الحمدلله ربي عوضني خير يا بنات

السلام عليكم ورحمة الله وبركاته
اسال الله الكريم ان يرزقنا بالذرية الصالحة عاجلا غير اجل
ويثبت حمل لكل حاامل ويهون عليها يارب وتفرح بشوفته امين يارب العالمين
انا يا بنات تاخرت الدورة على 15 يوم
وبعد الدورة بيوم تاخرت وقلت اكيد انه يومين وبتنزل
وعلى فكره انا ما فحصت ولا زوجي تاركينها على الله ولا استخدم اي علاج ولا اي شئ
المهم انا لى تقريبا اسبوع احس باعراض الدورة وصاايره اناام كثير او بالاخص ثقيل نومي
رحت مع صديقتي وسالتني جاتك الدورة قلت لا متاخره لها يوم
قالت وشلوون صاابره ما حللتي قلت لا قالت خلاص نشتري تحليل منزلي قلت عندي بالبيت
قالت بعد عندك بالبيت ولا حللتي قلت ايه اصبر شوى لان التحليل يبي له على الاقل 4 ايام<<متعوده على السالب ما تبي تتحطم كالعاده
المهم قالت نشتري واحد ثاني حللي فيه اذا ما بان انتظري 4 اياام على قولتك وحللي بالى عندك قلت طيب
رجعت البيت تعشيت وقعدت <<مو مستعجلة على الضيقة الصدر والحمدلله على كل حاال ونسيت التحليل اصلا
اتصلت صديقتي قالت هاه حللتي قلت لا قالت ول عليك حللي الحين قلت لا ابصبر للصباح قالت وانتى شريته عشاان الصبااح حللي ترى يبان لا تصديقين يوم يقوولون التحليل الصباح انا بعيالي يبان عندي قلت طيب ...
وحللت والنتيجة خط واحد <<تهاوشت معه من زمان وقااعد يغيظني
رحت واتصلت فيها وقلت لها الله يسامحك تحطمت على الفااضي انا ما قلت لك بدري على التحليل
قالت ما بان اجل انتظري كم يوم اذا ما نزلت حللي بالثاني قلت هذا اللي بصير اصلا ورميت التحليل
المهم جاء زوجي للبيت ووتروش وتعشى وقعدت معه ولما رحنا على السرير انا وياه \مدري وش اللى خلاني ارجع للتحليل ولقيت خط ثاني خفيف مره
رحت واتصلت بصديقتي قلت لها طلع لى خط ثاني خفيف مره قالت مبرووك انتى حامل
قلت لها خفيف مره مثل الظل قالت ايه حامل مبروك انا بعيالي كذا الحمدلله روحي فرحي زوجك قلت بنفسي لا لا مو الحين اتاخر كم يوم ويبان الخط الثاني اكثر واسويها له مفاجأه
لاني مجهزه لبس طفل وابشتري هديه وابلغه بخبر حملي اخليها بحركات حلووة مره
رحت لزوجي شافني فرحانه اكلم صديقتي بصووت مره واطي شك ان الموضووع فيه شئ قال وش فيك قلت ما في شئ قال اشوفك فرحانه وش فيك قلت ولا شئ قال قوولي ولا ترى بزعل
قلت لا لا كل شئ ولا زعلك مااتحمله ,,,,,انا وياك اثنين وراح نصير ثلاثه ان شاء الله
طاار من الفرحة ضمني وباسني على جبيني وقال الحمدلله لك يارب
قلت وش نسمي اذا جات بنت؟ واذا جاء ولد؟ قال الله يجيب الخير ان شاء الله
وحددت الاسماء اذا بنت ولا ولد ...
