العازبات الشابات الحلوات يدخلو نصيحة من متزوجة

سلام ياحلوات ياعسولات
كيفكم أخباركم!!
المهم بأدخل بالسالفة على طول
صحيح هذا القسم لاينطبق علي بس حبيت أدخل بنصيحة صغيرونة
أنا والله دخلت هنا بالغلط كنت بأفتح قسم أفتح قلبك لقيت نفسي ضاغطة هنا
وجلست أقرأ بتجارب البنات وحزنتني كثير قصص بعض البنات
خصوصآ العازبات إلي يبغو الزواج
والله يابنات حاسة فيكم لاتقولو هذي متزوجة وجاية تشوف نفسها علينا
(يابنات بلاش هالحساسيات) وأنا متأكدة أنكم مو من هالنوع أبدآ
فيكم الخير والله
اللي شجعني أكتب هو لأني تذكرت وأنا أقرأ قصصكم وحدة من قرايب زوجي
(والله أنها بعمر الزهور وتجن بس نصيبها تأخر لخير من ربي أكيد)
والله ألف من يتمناها لو صبرت وقدرت نفسها عليها جمال وسنع تهبل
عمرها 29 سنة (عز الشباب والله العظيم)
مشكلتها انها هي اللي تأزم نفسها (وتطلق على نفسها قبل الناس هالكلمة اللي أكرها (عانس) )
بطلت تهتم بنفسها وهذا غلط (شوفو الأوربيات كيف عايشات حياتهم اللي بالأربعين عندهم تتزوج وهي مبسوطة بسبب أنها هي اللي مشببه عمرها وواثقة من نفسها والله من الأهتمام تقولي بنت عشرين)
أدري بعضكم يقول (بلاش مقارنة بالغرب)
طيب ليش مانتعلم منهم الأيجابيات
لاعيب ولاحرام
والرجال يموتو بالمرأة اللي تثق بنفسها رغم كل شي
المهم قريبتنا ذي تقدم لها واحد (الله يستر عليه مو مزبوط)
وأمه الله يسامحها أختارت له هالبنت لأنها عارفة ماأحد بيرضى بولدها (لأنه بأختصار حق مخدرات وسكر) يجيب المرض وعلى همه ماعنده وظيفه
وكأن الأم عارفة بلهفة هالبنت عالزواج
وفعلآ البنت وافقت رغم أنها عارفة بسيرته (يمينآ بالله أنجلطت من القهر عليها)
كل هالحلا ياخذه هالسكير
حاولت انصحها بس البنت الله يهديها عندت والله يسامحها فهمتني غلط
(تقول أحمدي ربك أنك متزوجة وماعانيتي زيي)
الله يسامحك
وتقول لو كنتي مكاني كنتي وافقتي على أي أنسان يتقدم لك ولو كان أيش؟؟
قات لها مستحيل والله لأعز نفسي
لأن أنا عندي مبدأ بالحياة (لأنها فانية)
سنة حلوة ولاعشرين سنة هم وغم ونكد
ليه أحنا في سباق مع الزمن !!! الحياة حلاتها بجمال دقايقها وثوانيها
ماسمعت نصايحنا وتزوجت هالشاب الوسيم
دعيت ربي من قلبي يهديه لها ويسعدها
وبعد شهرين بالضبط
تطلقت (لأسباب يشيب لها شعر الرأس)
وهي ألحين ندمانة
ياليتها قدرت نفسها وعزتها ........ومارمتها هالرمية
هي ألحين تتعالج نفسيآ (بسبب التجربة) والله تقول
عشت شهرين كبرتني مية سنة من اللي شفته
الزبدة.......
يابنات والله أنتم جواهر ودرر
ومثل ماقلت (سنة وحدة أعيشها مع أنسان يستاهل يحبني وأحبه أدلعه ويدللني ولا 20 سنة مع أنسان لايقدر وعيشة تضيق الخلق وتقصر العمر)
الحب هو بلسم الحياة
الحياة بمصايبها تحتاج لشي تسند عليه ويهونها ومافي أروع من الحب
والله العظيم الحياة حلوة لما نفهمها ونعيشها مع الشريك الصح
(اللي أدعي من ربي لكل وحدة منكم أنها تجرب الحب وتتزوج الأنسان أللي يسعدها ويهنيها ويصونها ويخليها تشوف نفسها أجمل وأسعد وأكثر نساء الأرض حظآ)
ياحلوات لاتستعجلو (وربي راح يعوض صبركم خير بأذن الله)
ياما سمعنا ببنات 18 تزوجو (تندب حظها لهاليوم )
وبنات تزوجو على نضج عاشو الحياة صح وبحب والله صارو ينحسدو على حياتهم
لاتغركم المظاهر كل أنسانه في حياتها قصة سواء سعيدة أو حزينة
ولما تتزوجي بأذن الله لاتفوتي ولالحظة بكذا تكوني ماخسرتي شي بل كسبتي أشياء هذا غير أجر الصبر والرضى
طوري من نفسك وجددي حياتك وكوني أجمل أمرأة بنظر نفسك وأجعلي ثقتك بنفسك تظهر للمجتمع
دللي نفسك وحبيها لأنك تستحقي هالدلال
وأنتي بعينك راح تشوفي لما تتزوجي أشلون بتكون نظرة زوجك لك
راح يحس نفسه أسعد رجال الأرض
عيشيه الحب
وخليه يعرف مذاق الحب على نضج راح يعرف أنه أختار لنفسه الشريك المناسب
أهم نقطتين من هالموضوع...
أختاري صح ولاتستعجلي
وأعشقي نفسك ودلليها وخليك أمرأة واثقة من نفسها
(أدري بعضكم بيقول خليه يجي وبعدين يصير خير بالأختيار)
أنا القصد من كلامي أن النصيب بأذن الله راح يجي لو في خير وقسمة ونصيب
فلاتستعجلو
وربي يرزقكم جميع ياحلوات
لأنكم تستاهلو كل خير بس أنتو لاتقسو على أنفسكم وتظلموها
مافاتكو شي
ألي جاي أحلى وأحلى بأذن الله
ياعام هالدنيا فانية
عيشو كل لحظات حياتكم برضى وحب
مع أرق دعواتي القلبية لكم
تحياتي