اذا كان الزواج في البيت وش افكاركم علشان يصير روعه

وعليكم السلام ورحمة الله وبركاته...
اذا كان البيت كبير يفضل انك تشيلي اثاث البيت كله وتحطي مكانه طاولات وكراسي...كذا حايكفي ضيوف اكثر..
وتحطي على كل طاوله ثلاجة قهوه وحلى ومعجنات وفناجيل ومويه...
يعني زي فكرة القاعه تمام... (بس قاعه مصغره )
وحطي عند مدخل البيت طاوله عليها صورتك وحلويات و اوتوجراف يكتبو لك فيه المعازيم
وحطي اكياس كمان عشان العبايات..
اذا المعازيم موزعين في البيت ...وحابه انه الكل يشوف زفتك..أعملي عرض مباشر ..يسير المعازيم اللي في المجالس الثانيه يشوفو زفتك بعرض مباشر على الشاشه ..
ان شاء الله اكون افدتك اختي..
وبالتوفيق...

حبيبتي بعد البحث في النت عن حفلا ت في المنزل مثل الخطوبة او الملكه او الزواج
لقيت موضوع لاحد الاخوات الله يسعدها وراح انقله لك من باب المساعدة راجية من الله ان يكون لي دعوة منك في ظهر الغيب بتفريج همي وشفاء عيالي ان شاء الله
تجهيز الحفلات في المنازل
روحي دوري لك مكان فاضي بأحد غرف اليت بالسطح او بالبدروم او باي غرفه
وخصصي فيها دولاب كبير تبينه خشب او بلاستك او او اللى تقدرين عليه
واذا عند كدواليب قديمه تنفع تستغنين عنها لتجميع هالأشياء اللى راح اقول لك عليها
بتقولين ليش!!
وأقول لك ليش!!
فرضآ صار عندك مناسبه بالبيت وتبين فازات وورد وتزيين راح يكون مكلف
ولو حسبتيها لو شريتي بعض من هالأغراض وخليتيها عندك راح تخدمك مدى العمر
بينما بذاك اليوم تدفعين اضعاف مضاعفه وتروح الفلوس
حكمي عقلك وافهمي معي زين
هلحين هالفازات منتشره وبرخص التراب وبكل مكان
لو اخذتي احجام منوعه مثلآ من الأحجام الصغيره وهي كم حبه
والأحجام الكبيره مثلآ عدد اربع حبات
وراح اعلمك وش تسوين فيها بعدين
ثانيآ راح تلاقين عندك بالبيت اشياء غير مستهلكه وتشوفينها
وتعجبك وماتدرين وش تسوين فيها..ضفيها على جنب وانقليها معنا لغرفة الشغل
ثالثآ
الكريستال والخرز واشجار اللولو الصغينونات هاذي تسوين فيها حركات خطيره لاحظواهنا
الورود الطبيعيه
احيانآ تكون عندكم مناسبه حاولى تجمعين الورد كله وتحطينه بغرفه مظلمه بعد ماتفككينه عن بعضه
وبعد ماينشف احفظيه بعلبه كرتونيه وضفييه على جنب مع الأغراض اللى بننقلها للغرفه
الله يعينكم ههه
عندك بعد
اغصان الأشجار الخريفيه وهاذي لب الموضوع
والله اني وانا امشي بالشارع واشوف ه الأشجار احيانآ مرميه بهالأرض ينتظرون البلديه تاخذها
وهي مو بالبلديه اللى ياخذونها يبيعونها والله العالم على محلات تزيين الهدايا والحفلات
يعني اذا عندكم استراحه او مزرعه او شفتوا شجره يابسه ميته مرميه بهالارض
لا تفوتكم تراها كنز ههه اي غصن ينفعنا لأن الأغصان صايره
موضه وراح اقول لكم فيها أفكار روعه
وعندكم الريش
الريش شي خطير مااشوف له ديكورات منتشره
والريش هذامتوفر بكل مكان وأكثر شي عند محلات الكلف وادوات الخياطه
لكن عندك بالسويلم محلات تبيعه الجمله تطلع الوحده تقريبآ 13 ريال وبالحبه 14 ريال
يعني لو تاخذين لو نين درزن كامل وتضفينه مع عفشنا اللى بالغرفه ياسلام بأسوي فيه حركات شي
نكمل الجزء المتخصص بتجميع الخامات اللى راح نستهلكها