ويوم الثاني احس بمغووص انا اكلمه بالدوام واقووله بطني يعورني البوبو شقي يرفسني طالع على ابوه شقى وانا اضحك وهو مات من الضحك ولا قلت لاحد غير لاخواتي
بعد خمس اياام قلت احلل منزلي باللى عندي وطلع سلبي وبعد فتره طوويله طلع مثل الظل بس ما حسيت انه تغير شئ خفيف مره نفس الشئ .. وطرت على المستشفى وحللت دم وطلع سلبي
والله يا بنات ان خنقتني العبره وكان زوجي عازمني على العشااء من كثر ما هو مبسووط
لكن للاسف ما كملت الفرحه ليتني ما حللت دم كان عشت اللحظات الحلوة قبل ماخربها بس الحمدلله على كل حال واتصلت باختى وقلت لها على النتيجة قالت بدري المفروض تنتظرين اسبوع
حطت لي امل من جديد ورحت المطعم ولا كني موجوودة الدموع بعيني بس قلت اللهم اجرني في مصيبتي واخلف لي خيرا
وزوجي يواسيني ويصبرني والله مفتشلة منه وتضاايقت قلت اصبر اشووف يمكن استعجلت
ورجعت البيت وانتظرت زوجي ينام وقعدت ابكي لين طلعت روحي لاني ما قدرت اناام مخنووقة على الاخر ...ونمت وصحيت يوم السادس من تاخير الدورة وحللت وطلع الخط الثاني خفيف مره <يلعب باعصاابي يعانديني
قلت خير ان شاء الله حتى كنت اوريه زوجي واقوول فيه خط ثاني ولا اتوهم قال ايه فيه
قلت ان شاء الله حمل قال الله يجيب خير وما فيه تحليل دم الا بعد شهر كل سااعه يسحبون بدمك ارتاحي شويه قلت خلااص <<من كثر ما تحطمت
وقلت ما راح احلل منزلي الا بعد تاخير 15 يوم
وفي 13 من تاخر الدورة باخر الليل لقيت نقطة دم وقلت الدورة نزلت وادور واروح واجي ما لقيت شئ ولا نزل ولا شئ الا هالنقطة
وحللت 14 ما قدرت اصبر وطلع سلبي استغربت من جد قلت اكيد فيه شئ فيني
اكيد فيه شئ مو طبيعي فيني اكيد فيني .......... ولا فيني ........... افكار تودي وتجيب وقلت لزوجي
ابروح لدكتورة تكشف على حالي خلااص ما عادني قااده اعصاابي على راس خشمي
ورحت من تاخيرها 15 يوم حللت دم وسلبي وانا قبلها كنت اقوول اللهم اخلف لي في مصيبتي واجرني خيرا منها <كنت حاسه انه ما فيه حمل لاني ما احس باعراض حمل غير مغص الدورة
وسوت لي سونار وانا قلبي يدق بقووة من الخووف وحطت السونار وقاعد تشووف قالت ما شاء الله
كل شئ سليم عندك مبايضك وبطانه الرحم كل شئ عندك سليم الحمدلله بس انتي عندك تاخير في التبويض
يجي في 16 و17 و18 قلت لها ايه
قالت التبويض لا تاخر يتاخر معه الدورة عشاان كذا راح اعطيك شئ ينزل الدورة ومنظم للدورة واستمري على العلاج 4 شهور
واذا ما نزلت الدورة حللي لان بيصير حمل باي لحظه وانا بنظم لك التبويض عشاان الدورة تنزل لك
يعني لا تحسبين وقت العلاج ما يصير حمل بيصير حمل وعطتني فتامين e قالت دوامي عليه
وسلامتك ما تشووفيني شر
بنات طلعت وانا بالحيل فرحانه ..
يمكن تستغربون ليش انا فرحانه مع ان ما فيه حمل ...
بس العووض اني سليمة ما فيني شئ ..مافيه شئ يمنع الحمل ..لكن ما علي غير الدعااء ليل ونهار بالذرية الصالحة
والله يا بنات متفاائلة خير بشكل مش طبيعي ارتحت من الوسوااس اللى قااعد يتعب نفسيتي
وكلمت اختي وانا مبسووطة قالت هاه اقوول مبرووك حامل قلت لا مش حاامل انا الحمدلله سليمة
ما فيني شئ وحاسة اني واثقة من نفسي على الاخر الحمدلله والشكر لله الحمدلله والشكر لله
وقررت من اول ما طلعت من الدكتورة اني ما فكر بالحمل نهائي واشيل هالفكره صحيح صعبه بس خلاص دام اني سليمة ما فيه شئ ارجيه من احد غير من رب العالمين ان يرزقني بالولد الصالح يارحيم واعيش حيااتي من دون قلق وخووف من الجااي
بس الدكتورة قالت لي ان التفكير بالدورة وموعدها يلخبطها وياخرها لان الهرمونات مع الزواج تتغير وتتاثر .. والسمنة ما هي زينه ابد لان المبااييض تتاثر فيها
قلت لها وزني زايد قالت زونط حلو لجسمك ولطولك <<لا تخافون مو دبة ههه
وما انكر يا بنات عشت احلى اربع اياام وانا مصدقة نفسي حاامل والله شعوور ما يوصف
شعور حسسني اني ملكة زماني .. اسال الله الكريم ان يرزقني ويرزقكم بالولد الصالح اللهم امين
واللى مرت بمثل حالتي تقوول الله لا يحرمها الجنه
اختكم وصيفة خير