الفراشة أصبح فتيات Ftayat.com : يتم تحديث الموقع الآن ولذلك تم غلق النشر والمشاركات لحين الانتهاء من اتمام التحديث ترقبوا التحديث الجديد مزايا عديدة وخيارات تفاعلية سهلة وسريعه.
فتيات اكبر موقع وتطبيق نسائي في الخليج والوطن العربي يغطي كافة المجالات و المواضيع النسائية مثل الازياء وصفات الطبخ و الديكور و انظمة الحمية و الدايت و المكياج و العناية بالشعر والبشرة وكل ما يتعلق بصحة المرأة.
زحمه مشاعر
11-06-2022 - 04:40 am
السلام عليكم ورحمه الله وبركاته
كيفكم يا فراشات
ماني عارفه كيف ابدا احس اني مصدومه 00 كنت على طول اقرا المشاكل الزوجيه الي يكتبوها الاخوات وبالذات الخيانه وما كنت متوقعه اني في يوم راح اتعرض لنفس الشي
انا بقولكم السالفه وانتم احكموا -- انا زوجي اليوم ما داوم راحت عليه نومه فصحيت قبله الساعه 10 عملت الفطور واستنيته اول ما صحى وفطرنا ودردشنا وكل شي
بنتي صحيت عمرها سنه و3 شهور وهي متعلقه فيه مره وهو كذالك -- المهم راح نومها واثناء ما كان عندها كنت جالسه انا في غرفه الجلوس الي فطرنا بها وجواله كان على المكتبه وعلى الصامت لاحظت نور الجوال قلت اكيد اهله وعرفوا انه ما داوم ويبغوه في شي لاننا ساكنيين بعماره اهله تحت وهو واخوه شققهم فوق قبالت بعض المهم رحت اخذت الجوال وكانت الطامه رساله من رقم غريب ونصها .....
  • حبيبي دقيت اكثر من مره والرقم محظور ومشكور على البطاقه يا قلبي وحاولت اكلمك بس ما مسك معي الخط وانا مشتاقه لصوتك مره ارسلي على الايميل انا حصحوص وهذا جوال امي *

الما شفت الرساله حسيت اني ارتجف وقلبي يدق بشكل غريب حسيت بخقان فضيع شعور مدري كيف اوصفه ذهلت بجد ما كنت متوقعه -- قفلت الجوال وتركته لين ما جاء قلت له ترى جوالك دق وجتك رساله طبعا قرا الرساله وحسيته ارتبك وجلس 10 دقايق بس يقلب بالجوال استنيته يقول شي بس ما علق فقلت له من حصحص لانها كاتبه كذا قال لي ما اعرفها مدري عنها قمت اخذت الجوال ودقيت عليها وردت امها وطلبتها بالاسم وكلمتني البنت وانكرت طبعا وقالت انا ارسللت الرساله لدبي ومدري ايش وقفلت بوجهي المهم قلت له اخر شي كنت اتوقعه منك قال ما اعرفها وانتي بنفسك تاكدتي ومدري ايش قلت له خلاص كلمها واتاكد فرفض مره واخذ نفسه وطلع
هنا انا انهرت هذا جزاء صبري وتضحيتي بامور كثير لاطلع زي الخلق ولا اسافر بحجه الامكانيه وهو من وراي يوزع بطايق شحن
تحملت كثير مشاكل اهله الي من يوم تزوجت وهم فارضين علينا اننا ما نطلع الا نمر عليهم ناخذهم او ناخذ بناتهم معنا نمشيهم ونصرف عليهم يعطي ابوه 1500 وقلت ابوه ويستاهل ونفس الطريقه امه 300 وقلت هذي امه والحين امه تطلب منه واخوه انهم يدفعون لاختهم كل شهر فلوس بحجه انها ماهي لاقيه وظيفه بالرغم انه كذا مدرسه اهليه دقت عليها بس هي رفضه بحجه ان ما عندها ملابس --- والله لو عليهم قصور كان قلت لكن قسم بالله انهم مرتاحين ماديا بس خلاص متعودين ياخذون والادهى ولامر لما فكرنا نسافر مره الشرقيه قلنا بنجلس اسبوع عند اختي نغير جو رفض بوه وقال لو رحت ما اعترف فيك فكنسل الموضوع وحسيت اني مره مقهوره وسكت قلت عديها يا بنت وغيرها كثير والله ما يجي عندي وما اخذه من صغيره او كبيره الا وعرفوها بس كل ذا كنت اعديه وكنت اقول ما دام انه يحبني كفايه بتغاضى بس بعد هذي الرساله حسيت ان كل الي كنت اسويه واتغاضى عنه يدل على صغر عقلي وهبالتي اعطيته الثقه وهو ما يستاهل
كان ودي اروح لامي واتركه هو واهله في حريقه جابوا لي الاكتئاب بس المشكله اني يتيمه وامي كبيره بالسن ما ودي ازيد من حملها وازيدها هم فوق همها
بنات لجات لكم بعد الله مدري ايش اسوي احس اني مره تعبانه وكثير طيبه وعلى نياتي بس اتعامل بخبث ابغى منكم المشوره انا خلاص عقلي تعطل