احيانآ تلاقين عندك اقمشه ماراح تحتاجينها وتكون من الساتان الحريري او التل
أو الأورجنزا وكذلك الشالات بمختلف انواعها لها معنا نصيب الأسد
وللاحتياط لو ماعندك أقمشه
يعني مو براعية تجميع اقول لك
الساتان الحريري متره بخمسه او عشره ولو بتشرين لفه كامله
بتكلف يمكن ب3 ريال للمتر
تصير اللفه كامله يمكن بأربعين ريال او بخمسين وتلاقينها
عند السويلم بشارع الخزان
اذكر محل كبير يبيع جمله شي روعه
شوفوه هنا بخلفية الصور شلون متموج
الساتان هذا سويت فيه طاولة السفره بحركة البوفيه طلع
روعه وراح يجي تفصيل كل شي
وفيه ايضآ أقمشة المخمل والقطيفه هاذي اذا تبين حفلات ملكيه
وبسعر رخيص لا تفوتك افكاري فيما بعد,,,وشعارنا (لا للأسراف)
اقمشة الأورجنزا
تخدم كثير بعد شوفوا هنا
وراح تنفعنا ا لشالات بلفها حول الفازات تعطي تأثير روعه
وراح اقول لكم على شالات بالجمله اخذت من السويلم درزن 12 حبه بسعر
18 ريال فيها عدة الوان والسوق يبعونها
بعشره للحبه او بخمسه حسب المحل وينه فيه
من الأشياء اللى نحتاجها وتعطي لمسة بعد
المرايا
احرصي انك تجمعين كل اطار عندك مهما كان صغير
وللمرايا خيال واسع عندي وافكار سويتها فيها جدآ رائعه
وترا مرايا البيت المعلقه تقدرين تستغلينها وراح اذكرها بالأفكار الخاصه بالمرايا لاحقآ
وهناك
المناظر القديمه او الموجوده عندك من هدايا او غيره
لما سبق ذكره هناك خامات كثيره
راح تكتشفونها بانفسكم مخرنه بهالدواليب اجمعوها وللغرفه على طول
ايضآ نحتاج
مثل الرمل الملون ,,اللماع الذهبي او الفضي ماادري وش اسمه مثل الرمل
ويناسب لشموع الجل ولتعبئة الفازات,ورق الكريشه الملون
وهذا اللى بنلون فيه المويه و
وكل شي راح اذكره بالتفصيل الممل
نرجع لأغراضنا وغرفتنا اللى بنجمع فيها
وهنا غرفتنا شكلها تنتظر الدخول مليانه مما لذ وطاب
وصينية الكاكاو مكلفه قد تتجاوز احيانآ ال 600 ريال
وصينية الفطاير بديكورها مكلفه وراح تكلف بعد
وغير كذا تبين تجددين بالبيت وتبين ورد وحركات
على كذا تبين ميزانيه ووالله حرام رمي هالفلوس
واللى يشوف انتشار محلات تجهيز الحفلات والحلويات كيف انتشرت
بيعرف السبب==شفط الفلوس
يعني
المشكله ماتكون بغلا الشوكلا او الفطاير او غيرها ولكن بالصينيه نفسها
ثاني مشكله والأهم
تجهيز الحفلات مثل الزواجات سواء بالبيت او بقاعه او باستراحه
انا من النوع اللى احب الديكورات والتزيين وعندي افكار كثيره ماتخطر ببال
ودايم احتفظ بكل صوره تعجبني
وعند مااشوف اسعار هالمحلات والله انقهر اقول والله حرام على
ألأقل الواحد يحاول يخفف شوي من هالأعباء الماليه
مثلآ راح اخطط لكم تنسيق حفله منزليه بأقل التكاليف
يمكن اول مره للي ماعندها كل ألغراض راح تحتاج تشتري لكن
باادلكم على سوق الجمله وتاكدي ان دفعك لهالفلوس اول مره بس
وبعدين راح تستفيدين منها بكل مناسبه سواء بالأعياد او الحفلات الخاصه او حتى البوفيهات وتنسيقها بالبيت مثل طاولة الطعام
للموضوع بقية

تنسيق حفله داخل البيت
في البدايه
سمي بالله وأدعي الله بتيسسر أمورك تراها خطوه مهمه عند عمل أي شئ
وايضآ لا تنسي أشغال نفسك بالتسبيح والاستغفار وانتي تشتغلين حتى لا يضيع وقتك بهالأمور
