زواجنا
المهم هو يحبني من الطفولة على كلامه طبعا وانا مااحمل له اي شعور
لكن مراعاة مني لمشاعره لما يسألني تحبيني اجاوبه ايه احبك ..
المهم دائما زوجي كلامه قاسي مادري هو يتعمد ولا طبع فيه
اول اسبوع من زواجنا اخذني لبيت خاله ووراني بيت خاله وقال لي خالي عبقري
مركز ومال ومنصب وزوجتين ... شوي ولا يقول لي زميلي بالعمل ماكمل سنه
زواج الا وهو ماخذ الثانية ... يعني كل كلامه يدل على انه مع وبقوه الزواج الثاني
اذكر مره قال لي لو كنت مقتدر ماليا عادي اتزوج الثانيه طبعا هالكلام وانا لسه مالي معه اسبوعين حتى
كان يتكلم معي قدام الناس مثلا موظفين المطار او عمال المطاعم بستهزاء
مره كنا بالطيارة ودار بينه وبين الكابتن والمظيفين كلام طوويل جدا قبل بدأ الرحله حتى انهم اخروا وقت الاقلاع
سألته بصوت منخفض إيش القصة عسى ماشر؟؟
جاوبني بكل ثقة وصوت عالي سمع الرجال اللي معه (( يعني لو شرحت لك راح تفهمين ؟؟))
انزعجت بقوه وبكيت لكن بدون مايحس فيني ... بعدها بدقايق قال لي طالعي من زجاج الطيارة
بيوريني شي المهم ماقدرت اشوف قال لي (( انتي مخك تخين))
طبعا غيرها اشياء كثيره ... كنا اول زواجنا اول اسبوع تقريبا دائما يشدد على كلمة انتي لازم تتغيري
وانا ماادري هو ايش قصده ... طبعا يتكلم 24 ساعه عن زوجة اخوه يبيني اصير صوره منها
انا عروس مالي ثلاث ايام اجبرني ازور خالاته ببيوتهم واجبرني ازور زوجة اخوه رغم انها تهربت
من زيارتي اكثر من مره ومشيت الموضوع
دائما يقول لي انتي كلك حلوه ماشاء الله عليكي
ويرجع يقول لازم تتغيري.. ارد عليه انت عرفتني اصلا حتى تعرف من اكون او ايش لازم اغير؟؟
طبعا كان تفكيره لازم اطيعه دائما بدون مااعرف سبب اوامره او حتى اقتنع فيها
من اول يوم زواج كان يبيني عند امه 24 ساعه وهو يطلع يسهر
وكنت ابكي واقلب الدنيا ويراضيني ونبدأ يوم جديد ومشكله جديده
المهم بيوم من الايام كنت مريضه جدا وكان هو مسافر
اتصل علي وقال لي كلام جرحني بقوه ... هو قاله فضفضة وقتها لكنه جرحني فيه بقوه
قال انا انصدمت فيكي ماتوقعتك كذا ... قصده بعد ماتزوجني انصدم باخلاقي واسلوبي وتعاملي
المهم انهارت اعصابي وصرت ابكي بصوت عالي سمعتني امي
وشافت الجوال بيدي عرفت انه السبب اصرت احكي لها وحكيت له
اتصلت عليه وعاتبته بقووه وهي تبكي على حالي
قطع سفره ثاني يوم وجا اتصل علي من الشارع قال اطلعي
انا رفضت اطلع قلت ادخل سلم على اهلي اول رفض وبعد محاولات كثيره راح
ورجع بعد ساعه ومعه امه ...
المهم امه سألتني راح تروحي مع زوجك<< تعمل نفسها انها مو عارفه بشي
قالت لها امي اكيد بتروح تجلس هنا كيف وزوجها موجود
قامت امي بعد ماطلعت حماتي تسلم على زوجي
انا طبعا كنت احضر اغراضي ومادخلت عليه لسه
المهم شوي اسمع صراخ وصوت عالي والباب تقفل بقوه
طلعت امي تبكي
تقول زوجك اهانني وتطاول علي وقلت لك اجلس بأدبك ولا اطلع من بيتي المهم هو طلع
شوي ولا يتصل علي يقول اطلعي يالله
انا كنت منفعله من دموع امي بقوه وقلت له مو طالعه معك وطلقني .. طبعا تسفه علي وقفل الخط بوجهي
رديت اتصلت عليه وسبيته وشتمته وقلت له لو فيك ذرة رجوله وكرامه طلقني انا مااحبك
نفس الشي قفل الخط بوجهي
عرف والدي بالموضوع وعصب علي جدا واتصل عليه على اساس يقول له تعال خذ زوجتك
لكن رفض يرجع ...
