العيب فيني او في البزارين

1. بتقولون لي وين المشكله ؟؟؟؟

مساء الورد يابنات
ادري الصيفيه خذتني منكم بس اوعدكم ماراح اطول اكثر من الفتره اللي غبتها عن المنتدى
انا من زمان وانا فيه موضوع مزعجني ومقلق راحتي قلت يابنت وشو له تعانين دام بيدك تتخلصين من هالمعاناه .....!!!
تعرفوني كلش الا اني اعاني البنات لو يطلع لولدها ضرس كتبت موضوع يابنات الحقوني ولدي طلع له سن !!!! وانا عيالي طلعوا لي قرون ومااكتب موضوع ؟؟؟ معصي وانا بنت ابوي......
قبل ابدا حبيت اقولكم عن حياتي المليئه بالهناء عندي عيال بس يمكن مو زي عيالكم اه احيانا اصحى والقاهم مسوين لي الفطور ومرات الاقي ملابسهم مرتبه ومرات اصحى الصبح وهم حاطين لي الفوطه عندي ونعالي عند الباب واجلس كل صبح احتسي الموكا امام النافذه واتفاجأ بصوت جرس سيكل الهندي عند الباب وينزل ويدخل الجرايد واعلانات كارفور من تحت الباب ....!!
وايامي كلها بهذا الروقان !!!<<<مصدقينك عجلي بس

بتقولون لي وين المشكله ؟؟؟؟

المشكله تكمن في حالات الاستنفار اللي تصير بالبيت لاجيت انا وزوجي بنسوي فيها شاعريينوتبدا المعاناه في تهجيد وترقيد وتهديد كل من تسول له نفسه يطق باب الغرفه .....
وكل ذا ماهمني بس كله كوم والاحراجات اللي تصير كوم ثاني ......مره من المرات كالعاده تجمر المبزره عند باب الغرفه اللي يطق ويقول افتحوا واللي على التليفون يتصل عالجيران والثانيه تصيح الا ادخل اشوف وش السالفه واللي يبي ياكل ومايجوع الا وقت الذروه....!!
اتصل ابو زوجي عالتليفون وكان الجوال مع ولدي الكبير .....قال وين ابوك ياورع؟؟؟
قال ابووي مع امي في اجتماع بالغرفه....
ضحك ابو زوجي الى ان وصل لمرحله القهقه وقال
قل لابوك يكلمني بعد مايخلص الاجتماع مع امك....! !
طبعا بطبيعه الحال ولدي يسالني ليه تجتمعون بالغرفه .....قمت رديت بفهاوه اني ياحبيبي اقنعه يودينا لخوالك!!!
واذا صار مروق ولحالنا يقتنع يوديني السوق او اي مكان ابيه ....؟؟
ومن عقبها صار ولدي في كل مره يرفض ابوه طلباته يقولي روحي معاه الغرفه وهو يقتنع تخيلوا قدام جده وجدته يقول ترا ابوي مابيودينا البحر الا اذا كلمته امي بالغرفه وانا وجهي قدامهم يصير علبه الوان .....!!
السالفه عيت تخش مزاج اخته لاني تفاجات مره انها تصيح من تحت الباب .....!!
يبه ولع النور ترا امي تخاف من الظلام ....؟؟؟
طبعا اكيد انها تصير لكم وابي خبراتكم كيف تتلافون هالمواقف وماهي الطريقه السليمه لاقناعهم بالسكوت لحين انتهاء المؤتمر الصحفي ....
اختي تسولف لي قصص مشابهه واحس اني باقي دقيقه وانفجر من هالبزارين تخيلي انك مع زوجك ويقطع لحظات الرومنسيه اتصال من امك ويرد عليها ولدك وهي عالسبيكر تسمعه يطق الباب
وماتردون وزوجك مايدري ان امك عالخط وانواع الشتايم من وراء الباب وش موقفك وامك تسمع زوجك يهاوش ....والله اختي تقول ماعاد قدرت احط عيني بعين امي من الاحراج ........!!!
قبل اختم ابي اسال الى اي مدى هالشي له تاثير بعلاقتكم لاني اكتشفت ان زوجي جته حاله ومدري العيب فيني او في البزارين ؟؟؟
مشرفاتي الغاليات ....الموضوع حلالكم ودكم تثبتونه بدون اذني ماعندي مانع