التعليقات (9)
ليان بس
ليان بس
الله يفرج همك يقلبي ويسخر لك زوجك

مطيحه الرومانسيه
مطيحه الرومانسيه
ياعمري انتي والله جد صدمه وحياتك مع اهل زوجك والله العظيم نفس الي عندي مافي فرق والطلعات والسفرات على قولتك لا اسافر ولا اطلع وانا مثلك للحين صابره
حسبي الله على كل رجال مايقدر صبر و تحمل زوجته
حبيبتي انتي امسكيه وخليه يحلفلك على المصحف انو مايعيد الحركات ذي واذا ماسواها هدديه انك بتروحين لاهلك لو ماحلفلك ووعدك انو يتعدل ويبطل حركات المراهين وذكريه انو عنده بنت ترا ربي بينتقملنا في بنتنا الله يحفظها
و اله يعيني ويعينك على بلوانا
اتمنى اني افدتك لو بشي بسيط

ريف الاشوااق
ريف الاشوااق
تدرين الله يشغلهن بانفسهن يارب
حسبي يالله على اللي ماتخاف من الله
حسبي الله حسبي الله

sarah/ksa-uk
sarah/ksa-uk
على فكره .. انتي فعلآ انسانه طيبه .. و بنت اصول .. و قلبك ابيض .. و صبوره جدا .. ما شاء الله عليك .. ما شاء الله عليك .. ما شاء الله عليك .. الله يرزقك من اوسع بيبانه .. امين ..
و لجل كذا ربي راح يفتح عليك في يوم, تاكدي من هالشيء .. و خلك مؤمنه كل الايمان انه .. يمهل ولا يهمل ..
الي سواه زوجك غلط و ما اضن اثنين يب يختلفون على هالشيء .. و استعمار اهل زوجك لك و سيطرتهم على ابنهم بعد غلط و ما فيه شك .. بس الصبر حلو .. و الله يحب المحسنين, لجل كذا ..
عامليهم بنفس طيبك و لا تتغيرين عليهم .. بل احسني اليهم اكثر .. من يدري يمكن يعوضونك حرمانك للاب في يوم و يحنون و يستوعبون انك عمله نادره و صعب التفريط بها .. و يبطلون ظلم و ديكتاتوريه .. بس بعد لا تهضمين حقك .. خذيه بذوق احرجيهم باخلاقك العاليه و تعاملك الراقي ..
و بالنسبه لزوجك .. الله يهديه و يرده للصواب و يصلحه امين .. من رئيي: لا تفتحين عليك الموضوع ثاني هاليومين, بس خلك رسميه معاه و اتممي كل واجباتك وياه .. و بعد كم يوم اقعدي وياه و اساليه ثاني عن الي سواه و قولي له انك منتي منتظره منه اجابه بس خله يجاوب نفسه و يفكر بلي سواه و يفكر في الاسباب .. حاولي تراقبيه عن بعد على انه راح يكون شوي صعب لان اعتقد انه يتواصل معاها خارج البيت او في العمل بما انها دقت عليه ذيك الفترة .. حاولي تدقي على ام البنت ذيك الله يصلحها و اطلبي من امها انها تلم بنتها إن استطعتي ..
و اخيرا اذكري الله كثير و ادعي لزوجك كثير .. الا بذكر الله تطمئن القلوب ..
الله يهدي سرك .. و يسخر لك زوجك .. و يحنن قلب هل زوجك و يردهم للصواب .. امين ..
كوني كما انتي .. قلبٌ بالعطاء بحر .. بارك الله فيك و في ذريتك و في زوجك ..

