الحقوا وشوفو وش صار لشعري

السلام عليكم ورحمة الله وبركاته
هاذي اول مشاركة لي وابيكم تشوفولي حل ؟؟ انا اليوم رحت صبغت شعري الارضيه اشقر رمادي فاتح والخصل ثلجي والمصيبه اني مالقيت الكوفيرا الي دايم اصبغ عندها وقلت خليني اجرب وصبغتلي وحده مغربيه وسوتلي الخصل بالطاقية ويوم خلصت ووشفت نفسي الله لايوريكم كاني عجوز من عجز الاجانب اللون طلع مره فاتح ورجعت غمقت بعض الخصل لكن نفس الشي تكفون قولولي وش اسوي والله تعقدت يوم دخلت البيت عيالي انخرعوا مني
بصراحة تعقدت من شكلي ماني عارفة ايش اسوي وفيني الصيحة بس مستحية من زوجي اخاف يقول عني خبلة تكفون ابي حل
مستحيل اطلع للناس وشكلي كذا وتعرفون حنا على وجة الاجازه وخوات زوجي وحمواتي واخوانه كلهم راح يكونون هنا في الرياض وراح تصير عزايم وانا مابي اصير نكتة الموسم
ابي حل والي يرحم والديكم
اقدر اصبغ شعري مره ثانية وكيف اغمق لونه
واذا فيه زيوت تغمق لون الشعر ياليت تفيدوني
علماً بأن شعري خفيف مرره وناعم لكن بعد الصبغة حسيته ليفه ليه ماأدري ؟؟؟
أمانه لاتبخلون علي بالي تعرفونه ترى اختكم في ورطه