الحقوني

خبيبتي شوفي القسم هذا مليان من اللي طلبتيه
بس بأحاو أساعدك باللي أقدر عليه
شوفي الهرم وسيتي ماكس وسيتي بلازا والعزز مول والغرباوي اللي بالصواريخ هذا اللي في بالي
وأكيد فيه أسواق ثانيه كمان الحجاز الجامعه مول والجامعه بلازا ....
بالنسبه للكوافيره الكل أجمع على رويال كير ((العنايه الملكيه))مكياج عفت والشعر سونيا شغلهم روعه بس مواعيدهم مش مضبوطه ....
وهذا رقمهم ...((026578498))
أرجو من المشرفات عدم الحذف عشان الكل يستفيد....
بجد غلاي روحي لهم بوقت إجازه وعندهم عرايس وإحجزي عندهم بس المواعيد لك عليها الله يسعدك....
بالنسبه لوهج سنتر أنا شفت شغلهم على وحده طلعت روعه وشفت شغلهم على وحده ثانيه أنصدمت بصراحه فرق مو حلو....
موفقه
أتمنى أكون أفدتك بشي بسيط
وإنت إسألي أكيد تعرفي جده وأسواقها

الف شكر اختي امواج,, الله يوفقك في الدنيا والآخرة,, طيب فين مشغل رويال كير في اي حي بجدة..وتسلي وانا انتظر باقي الفراشات

حلوة الاسواق الي قالتها اختي امواج والكوافير في مشاغل كثيرة بس ماعرف اسمها بس شفت شغلها مشغل ريما-ومشغل الشيخة\ومشغل الامبرطورة
ومشغل كارمن وياليت الي تعرف ارقامهم وتستفيد اختنا لموى

حبيبتي ابدأي بملابس الخروج وشتريها من ماركات يعني حدود خمس اطقم معاها اكسسواراتها وجزمها وشنطها عشان تسهل عليك وبعدين اشتري ملابس البيت وبعدها المكياج والعطور واذا كان عندك اخوات قسمي عليهم الأشياء الي بتشترينها وحده تمسك القمصان والبجايم وحده الإسبورات وحده تفكر وتجيب تغاليف للعفش وعليك بالدعاء الله يسهلك ادعيلك من كل قلبي ولاتنسين نفسك اهتمي بنفسك اهم حاجه ..............

ابدائي بملابس البيت وهي اللي كثريها ام العزايم لاتاخذي اكثر من خمسه بس يكونو حلوين

الله يوفقك يارب
عليكي بالإستخارة وسهام الليل(الدعاء)
وبالنسبة للكوفيرة منة سنتر بصراحة روعة

مرمر,زمردة,سهام,رنج ألف شكر لكم اخواتي وذحين انتو حيرتوني زيادة بالنسبة للكوافيرة..عموما تسلمون ياغاليات

حبيبتي الله يعينك إنشاء الله لأني حسيت بحوستك هذي أنا ملكتيما شاء الله جهزت لها في اسبوع واحد بس قاعة وفستان ومكياج ومصورة والطاولات و و و و كل اللي تتوقعيه لكن السهولة الحمد لله جات من ربي .. والله أنا قبل أسوي أستخرت ربي والحمد لله ربي سهل أمري الحمد لله ما شاء الله فالاسبوع صح كان ضغط بس الحمد لله يارب على النعمة ..
المهم أهم شي تسوية ملابس الخروج والمناسبات لأن صعب أحد يعزمك وانتي ماعندك غير ملابس البيت ملابس البيت لاتكثري منها انتي حتشوفي قمصان النوم والبجامات حتغريكي (لأني مجربه) لكن انتي ماعندك وقت ركزي على ملابس الخروج واكسسواراتها وجزمها وشنطها أهم شي بس لاتكون أقل من خمس لأنك عروسة وحتكون خرجاتك مميزة والعين عليكي فصعب تكرري اللبس وللبيت كثري من الملابس الداخلية الفخمة الحلوة ..مو يعني ما تاخذي قمصان وبيجامات لكن هذي الاساسيات اللي مرة ضرورية .. والقمصان حلوة مع الوقت تغيريها وتا خذي موديلات جديدة طبعاً حتخرجوا سوا خليه يختارلك قميص على ذوقه وزي كذا جددي فيها
والاسواق روحي عزيز مول , والتحلية , والأندلس يقولو فيه كل الماركات , وحراء .. و غيرها كثير ما شاء الله جدة مليانة اسواق
والكوافيرات بصراحة أنا للملكة رحت لتولين اللي خلف الآيس لاند فآخر لحظة حجزت عندهم بالرغم إنو عمري ما سمعت بهم اصلا عرفتهم بطريقة غريبة المهم عملولي التنظيفات والحمام المغربي والواكس والمساج و وبصراحة أنا اللي عمري ما اقتنع بالمكياج أقتنعت هذي المرة وكمان اللي في الصالون كلهم ذوق مره الحمد لله يارب هذا كله توفيق من ربي الحمد لله أهم حاجة أستخيري وربي حيسهلك أمرك ..
وكمان عندك منه سنتر وجمالك مكياجهم ناعم مره أنا احب الناعم ما احب الكثير والعناية الملكية وريما وسمعت عن سيرينا يقولو حلو ..
آسفة طولت عليكي بس والله حاسة بيكي..

حبيبتي لاتحتاري ولاشي بالنسبه للكوافيرات
إنت روحي لمنه سنتر ورويال هذا الكل أجمع عليه إنه روعه للأمانه أنا ماجربت أحد منها بس والله العظيم إن صديقاتي راحوا لرويال وماشاء الله تبارك الرحمن طلعتهم روعه ترى الكل يجمع على روعة رويال بس مواعيده هي اللي مره مو مضبوطه
لاتحتاري إنت إستخيري وروحي شوفي شغلهم لاتعتمدي على الكلام لازم العروس تتعب في البدايه عشان ماتندمي بليلة عمرك ..
روحي وفري بها المشاغل ويارب يختار لك الخيره الطيبه