كل النساء بطبيعتهن يحبون الزين ويدورون عن الزين
وتضيع فلوسهم بسبيل هالزين
ودايمآ يبحثون عن المتميز والغريب و
وللأسف اننا نعتقد يعتقد البعض أن الأابداع هي صفة من وحي الخيال
أو أنها حصر على بعض الأشخاص
هنا أقول لا
هم ناس مثلنا مثلهم وبشوي شطاره وتصميم وصلوا الى القمه
ولو لا حظتوا انتشار البنات اللى الأن بدوا يكسبون ذهب ماشاءالله من هذه الأعمال
والله انها مشروع ناجح بعد توفيق الله واللى بتستثمر هالفرصه
تراها مكسب ههه رحنا بعيد عن الموضوع
واحب الفت نظركم لأمر مهم
هو انك كل ماشفتي تنسيق او حركه
حلوه بمكان بحفله بصوره بأي محل
احفظيها بعقلك وصممي على تنفيذها ,,
مع الوقت راح يصير عندك افكار متنوعه وكل فكره تجيب الثانيه
اقل شي تكفين نفسك وبيتك وماتحتاجين لصرف هالفلوس بهالامور
نرجع للشغل والتجهيز ليوم الحفله واللي عندها حفله اكيد راح تفيدها هالأفكار
واهم نقطه انك تكونين مجهزه كل ماسبق ذكره بغرفتنا اللى ذكرتهابالأعلى
بس تدخلينها تنشرح نفسك وتتشجعين للتنفيذ.
وهذا كوم واذا شفتي البيت بعد تنسيقك راح تزيد فرحتك
دعي لمساتك تزين حفلاتك
قبل مانبدأ بداخل البيت
أهم شي حديقة المنزل(الحوش)وهذا تعرفونه اكثر ههه
أول مايقابل المعازيم هو حديقة المنزل ولمسات بسيطه
راح تخلينها روعه بأبسط التكاليف وهذا المطللوب
وخاصة لو كانت الطاولات بالحديقه بتطلع أحلى واحلى
الكل أو الأغلبيه عندهم أشجار بحديقة او مدخل البيت الخارجي
والمطلوب الأنوار الصغيره وهاذي متوفره عند محلات ابو عشره وبأطوال مختلفه
يعني اشتري كميه واحفظيها عندك وراح تخدمك بكل المناسبات
وحسب ماسمعت ان فيه اشكال تشتغل بالبطاريه
وهاذي تناسب المكان اللى مايكو ن فيه فيش للكهربا
انتهينا من الفكره الأولى وهي تزيين الأشجار بالأنوار وهاذي غير مكلفه نهائيآ
تابعوا الموضوع

الفكره الثانيه
الطاولات وتنسيقها
اذا كانت المناسبه كبيره لازم تستأجرين طاولات من محلات تجهيز الحفلات وهي عادة رخيصه
مع الكراسي حقتها
وان كانت الحفله لداخل البيت ايضآ تستأجرين الطاولات ألأقل بالحجم ماتكون كبيره
ولو عندك الطاولات الدائريه الخشبيه افضل تقدرين تزينينها بنفسك
وانا مره سويت حفله من الطاولات الموجوده عندي لعدد قليل 16 شخص فقط
ولبستها شيفونات واقمشة ستاير قديمه عندي واستغليتها بالتزيين
يعني كل شي ينفعك المهم
طاولات المحلات يجي معها المفرش السكري انتي ابدعي بالمفرش اللى فوق الطاوله وهنا ألابداع راح يضيف لمسة فخامه ملكيه
واللى لها خلق تفهم تركز معي
افضل شي لتزيين الطاولات الخامات المخمليه الموشاة باللون الذهبي
ولو اخترتي اللون اللى تحبينه وسويتي لك كم مفرش ماراح تكلفك اكثر
ولأن عندي خبره كافيه بأسعار الأقمشه المخمليه القطيفه والأورجنزا المطرزه بالخيوط الذهبيه
راح اعطيكم نموذج لأسعارها وراح تتفاجاون أكثر أذا شفتوا غلاء اسعارها بمحلات الثاث
القطيفه اللى تناسب الطاولات سعرها بالمتر 12 ريال والفخمه ب20 ريال موجوده بشارع الظهيره
هنا نموذج لقماش القطيفه
وسعر الأورجنزا المطرزه بخيوط ذهبيه وهي مثل اللى نحطها للستاير