ثاني يوم جاتنا امه الصباح قالت لامي ليش تعملي بولدي كذا؟؟
المهم حماتي قالت لامي ان زوجي قال لهم ان والدتي سبته واهانته وطردته
ولا بعد تقول بنتك اللي هي انا مرسله له مسجات على الجوال قليلة ادب
وانا والله ماادري مسجات شو او كيف او متى؟؟
المهم عدى كم يوم وجا عمي ابو زوجي عندنا بالبيت وقال للوالد بنتك غلطانه بنتك قليلة ادب
مسجاتها على جوال الولد تقول انها قليلة ادب ومن هالكلام المهم الوالد ضربني وقتها لانه صدق عمي وقال لعمي اتصل على زوجها خله يجي ياخذها
اتصل عليه ابوه ورفض يجي بيتنا
طبعا ابوه راح ورجع اتصل على الوالده بعد كم ساعه وقال له يابو فلان ليش تهدد ولدي وتقفل الخط بوجهه
ابوي انصدم قال انا ماقفلت الخط بوجهه ولا هددته ولا حتى شفت وجهه
بعدها بااسبوع رجع عمي لنا وقال زوجها يقول مايبيها وعمل لي وكالة حتى اطلقها بالمحكمة
انا انصدمت
وجلست اسبوعين تقريبا وانا على اساس في العده مو هو طلقني خلاص...
بعد مروراسبوعين او اكثر ولا امه تتصل بالليل على امي تبكي
تقول ولدي يحبها ويموت فيها ومايبي يطلقها ؟؟؟ هذي صدمة طبعا
على اساس طلق وانا خلاص صرت بالعدة
وقالت اكيد هذي عين صابتهم ومن هالكلام
طبعا الوالد عرف وقال هذي حدود الله حرام اللعب فيها
قام اتصل على عمي وقال له ولدك طلق ولا ماطلق
عمي قام يصارخ ويسب بالوالد ويقول له طلاق ماحنا مطلقين واشتكينا للمحكمة ورسايل بنتك اللي
على جوال ولدي كلها نقلها لجوالي وبحطها بالمحكمة لو اشتكيت
طبعا احب اوضح شي :: اني بعد فتره اتصلت على زوجي قبل ماتصير كل هالتطورات يعني بعد
ماسبيته بيوم رجعت اتصلت عليه واعتذرت منه صحيح اهانني وسبني وسب اهلي بس سكتت
وقلت وقت غضب اتحمله شوي واعتذرت وقال لي روحي انا ماابيك بطلقك ))
طبعا اساس المشكله هو كان رافض يجي ياخذني من بيت اهلي لازم ابوي بنفسه يوديني له البيت
الصباح وهو يجي البيت بالليل بعدين يفكر هل بيتفاهم معي ولا لا؟؟
بذمتكم شفتوا اهانه اقوى من هذي؟؟
انا اللي ذابحني والله انه كان يقسم لي على المصحف انه يعشقني للجنون
كان فيه كلمه يرددها دوم (( يقول إستغفر الله العظيم والله ياحبيبتي لو ماهو حرام كان عبدتك))
كان يبوس رجولي اقسم بالله لو شافت دمعه من عيني ؟؟؟؟
كيف الحين صار يهددني وفاضحني بين الناس وقال لاهله كل اسرارنا الزوجيه بأدق التفاصيل
خلى امه واخواته يدخلون بيتي في غيابي يفتشون اغراضي؟؟؟
وبالرغم من هذا كله قلت الطلاق صعب واهنت نفسي واتصلت عليه امس
رد علي بكل برود انا صحيح احبك وماكنت اتصور ممكن اطلقك بيوم من الايام بس خلاص
كلها كم يوم وتوصلك ورقتك وروحي تزوجي واحد من الالف اللي كنتي تتمنينهم وانتي على ذمتي!!!!
\\
بالله يااخواتي دلوني هذا لو صار وحاول بيوم من الايام وهذا في عداد المستحيل طبعا انه يرجعني
بالله عليكم اكون عاقله لو رجعت له ؟؟؟
بس اني متندمه على عمري اللي ضاع على حسابه 6 سنوات من عمري ضاعوا وانا معه
5 وزياده خطوبة والله مخطوبه له وهو لسه طالب مستقبله مجهول وقبلت بكل شي كان يحطه
لاشهر عسل ... ولا بيت زي الناس حتى المكان اللي كان يشتغل فيه ماكان يرضى ياخذني معه
ورضيت عشت معه من الاربع شهور اقل من شهر
والان بيعمل هذا كله معقول في زوج يعمل مع زوجته كذا
انا قلت لكم قصتي حتى تقولوا لي انا لو تطلقت منه هل هذا صح ولا غلط؟؟؟
وللعلم اهلي حالفين لو رجعت له ماادخل بيتهم لا أحياء ولا اموات
دلووني بالله وش الحل..؟