حبيبه زوجها.
حبيبه زوجها.
والله نفس الحاله نمر فيها بس الحياه يبغالها صبر
وعلى سالفه الرساله لو ماقلتيله كان وصلتي لاخرتهاا ولو ماعجلتي عشان هو راح يبرد الموضوع وينسيك هوه لو انتظرتي شوي عشان تعرفي سالفتهم اما اللحين قلتيله خلاص يسير ينتبه للجوال ويحرص اشد الحرص
انا زوجي ايميله كله بنات دايم اشوف في المستندات وش كاتب بس انا زيك تسرعت وقلتله وبرد الموضوع واللحين خلاص ارتاح لانه هوه كسبها انا لو انتظرت شوي كان عرفت وش وراهم بلي يكتبونه بس هاذا الي كنت بقوولك انه الرجال يخون بس صدقيني انه راح يتوب بعد مايسوي الاشياء هاذي وراح يشوف اسمك بينهم وانتي وبنتك بس

BOLI
BOLI
تجاهليه في صمت وقومي بواجباته واحذري النقاش بصوت عالي وانفعال ابتعدي عنه ليس من اجل الزعل لانك مشحونة من ناحيته وهو بعد حساباته ملخبطة لاتحاولي تتناقشي معاه ولو هو حاول بكل ادب قوليله اي كلمة منك راح تخلي المشكله تتفاقم ولما تشعري انك هداتي وممكن تتقبلي منه الكلام اجلسوا اتناقشوا عاتبيه بادب واسمعي له ولو طلب فرصه اعطيه وسامحية الرجال زلاتهم كثيرة المراه العاقله هي اللي تعاتب برقة وادب وتعطي فرصة لزوجها وتحاوطه ولاتخليه لبنات الحرام يلعبوا بعقلوا ولا تسمعي كلام اللي يقول اتركي له البيت وروحي كم يوم او خاصميه ولاتنامي معاه الجفا يولد الجفا ودي راح تكون فرصته لانو ينجر لها الطريق بحجة انك هاملاه وهاجراه
الله يهدي زوجك ويهدي سركم

*دلوعة زوجي*
*دلوعة زوجي*
شوفي اطلغي وروحي وتعالي لحالكم بلا اهله بلا بطيخ وقفيهم عند حدهم الى متى يعني
وزوجك مقدولر عليه واله الرجال مقل الاطفال البسيله وتمكجي وتعطري وسكري الانوار وشغلي شموع ودلعيه يركض وراك
وترى الرجال مايحب المره اللي كل شي عنده عادي قوي شخصيتك

%%رومانسيه بطبعي%%
%%رومانسيه بطبعي%%
مااقدر اقول الا مع ذا الاذان الله لايوفق بنت او متزوجه تكلم رجال غريب عنها الله لايوفقهم وخاصة اللي تكلم متزوج او تغازل متزوج حسبي الله عليهن اللي مايخافون الله فوقهم حسبي الله فيهن وكفى

المهاجره إلى الرحمن
المهاجره إلى الرحمن
الله يفرج همك يارب ويسخر لك زوجك ويهديه يارب ...

الي ما يطل العنب حامض عنه يقول للمتزوجات فقط
من جربت باي تاتش