سعرها احيانآ 10 ريال واحيانآ 12 ريال,ولو تشوفونها ماتصدقون تقريبآ مثل كذا
بس التطريز يكون ذهبي
وعندك خامات كثيره ورخيصه ولو تاخذينها بالجمله جدآ رخيصه
اللفه الكامله ماتكلفك اعتقد اكثر من خمسين ريال وتلاقينهم بشارع الظهيره بعد
وبالنسبه للكراسي تستفيدين من خامات التول والشيفون
والأورجنزا
تربطينها بكل بساطه على ظهر الكرسي بهالطريقه
مع غصن ورده اللولبي تلاقينه بريالين ولكن بالجمله ارخص بكثير
يعني حتى الشالات لو شريتي مثل ماذكرت لك بألأول اللى الدرزن ب18 ريال
تقدرين تسوين حركان بسيطه بالكراسي من خلال الأفكار اللى عندك فوق
تابعوا الموضوع

نكمل الجزء الخاص بتنسيق الطاولات
تحدثنا عن المفارش وهلحين بنتكلم عن الفازات
وهنا اشكال مختلفه
والأستاندات واالشمعدانات
وكل مايوضع فوق الطاوله
طبعآ الأفكار كثيره ومتنوعه..
لكن من اجمل وانعم الأشكال
هي اللى يكون فيها الخرز والكريستال والاغصان والريش
لأن فيها تنوع وماتخسرينها مثل الورد الطبيعي اللى ماتستفيدين منه
لكن مافيه مانع مو بعض الحبات تضيف رونق للطاوله
واحب اقول لكم شي بالنسبه للخرز والكريستال
لأن البعض يعتقد بأنه غالي وهو رخيص جدآ
وسوقنا السويلم الله يسلمه يعج بأشكال وألوان منها
اللى بعشره واللى ب15 ريال
والكريستال اللى تجي قلوب ونص هلال ودوائر تلمع
الكيس الظاهر اخذته ب3 او ب5 ريال والله مااذكر
مثل هنا
وفيه عندنا بعد الأغصان اللولبيه وهاذي منتشره بكثره
والأغصان الورد المجفف تلاقون اشكال حلوه عندهم وتنفعك بكل المناسبات
والشمعدانات تلاقين اشكال رخيصه واحيانآ تحتاج للمسات مثل تعتيقها باللون الذهبي حتى تطلع احلى وتناسب جميع الألوان والديكورات وتقدرين تستغلينها بأشياء كثيره يعني ماهي بحسافه ابد
شوفوا هنا شمعدان فضي عادي لكن مع الشموع يعطي شكل ثاني
وهنا فازه بسيطه ومثل هاذي بعشرة ريالات
وفيها اغصان متفرقه وحوامل الشمع الجانبيه متوفره ورخيصه
ويمكنك ان تضيفين لها قطع من الشيفوت او التل او الأورجنزا وتلفينها حولها بشكل انسيابي وراح تعطيك شكل احلى
وعندكم بعد الكور الزجاجيه
اللى تتعلق بالحوامل وشفتها كثير عند زهرة الربيع اللى يعبونها مويه ملونه
او قش مذهب وهاذي صراحه ابداع وايضآ شفتها عند محل بالسويلم
وهي مو غاليه ولا رخيصه لكن بالجمله ماراح تكلف وتنفعك بكل وقت
تابعوا

نكمل تنسيق الطاولات وافكار كثيره
احيانآ نشوف طاولة ديكوريه رائعه وتعجبنا ونوقف قدامها منبهرين
لكن بقليل من التركيز نجد ان حسن اختيار الألوان وشوية حركات
مثل اوراق الورد المنثوره او حبات الكريستال المتلالئه او اغصان لامعه
شوفوا هنا الصوره ماعليش كبيره شوي مااعرف للتصغير
لو دققتوا النظر الهيكل هذا جدآ متوفر وأي شجره تعطينا النتيجه الرائعه
فكل ماطلعتوا يمين او يسار بتشوفون الأشجار مرميه بهالشوراع
تحتاج لمسات بسيطه مثل تنظيفها من الأوراق ورشها ببخاخ الذهبي
وشوية ترتر لامع
بعد كذا حطوها بأي قاعده سواء خشبيه او فازا
وبعدين يجي الأبداع شوية سلاسل من اللولو الذهبي والأوف وايت أو
وقطعة من الريش الأحمر حطيها بطريقه متداخله على كيفك
شوية اكسسورات كريستاليه او خرز او عقود اللولوعلقيها على الأغصان
ويبقى الهيكل الداخلي عندك كذا فكره
عندك قش ذهبي لامع الكيس بالريال روعه ويعطي تأثير حلو بمحلات الجمله
أو قطعه من الريش وتنزلينها على جوانب الفازه او القاعده
او قطعه من الأورجنزا بلون سكري بذهبي تقريبآ مثل هنا
وانثري اوراق من الورد الصناعي او الطبيعي على الطاوله
ووزعي قواعد الشموع سواء بفازات صغيره مره او بقواعد من الورد
حسب ماتحبين
او هنا
يعني كل مانوعتي بوضع الديكورات على الطاوله تعطينا منظر احلى
تابعوا

نكمل على بركة الله تنسيق الطاوله وتوابعها
من الأفكار الغير مكلفه واللى تعطي
شكل جذاب وحلو
التأثيرات بالأقمشه فقط يعني تختارين مفرش للطاوله من التل والأورجنزا
شوفوا الصوره هنا نسوي كرمشه(عفوآ للكلمه)ههه بس عشان تفهمون
حنا قلنا نتكلم بالعامي اسهل للشرح ويدخل القلب
يعني شوية تاثيرات بخامة القماش ونثر اوراق
بسيطه من الورد
مع فازات شموع صغيره بتطلع الطاوله مره حلوه وماتحتاج جهد
واذا اخترتي لون مناسب راح يطلع احلى بالتأكيد
خاصة لو دمجتي لونين شوفي هالفكره عنك هنا لون هالمفرش مثلآ
تخيلي لو جبنا متر واحد بس من التل اللمعه وحطيناه فوق
المفرش الأشاسي بشوي حركات متموجه وش بيطلع!!
يعني الخيال واسع هنا وتخيلي بعد اللون العنابي مع الذهبي ملوكي هذا عاد
أو الفوشي والذهبي
وعلى فكره بالنسبه للشموع لها افكار عديده تقدرين تستغلينها
اي قاعده زجاجيه او ورد او حتى البرطمانات الموجوده عندك بالمطبخ تقدرين تغيرين شكلها
بنشوف ان الهيكل الداخلي مو واضح ولا احد يقدر يشوفه
يعني اي علب زجاجيه عندك واحجام مختلفه جمعيها واحفظيها بكرتون بالمخزن مثلآ
شوفي هنا بالخلف اشكال الشموع بالزجاجيات شلون تعطي شكل
وعند المناسبه راح تبدعين فيها مثل
تلبيس النموذج بقطعه مربعه من الورق المستخدم في تغليف
الهدايا اللى يكون مثل المناديل ناعم شوي
وفيه بشارع العطايف بالمكتبات الوان خيال
وبعد ماتلبسينها تربطينها بشريطه من القش وهذا
مستهلك كثير عند محلات الهدايا وهو يعطي لمسة لأي تغليف
تلاقونه بالسويلم بعد لفه كامله ب25 ريال تقعد اشهر حسب الستخدام
وبعد ماتربطينها انتي
وخيالك الواسع تقدرين تحطين فوق الربطه اي اكسسوار عندك قديم
تراه يعطي شكل عشان تفهمون قصدي تقريبآ مثل
هذا بس الصوره لنموذج كبير بس انتم خذوا الفكره وابدعوا فيها
وانتي عاد تقدرين تنوعين بالربطه قش او شرايط اورجنوا او قطعه
من التل المستخدم في مفرش الطاوله نفسها يعني الخيال واسع انتي بس فكري وبتلاقين خير
تابعوا

نكمل ديكور الطاولات
الشموع
عندنا هنا منظر روعه للشموع
وشوفوا التأثيرات اللى على الشمعه
هاذي تقدرين تجيبين اي شكل عندك وتجيبين قشارة البطاطس
وتسوين فيها الخطوط وبعدين شوية صمغ بالفرشه وانثري الترتر
الذهبي عليها وسوي كذا حجم كبير واصغر وصغير وحطيها بجنب بعضها
وتحتهم قطعه من الأورجنزا او التل او القطيفه اذا تبين التميز
وتخيلي نموذج هالشموع مع ديكور ذهبي مثل هنا
وتقدرين تحطين تحتها من الشالات اللى ذكرتهم باحد ردودي
وهي اورجنزا جاهزه مثل ماقلت لكم وفيها تطريز بسيط الشال
الواحد يكلف ريال ونص بالجمله شي غريب صح!!
مثلآ هنا مفرش ويمكن انك تستبدلينه بالشال
وهناك افكار كثيره بالنسبه للمفرش يعني بمجرد انك تشوفين
صوره معينه راح تاخذين منها افكار كثيره
شوفوا هنا تلبيسة الكراسي اورجنزا عادي بس مطرزه بوردات
وهاذي سهله جدآ الأورجنزا رخيص جيبي لك مترين لكل طاوله
وجيبي ورود جاهزه بشكل حلو وخلي شغالتك تثبتها بالمفرش
راح تكون فكره غريبه وغير مسبوقه خاصه لو سويتها بمناسبه
عند بالبيت تسوينها ديكور موحد لكل طاولات المجالس للحفله نفسها بتصير حلوه مره
وهنا شكل اوضح
ومثل ماذكرت لو المناسبه بالبيت وعندك طاولة سفره مثلآ
غيري شوي من شكل الكراسي بمثل هالأفكار البسيطه
شوفي هنا شلون لافين الكرسي بقطعة شيفون طويله بشكل مثل الشال اللى نلبسه
مع تثبيته بغصن ورد اللى تقدرين تلفينه يعني يكون من الأسيام الحديد
وهنا قطعه من الشيفون طالع نعوم مره على الكرسي
وهنا ورده كبيره مع قطعة من الورجنزا او الشالات الجاهزه
وهناا عاد اذا مره بتنهبلين ههه
ولا تنسين التنسيق بين ربطة الكرسي وبين لون الديكور
المعتمد للحفله من حيث الوان الورد والشموع والمفارش
وايضآ اختيارك للون المناسب راح يعطي جو أكثر رومانسيه
تابعوا معي ياالغاليات

ومن افضل الألوان المعتمده ب الحفلات اللون ال سكر ي وألاوف وايت
مع اختيار اللون الأخر للورد والشمع والمفارش
واغطية الكراسي بلون زاهي وحلو مثل درجات الوان الباستيل
شوفوا درجات الألوان بهالكيكه
ومنها تقدرين تاخذين فكرة اللون مثلآ
وشوفوا وركزوا معي بهالصوره بمجرد نظره
وحده راح تاخذين عدة أفكار منها
اللولو+ المرايا + تناسق الوان الورد بين الأوف وايت ودرجات الوردي=ابداع
فكرة استخدام المرايا بديكور الحفلات جدآ رائعه
وتعطي جو خيال بالورد والشموع وكل مايضاف من اكسسورات
وعلى فكره اكياس اللولو تباع بالجمله بمحلات الخياطه والكلف بسعر زهيد جدآ
وغير كذا حسن تنسيقها يعطينا جو وشكل ثاني
وممكن انك تشترين ورد جاهز بس يكون من النوع اللى فيه اورجنزا ومتوفر كثير
وتلصقين فيه حبات وسلاسل اللولو
وهنا اسلاك نحاسيه وحركات بسيطه بالخرز واللولو تضاف للأفكار
انتي امسكي حبات اللولو بيدك وراح تبتكرين وانتي تشوفيها الف فكره وفكره
يعني اللولو يرمز لقاع البحر
فأختاري الألوان المرجانيه لفكرة الديكور عامة ولا تستغربون!!
ترى الطبيعه عامة يستلهم منها الرسامون الوانهم
تابعو ا معي